ས་སྐྱ་སྨོན་ལམ་ཆེན་མོ་མཇུག་བསྒྲིལ་ཡོད་པ་རེད།
དཔལ་ལྡན་ས་སྐྱ་པའི་སྨོན་ལམ་ཆེན་མོ་ཐེངས་ཉེར་གཅིག་པ་དེ་གདན་ས་བཞིས་གོ་སྒྲིག་འོག ཕྱི་ཟླ་༡༡ པའི་ཚེས་༢༢ ནས་ཕྱི་ཟླ་༡༢ པའི་ཚེས་༡ བར་གནས་མཆོག་ལུམ་བྷའི་ཚལ་དུ་ཚོགས་ཡོད་པ་རེད།
དེ་ཡང་ཐུབ་བསྟན་རྒྱལ་མཚན་གྱིས་གནས་ཚུལ་འགྲེལ་བརྗོད་གནང་བ་ལྟར་ན། འདི་ལོ་སྨོན་ལམ་ཆེན་མོ་ཚོགས་མགོན་དུ་དཔལ་ས་སྐྱའི་ཁྲི་ཐོག་ཞེ་གཅིག་པ་ཆེན་པོ་སྐྱབས་མགོན་༸གོང་མ་བདག་ཁྲི་རིན་པོ་ཆེ་མཆོག་དང་ཕོ་བྲང་རྣམ་གཉིས་ཀྱི་གདུང་སྲས་རྣམ་པ་གཙོས་པའི་གཞན་ཡང་བླ་སྤྲུལ་དགེ་བཙུན་དབུས་པའི་འདུས་པ་གསུམ་སྟོང་དྲུག་བརྒྱ་ཡས་མས་ཞིག་གིས་ཉིན་གྲངས་བཅུའི་རིང་འཕགས་པའི་བཟང་པོ་སྤྱོད་པའི་སྨོན་ལམ་དང་མཚན་བརྗོད་སོགས་གསུངས་ཡོད་འདུག
ཁ་སང་སྨོན་ལམ་ཆེན་མོ་ཉིན་མཐའ་མར་སྐྱབས་མཆོག་༸གོང་མ་བདག་ཁྲི་རིན་པོ་ཆེ་མཆོག་ གིས་བལ་ཡུལ་གནས་བསྡོད་བོད་པ་དང་ཧི་མ་ལ་ཡའི་མི་རིགས་གཙོ་བོ་གྱུར་པའི་ཆོས་ཞུ་ སྟོང་ཚོ་བཞི་ལྷག་ལ་ཆོས་འབྲེལ་ཚེ་དབང་གནང་ཡོད་འདུག སྐབས་དེར་བདག་ཁྲི་རིན་པོ་ཆེས། ཆོས་ཞུ་བར་ཐོག་མ་ཀུན་སློང་ཀུན་སྤྱོད་སོགས་ལེགས་པོ་གསལ་བཏབས་དགོས་པ་དང་རང་ཉིད་ཀྱིས་ཆོས་སྒྲུབ་ནས་ཆོས་པ་རྣམ་དག་ཞིག་ཡོང་དགོས་པ་དང་དེ་ཡོངས་བར་ཐོག་མ་རང་ཉིད་མི་ཡ་རབས་ཤིག་ཡོང་དགོས་སྐོར་སོགས་གསུངས་ཡོད་པ་རེད། དེ་བཞིན་བོད་བསྟན་སྲིད་མི་རིགས་ཀྱི་ཆེད་མི་གྲངས་བརྒྱར་ཉེ་བའི་སྐུ་སྲོག་མེ་མཆོག་བྱས་ཡོད་པས་དེ་དག་ལ་གདུང་སེམས་མཉམ་བསྐྱེད་ཞུ་རྒྱུ་དང་། དེ་དག་གི་ཆེད་ཚང་མས་ཐུགས་སྨོན་སོགས་རྒྱ་མི་ཆུང་གནང་དགོས་སྐོར་ཡང་གསུངས་ཡོད་པ་རེད།
ས་སྐྱ་སྨོན་ལམ་འདི་ཕྱི་ལོ་༡༩༩༢ ནས་དབུ་འཛུགས་གནང་ནས། ད་བར་ལོ་ལྟར་བཞིན་གནས་མཆོག་ལུམ་བྷའི་ཚལ་དུ་གདན་ས་ཁག་གི་རེས་མོས་ཀྱིས་གོ་སྒྲིག་འོག་འཚོག་བཞིན་ཡོད་འདུག
