དམྱལ་བ་མི་ཡུལ་དུ་མྱོང་བ།
མ་འོངས་རང་རྒྱལ་གཙོ་སྐྱོང་མཁན།།
ལོ་ཆུང་རིག་འདོད་སློབ་མ་རྣམས།།
གར་སོང་ཆ་མེད་གྱུར་བ་དེས།།
སེམས་ཁོང་དྲག་མེད་རྨ་ཁ་བཟོས།།
ལྷད་མེད་དཀའ་བ་ཁྱད་གསད་ཅིང་།།
ད་ལྟ་རང་ཡུལ་འཛིན་པའི་མགོན།།
ན་གཞོན་ཕོ་མོ་ཁྲི་མ་འབུམ།།
མིག་སྔར་ས་རྡོར་གྱུར་འདི་སྐྱོ།།
འདས་ཟིན་ལོ་ཟླར་དཀའ་སྡུག་འབུམ།།
དཔག་མེད་མྱོང་བའི་བགྲེས་པོ་ཚོགས།།
མྱོང་བ་བཤད་ལོང་དུས་མེད་པར།།
འདི་ནས་གཏན་དུ་གྱེར་འདི་སྐྱོ།།
ཅ་ཅོ་མི་ཚོགས་མང་བའི་གྲོང་།།
འདུ་འཛོམས་སྤྲོ་སྐྱིད་འཕེལ་བའི་ཡུལ།།
སངས་རྒྱས་བསྟན་པ་དར་བའི་གནས།།
ངུ་སྒྲས་གནམ་ས་གཡོ་བས་སྐྱོ།།
ཤེས་རིག་བདུད་རྩི་འཐུང་བའི་ཞིང་།།
མ་འོངས་སྲོན་རྩ་མང་བའི་གནས།།
ཡར་རྒྱས་རྣམ་པ་ཆེ་བའི་ས།།
མིང་གི་ལྷག་མར་གྱུར་བས་སྐྱོ།།
རང་ཡུལ་སྐྱེ་དགུ་མདོ་ཡི་སར།།
ཁྲག་གི་རྦ་རླབས་རབ་འཕྱོ་སྟེ།།
ཕུང་པོ་རི་ལྟར་བརྩིགས་པའི་དུས།།
སེམས་ཆུང་གཏིང་ནས་སྐྱོ་བ་སྐྱེས།།
རྒྱལ་སྤྱིའི་མི་དམངས་རྣམ་པ་དང་།།
བོད་རིགས་སྤུན་ཟླ་རྣམ་པ་ཚོས།།
ཚེ་འདས་རྣམས་ལ་སྔོ་སྨོན་དང་།།
གསོན་པོ་རྣམས་ལ་སྐྱབས་འཇུག་ཞུས།།
ཕ་ཡུལ་ལ་ས་ཡོམ་བྱུང་བ་དེ་ཡི་ལྟད་མོ་བལྟས་རྗེས་བྲིས།