རྒྱུ་དག་མེད་པའི་ང་།།
གངས་ཆུ་དང་མོའི་ཟུང་ཁྲག་དེ།།
དུག་སྦྲང་ལྕགས་མཆུས་འཇིབ་ནས་སོང་།།
སྦྲང་དཀར་རྩམ་པའི་ཉིང་ཁུ་དེ །།
འཇོ་བག་ཅན་གྱིས་འཇིབ་ནས་ཐལ །།
ད་ལྟའི་ཟུང་ཁྲག་དམར་པོ་ནི།།
ས་འོག་འདམ་ཆུའི་དྲི་ངན་བྲོ།།
ད་ལྟའི་ལུས་ཀྱི་ཤ་རྒྱས་ལ།།
སྔོ་ཚལ་རིགས་ཀྱི་དུག་རྫས་ཁྱབ །།
གླད་པ་དཀར་པོའི་དཀྱིལ་འཁོར་རུ །།
གཡོ་བྱོས་ངན་པའི་འཁོར་ལོ་བསྐོར །།
དམར་ཆུང་སེམས་ཀྱི་རྡོ་རིང་ལ།།
ལ་རྒྱ་མེད་པའི་ཁྱི་གཟུགས་སྐྲུན །།
སྐྱོ་བྱུང་ཧ་ཅང་སྐྱོ་བྱུང་།།
བཙན་པོ་མི་ཡི་གདུང་ཞིག །
ཁྱི་ལས་སྡུག་ཅིག་ཆགས་པར །།
བསམ་པའི་ཡུལ་ལ་མ་བྱུང་།།
སྤུན་ཟླའི་གཅེར་བའི་སྐུ་སྲོག །
དམར་པོ་མེ་ལ་ཕུལ་ཡང་།།
རྒྱང་རིང་ས་མཐའི་ཡུལ་ནས།།
ཁྱི་སྐད་ཙམ་ཡང་མི་ཐུབ།།
