གནམ་ཡིག།
འཁོར་བའི་འཁོར་ལོ་འཁོར་སྟངས་རྩུབ་མོ་འདིས།།
བྱེ་ཐང་ལམ་ཁ་སྐྱ་མོ་འཐེན་ལུགས་འདིས།།
ཨ་ཁུའི་སེམས་པ་གཏིང་ནས་རྨས་བྱས་ནས།།
དེ་རིང་ན་ཟུག་གཅིག་གི་མགོ་རྔ་གླེང་།།
སྤྲིན་པ་བསིལ་རླུང་འཇམ་པོས་འབུད་ཀྱིན་པས།།
རྩྭ་ཐང་དཔྱིད་ཀའི་བུ་མོས་གསོ་ཀྱིན་པས།།
ཕ་རྒན་སྙིང་ལ་དགའ་བའི་དཔལ་སྟེར་པས།།
ནམ་ཡང་བདེ་སྣང་ཞིག་གི་སྐེད་པ་གླེང་།།
ཐབ་ཀ་འགྲམ་གྱི་བྱིས་པ་གཅེར་བུ་རྣམས།།
ཨ་ཕས་བཤད་དུས་ཨ་ཕའི་རྗེས་སུ་བཞུགས།།
ཨ་ཁུས་བཤད་དུས་ཨ་ཁུའི་རྔ་མར་བྱས།།
གླེང་རེས་ཆད་དུས་མགོ་བོ་སྔས་མགོར་བབ།།
ཕ་ཁུའི་བསམ་པ་གཉིས་སུ་གྱེས་པ་ཡིས།།
ཕ་ཁུའི་སྐད་ཆ་གཉིས་སུ་གྱེས་པ་ཡིས།།
སྦྲ་ནག་གྲུ་བཞི་ནང་གི་དྲོད་འཁོལ་དེ།།
ཕྱི་རོལ་གྲང་མོའི་རླུང་གིས་འཁུར་ལ་ཁད།།
ཕོ་རོག་ཁ་ཏ་ནག་པོ་ངར་ལུགས་དང་།།
བྱ་ཆེན་ཐང་དཀར་རྒོད་པོ་འཕུར་ལུགས་ཀྱིས།།
རི་མགོའི་མིག་ནང་ལེགས་ཉེས་དབྱེ་འབྱེད་ཀྱིས།།
སྦྲ་ནག་ནང་གི་གཏམ་རེ་བློ་ལ་བཟུང་།།
ཁ་ནས་ཐོན་པའི་གཏམ་གྱི་སྣེ་མོ་ན།།
སྣ་ནས་ཐོན་པའི་དྲི་ཡི་སྣེ་མོ་ན།།
སོ་སོར་ཁུག་པའི་གོང་ཐང་རེ་རེ་ལ།།
མཇུག་སྒྲོ་བཏགས་ནས་ཕ་ཁུའི་གཏམ་རྒྱུད་གླེང་།།
གཏམ་རྒྱུད་གླེང་ཐེངས་རེ་ལ་འཁྲུག་ཆ་རེ།།
ཧར་རྒོད་བྱ་ཐེངས་རེ་ལ་ལྷག་རླུང་རེ།།
ནམ་ཡང་དུམ་ཐབས་བྲལ་བའི་མེ་ཕུང་ན།།
ཕ་དང་ཨ་ཁུ་གཉིས་ཀྱི་རྐང་རྗེས་གསལ།།
ཉོབ་ཀྱིན་ཉོབ་ཀྱིན་ཟེར་བའི་སྐད་གྲགས་ནང་།།
སད་སོང་སད་སོང་ཟེར་བའི་སྐད་གྲགས་ནང་།།
རིན་ཐང་སྣ་ཚོགས་ཅན་གྱི་བྱ་བྱེའུ་རྣམས།།
ཕ་ཁུའི་སྐད་ཆ་གླེང་འཕྲོ་འཕྲོག་རེས་བྱས།།
ཧོབ་འཐབ་ཆེ་བའི་ཐལ་རླུང་འཚུབ་པོ་ནང་།།
ཧམ་པ་ཆེ་བའི་འཁྲུག་ཆེན་དཔུང་འཛིན་ནང་།།
ཤ་དང་རུས་པ་སྟེང་གི་གླུ་དབྱངས་ཀྱིས།།
ཨ་ཁུའི་མགོ་འཕང་ནམ་མཁའི་ངོས་སུ་བཏེགས།།
ཨ་ཁུའི་མགོ་འཕང་སྤྲིན་ངོས་དཔྱངས་པ་ན།།
གློ་བུར་སྤྲིན་ནག་ཆུན་པོས་གནམ་བཟུང་ནས།།
གློག་དང་གློག་དམར་འཁྱུག་པའི་བར་གསེང་ནས།།
གནམ་ཡིག་ཤོག་དྲིལ་གློ་བུར་ཐང་སྟེང་ཟག།
ཤིག་དྲིལ་རང་བཞིན་བྱེས་ནས་རང་བཞིན་ཀློག།
ཀློག་མདངས་གསལ་བའི་སྐད་ཀྱི་བར་གསེང་ན།།
ཨ་ཁུའི་མགོ་བོ་སྨད་པའི་གནས་འཕྲིན་མངོན།།
ཨ་ཁུའི་མགོ་གཅོད་པའི་སྐད་ངན་འཆོར།།
དེ་མ་ཐག་ནས་ཡོང་པའི་ལས་མཁན་ཚོས།།
དེ་མ་ཐག་ནས་ཡོང་པའི་ཧུར་བརྩོན་ཚོས།།
རིན་ཐང་སྟོང་དང་ལྡན་པའི་ཨ་ཁུའི་མགོ།
ད་ནས་ས་ལ་བརྡབ་པའི་ལེ་འུ་འཁྲབ།།
ད་ནས་མགོ་བོ་མེད་པའི་ཨ་ཁུའི་མགོ།།
ད་ནས་སྐད་ངག་མེད་པའི་ཨ་ཁུ་ལུས།།
འཇིག་རྟེན་འདི་ནས་གསོན་པའི་ཡུལ་མེད་པས།།
ཇི་ལྟར་འཐེན་ཡང་དོན་དངོས་གླུ་དབྱངས་མིན།།
གནམ་ཡིག་དེ་ཡིས་རེ་བ་ཡོད་ཚད་གཏོར།།
གནམ་ཡིག་དེ་ཡིས་ལང་ཚོ་ཡོད་ཚད་བཅོམ།།
ད་ནས་ཅི་ཡང་མེད་པའི་ས་སྟོང་འདིེ།།
ཨ་ཁུའི་མགོ་བོ་འབོད་ནས་སྟོང་རྒྱུག་བྱས།།