༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌སྐྱོ་ལྷང་ལྷང་གི་བྱ་མ་རྟ།༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌
དེ་བས་ཁྱོད་ཀྱི་བསམ་ངོར་གྲྭ་བཙུན་སྤྱི་ཚོགས་ཀྱིས་མ་གཏོགས་རྫུན་དང་ལྟུང་བ། སྐུར་འདེབས་སོགས་ཀྱི་རྣམ་གཞག་ལ་སྦྱང་པ་བྱེད་མི་ཆོག་པ་དང་བྱེད་མི་ཤེས་པར་ངོས་འཛིན་པ་དེར་ང་དངོས་གནས་ཡ་མཚན་ཆེན་པོ་སྐྱེས་བྱུང་། སྔར་ཡིན་ན་བླ་གྲྭ་དང་བཙུན་མའི་རིགས་མ་གཏོགས་པས་གཞུང་ཆེན་མོ་ལ་ཐོས་བསམ་གནང་མི་ཆོག་པ་དང་གནང་སྲོལ་མེད་པ་དེ་འདྲ་རེད་དེ། དེང་རབས་ཉེར་གཅིག་པར་༸གོང་ས་སྐྱབས་མགོན་ཆེན་པོའི་ཐུགས་རྗེའི་འོད་རླབས་ལ་བརྟེན་ནས་ཁྱིམ་པ་དཀྱུས་མ་རྣམས་ལའང་འདུལ་བ་ལས་གཞན་པའི་གཞུང་ཆེན་མོ་ལ་ཐོས་བསམ་བྱེད་པའི་སྐལ་བཟང་ཤར་ཡོད་པ་དེ་ཁྱོད་ཀྱིས་ཀྱང་ཤེས་ངེས་རེད་ལ། ༸རྒྱལ་བ་རིན་པོ་ཆེའི་སྐུ་མདུན་དུ་ཁྱིམ་པས་རྟགས་བསལ་བཏང་མྱོང་ཡོད་པའི་ལོ་རྒྱུས་ཁྱོད་ཀྱིས་ཤེས་ཡོད་སྲིད། དེ་ལྟར་ཤེས་མེད་ན་གྲོགས་ཕན་ཚུན་ལ་བཀའ་འདྲི་གནང་དང་མཁྱེན་ངེས་རེད།
འདིར་ངས་སྐྱ་བོས་གཞུང་ཆེན་ལ་བསླབ་པ་སློབ་གཉེར་གནང་དང་གནང་བཞིན་ཡོད་པའི་དཔེར་མཚོན་ཙམ་ཞུ་ན། དེ་ཡང་། སཱ་ར་མཚན་ཉིད་སློབ་གྲྭ་དང་ཝཱཎ་མཐོ་སློབ་ཏུ་ཡོད་པའི་སྐྱ་བོ་ཚང་མས་འདུལ་བ་སྤུད་པའི་གཞུང་ཆེན་དག་ལ་ཐོས་བསམ་གནང་དང་གནང་བཞིན་པ་རེད་ལ། སློབ་གཉེར་ཁང་དེ་དག་ནས་གཞུང་ཆེན་ལ་ཐོས་བསམ་གནང་ནས་སོ་སོའི་བློ་གྲོས་ལ་དཔག་པའི་ལེགས་སྐྱེས་མི་ཉུང་བ་རག་པ་དེ་ཁྱེར་ནས་དེང་གི་སྤྱི་ཚོགས་སུ་སྐད་སྒྱུར་དང་ཡིག་སྒྱུར་སོགས་ཀྱི་ཕྱག་ལས་གནང་དང་གནང་མུས་ཇི་སྙེད་ཅིག་ཡོད་པ་རེད། དེ་དག་གིས་ཆོས་འདུལ་བའི་གཞུང་ལ་ཐོས་བསམ་གནང་མྱོང་མེད་ཀྱང་རྫུན་དང་ལྟུང་བ། སྒྲོ་སྐུར་གྱི་རྣམ་གཞག་ལ་ཐོས་བསམ་བྱེད་མྱོང་ཡོད་ཀྱི་རེད།
འོ་ན་ཁྱོད་ཀྱིས་རྫུན་དང་ལྟུང་བ། སྐུར་འདེབས་སོགས་ཀྱི་ཚིག་སྤྱོད་པའི་དཔེ་ཆའི་རིགས་ཐམས་ཅད་ཆོས་འདུལ་བའི་གཞུང་ཞིག་ཏུ་ངོས་འཛིན་གྱི་ཡིན་ནམ། ཡིན་ཞེ་ན། མངོན་པ་མཛོད་དང༌། ཤེར་ཕྱིན་གྱི་གཞུང་མངོན་རྟོགས་རྒྱན་དང་དེའི་འགྲེལ་བ། ཡང་འགྲེལ་སོགས་དང༌། དབུ་མའི་གཞུང་འཇུག་པ་དང་། དེའི་འགྲེལ་བ་དང་། ཡང་འགྲེལ་སོགས་དང༌། གྲུབ་མཐའི་རྣམ་གཞག་བསྟན་པའི་གཞུང་སོགས་ཀྱང་འདུལ་བའི་གཞུང་དུ་ངོས་འཛིན་དགོས་པར་འགྱུར་ཏེ། གཞུང་དེ་དག་ཏུ་རྫུན་དང་། ལྟུང་བ། སྒྲོ་འདོགས་དང་སྐུར་འདེབས་ཀྱི་ཚིག་སྤྱོད་ཡོད་པའི་ཕྱིར། དེ་ལྟར་ན་འདུལ་བ་ལས་གཞན་པའི་གཞུང་ཆེན་མོར་ཐོས་བསམ་གནང་དང་གནང་བཞིན་པའི་ཁྱིམ་པ་མང་པོ་འདུག་པ་དེ་ཚོར་འགྲེལ་བཤད་ཇི་ལྟར་བྱ། འདུལ་བའི་གཞུང་ལ་གྲྭ་བཙུན་རིགས་མ་གཏོགས་པས་བལྟ་ཀློག་གནང་མི་ཆོག་པ་དེ་ངས་གསལ་བཀྲོལ་མི་དགོས་པར་སྲིད་གསུམ་ཁྱོན་འདིར་རླུང་ལྟར་གྲགས་བཞིན་པ་རེད།
སྤྱིར་གུས་མོས་ལྟུང་བ་ཞེས་པའི་ཚིག་དེ་འདུལ་ཚིག་ཐོུང་མིན་པ་ཞིག་དང་། སྐུར་འདེབས་ཞེས་པའི་ཚིག་དེ་དཔེ་ལྔའི་ནང་རྒྱུགས་ཆེ་བའི་ཚིག་ཅིག་ཡིན་པ་ཤེས་ཀྱི་མེད་ཀྱང་རྫུན་དང་ལྟུང་བ། སྐུར་འདེབས་གསུམ་གྱི་ཚིག་དོན་ཤེས་ཀྱི་ཡོད་ལ། སྐྱབས་གནས་ཁྱོད་ཚོ་ནང་བཞིན་ངས་ནང་ཆོས་ཤེས་ཀྱི་མེད་ཀྱང་ནང་ཆོས་ལ་ཐོས་པའི་བག་ཆགས་ཅུང་ཙམ་ཡོད་པས། ཁྱིམ་པ་ཉམ་ཆུང་ཞིག་གིས་འདི་ལྟར་བྲིས་པར་དགའ་བསུ་མེད་ཀྱང་མིས་འདྲེ་མཐོང་བ་བཞིན་ཧ་ལས་མདོག་མ་གནང་རོགས་ཞེས་ཞུ་རྒྱུ་ཡིན།
