སྦེལ་ཀོབ་ཏུ་སྨོན་ལམ་དགོང་ཚོགས།
ཟླ་འདིའི་ཚེས་ ༥ ཉིན་རྒྱ་གར་ལྷོ་ཕྱོགས་སྤེལ་ཀོབ་ས་གནས་གཞོན་ལྷན་དང་བུད་མེད་ལྷན་ཚོགས་གཉིས་ཀྱི་གོ་སྒྲིག་འོག ཁམས་འབྲི་ནས་ཡིན་པའི་རྩོམ་པ་པོ་དགུ་འགྲུབ་ཀྱིས་བོད་བསྟན་སྲིད་རང་དབང་ཆེད་སྐུ་ལུས་མེ་རུ་སྤར་ནས་འདས་གྲོང་སོང་བར་གདུང་སེམས་མཉམ་བསྐྱེད་ཆེད་སྨོན་ལམ་དགོང་ཚོགས་ཚུགས་ཤིག་འཚོགས་ཡོད་པ་རེད།
སྨོན་ལམ་དགོང་ཚོགས་དེའི་ཐོག་གོ་སྒྲིག་པས་རང་ལུས་མེར་སྲེག་གཏོང་མཁན་དགུ་འགྲུབ་ཀྱིས་བཞགས་པའི་ཞལ་ཆེམས་ཁག་དང་། འབོད་སྒྲ་བཅས་སྒྲོགས་སྦྱང་གནང་བ་དང་སྦྲགས། ཁོང་གི་ངོ་སྤྲོད་མདོར་བསྡུས་དང་། ད་ལྟའི་བོད་ནང་གི་གནས་སྟངས་བཅས་འགྲེལ་བཤད་བྱས་ཡོད་པ་རེད།
གསར་འགོད་པས་སྨོན་ལམ་དགོང་ཚོགས་ཐོག་བཅར་བའི་བསོད་ནམས་ལ་བོད་རང་ལུས་མེར་སྲེག་གཏོང་མཁན་གྱིས་ཞལ་ཆེམས་ཐོས་སྐབས་ཁྱེད་ལ་སེམས་ཚོར་གང་འདུག་ཅེས་དྲིས་པར། ཁོས་ངས་བོད་ནང་གི་རྒྱལ་གཅེས་དཔའ་བོ། རང་ལུས་མེར་སྲེག་གཏོང་མཁན་དག་གིས་ཞལ་ཆེམས་བཞག་པ་དེ་ཚོ་གོ་སྐབས། དངོས་གནས་དྲང་གནས་སེམས་ལ་བཤད་མི་ཤེས་པ་ཞིག་རེད། ཁོང་རྣམ་པའི་སྙིང་སྟོབས་དང་ཆོད་སེམས་ནི་བསམ་གྱིས་མི་ཁྱབ་པ་ཞིག་རེད། ཁོང་རྣམ་པས་ཞལ་ཆེམས་བཞག་པ་ནང་བཞིན་ང་ཚོ་རྒྱ་གར་དང་རང་དབང་ལུང་པར་ཡོད་པ་ཚོས་བོད་སྤྱི་པའི་དོན་ལ་ལས་ཀ་བྱེད་དང་བྱེད། ༸རྒྱལ་བ་རིན་པོ་ཆེ་དང་རང་ལུས་མེར་སྲེག་གཏོང་མཁན་ཁོང་རྣམ་པ་ཚོའི་བཀའ་དྲིན་ལ་བརྟེན་ནས་ད་ལྟ་བོད་དོན་འདི་འཛམ་གླིང་ཐོག་གནས་ཐུབ་པ་རེད། དེ་གཙོ་བོ་རྒྱལ་གཅེས་དཔའ་བོ་དཔའ་མོ་ཁོང་རྣམ་པའི་བཀའ་དྲིན་རེད། ཅེས་བརྗོད་སོང་། སྦེལ་ཀོབ་ས་གནས་གཞོན་ལྷན་བུད་མེད་ལྷན་ཚོགས་གཉིས་ཀྱི་བོད་ནང་ཛ་དྲག་གི་གནས་ཚུལ་ནམ་བྱུང་ལ་སྨོན་ལམ་གསོག་སྒྲུབ་ཀྱི་ལས་འགུལ་གོ་སྒྲིག་བྱེད་ཀྱི་ཡོད་པ་རེད།
མེ་སོར་གསར་འགོད་པས།
