བོད་ལ་རང་དབང་དགོས། ང་ཚོར་འགྲོ་བ་མིའི་ཐོབ་ཐང་དགོས། ༧རྒྱལ་བ་རིན་པོ་ཆེ་བོད་ནང་གདན་འདྲེན་ཞུ་དགོས། བོད་མི་ཚང་མ་ལོངས་ཤོག་ཅེས་པའི་སྐད་འབོད་ཤུགས་ཆེན་བྱས་ཏེ། རྒྱ་ནག་གཞུང་ལ་ངོ་རྒོལ་བྱས་པ་དང་། མཐར་མི་གཅིག་དེ་མ་ཐག་འདས་གྲོངས་དང་མི་གཅིག་གི་ལུས་ཡོངས་རྫོགས་མེས་ཤུགས་ཆེན་ཚིགས་ཏེ་ད་ལྟ་ཤི་གསོན་གནས་སྟངས་གསལ་ཁ་མི་འདུག
མ་ཟད་ད་ལྟ་སྔོན་དང་མི་འདྲ་བར་རྔ་བ་རྫོང་ཡོངས་སུ་འགྲུལ་བཞུད་ཚང་མ་བཀག་སྡོམ་གྱིས་ཡར་མར་འབྲེལ་བ་བྱེད་མི་ཐུབ་པར་ཧ་ཅང་གིས་ཛ་དྲག་གནས་སུ་གྱུར་འདུག
ད་ལྟ་སྐད་འབོད་བྱེད་མཁན་མི་སྣ་དེ་གཉིས་ཀྱི་མིང་དང་ལོ་ཚད། ཡུལ་ལུང་སོགས་གང་ཡིན་ཁ་གསལ་མི་འདུག ། བལ་ཡུལ་ས་གནས་གསར་འགོད་པས།
བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་གནས་ཚུལ་སྤེལ་བའི་ནང་འཁོད་དོན། ཕྱི་ལོ་ ༢༠༡༡ ཟླ་ ༡༠ ཚེས་ ༧ ཉིན་གྱི་བོད་ནང་གི་སྔ་དྲོའི་དུས་ཚོད་ ༡༡།༣༠ ཐོག་རྔ་པ་རྫོང་མཐའ་བ་གོང་མའི་འཇུག་རིས་ཚང་གི་བུ་ཆོས་འཕེལ། རང་ལོ་ ༡༩ ཡིན་པ་ཁོང་དང་། མཐའ་བ་གོང་མའི་གསོང་པོ་ཚང་གི་སྐལ་བཟང་གི་བུ་མཁའ་དབྱིངས་༼ཁག་ཅིག་གིས་བཤད་ན་ཁོང་གི་ལ་མིང་ལ་ལྷུང་ཡངས་རེད་ཟེར་གྱིན་འདུག༽། རང་ལོ་ ༡༨ ཡས་མས་ཤིག་ཡིན་པ་ཁོང་གཉིས་རྔ་པ་རྫོང་གི་ཁྲོམ་གཞུང་དུ་ཐོན་ནས་རང་ལུས་ལ་མེ་ སྦར་ཞིང་ལག་ཟུང་ཐལ་མོ་སྦྱར་ནས་རྒྱ་ནག་གཞུང་ལ་ངོ་རྒོལ་གྱི་སྐད་འབོད་གནང་ཡོད་ འདུག་ལ། སྐབས་དེར་ཉེན་རྟོག་པ་སོགས་ཀྱིས་ཁོང་གཉིས་ཀྱི་ལུས་ཀྱི་མེ་བསད་ཅིང་གཅར་རྡུང་ གཏོང་བཞིན་ས་གནས་རྫོང་མི་མང་སྨན་ཁང་དུ་ཁྱེར་ཡོད་པ་དང་། ཉེན་རྟོག་པ་རྣམས་ཀྱིས་ཡར་སྨན་ཁང་ནང་ལ་ཁྲིད་ནས་འགྲོ་སྐབས་མཁའ་དབྱངས་ཀྱིས་ཁུ་ ཚུར་གནམ་ལ་འཕྱར་ནས་འབོད་སྒྲ་སྒྲོག་བཞིན་ཡོད་ཀྱང་འབོད་ཚིག་གསལ་པོ་གོ་མེད་ འདུག འཇུག་རིས་གི་ཚང་གི་བུ་ཆོས་འཕེལ་དངོས་སུ་མཐོང་མཁན་མང་པོས་ཞིག་གིས་གསུངས་ པ༌ལྟར་ན་བོད་ནང་གི་དུས་ཚོད་ ༡༢ ཡས་མས་སུ་གྲོངས་ཚར་ཡོད་པའི་གནས་ཚུལ་འབྱོར་ཡོད་ཅིང་། ཁོང་གཉིས་ཀ་དེ་སྔོན་རྔ་པ་ཀིརྟི་དགོན་པའི་གྲྭ་པ་ཡིན་ཞིང་རྗེས་སུ་གྲྭ་ལོགས་བྱས་ཡོད་འདུག སྐལ་བཟང་གི་བུ་མཁའ་དབྱངས་ནི་ཕྱི་ལོ་ ༢༠༠༨ ལོར་རྒྱ་གཞུང་གིས་དམར་གསོད་བྱས་པའི་མཐའ་བ་གོང་མའི་རྩེ་ཕྲུག་ཚང་གི་རྒྱལ་གཅེས་དཔའ་བོ་བཀྲ་ཤིས་ཀྱི་ཚ་བོ་ཡིན་འདུག དེང་སྐབས་རྔ་པ་རྫོང་ལ་དམ་དྲགས་ཤུགས་ཆེ་ཡོད་མུས་ཐོག་སྔར་བས་དམ་དྲགས་ཤུགས་རུ་སོང་ཡོད་པ་དང་། དམག་མི་གང་སར་འགྲེམས་འཇོག་བྱས་ཡོད་འདུག་ལ། མི་མང་སྐྱོ་གདུང་དྲག་པོས་གཟིར་ཞིང་ཚོར་བ་རབ་ཏུ་འབར་གྱིན་ཡོད་པས་ཆེས་ཛ་དྲག་དང་ཉེན་ཁ་ཆེན་པོ་ཞིག་ལ་འཕྲད་བཞིན་ཡོད་འདུག་པ་བཅས།
