གངས་ཏི་སེ་བོན་གཞུང་རིག་མཛོད་འགྲེམས་སྤེལ།
བོད་ལྗོངས་ཆ་འཕྲིན་དྲ་བས་གནས་ཚུལ་སྤེལ་བ་ལྟར་ན། 《གངས་ཏི་སེ་བོན་གཞུང་རིག་མཛོད་》 དཔེ་ཚོགས་ནི་བོད་ཀྱི་རིག་གནས་བསྟན་བཅོས་གལ་ཆེན་ཞིག་ཡིན་ལ། རིན་ཐང་ཆེ་བའི་བོན་ཆོས་བྲིས་མ་དང་ཤིང་བརྐོས་པར་མ་གང་མང་ཕྱོགས་བསྡུས་བྱས་པ་ཞིག་ཀྱང་ཡིན་འདུག དེར་བོད་མི་རིགས་ཀྱི་བསམ་བློ་དང་ལོ་རྒྱུས། ཆོས་ལུགས། གནམ་དཔྱད། སྐར་རྩིས། ས་ཁམས། སྨན་དང་སྨན་བཅོས། རྩོམ་རིག སྒྱུ་རྩལ་སོགས་ཀྱི་ནང་དོན་འདུས་ཤིང་རིག་གནས་ཀྱི་རིན་ཐང་དང་རིག་གཞུང་གི་རིན་ཐང་གཞལ་དུ་མེད་པ་ཡོད་པ་རེད། དཔེ་ཚོགས་དེ་ནི་ཀྲུང་དབྱང་མི་རིགས་སློབ་གྲྭ་ཆེན་མོའི་སློབ་དཔོན་ཆེན་མོ་དང་བོད་རིག་པའི་མཁས་ཆེན་ཚེ་རིང་ཐར་ལགས་ཀྱིས་གཙོ་སྒྲིག་གནང་ཞིང་མི་རིགས་དཔེ་སྐྲུན་ཁང་གིས་པར་ཏུ་བསྐྲུན་པ་རེད།
བོན་ཆོས་ནི་མཚོ་བོད་མཐོ་སྒང་རང་ས་ནས་བརྡོལ་བའི་སྲོལ་རྒྱུན་རིག་གནས་ཡིན་པ་མ་ཟད་བོད་པའི་རིག་གནས་ཀྱི་འབྱུང་ཁུངས་ཀྱང་ཡིན་ཞིང་། དེའི་སྔ་དུས་ཀྱི་དད་པ་བྱེད་སྟངས་དང་ཆོ་ག་ཕྱག་ལེན་སོགས་ཀྱིས་བོད་མི་རིགས་ཀྱིས་འཇིག་རྟེན་ཁམས་ཀྱི་འབྱུང་ཁུངས་ངོས་འཛིན་ཚུལ་དང་། ཉི་ཟླ་གཟའ་སྐར་གྱི་རྒྱུ་ལུགས། རང་བྱུང་ཁམས་ཆེན་མོའི་ཆགས་སྟངས། ཚེ་སྲོག་གི་བྱུང་བ། མིའི་རིགས་ཀྱི་སྐྱེ་འཕེལ། རང་བྱུང་ཁམས་དང་བྱ་དངོས་གཞན་བར་གྱི་འབྲེལ་བ་སོགས་མཚོན་ཡོད། དཔེ་ཚོགས་གཙོ་སྒྲིག་ཚན་ཆུང་གི་དགོངས་ཚུལ་ལྟར་ན། བོན་ཆོས་ཀྱི་མི་ཚུལ་གཟིགས་སྐྱོང་སོགས་མིའི་རིགས་ཀྱི་གནའ་བོའི་ཤེས་རིག་གི་གླེང་གཞི་གལ་ཆེན་རྣམས་ནི་བོད་མི་རིགས་ཀྱི་གནའ་རབས་རིག་གནས་ཀྱི་འབྱུང་ཁུངས་དང་ཡོད་ཚད་ཡིན་ལ། བོན་ཆོས་ཤེས་རིག་གིས་བོད་མི་རིགས་ཀྱི་སེམས་རྒྱུད་དང་རིག་གནས་སེམས་ཁམས། བྱ་བ་སྤྱོད་པ་སོགས་ལ་ཤུགས་རྐྱེན་གཏིང་ཟབ་མོ་བཞག་ཡོད་ལ། དཔེ་གཞུང་དུ་བོད་མི་རིགས་དང་མཐའ་མཚམས་མི་རིགས་ཁག་བར་གྱི་ཆབ་སྲིད་དང་ཆོས་ལུགས། རིག་གནས། དཔལ་འབྱོར་སོགས་ཀྱི་ཕྱོགས་ནས་ལོ་རྒྱུས་ཀྱི་འགྲོ་འོང་དང་སྲོལ་རྒྱུན་གྱི་མཛའ་བརྩེའི་འབྲེལ་བ་ཡོད་པའང་མཚོན་ཡོད་ཅེས་གནས་ཚུལ་སྤེལ་འདུག །
