གྲྭ་བསྟན་པ་དར་རྒྱས་ལགས་སྐུ་གྲོངས་ཡོད་པ་རེད།

འདི་ལོའི་ཕྱི་ཟླ་༣ ཚེས་༣༠ རང་ལུས་མེར་བསྲེག་གིས་རྒྱ་ནག་གཞུང་ལ་ངོ་རྒོལ་བྱེད་མཁན་ མདོ་སྨད་རྒྱལ་རོང་ཚོ་བདུན་ཀིརྟི་དགོན་པའི་གྲྭ་བསྟན་པ་དར་རྒྱས་ལགས་དེ་རིང་རྔ་པ་ཁུལ་གྱི་སྨན་ཁང་ནས་འདས་གྲོངས་སོང་ཡོད་པ་དང་། ཁོང་གི་ཕུང་པོ་ཡང་རྒྱ་ནག་གཞུང་གིས་ནང་མིར་རྩིས་སྤྲོད་མ་བྱས་པར་མེར་བསྲེག་བཏང་འདུག

དྷ་ས་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས་གནས་ཚུལ་མཁོ་སྤྲོད་བྱས་པའི་ནང་འཁོད་དོན།  ༢༠༡༢ ཟླ་ ༣ ཚེས་ ༣༠
ཉིན་མདོ་སྨད་རྒྱལ་རོང་ཚོ་བདུན་ཀིརྟི་དགོན་པའི་གྲྭ་བསྟན་པ་དར་རྒྱས་དང་འཆི་མེད་དཔལ་ལྡན་གཉིས་ཀྱིས་རང་ལུས་མེར་སྲེག་བཏང་ནས་རྒྱ་ནག་གཞུང་ལ་ངོ་རྒོལ་སྐད་འབོད་གནང་ཡོད་ལ།
གྲྭ་འཆི་མེད་དཔལ་ལྡན་ཕྱི་ཟླ་༣ ཚེས་ ༣༡
ཉིན་འདས་གྲོངས་སུ་གྱུར་ཡོད་མོད།
བསྟན་པ་དར་རྒྱས་ལགས་ད་བར་གསོན་ཙམ་གྱི་གནས་སྟངས་ལྷག་ཡོད་ནའང་།
ཕྱི་ཟླ་ ༤ ཚེས་ ༧ ཉིན་གྱི་བོད་ནང་གི་སྔ་དྲོའི་ཆུ་ཚོད་ ༩།༢༣
ཙམ་ལ་རྔ་པ་ཁུལ་གྱི་སྨན་ཁང་ནང་ནས་གཟི་བརྗིད་ལྡན་པའི་ངང་ཁོང་ཡང་སྐུ་གྲོངས་ཡོད་ཀྱང་ཁོང་གི་སྐུ་ཕུང་ནང་མི་དང་དགོན་པར་སྤྲོད་རྒྱུའི་རེ་འདུན་ཤུགས་ཆེ་ཞུས་ནའང་།
རྒྱ་གཞུང་གིས་དང་ལེན་མ་བྱས་པར་ཉིན་རྒྱབ་ཀྱི་ཆུ་ཚོད་ ༡
ཙམ་ལ་མེར་བསྲེག་བཏང་སྟེ་ཕྱི་དྲོའི་དུས་ཚོད་ ༤
ཙམ་ལ་རུས་ཐལ་ཞིག་འབྲེལ་ཡོད་ལ་སྤྲད་པ་དེར་ཡང་མི་ཆོག་པ་མང་པོ་ཞིག་ལ་ཁས་ལེན་གྱིས་མཛུབ་ཐེལ་རྒྱག་དགོས་བྱུང་འདུག

དེ་རྗེས་ཁོང་གི་རུས་ཐལ་ཚོ་བདུན་ཀིརྟི་དགོན་པའི་ནང་གདན་འདྲེན་ཞུས་སྐབས་ཀྱང་དྲག་ཆས་ཉེན་རྟོག་པ་སོགས་རླངས་འཁོར་ཆེ་བ་གསུམ་གྱིས་རྗེས་འདེད་བྱས་ཡོད་ལ།
དགོན་པའི་གྲྭ་མང་གིས་ཁོང་གི་རྗེས་འཇུག་གི་ཆོ་ག་ཁག་སྒྲུབ་བཞིན་ཡོད་འདུག
དེང་སྐབས་ཚོ་བདུན་ཀིརྟི་དགོན་པའི་ཐག་ཉེར་ཡོད་པའི་ཆུའི་ཕར་ཕྱོགས་སུ་དམག་མི་དང་དྲག་ཆས་ཉེན་རྟོག་པ་སོགས་འབོར་ཆེན་ཞིག་རྒྱུན་སྡོད་ཀྱིས་དམག་སྦྱོང་འདྲ་མིན་བྱེད་བཞིན་ཡོད་འདུག །