སུ་ཇ་བོད་ཁྱིམ་སློབ་གྲྭའི་མི་གསོད་དོན་རྐྱེན་སྐོར།
སྤྱིར་སློབ་གྲྭའི་སྒྲིག་སྲོལ་ལྟར་ན་ཐ་མག་འཐེན་མཁན་གྱི་སློབ་ཕྲུག་དེས་རྗེས་སུ་མི་འཐེན་པའི་དམ་བཅའི་ཡི་གེ་བྲིས་ཏེ་སྤྱི་ཁྱབ་རྒན་བདག་དང་ཁང་ཚན་རྒན་བདགདེ་བཞིན་ཉལ་ཁང་རྒན་བདག་སོགས་རེ་རེའི་མདུན་ནས་ས་རྟགས་བཟེད་དགོས་འདུག སློབ་ཕྲུག་འདས་པོ་དེས་ཐེངས་དང་པོར་ཐ་མག་འཐེན་པ་རྒན་བདག་གིས་ཤེས་ཏེ་དམ་བཅའི་ཡི་གེ་དང་ས་རྟགས་སོགས་རྒྱག་ཡོད་ཀྱང་། ཐེངས་གཉིས་པར་ཡང་ཉལ་ཁང་གཅིག་པའི་ཁང་ཚན་རྒན་བདག་དེས་དྲི་མ་ལ་བརྟེན་ནས་ཤེས་པར་བརྟེན་ཁོས་ཀྱང་ཁས་ལེན་བྱས་ཡོད་པ་དང་། རྗེས་སུ་མི་འཐེན་པའི་དམ་བཅའི་ཡི་གེའང་བྲིས་ཏེ་ཡི་གེའི་ནང་དུ་ཁོ་པས་ཕ་ཡུལ་ལ་ཡོད་དུས་ནས་ཐ་མག་འཐེན་ཏེ་དུས་ཚོད་ཡུན་རིང་སོང་བས་ད་ལྟ་གློ་བུར་དུ་སྤངས་དགོས་ན་ཧ་ཅང་དཀའ་ངལ་འདུག་སོགས་བྲིས་འདུག འོན་ཀྱང་སྟབས་ལེགས་པ་ཞིག་ལ་ཡི་གེ་དེ་ཁྱེར་ནས་ས་རྟགས་ལེན་པར་མ་སོང་བར་ཞག་ཁ་ཤས་འགོར་འདུག་པས། ཁང་ཚན་རྒན་བདག་དེས་ས་རྟགས་བཟེད་མ་སོང་བའི་རྒྱུ་མཚན་སོགས་དྲིས་ཏེ་ཁོ་གཉིས་བར་ཁ་རྩོད་ཕྲན་ཙམ་ཤོར་ཡོད་པ་དང་། རྒན་བདག་གིས་འགྲམ་ལྕག་ཞུས་འདུག དེ་མ་ཐག་འདས་པོ་དེས་ཀྱང་སློབ་ཕྲུག་གཅིག་གིས་གཅིག་ལ་ལག་པར་བཀྱགས་པར་གཟོད་བསྲན་མ་ཐུབ་པར་བྲང་ལ་འཇུས་ཏེ་ཕྱིར་ལན་བསློག་གྲབས་བྱས་སྐབས། རྒན་བདག་དེ་དང་ཁོའི་རོགས་པ་ཡང་རྒན་བདག་གཉིས་ཀྱིས་གཅིག་གིས་རྒྱབ་ནས་འཇུས་པ་དང་ཁང་ཚན་རྒན་བདག་དེས་ལག་གཡས་པས་ཕོ་བའམ་མཆིན་འོག་ཏུ་ཕར་ཤུགས་ཆེན་པོས་ཁུ་ཚུར་གྱིས་གསུམ་བཞི་ཙམ་བཞུས་མ་ཐག སློབ་མ་འདས་པོ་དེས་དབུགས་འཐེན་ཙམ་འཐེན་ཙམ་བྱས་ཏེ་སར་འགྱེལ་འདུག དེ་མ་ཐག་ཉལ་ཁང་ནང་གི་སློབ་གྲོགས་ཚོས་དབུགས་ཕྱིར་ལེན་ཐུབ་པའི་ཐབས་ཤེས་འདྲ་མིན་བྱས་ཀྱང་མ་ཐུབ་པའི་མཐར་སློབ་གྲྭའི་སྨན་ཁང་ནང་དུ་བསྐྱེལ་འདུག ཡིན་ནའང་སྐབས་དེ་དུས་ནི་མཚན་མོའི་ཆུ་ཚོད་བཅུ་མ་ཟིན་ཙམ་ཡིན་པ་དང་སློབ་གྲྭའི་སྨན་ཁང་གི་ཛ་དྲག་མྱུར་སྐྱོབ་ཀྱི་མཚན་རེས་པ་དེའང་ཉལ་ནས་ཡོད་སྟབས་དུས་ཚོད་སྐར་མ་ཁ་ཤས་འགོར་འདུག སློབ་གྲྭའི་སྨན་ཁང་དུ་སྨན་སྤྲད་པ་དང་ཁབ་རྒྱག་པ་ཙམ་ལས་ཛ་དྲག་མྱུར་སྐྱོབ་ཀྱི་སྨན་པའི་ལག་ཆའི་ཆ་རྐྱེན་གཅིག་ཀྱང་མེད་པས་ཁབ་ཅིག་རྒྱབ་ཀྱང་མ་སོང་བར་བརྟེན། ད་གཟོད་རྒྱ་གར་སྨན་ཁང་དུ་མ་བསྐྱལ་ན་ཐབས་ཤེས་མི་འདུག་ཟེར།ཕྱིའི་སྨན་ཁང་དུ་བསྐྱལ་རྒྱུའི་འགན་དེ་ཡང་སྨན་པ་གཞན་ཞིག་ལ་ཡོད་པས་དེ་སྐད་བཏང་བར་མ་མཐའ་སྐར་མ་ལྔ་ཙམ་འགོར་འདུག དེ་ནས་སློབ་གྲྭ་དང་ཆེས་ཐག་ཉེ་ཤོས་ཀྱི་རྒྱ་གར་སྨན་ཁང་ཞིག་གི་ལམ་དུ་ནམ་རྒྱུན་སྐར་མ་ཉི་ཤུ་ཙམ་འགོར་བའི་ཐག་ཡོད་འདུག རྒྱ་གར་སྨན་ཁང་དུ་འབྱོར་མ་ཐག་སྨན་པས་བརྟགས་དཔྱད་བྱས་པར་བརྒྱུད་ནད་པ་ཆུ་ཚོད་ཕྱེད་ཀའི་སྔོན་ཙམ་ནས་ཤི་ཚར་འདུག་ཅེས་ཚིག་ཐག་ཆོད་པོའི་བཤད་འདུག རྒན་བདག་སློབ་མ་དེས་བརྡུང་པ་ནས་བརྩིས་པའི་རྒྱ་གར་སྨན་ཁང་དུ་མ་སླེབས་བར་གྱི་དུས་ཚོད་དེ་རགས་བརྩིས་ཙམ་རྒྱག་ན་ནད་པ་ཕལ་ཆེར་སློབ་གྲྭའི་སྨན་ཁང་དུ་ཤི་ཡོད་འདུག
སྤྱིར་དོན་རྐྱེན་འདི་སྟབས་མ་ལེགས་པར་བྱུང་བ་ཞིག་ཡིན་པར་བཤད་ཆོག་ཀྱང་ཞིབ་ཏུ་བསམ་ན་འདིའི་འགན་འཁྲི་ནི་བསད་མཁན་གྱི་མི་དེ་ཙམ་མ་ཚད་སློབ་གྲྭའི་འབྲེལ་ཡོད་འགན་ཁུར་གྱི་དགེ་རྒན་དང་སློབ་སྤྱི། སློབ་གྲྭའི་དབུ་འཛིན་སོགས་ཚང་མ་ལ་ཡོད་པ་ཞིག་རེད། སུང་ཇ་སློབ་གྲྭར་ལྟ་བུར་མཚོན་ན་ད་ཐེངས་ཙམ་མིན་པར་དེ་སྔོན་ཀྱང་གནས་ཚུལ་འདིའི་རིགས་ཐེངས་མང་པོ་བྱུང་མྱོང་ཡོད་འདུག ༢༠༠༥ལོར་སློབ་གྲྭའི་སྤྱི་ཁྱབ་རྒན་བདག གིས་སློབ་ཕྲུག་ཅིག་ལ་ཉེས་བརྡུང་ཚབས་ཆེན་བཏང་པར་བརྟེན། སློབ་ཕྲུག་དེས་ན་ཟུག་དེ་སེམས་ལ་བཅངས་ཏེ་མཚན་མོ་ཞིག་ལ་རྒན་བདག་ཉལ་ཡོད་པའི་སྐབས་དང་བསྟུན་ནས་རྒན་བདག་གི་གཟུགས་པོ་གང་སར་གྲིས་བཙུགསཏེ་མ་ཤི་ཙམ་བྱུང་ཡོད་འདུག དེ་བཞིན་དེ་ལྟ་བུའི་གནས་ཚུལ་ཆུང་ཚགས་རིགས་ཐེངས་དུ་མར་བྱུང་ཡོད་ཀྱང་དེ་ལ་དེ་བསྟུན་དང་སྣག་ཐོག་བཙགས་ཁེལ་གྱིས་ཉེན་འགོག་གི་ཁྲིམས་དང་སྒྲིག་སྲོལ་མེད་པར་ངན་པ་རྒྱ་ཡན་དུ་བཏང་པའི་གནད་དོན་ལ་བརྟེན་ནས་བྱུང་བ་ཡིན་པ་ནི་གདོན་མི་ཟ་བ་ཞིག་རེད། ཕ་མ་དང་དགེ་རྒན་གྱིས་ཀྱང་ཕྲུག་གུར་ལག་པ་འཆང་མི་ཆོག་པའི་དུས་འདིར་སློབ་མས་སློབ་མར་བརྡུང་ཏེ་བསད་པའི་དོན་རྐྱེན་ཆུང་ཆུང་ཞིག་ག་ལ་ཡིན།སློབ་གྲྭའི་དབུ་འཛིན་དང་སློབ་སྤྱི་གཉིས་ལའང་དེའི་སྐོར་ཉེན་འགོག་གི་སྒྲིག་སྲོལ་ཁ་གསལ་གཏིང་གསལ་ཞིག་ཡོད་རབས་གཏན་ནས་གསུང་རྒྱུ་མི་འདུག ད་དུང་སློབ་གྲྭའི་སྨན་ཁང་གི་ལས་བྱེད་མི་སྣར་ལ་ཡང་འགན་འཁྲི་ཡོད་དེ་དུས་ཐོག་ཏུ་ཛ་དྲག་མྱུར་སྐྱོབ་བྱས་ཐུབ་མེད་པ་དང་དུས་ཚོད་འགོར་འགྱངས་བཏང་བ་སོགས་ནི་ཧ་ཅང་གི་བློ་ཕམ་སྐྱེ་གཞིའི་གནད་དོན་ཡིན་ཏེ། མི་ཞིག་གི་དབུགས་བཏང་ལེན་མ་ཐུབ་པའི་ཛ་དྲག་གི་སྐབས་སུ་སྨན་དང་ཁབ་ཙམ་གྱིས་ཇི་ལྟར་ཕན། སློབ་མ་ཞིག་གིས་བཤད་པ་ལྟར་ན་དེ་སྔོན་ཡང་སློབ་གྲྭས་སྨན་པས་སློབ་མ་ནད་པ་ཞིག་ལ་ཟླ་ཤས་རིང་སྨན་ལོག་ཟ་བཅུག་པར་བརྟེན་ཀླད་པར་སྐྱོན་ཤོར་ཏེ་སེམས་པ་མ་ཐང་བའི་ཚད་ལ་སླེབས་སྐབས།ནད་པའི་སྤུན་མཆེད་ཀྱིས་སློབ་གྲྭ་ནས་འཁྲིད་དེ་རྒྱ་གར་སྨན་ཁང་ཞིག་ཏུ་བརྟག་དཔྱད་བྱས་སྐབས་སྨན་ལོག་བཏང་བ་ཡིན་པ་ར་འཕྲོད་འདུག སུང་ཇ་ནི་བོད་ཁྱིམ་སློབ་གྲྭ་གཞན་དག་ལས་ཀྱང་ཁ་ལག་དང་མཐུན་རྐྱེན་སོགས་ཞན་པས་(ཏྲི་བི)་གློ་བའི་ནད་པ་ནི་རྒྱུན་མི་ཆད་པ་དང་སློབ་མ་ཚོའི་ངོ་གདོང་ལ་བལྟས་པས་ཀྱང་ཤེས་ཐུབ། བོད་ནས་ཕ་མ་དང་སྤུན་མཆེད་ཚོས་བཙན་བྱོལ་གཞུང་ལ་རེ་བ་དེ་ཙམ་ཆེན་པོ་རྒྱག་ནས་རང་གི་བུ་ཕྲུག་རྒྱ་གར་ཏུ་བཏང་ཡང་། འདི་ནས་སྣང་མེད་དང་འཐུས་ཤོར་ཐ་ན་སློབ་གྲྭའི་ཁོར་ཡུག་ཏུ་བརྡུང་དེ་བསད་པ་དང་སྨན་ལོག་བཏང་ཏེ་སྨྱོ་བའི་བཅུག་པའི་གནད་དོན་འདི་དག་ངོ་མ་རྒྱ་ཕར་ཕྱོགས་ཀྱིས་བལྟས་ན་དགོད་བྲོ་བ་དང་། རང་རིགས་ཚུར་ཕྱོགས་ནས་བསམ་ན་བློ་ཕམ་དགོས་ས་ཞིག་ཅི་ལ་མིན།
ཐེངས་འདིའི་མི་གསོད་དོན་རྐྱེན་འདི་ཅིས་ཀྱང་བྱུང་ཚར་བས་མི་སྲོག་བསྐྱར་གསོས་ཀྱི་ཐབས་ཤེས་མེད་ཀྱང་དེ་རྐྱེན་འདི་ལ་བརྟེན་ནས་རྗེས་མ་འོངས་པར་བཙན་བྱོལ་གྱི་སློབ་གྲྭ་ཁག་དང་ལྷག་པར་དུ་སུང་ཇ་བོད་ཁྱིམ་སློབ་གྲྭར་གནས་ཚུལ་དེའི་རིགས་མི་ལྷག་པའི་ཆེད་དུ། གནད་དོན་དུ་ཐག་བཅད་ནན་པོ་དང་ཁ་གསལ་གཏིང་གསལ་རྗེས་སུའང་དཔེ་སྟོན་གྱི་ནུས་པ་ལྡན་པའི་ཐག་བཅད་ཅིག་ནི་ཅིས་ཀྱང་བྱ་དགོས་ངེས་ཡིན་ཞིང་། ད་ཐེངས་ཀྱང་སྣང་མེད་ངང་ཡ་ཡོལ་ཙམ་གྱིས་འགེབ་ཐབས་བྱས་ནི་རང་གཞན་གཉིས་ཀར་ཁེ་ཕན་མེད་པ་མ་ཟད་མ་འོངས་པའང་དེའི་རིགས་མ་འབྱུང་བའི་ངེས་པ་མེད་དོ།
