ཁམས་དཀར་མཛེས་སུ་ཞི་རྒོལ་དང་བཙོན་འཇུག
སེར་བྱེས་ཏྲེ་གྲྭ་དཀར་མཛེས་པདྨ་ཚེ་དབང་གིས་གནས་ཚུལ་མཁོ་སྤྲོད་གནང་བ་ལྟར་ན། དཀར་མཛེས་དགོན་དུ་སློབ་སྦྱོང་བྱེད་བཞིན་ཡོད་པ་རྩིས་ཚང་དགོན་གྱི་གྲྭ་མགོ་དབྱངས་ཀྱིས་དཀར་མཛེས་རྫོང་གི་ཁྲོམ་གཞུང་དུ་༧གོང་ས་མཆོག་སྐུ་ཚེ་ཁྲི་ལོ་བརྟན་པར་ཤོག བོད་ལ་རང་དབང་དགོས། སྐུ་ཞབས་སྤང་རི་སྣ་རིན་པོ་ཆེ་མཆོག་གིས་དབུས་ཆབ་སྲིད་བཙོན་པ་རྣམས་གློད་གྲོལ་གཏོང་དགོས། ཞེས་སོགས་ཀྱི་འབོད་ཚིག་སྒྲོག་བཞིན་ཞི་བའི་ངོ་རྒོལ་སྐད་འབོད་བྱས་པར་བརྟེན་དྲག་ཆས་ཉེན་རྟོག་པ་དང་། དམག་མིས་ཉེས་རྡུང་གཏོང་བཞིན་འཛིན་བཟུང་བཙོན་འཇུག་བྱས་ཡོད་འདུག གྲྭ་མགོ་དབྱངས་ནི། སྐྱེས་ཡུལ་ཟི་ཁྲོན་ཞིང་ཆེན་ཟེར་བའི་དཀར་མཛེས་རྫོང་། ལྷོ་པ་ཤང་། རྩག་ལེགས་གྲོང་ཚོ་རུ་ཕ་ཐུབ་བསྟན་དང་། མ་ཚེ་རྒྱན་སྒྲོལ་མ་གཉིས་ཀྱི་བུ་རུ་སྐྱེས་ཤིང་ད་སྐབས་རང་ལོ་༣༠ ཙམ་ཡིན་པ་རེད། ཁོང་གི་ནང་མི་ཕ་མ་གཅིག་པའི་སྤུན་མཆེད་རང་ལོ་༢༣ ཡིན་པ་གྲྭ་བློ་དབྱངས་ཀྱིས་ཕྱི་ལོ་༢༠༠༨ ལོའི་ཟླ་༥ པའི་ཚེས་༢༠ ཉིན་དཀར་མཛེས་རྫོང་ཐོག་ཏུ་ཞི་རྒོལ་བྱས་རྐྱེན་གྱིས་འཛིན་བཟུང་བྱས་ནས། ཟླ་ཤས་རྗེས་དུས་བཀག་བཙོན་འཇུག་ལོ་༣ གྱིས་ཁྲིམས་ཐག་བཅད་དེ་རྒྱ་ནག་ཁྲིན་ཏུའུ་ཕྱོགས་ཀྱི་བཙོན་ཁང་ཞིག་གི་ནང་དུ་བཙོན་འཇུག་བྱས་ནས་ཉེ་ཆར་བཙོན་གྲོལ་ཐོབ་པ་ཡོད་པ་རེད།
ཡང་ཉིན་ཕྱི་ཟླ་༦ ཚེས་༡༠ ཉིན་དེ་རང་ལ་བོད་ནང་གི་དགོང་མོ་ཆུ་ཚོད་༥ པ་ཙམ་གྱི་ཐོག་དཀར་མཛེས་རྫོང་ལམ་བྲག་བཙུན་དགོན་གྱི་བཙུན་མ་གཉིས་ཀྱིས་དཀར་མཛེས་རྫོང་ཐོག་ཏུ་ཞི་རྒོལ་སྐད་འབོད་བྱས་པར་བརྟེན། དྲག་ཆས་ཉེན་རྟོག་པ་དང་། དམག་མིས་ཉེས་རྡུང་ཚད་མེད་གཏོང་བཞིན་འཛིན་བཟུང་བཙོན་འཇུག་བྱས་ཡོད་པ་མ་ཟད། རྒྱ་གཞུང་གིས་ཁམས་དཀར་མཛེས་རྫོང་ཁོངས་སུ་ཡུལ་དགོན་གཉིས་ལ་དམ་དྲག་ཤུགས་ཆེན་བྱེད་བཞིན་ཡོད་ཚུལ་ཐོན་ཡོད་པ་རེད།།
