ཚོགས་ལ་ཡོང་མཁན་གྱི་གྲྭ་པ་མི་འདུག་ཅེས་བརྗོད་འདུག

དྷ་ས་ཀིརྟིའི་བྱེས་པ་གྲྭ་ཚང་གི་གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་ཟླ་འདིའི་ཚེས་ ༡༦ ཉིན་བོད་ཨ་མདོ་རྔ་པ་ནས་འབྱོར་བའི་གནས་ཚུལ་ཁག་ཅིག་བཏང་བའི་ནང་འཁོད་དོན། རྔ་པ་ཀིརྟི་དགོན་པའི་ནུབ་ཕྱོགས་ཀྱི་གླིང་གི་ཕྱི་རོལ་ཏུ་ཡོད་པའི་སྲུང་མ་ཁང་ལ་ཉིན་བཅོ་ལྔ་རེའི་མཚམས་སུ་ལྷ་ཚེས་ཤིག་འཚོགས་རྒྱུ་ཡོད་པ་དེ་ཕྱི་ཚེས་ ༡༥ ཉིན་ལ་ཁེལ་ཡོད་ཅིང་། ཉིན་ཤས་གོང་གློ་བུར་དུ་ཚེས་ ༡༥ ཉིན་ལྷ་ཚེས་འཚོག་དགོས་ལུགས་བརྗོད་ཡོད་པ་མ་ཟད། མི་མང་ལ་ཡང་ལྷ་ཚེས་འཚོགས་རྒྱུ་ཡིན་པས་མཇལ་དུ་ཡོང་ན་ཆོག་ཚུལ་གྱི་གནས་ཚུལ་གློ་བུར་བ་ཞིག་དངོས་ཤུགས་བརྒྱུད་གསུམ་ནས་སྤེལ་བཅུག་ནས། ཉིན་དེར་མི་མང་ཧ་ཅང་མང་པོ་འདུ་འཛོམས་བྱེད་བཅུག་ཡོད་མོད། ཉིན་དེའི་ཞོགས་ཀ་སྔ་བོ་ནས་སྲུང་མ་ཁང་དུ་ཕེབས་ལམ་ཚང་མར་གློག་བརྙན་ལེན་བྱེད་ཀྱི་དཔར་ཆས་དང་སྤྱི་བཏང་གི་དཔར་ཆས་མང་པོ་བཀར་ནས་གྲྭ་པ་རྣམས་ཕེབས་སྒུག་བྱས་ཡོད་ནའང་། དགུང་ལོ་ ༦༠ ། ༧༠ ཡིན་པའི་གྲྭ་པ་རྒན་པ་བཞི་བཅུ་ཙམ་ལས་ལྷ་ཚེས་སུ་ཕེབས་མེད་འདུག་ལ། རྒྱ་གཞུང་གི་ལས་བྱེད་པ་སྐོར་ཞིག་གིས་གྲྭ་ཤག་མང་པོར་སོང་ནས་ལྷ་ཚེས་ལ་འགྲོ་དགོས་ལུགས་བརྗོད་ཡོད་ཀྱང། གྲྭ་པ་རྣམས་ཀྱིས་དེ་རིང་ཚོགས་འཚོགས་བཅུག་པ་དེ་རྒྱ་གཞུང་གིས་དྲིལ་བསྒྲགས་རྫུན་མའི་རྒྱབ་རྟེན་དུ་ཁྲབ་སྟོན་བྱས་པ་དང་འདྲ་བས། རྩ་བ་ནས་འགྲོ་མི་ཐུབ་ཚུལ་བརྗོད་དེ་ཕེབས་མེད་འདུག སྲུང་མ་ཁང་གི་ནང་དང་གཡས་གཡོན་དུ་དམག་ཆས་མ་གྱོན་པའི་དམག་མི་བརྒྱ་ཕྲག་ཙམ་བཀྲམ་ནས། མི་མང་གིས་བསང་གཏོང་བ་གློག་བརྙན་དུ་ཕབ་ཅིང་དཔར་བླངས་ཡོད་འདུག་ལ། མི་རེ་ཟུང་ལ་སྐད་ཆ་ཡང་དྲིས་འདུག་མོད། གྲྭ་པ་ཉུང་ཉུང་ཞིག་ལས་མ་ཕེབས་སྟབས་མི་མང་པོ་ཞིག་གིས་གསུམ་པའི་བཅུ་དྲུག་ནས་ད་བར་ཟླ་གསུམ་ཙམ་གྱི་རིང་གྲྭ་པ་རྣམས་ལྷན་ཚོགས་གནང་བ་མཇལ་རྒྱུ་མ་བྱུང་ཚུལ་གླེང་ཞིང་མིག་མཐའ་མཆི་མས་བཀང་སྟེ་ཕྱིར་རང་རང་གི་ནང་དུ་ལོགས་ཡོད་འདུག།

ཡང་ཉིན་ཤས་གོང་ནས་དགོན་པའི་གླིང་གི་ཕྱི་རོལ་ཏུ་ཡོད་པའི་དམག་མི་རྣམས་སྡོད་སའི་གུར་ཕལ་ཆེ་བ་ཕབ་ཡོད་པར་མ་ཟད། ཤུལ་གཙང་མ་བཟོས་འདུག་པས། དགོན་པའི་ཕྱི་ནང་གི་བོད་མི་རྣམས་ཀྱི་མི་ཤེས་ས་ནས་ཕྱི་ལོགས་ཀྱི་གསར་འགོད་པའམ། ཡང་ན་རྟོག་ཞིབ་ཚོགས་ཆུང་རེ་ཡོང་གི་ཡོད་པ་ཡིན་ནམ་སྙམ་ནས་མི་མང་གིས་གླེང་སློང་ཆེན་པོ་བྱེད་ཀྱི་ཡོད་འདུག དམག་མི་རྣམས་སྔར་བཞིན་ཡོད་ཀྱང་ལམ་སེང་གང་ཞིག་ཏུ་ཡིབ་ཆོག་ཆོག་ལྟ་བུའི་ངང་ཡོད་པས། མི་མང་གིས་གལ་སྲིད་དེ་འདྲ་ཞིག་ཡོང་ན་རྒྱ་གཞུང་གི་མགོ་སྐོར་འོག་ཚུད་རྒྱུའི་གཉེན་ཁ་ཡོད་ཚུལ་གླེང་གི་ཡོད་འདུག།

ཕྱི་ཟླ་ ༦ ཚེས་ ༡༢ ཉིན་སྟེ་གཟའ་ཉི་མའི་ཉིན་ནས་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བ་སྤེལ་སྐབས་ཀྱི་ཚོགས་ཆུང་རེ་ནས་གྲྭ་པ་གཉིས་རེ་དགོན་པའི་ཕྱི་རོལ་ཀྱི་ཁྲོམ་སོགས་ལ་མངགས་ཡོད་ཀྱང་གཟའ་ཟླ་བ་ནས་སྔར་བཞིན་དགོན་པའི་ནང་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བའི་ལས་འགུལ་མུ་མཐུད་སྤེལ་བཞིན་ཡོད་འདུག

{jcomments on}