སེམས་ཁོང་གི་ཁུག་རྟ།

 

བྱ་ཁུ་བྱུག་རང་བྱུང་ཕོ་ཉ་རེད།།

ནགས་ཚ་ཚིང་གསེང་ནས་མཇལ་ཁ་ཞུ།།

གྲོགས་གཞིར་གཞུགས་བོད་རིགས་སྤུན་ཟླ་ཚོར།།

རྗེ་བླ་མའི་སྐུ་ཚེ་བརྟན་རབས་ཤོད།།

སྦྲང་ཆར་བ་གྲོགས་ཀྱི་ཕོ་ཉ་རེད།།

དཔྱིད་ཚ་བའི་དུས་དེར་ཐུག་འཕྲད་བྱ།།

གནས་རང་ཡུལ་འཚོ་སྡོད་སྤུན་ཟླ་ཚོར།།

ངེད་སྐྱབས་བཅོལ་བོད་མིའི་སྨོན་ཚིག་ཤོད།།

དགུང་ཉི་ཟླ་ཨ་མའི་ཕོ་ཉ་རེད།།

ཤར་བྲག་རིའི་རྩེ་ནས་ཕེབས་བསུ་ཞུ།།

ང་མི་ཡུལ་ས་མཐའ་འགྲིམས་པའི་ཚེ།།

ལས་བསམ་དོན་འགྲུབ་པར་སྨོན་རོགས་ཞུས།།

བྱ་རྒོད་པོ་ཨ་ཕའི་ཕོ་ཉ་རེད།།

ཤར་རྡོ་རྗེ་བྲག་ཏུ་མཇལ་བར་ཡོང་།།

ང་མི་ཡུལ་འཁྱམ་པའི་ལོ་འགའི་ནང་།།

ཁོང་སྐུ་ཚེ་བརྟན་པའི་སྨོན་འདུན་ཁྱེར།།

ཉ་གསེར་ཉ་བྱམས་པའི་ཕོ་ཉ་རེད།།

ཆུ་དྭངས་མོའི་འགྲམ་ནས་ཐུག་འཕྲད་ཞུ།།

ཆུང་བྱིས་པ་རང་ཡུལ་གནས་སྡོད་ཚོར།།

དགོས་རིག་གནས་སྦྱང་རྒྱུ་མ་བརྗེད་སྨོས།།

རླུང་བསིལ་མོ་རྩ་ཐང་ཕོ་ཉ་རེད།།

འབྲོག་རྩ་ཐང་ཡངས་པ་ཆེན་པོ་དེར།།

སྤུན་ས་མཐའ་འགྲིམས་པའི་དུས་ཡུན་རིང་།།

སྐུ་བགྲེས་སྔ་མ་བྱེད་བཞུགས་རོགས་ཞུས།།

འབྲི་མཛོ་མོ་ཁ་བའི་རྒྱན་ཆ་རེད།།

འབྲོག་རྩ་ཐང་ཆེན་པོའི་བདག་མོ་ཚོར།།

ངེད་མི་ཡུལ་རྒྱལ་ཁམས་འགྲིམས་ཡུན་རིང་།།

མཇུག་མ་རྫོགས་རིགས་བརྒྱུད་དར་སྤེལ་བྱོས།།