རྒྱ་གར་གི་ཟས་བཅད་ངོ་རྒོལ་མཚམས་འཇོག
དེ་ཡང་ཁོང་གིས་དགོས་འདུན་བཏོན་པའི་དོན་ཚན་གསུམ་སྟེ། རྒྱ་གར་དབུས་ཀོང་སེ་སིའི་སྲིད་གཞུང་གིས་གྲོས་ཚོགས་ནང་ལྐོག་ཟ་རུལ་སུངས་འགོག་ཆེད་ “ལོཀ་པཱལ་”ཞེས་པའི་གྲོས་གཞིའི་ནང་དུ། གཞུང་གི་འཛིན་སྐྱོང་གནས་རིམ་འོག་མ་དང། མངའ་སྡེའི་ནང་དུ་ “ལོ་ཀ་ཡུཀ་ཏ་” ཞེས་པ་ས་གནས་ས་ཐོག་ཏུ་རུལ་སུངས་འགོག་པའི་ཁྲིམས་དང། སྲིད་གཞུང་ནས་མི་མང་གི་ལས་དོན་ཕྱི་གསལ་ནང་གསལ་སྒྲུབ་པའི་མི་སེར་བཅའ་ཁྲིམས་བཅས་ཚུད་པའི་དགོས་འདུན་བཏོན་པ་རྣམས་ལ། སྲིད་གཞུང་གིས་གྲོས་ཚོགས་ནང་འཁྱེར་རྒྱུའི་ཁས་ལེན་བྱས་པར་བརྟེན། ཁོང་གིས་ཟས་བཅད་ངོ་རྒོལ་དེ་མཚམས་བཞག་ཡོད་པ་རེད།
སྐབས་དེར་ཨན་ན་ཧ་ཛ་རེ་མཆོག་གིས་གསལ་བཤད་གནང་དོན། དེ་རིང་ང་ཚོར་རྒྱལ་ཁ་ཕྱེད་ཀ་ཐོབ་ཡོད། ང་ཚོས་དགོས་འདུན་དོན་ཚན་གསུམ་དེ་རྩ་ཁྲིམས་སུ་འགྱུར་བར་ད་དུང་ཡང་སྲིད་གཞུང་གི་ལས་དོན་མང་པོ་ལྷག་ཡོད་པ་དང། སྲིད་གཞུང་གིས་ལས་དོན་འཐུས་ཚང་སྒྲུབ་པའི་ཡིད་ཆེས་བྱེད་ཀྱི་ཡོད། གལ་ཏེ་སྲིད་གཞུང་ནས་དེ་ལྟར་མ་བྱས་ཚེ་ང་ཚོས་ཡང་བསྐྱར་ཟས་བཅད་ངོ་རྒོལ་དུ་ཞུགས་རྒྱུར་གྲ་སྒྲིག་བྱེད་པ་དགོས་པ་རེད་ཅེས་གསུང་ཡོད་པ་རེད།
ཨན་ན་ཧ་ཛ་རེ་མཆོག་གིས་ཉིན་གྲངས་ ༡༢ རིང་ཟས་བཅད་ངོ་རྒོལ་བྱས་པར་བརྟེན། སྐུ་གཟུགས་ཞན་པོར་གྱུར་ཡོད་པ་དང། དེ་རྗེས་གུར་གཱན་ཨོ་གྲོང་ཁྱེར་གྱི་སྨན་ཁང་ཞིག་ཏུ་སྨན་བཅོས་ཆེད་ཕེབས་ཡོད་པ་རེད། ཉིན་དེར་རྒྱ་གར་རྒྱལ་ཡོངས་སུ་མི་མང་ཚོས་མི་རིགས་དབྱེ་འབྱེད་མེད་པར་ཚང་མ་གཅིག་གྱུར་གྱི་འབོད་ཚིག་འོག་མི་སེར་ཕལ་པ་ཚོར་རྒྱལ་ཁ་ཐོབ་པའི་དུས་ཚོད་ཁྱད་པར་ཅན་ཞིག་ཡིན་པ་སྲུང་བརྩི་ཞུས་ཡོད་པ་རེད།
རྒྱ་གར་རང་བཙན་ཐོབ་པ་ནས་བཟུང་མི་སེར་ཚོར་ལྐོག་ཟ་རུལ་སུངས་ཀྱི་དཀའ་ངལ་ཕྲད་ཡོད་པ་དང། ཉེ་ཆར་ཡང་རྒྱ་གར་གི་ཁ་པར་འཕྲིན་གཏོང་ལས་གཞིའི་ནང་ཧིན་སྒོར་དུང་ཕྱུར་མང་པོའི་རུལ་སུངས་བྱུང་ཡོད་པ་ཤེས་རྟོགས་བྱུང་ཡོད་པ་རེད། དེ་བཞིན་དེ་སྔ་དབྱིན་ཇིའི་མངའ་འོག་ཡོད་པའི་རྒྱལ་ཁབ་རྣམས་ཀྱི་རྩེད་འགྲན་ཆེན་མོ་ Common Wealth Games ༢༠༡༠ ལོར་རྒྱལ་ས་ལྡི་ལི་གསར་པར་འཚོགས་ཡོད་པ་དེའི་ནང་དུའང་རུལ་སུངས་བྱས་ཡོད་པའི་གནད་དོན་རྣམས་བྱུང་བ་དང། ད་ལྟ་བཙོན་ཁང་ནང་དུ་སྲིད་གཞུང་གི་བློན་ཆེན་གསུམ་ཡོད་པ་རེད། གནད་དོན་དེ་དག་ལ་གཞིགས་ཏེ་མི་མང་རང་ཉིད་ནས་རྒྱལ་ཁབ་ཀྱི་ཆབ་སྲིད་ལམ་ལུགས་ལ་ལེགས་བཅོས་བྱ་དགོས་པ་མཐོང་སྟེ་རུལ་སུངས་འགོག་པའི་ལས་འགུལ་དེ་སྤེལ་ཡོད་པ་རེད།།
