ཁྲིམས་སྒྲིག་བསྐྱར་བཅོས་མང་ཤོས་ཀྱི་གྲོས་ཚོགས།

མཇུག་བསྡོམས་མཛད་སྒོའི་ཐོག་ཚོགས་གཙོ་སྤེན་པ་ཚེ་རིང་མཆོག་གིས་གསུང་བཤད་སྐབས།

སྤྱི་འཐུས་རྣམ་པ་ཚང་མས་དུས་རྒྱུན་ཁྱིམ་ཚང་གཅིག་ནང་བཞིན་བྱས་ཏེ། གཅིག་གིས་གཅིག་ལ་བཟང་སྤྱོད་ཀྱིས་ལྟ་དགོས་པ་དང་། ཆིག་སྒྲིལ་གྱིས་ལས་དོན་བྱེད་དགོས་པ་རེད་ཅེས་གསུངས་པ་དང་སྦྲགས། ཐེངས་འདིའི་གྲོས་ཚོགས་ནང་མྱ་ངན་གུས་འདུད་གྱིས་གྲོས་ཆོད་ཁག་ཅིག་བཞག་པ་དང་། མི་རབས་རྒན་པ་ཚོའི་བྱས་རྗེས་ལ་བཀའ་དྲིན་རྗེས་དྲན་གྱི་གོ་སྐབས་ཤིག་བྱུང་བ་རེད། དེ་བཞིན་བཀའ་ཤག་གི་བཀའ་བློན་རྣམས་གྲོས་ཚོགས་ནང་སྤྱི་མོས་འོས་འདེམས་བྱེད་ཐུབ་པ་དེས་འཛིན་སྐྱོང་ལ་གྲོས་ཚོགས་ནས་དགོས་ངེས་ཀྱི་མཐུན་རྐྱེན་སྦྱར་གྱི་ཡོད་པ་གསལ་སྟོན་བྱུང་བ་རེད། དེ་བཞིན་ཁྲིམས་སྒྲིག་ཁག་བསྐྱར་བཅོས་ཚགས་ཚུད་བྱུང་ཡོད་པ་དང་། ལོ་རྒྱུས་ཀྱི་ཐོག་ནས་ཁྲིམས་སྒྲིག་བསྐྱར་བཅོས་མང་ཤོས་ཀྱི་གྲོས་ཚོགས་ཤིག་ཡིན་སྐོར་ངོ་སྤྲོད་གནང་སོང་།

ཚོགས་གཙོས་མུ་མཐུད་གསུང་དོན། སྤྱི་འཐུས་ཚོ་འདེམས་མཁན་མི་མང་རེད། མི་མང་གིས་ཁོངས་སོ་སོ་ནས་དྲག་འདེམས་བྱས་ཡོད་པ་དང། སྤྱི་འཐུས་ཚོ་སོ་སོར་ཡོན་ཏན་རེ་ཡོད་པ་རེད། ཁ་ཤས་དཔལ་འབྱོར་ལ་ཕན་ཐོགས་མཁན་དང་། ཁ་ཤས་གསུང་བཤད་ཀྱིས་ཕན་ཐོགས་མཁན། ཁ་ཤས་ཀྱི་མིའི་འབྲེལ་བ་འཛུགས་སྟངས་སོགས་ལ་ཕན་ཐོགས་ཡོད་པ་རེད། ལྷག་པར་དུ་ད་ཐེངས་ཀྱི་གྲོས་ཚོགས་ནང་ཤེས་ཡོན་ཅན་མང་པོ་ཞིག་ཡོད་པ་རེད། བོད་ནང་ནས་འཚར་ལོངས་བྱུང་བའི་བོད་ནང་གི་གནས་སྟངས་ཤེས་མཁན། བཙན་བྱོལ་ནང་འཚར་ལོངས་བྱུང་ནས་ཕྱིའི་འཛམ་བུ་གླིང་གི་གནས་སྟངས་ཤེས་མཁན་ཟུང་དུ་འབྲེལ་བའི་ཡག་པོ་ཆགས་མོད། ཡོན་ཏན་ཡོད་པ་རེད་ཅེས་བཤད་ནས་ཕན་ཐོགས་མེད་པས། གྲོས་ཚོགས་ནང་ནས་ཁས་ལེན་བྱས་པ་བཞིན་དུས་རྒྱུན་མི་མང་གི་སྐུ་ཚབ་བྱས་ཏེ། མི་མང་གི་རེ་བ་འགྲུབ་ཐབས་སུ་འབད་བརྩོན་དགོས་པ་དེ་ང་ཚོའི་འོས་འགན་ཆགས་ཡོད་པ་རེད། རང་བཙན་རྒྱལ་ཁབ་ཡོད་པ་དང་མི་འདྲ་བར། ང་ཚོ་འཐབ་རྩོད་པ་ཡིན་པས་རྒྱ་གར་ནང་དང་རྒྱལ་སྤྱིའི་ནང་དུ་འབྲེལ་བ་བྱས་ཏེ། བོད་དོན་ལ་རྒྱབ་སྐྱོར་བ་འཚོལ་དགོས་པ་རེད།

འཚམས་རེར་ང་ཚོས་ལས་ཀ་བྱེད་སྐབས་གཅིག་གིས་གཅིག་གི་རྐང་པའི་ཐོག་བརྫིས་བསྡད་པ་ལྟ་བུར་བཟོད་སྲན་བྱེད་མ་ཐུབ་པ་ཡོང་གི་འདུག དེ་ལྟར་མ་ཡིན་པར། དོན་གཅོད་ཚོས་འགན་ཁུར་དགོས་པ་དང། འཛིན་སྐྱོང་བཀའ་ཤག་གིས་འགན་ཁུར་དགོས། གྲོས་ཚོགས་ཀྱི་འགན་ཁུར་དགོས་པ་སོགས་ལྷུ་འགྲིག་པོ་ཞིག་དགོས་ཀྱི་འདུག སྤྱིར་བཏང་ང་ཚོ་མི་ཉུང་ཉུང་རེད། དཔལ་འབྱོར་གྱི་གནས་སྟངས་སྐྱོ་པོ་རེད་མོད། ང་ཚོ་ལས་ཀ་བྱེད་མཁན་ཚོ་མཐུན་པ་དང་། ཆོད་སེམས་བརྟན་པོ་ཡོད་ན། ནུས་པ་ཐོན་རྒྱུ་ཡིན་པ་བཤད་མི་དགོས་པ་རེད། བོད་ནང་གི་དཀའ་ངལ་སེལ་ཐབས། བཙན་བྱོལ་ནང་བརྟན་པོ་བཟོ་དགོས་སོགས་གདོང་ལེན་བྱེད་དགོས་ས་མང་པོ་ཡོད་པ་རེད་ཅེས་འགྲེལ་བརྗོད་གན་སོང་།

ཁོང་གིས་མཐུད་མཐུད་གསུང་དོན། ད་ཐེངས་ཀྱི་སྤྱི་འཐུས་ཚོ་སྔར་དང་མ་འདྲ་བར་མཐུན་སྒྲིལ་དང་། བསམ་བློ་སྔར་ལས་གུ་ཡངས་པ་ཡོད་པའི་ཚོར་སྣང་གྲོས་ཚོགས་ཀྱི་ཚོགས་གཙོ་གཉིས་ལ་བྱུང་སོང་། གྲོས་ཚོགས་ནང་བཀའ་མོལ་དོན་དང་ལྡན་པ། ལས་ཀ་བྱེད་རྒྱུའི་འགན་ཁུར་ཡོད་པ་ཞིག་ཆགས་འདུག དེར་བརྟེན། སྔོན་མ་རྒན་རབས་པས་རྨང་གཞིར་བཏང་བ་དེའི་ཐོག་ང་ཚོས་རྩིག་པ་ག་ཚོད་རྒྱག་ཐུབ་ལྟ་དགོས་པ་རེད་ཅེས་འགྲེལ་བརྗོད་གནང་སོང།།