༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌གྲོང་གསེབ་གསར་པ།༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌
དེ་ལྟར་རྒོད་པའི་ཁྱོད།
གཡག་རྒོད་ལས་ཀྱང་རྒོད་ཅིང་།
གླང་ཆེན་ལས་ཀྱང་སྟོབས་ཆེ་བའི་གྲོང་གསེབ་གསར་པ།
ཁྱོད་ཀྱི་བཅོས་མའི་འཛུམ་བག་རེ་རེས།
ངེད་སྤུན་ཟླ་དུ་མར་མ་འོངས་མེད་ལ་ད་ལྟ་དབེན་པའི་གནས་དེར་འདྲེན།
ཁྱོད་ཀྱིས་རྫུས་པའི་གཟུགས་བརྙན་ཟབ་མོས།
ངེད་སྤུན་ཟླ་མི་རིགས་ཀྱི་སེམས་པ་འཕྲོག
ཁྱོད་ཀྱིས་སྐར་ཆ་རེ་ལ་བསམ་བློ་རེ་བཏང་ཞིང་།
སྐད་ཅིག་རེ་ལ་འཆར་གཞི་རེ་བཟོས་ཀྱང་།
རྫུན་པ་ནི་ནམ་ཡང་བདེན་པར་འགྱུར་མི་སྲིད་ལ།
རྫུན་པ་ནི་ནམ་ཡང་རྒྱལ་མི་སྲིད།
དེར་བརྟེན། གྲོང་གསེབ་གསར་བ།
ཁྱོད་ཀྱི་བྱམས་བརྩེ་དེ་ཇི་ཙམ་གྱིས་ཟབ་ཀྱང་།
ཁྱོད་ཀྱི་སྙིང་རྗེ་དེ་ཇི་ཙམ་གྱིས་ཆེ་ཡང་།
ཁྱོད་ཀྱི་ལྷག་བསམ་དེ་ཇི་ཙམ་གྱིས་ལྷག་ཀྱང་།
ང་ཚོའི་མི་རིགས་འདི་དང་།
ང་ཚོ་བོད་པ་ཚོར་།
ཁ་འཇམ་ཁོག་རྩུབ་ཀྱི་གཅེས་སྐྱོང་རྫུན་མ་དེ་མི་དགོས་ལ།
གཅིག་བཟོ་བརྒྱ་གཏོར་གྱི་འཛུགས་སྐྲུན་དེ་བས་ཀྱང་མི་དགོས།
གྲོང་གསེབ་གསར་བ།
ཁང་ཁྱིམ་གསར་བ།
མི་སྣ་གསར་བ།
འཛུགས་སྐྲུན་གསར་བ།
གསར་བ་གསར་ཀྱང་དེ་དག་གི་རྐྱེན་པས།
ངེད་ཕ་མེས་ཡང་མེས་ནས་རྔུལ་ཆུས་བསྐྱངས་བའི་སྲོལ་རྒྱུན།
ཡུལ་སྲོལ། གོམས་གཤིས་རིམ་བཞིན་ཡལ་ཞིང་།
ཡངས་པའི་རྩྭ་ཐང་སྟེང་གི་སྦྲ་ནག་དག
ཇེ་ཉུང་ནས་ཇེ་ཉུང་དུ་ཕྱིན།
དེ་ལྟར་ཇེ་ཉུང་དུ་ཕྱིན་པའི་སྦྲ་ནག་རེ་རེའི་ཆེད།
ཡངས་པའི་རྩྭ་ཐང་ཆེན་མོའི་སྨྲེ་ངག་ཟབ་མོ།
ངུ་ངག་གི་དབྱངས་རྟར་བཞོན་ནས་ལྷོ་རུ་འཕུར།
ང་ཚོ་ཡུལ་གྱར་སྤུན་ཟླའི་སྐྱོ་གླུ་རེ་རེས།
གཞིས་ལུས་སྤུན་ཟླའི་སེམས་པ་མཚོན་ཐབས་བྱས།
གང་ལྟར་ཡང་།
གསར་བ་གསར་རྐྱང་ལགས། ཁྱོད་ལ་མ་འོངས་བར་གྲུབ་འབྲས་མེད་ལ།
མདུན་ལམ་མེད།
ཁྱོད་ལ་རྒྱུ་བ་མེད་ལ་ལྷག་བསམ་དེ་བས་ཀྱང་མེད་སྟབས།
ཁྱོད་རྒྱང་རིང་ནས་རྒྱང་རིང་དུ་མྱུར་དུ་བཞུད་རོགས་ཞུ།