༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌བོད་པ་ཚང་གི་སྙིང་རྗེ།༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌༌
སྙིང་རྗེ་བརྗོད་ལ་དགའ་བའི་བོད་པ་ཚང་།།
སྙིང་རྗེ་ཁ་ཙམ་ཡིན་པའི་བོད་པ་ཚང་།།
མ་བུ་ཁ་བྲལ་བཏང་མཁན་ཤན་པ་ཚང་།།
དམར་ཟས་རོལ་ལ་དགའ་བའི་སྤྱང་ཀི་ཚང་།།
རྟག་ཏུ་སྙིང་རྗེའི་ཚིག་དེ་འབོད་ལུགས་ལ།།
བོད་པ་ཚང་དེ་སྙིང་རྗེ་ཆེ་ཚུལ་མངོན།།
ལུ་གུ་མ་མོ་ཁ་བྲལ་བཏང་ལུགས་ནས།།
བོད་པའི་སྙིང་རྗེ་ཁ་ཙམ་ཡིན་པ་ཤེས།།
དཔོན་པོ་མཐོང་ན་བོད་པས་སྙིང་རྗེ་གླེང་།།
སྤྲང་པོ་ཐུག་ན་ཁོང་ཚོས་སྙིང་རྗེ་ཟེར།།
སྙིང་རྗེའི་གོ་བ་ལོག་པའི་བོད་པ་ཚང་།།
ཀུན་ལ་ཁྱེད་ཚོའི་སྙིང་རྗེ་དགོས་དོན་མེད།།
བླ་མ་མཇལ་ཚེ་བོད་པས་སྙིང་རྗེ་ཟེར།།
རྐུན་ཇག་མཐོང་དུས་ཁོང་ཚོས་སྙིང་རྗེ་བསམ།།
ཚིག་སྐམ་སྙིང་རྗེ་གླེང་མཁན་བོད་པ་ཚང་།།
དོན་དམ་སྙིང་རྗེ་ཟེར་བ་ཁྱེད་ཚོར་དབེན།།
ཞིམ་པོའི་དཀར་ཟས་ལོངས་སུ་མ་སྤྱད་པར།།
སྲོག་འཕྲོག་ཤ་ཟ་ཁྲག་འཐུང་ལས་ལ་འབུངས།།
སྤང་དགོས་འཚེ་བ་མ་སྤང་རྟག་ཏུ་སྤྱད།།
མི་དགོས་ཁ་ནས་སྙིང་རྗེ་ཡང་ཡང་གླེང་།།
ཁ་བཤད་ལག་ལེན་མེད་པའི་བོད་པ་ཚང་།།
དམར་ཟས་རྒྱུན་དུ་སྤྱོད་པའི་ང་ཚོ་ཚང་།།
གཏི་མུག་ཞིང་ཁམས་ཉུལ་བའི་རྨོངས་ཕྲུག་ཚང་།།
ཉེས་སྐྱོན་མཐའ་དག་འཛོམས་པའི་སྙིང་རྗེ་ཚང་།།