སྲིང་ཆུང་མ།
སྲིང་ཆུང་མ།
ཁྱོད་ཀྱི་ལས་དབང་དེ་ཞན་སོང་།
ཁྱོད་ཀྱི་སྤྱང་གྲུང་གོས་ཧྲུལ་བཞིན་རི་སྐད་དུ་རུལ་སོང་ལ།
ཁྱོད་ཀྱི་ལང་འཚོའི་མེ་ཏོག་སྦྲ་འོག་ཏུ་སད་སོང་།
ད་དུང་ཁྱོད་ཀྱིས་སློབ་ཆུང་སྐབས་སྦྱོང་ཟིན་པའི་ཀ་ཁ།
ད་ལྟ་ཕ་ཆེར་མཐོང་ཐོས་མེད་པའི་དངོས་རྫས་ཞིག་ལྟར་གྱུར་ཟིན་ངེས།
སྲིང་ཆུང་མ།
ངས་ཉིན་རེ་བཞིན་ཁྱེད་ཀྱི་ལས་དབང་དེ་བསམ་ཞོར།
ང་ལ་བརྗོད་མི་ཤེས་པའི་ཚོར་སྣང་དུ་མ་སླེབས་མྱོང་ལ།
བཞུད་མི་ཚར་བའི་མིག་ཆུའི་འཕྲེང་ཐག་འཐེན་པ་ཡང་ཉུང་ཉུང་མིན།
འོན་ཀྱང་། དེ་ནི་ལས་དབང་ཟེར་བ་དེ་ཡིན་ཤས་ཆེ་ལ།
དེ་ནི་ལས་དབང་ལས་གཞན་ཞིག་ལ་འགྲེལ་ཐབས་བྲལ།
ལས་དབང་དང་རྒྱུ་འབྲས་་་་་་
རྟེན་འབྲེལ་དང་རྣམ་སྨིན་སོགས་ལ་ཇི་ལྟར་འགྲེལ་ཡང་ཐུག་ས་ནི་ཁྱེད་ཀྱི་འཚོ་བ།
ཁྱེད་ཀྱི་དཀའ་སྡུག་་་་་་་་ན་མ་ཟིན་སྔོན་ལ་རྒས་ཟིན་པའི་ཁྱེད་ཀྱི་ལང་འཚོ།
མ་བཏབ་སྔོན་དུ་སད་ཟིན་པའི་ཁྱོད་ཀྱི་ཐམས་ཅད་མ་ཡིན་ནམ།
གང་ལྟར་ཡང་་་་་་་
སྲིང་ཆུང་མ།
ཁྱོད་ཀྱི་སྤྱོད་བཞིན་པའི་འཚོ་བ་དེ་ངའི་དྲན་འཛིན་དུ་འཁོར་ཚེ།
ངའི་སློབ་སྦྱོང་ལ་ཤུགས་སྣོན་དགོས་པའི་སྐུལ་མ་ཞིག་ཏུ་གྱུར་ལ།
ངས་ང་གཉིས་སློབ་ཆུང་དུས་ཀྱི་འདས་དོན་ལ་བསམ་ཚེ།
དེ་ཡང་ཁྱེད་ཀྱིས་ཆེས་སྐུལ་མ་ནན་ཤོས་ཤིག་ཏུ་གྱུར།
དེར་བརྟེན་སྲིང་ཆུང་མ་་་་་་་
ཁྱོད་ཀྱི་ལས་དབང་དེ་ཞན་སོང་མོད་་་་་འོན་ཀྱང་།
ད་དུང་ཁྱོད་ལ་བློ་གཏད་བྱ་སའི་ཕ་མ་ཡོད་ལ།
སྐྱོ་སྡུག་བཤད་སའི་ནུ་བོ་ཞིག་ཀྱང་ཡོད་སྟབས།
རང་སེམས་རང་གིས་སོས་དང་།
སྐྱེ་བ་ཚང་མར་སློབ་སྦྱོང་གི་གོ་སྐབས་ཐོབ་མི་སྲིད་ལ།
ཐོབ་པ་ཚང་མ་མཁས་དབང་དུ་ནམ་ཡང་གྱུར་མི་སྲིད་པས།
ཁྱེད་རང་ཆེས་ཉམས་དམའ་ཤོས་དང་ཐབས་སྐྱོ་ཤོས་ཤིག་མ་ཡིན།
སྲིང་ཆུང་མ་་་་་་་
་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་ཕྱི་ལོ་ 2008 ལོར།