དཀར་མཛེས་ཀྱི་བོད་དོན་ལས་འགུལ་བ་༢༠ ཙམ་འཛིན་བཟུང་།
རྒྱ་གར་ནང་གི་སེར་བྱེས་གྲྭ་པདྨ་ཚེ་དབང་ནས་ལས་འགུལ་བ་འཛིན་བཟུང་བྱས་པ་གསར་དུ་ཤེས་རྟོགས་བྱུང་བ་ཁག་ཅིག་གི་གནས་ཚུལ་བཏང་བའི་ནང་འཁོད་དོན། ཟླ་འདིའི་ཚེས་༡༡ ཉིན་བོད་ནང་དགོང་མོ་ཆུ་ཚོད་ ༤ པ་ཙམ་ཞིག་ལ། དཀར་མཛེས་རྫོང་། ཁང་དམར་དགོན་གྱི་གྲྭ་པ་སངས་རིན་ཆེན་གྱིས་ཁམས་དཀར་མཛེས་རྫོང་གི་ཁྲོམ་གཞུང་དུ་༧རྒྱལ་བ་རིན་པོ་ཆེ་ཁྲི་ལོ་བརྟན་པར་ཤོག བོད་ལ་རང་དབང་དགོས་ཟེར་བ་སོགས་སྐད་འབོད་བརྒྱབ་ཡོད་ཀྱང་། དུས་ཡུན་ཐུང་ངུ་ལས་མ་འགོར་བར་རྒྱ་གཞུང་གི་ཉེན་རྟོག་པ་འབྱོར་ཏེ་ཁོང་ཉེས་རྡུང་ཚད་མེད་གཏོང་བཞིན་རླངས་འཁོར་ནང་བཅུག་སྟེ་བཙན་ཁྲིད་བྱས་ཡོད་འདུག
ཚེས་ ༡༢ ཉིན་བོད་ནང་དགོང་མོ་ཆུ་ཚོད་བཞི་དང་ཕྱེད་ཙམ་ལ། ལྷ་སྐྱིད་ཚང་བུ་མོ་བསྟན་འཛིན་ལྷ་མཚོ་ལགས་ཀྱིས་དཀར་མཛེས་རྫོང་ཐོག་ཏུ་ ༧རྒྱལ་བ་རིན་པོ་ཆེ་ཁྲི་ལོ་བརྟན་པར་ཤོག ང་ཚོ་ལ་རང་དབང་དགོས། ༧རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས། བོད་ནང་འགྲོ་བ་མིའི་ཐོབ་ཐང་སྤྲོད་དགོས། ཞེས་པ་སོགས་ཀྱི་འབོད་ཚིག་སྒྲོག་བཞིན་ཞི་རྒོལ་བྱས་པར་བརྟེན། དྲག་ཆས་ཉེན་རྟོག་པ་དང་། དམག་མིས་ཉེས་རྡུང་ཚད་མེད་གཏོང་བཞིན་འཛིན་བཟུང་བཙོན་འཇུག་བྱས་ཡོད་པ་དང་། བསྟན་འཛིན་ལྷ་མཚོ་ནི། སྐྱེས་ཡུལ་ཟི་ཁྲོན་ཞིང་ཆེན་དཀར་མཛེས་རྫོང་། ཐིང་ཁ་ཤང་། ལྷ་སྐྱིད་གྲོང་། ༼ཁྱིམ་མིང་ལྷ་སྐྱིད་ཚང་༽ ཕ་རྡོ་རྗེ་བདུད་འདུལ་དང་། མ་དབང་མོ་གཉིས་སུ་ཕྱི་ལོ་ ༡༩༨༤ ལོར་སྐྱེས་ཤིང་། ད་ལྟར་རང་ལོ་ ༢༧ ཡིན་འདུག་
ཚེས་༡༣ཉིན་དཀར་མཛེས་རྫོང་ཁོངས། དགེ་མ་བྲག་དགོན་གྱི་བཙུན་མ། རྣམ་རྒྱལ་ལྷ་མོ་དང་། བཀྲ་ཤིས་ཆོས་སྒྲོན་གཉིས་ཀྱིས་དཀར་མཛེས་རྫོང་ཐོག་ཏུ་ཞི་རྒོལ་བྱས་པར་བརྟེན། དྲག་ཆས་ཉེན་རྟོག་པའི་ཉེས་རྡུང་ཚད་མེད་གཏོང་བཞིན་འཛིན་བཟུང་བཙོན་འཇུག་བྱས་ཡོད་འདུག
ཚེས་༡༥ ཉིན་དཀར་མཛེས་རྫོང་ཁོངས། དགེ་མ་བྲག་དགོན་གྱི་བཙུན་མ། བྱམས་པ་ཆོས་སྒྲོན་དང་། ཞེ་ལྷ་མོ། དབྱངས་ཅན་གསུམ་གྱིས་དཀར་མཛེས་རྫོང་གི་ཁྲོམ་གཞུང་དུ། ༧གོང་ས་མཆོག་སྐུ་ཚེ་ཁྲི་ལོ་བརྟན་པ་ཤོག བོད་ལ་རང་དབང་དགོས། ༧རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས། ཞེས་སོགས་ཀྱི་འབོད་ཚིག་སྒྲོག་བཞིན་ཞི་བའི་ངོ་རྒོལ་བྱས་པར་བརྟེན། དྲག་ཆས་ཉེན་རྟོག་པ་དང་། དམག་མིས་ཉེས་རྡུང་གཏོང་བཞིན་འཛིན་བཟུང་བཙོན་འཇུག་བྱས་འདུག
མདོར་ན་བོད་ཀྱི་ས་ཕྱོགས་གང་སར་བོད་མི་ཚོས་ཞི་བའི་རྔམ་སྟོན་ཁྲོམ་སྐོར་གནང་བཞིན་པ་རྣམས་ལ་རྒྱ་ནག་གཞུང་ཕྱོགས་ནས་སུན་གཙེར་ཧ་ཅང་ཆེན་པོ་བཟོ་བཞིན་པ་མ་ཟད། མང་དག་ཅིག་འཛིན་བཟུང་བཙོན་འཇུག་བྱས་ཏེ་མནར་གཅོད་ཚ་ནན་གཏོང་བཞིན་པ་སོགས་ཛ་དྲག་གི་གནས་སུ་ལྷུངས་ཡོད་པ། དཔེར་ན་། ཁམས་དཀར་མཛེས་རྫོང་གཅིག་པུ་ནས་འདི་ལོ་ཕྱི་ཟླ་ ༦ པའི་ཚེས་ ༦ ནས་ད་བར་ཉིན་བཅུ་ཙམ་གྱི་རིང་འཛིན་བཟུང་བཙོན་འཇུག་བྱས་པ་འདི་ནས་ཤེས་གསལ་བྱུང་བ་མི་གྲངས་ ༢༠ ལྷག་དང་། ད་དུང་དཀར་མཛེས་སྤྱི་བདེ་ལས་ཁུངས་ནས་དཀར་མཛེས་སུ་ཡོད་པའི་དགོན་པ་ཁག་ལ་གྲྭ་བཙུན་སུ་ཡིན་ཡང་གྲོང་ཁྱེར་ནང་། གང་བྱུང་མང་བྱུང་འགྲོ་མི་ཆོག་པ་དང་། གལ་སྲིད་ན་ཚ་འདྲ་ཕོག་ནས་འགྲོ་དགོས་བྱུང་བ་ཡིན་ཚེ་ས་གནས་དང་ཤང་གི་འགོ་ཁྲིད་བརྒྱུད་ཡི་གེ་བླངས་ཏེ་ཁག་ཐེག་ཁུར་མཁན་ལས་བྱེད་མི་སྣ་གཅིག་མཉམ་དུ་མ་ཡོང་ན་འཛིན་བཟུང་བྱ་རྒྱུ་ཡིན་སྐོར་བཤད་བཞིན་ཡོད་འདུག།།
