ང་ཚོའི་དབུ་ཁྲིད་དེ་བོད་ནང་གི་བོད་མི་ཡིན།
འཇིགས་བྲལ་བསྟན་འཛིན། སུད་སི།
དེང་སང་བོད་མིའི་ཚེ་སྲོག་བོད་དོན་གྱི་ཆེད་དུ་ཤོར་བ་ཁག་གི་ཐད་ལ་ཚང་མར་གང་དགའ་ཅི་ལེགས་ཀྱི་བསམ་ཚུལ་སླེབས་བཞིན་ཡོད་པ་རེད། དེ་བས་གུས་པ་སྒེར་གྱི་བསམ་ཚུལ་ཐུང་ཐུང་ཞིག་དོན་ཚན་དུ་ཆ་བགོས་རྒྱབ་ནས་ཞུ་རྒྱུ་ལ།
དོན་ཚན་དང་པོ། ད་བར་ཉུང་མཐར་བོད་མི་ས་ཡ་གཅིག་དང་འབུམ་གཉིས་ལས་བརྒལ་བའི་ཚེ་སྲོག་དེ་བོད་དོན་གྱི་ཆེད་དུ་ཤོར་བ་རེད། འདིའི་ནང་དེང་སང་ཚེ་སྲོག་ཤོར་བཞིན་པའི་རང་ཉིད་མེར་སྲེག་གི་དོན་རྐྱེན་དེ་ཡང་ཚུད་དགོས་ཀྱི་རེད། ཚེ་སྲོག་འདི་དག་ཤོར་སྔ་ཕྱི་ཙམ་མ་གཏོགས་ཚེ་སྲོག་ཤོར་བ་གཅིག་པ་རེད། དེར་བརྟེན་ང་ཚོས་ཚེ་སྲོག་གི་རིན་ཐང་ལ་དབྱེ་བ་ནམ་ཡང་ཕྱེ་རྒྱུ་ཡོད་མ་རེད། བཤད་སྟངས་གཞན་ཞིག་གི་ལམ་ནས་བཤད་ན། ཚེ་སྲོག་ཤོར་བ་ཕྱི་མ་དེ་ཚོ་གླེང་དུས་སྔ་མ་དེ་ཚོའི་ཚེ་སྲོག་ཤོར་བ་བརྗེད་མི་འོས་པ་རེད་ཟེར་གྱི་ཡོད་ལ། མདོར་ན་ཤོར་ཟིན་པའི་ཚེ་སྲོག་ཡོངས་རྫོགས་ལ་གཅིག་གྱུར་གྱི་རིན་ཐང་འཇོག་དགོས་ཀྱི་རེད། མ་ཟད་བོད་ནང་གི་བོད་མིར་དེ་བྱོས་དང་། དེ་མ་བྱེད་ཟེར་བའི་བཀོད་པ་གཏོང་རྒྱུའི་ཐོབ་ཐང་དེ་ང་ཚོ་བཙན་བྱོལ་བོད་མི་སུ་གང་ལ་ཡོད་མ་རེད་བསམ་གྱི་འདུག
དོན་ཚན་གཉིས་པ། ང་ཚོ་བཙན་བྱོལ་བོད་གཞུང་མང་གིས་ག་རེ་བྱེད་དགོས་རེད་ཟེར་ཡོང་དུས་ངེས་པར་ཚེ་སྲོག་འདི་དག་གིས་འབོད་སྒྲ་ག་རེ་བསྒྲགས་ཡོད་པ་དེ་ལ་ཕྱིར་བལྟ་བྱེད་དགོས་རེད། དེ་ལ་ཚེ་སྲོག་ཤོར་བ་འདི་དག་ཁོ་ནའི་འབོད་སྒྲ་གླེང་ན། བོད་བསྟན་སྲིད་གཉིས་ལ་རང་བཙན་ནམ། བོད་བསྟན་སྲིད་གཉིས་ལ་རང་དབང་དགོས་པ་སྟེ་བོད་ལ་རང་དབང་དགོས་ཟེར་བའི་འབོད་ཚིག་དེ་གླེང་ཡོད་པ་རེད། ༧གོང་ས་མཆོག་བོད་དུ་ཕེབས་འཇུག་དགོས་པའི་དེང་གི་འབོད་སྒྲ་དང་། ༡༩༥༩ ལོར་༧གོང་ས་མཆོག་བོད་ནས་བཙན་བྱོལ་དུ་ཕེབས་སྐྱེལ་ཞུས་པ་འདི་གཉིས་ཀ་ཡང་བོད་རང་བཙན་དང་བོད་རང་དབང་གི་ཆེད་དུ་རེད། དེ་མ་གཏོགས་རྒྱལ་བ་རིན་པོ་ཆེ་བོད་དུ་ཕེབས་འཇུག་དགོས་པའི་འབོད་སྒྲ་དེ་ཁོང་སྐུ་སྒེར་གྱི་གནད་དོན་དང་འབྲེལ་བའི་འབོད་ཚིག་ཞིག་མ་རེད། དེར་བརྟེན་བོད་མིས་ ༡༩༤༩ ནས་ད་བར་ཚེ་སྲོག་གིས་འབོད་བཞིན་པའི་འབོད་སྒྲ་དེ་ཇི་ལྟར་བསྒྲུབ་དགོས་མིན་དེ་དྲི་བ་ཞིག་ཏུ་གྱུར་ཡོད་པ་རེད།
དོན་ཚན་གསུམ་པ། བསྒྲུབ་བྱ་རང་བཙན་དང་རང་དབང་གང་ཡིན་རུང་སྒྲུབ་བྱེད་ཞི་བའི་འཐབ་རྩོད་ཀྱི་ལམ་དུ་བསྐྱོད་དགོས་པ་དེ་ང་ཚོའི་བགྲོད་ལམ་ཉག་ཅིག་རེད། ཡིན་ནའང་ཞི་བའི་འཐབ་རྩོད་དེ་ནང་ཆོས་ཀྱི་གཞུང་ནས་བཤད་པའི་སྤྱོད་པ་འཚེ་བ་མེད་པའམ་གཞན་གནོད་མི་བྱེད་པའི་བརྩེ་བའི་སེམས་བྱུང་ལག་བསྟར་བྱེད་པའི་དོན་དེར་གོ་རྒྱུ་ཞིག་མ་རེད། ཞི་བའི་འཐབ་རྩོད་ནི་ཕ་རོལ་པོའི་ལུས་སྲོག་ལ་རྨ་མི་གཏོད་ཀྱང་། ཕ་རོལ་པོར་ཕར་རྒོལ་བྱེད་པའི་རང་ཉིད་བློས་གཏོང་གི་ཐབས་ལམ་ཞིག་ལ་ཟེར་བ་རེད། ཞི་བའི་འཐབ་རྩོད་ཀྱི་སྐོར་ལ་འཛམ་གླིང་དུ་བྱུང་བའི་ཞི་བའི་འཐབ་རྩོད་བྱེད་ཐབས་དེ་ཚོ་བེད་སྤྱོད་པ་དང་། ཡུལ་དུས་ལ་དཔག་པའི་ཐབས་བྱུས་ལག་བསྟར་བྱེད་དགོས་པ་རེད།
དོན་ཚན་བཞི་པ། དེང་སང་བཙན་བྱོལ་བོད་གཞུང་གིས་དབུ་མའི་ལམ་གྱི་མིང་ཐོག་ནས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཟེར་བ་ཞིག་རྩོད་ཀྱི་ཡོད་པ་རེད། དུས་རྒྱུན་བོད་དོན་ལ་དངོས་འབྲེལ་དོ་སྣང་སྤྲོད་མཁན་ཞིག་ཡིན་ན་ཐབས་ལམ་འདི་བརྒྱུད་ནས་བོད་ལ་རང་བཙན་དང་རང་དབང་གཉིས་ཀ་རྩ་བ་ནས་ཐོབ་མི་སྲིད་པ་གསལ་པོ་ཆགས་ཡོད་པ་དེ་ཞིབ་རྒྱས་ཞུ་མི་དགོས་པ་བྱོས། གང་ལྟར་བོད་མིའི་ཚེ་སྲོག་གིས་གླེང་བཞིན་པའི་འབོད་སྒྲ་དེ་དེང་སང་རྩོད་བཞིན་པའི་མི་རིགས་ས་ཁོངས་རང་སྐྱོང་གི་ལམ་འདི་མིན་པ་དེ་ཧ་ཅང་གསལ་པོ་རེད། དེར་བརྟེན་ང་ཚོས་རང་གི་ལོ་རྒྱུས་དང་བོད་མིའི་མངོན་འདོད་མ་ཤོར་བའི་རྩ་དོན་གཞིར་བཞག་ཐོག་བོད་ཆོལ་ཁ་གསུམ་གྱི་ཁྱོན་དུ་རང་དབང་མང་གཙོ་དང་། འགྲོ་བ་མིའི་ཐོབ་ཐང་ཡོད་པའི་རང་སྐྱོང་དགོས་པའི་རྩ་དོན་འོག་རྒྱ་བོད་མཉམ་གནས་བྱེད་པའི་ལམ་ཞིག་ལ་དབུ་མའི་ལམ་ཞིག་ཏུ་འཇོག་དགོས་པ་དང་རྩོད་དགོས་པ་དེ་ཁ་ཚ་དགོས་གཏུག་ཆགས་ཡོད། གང་ཡིན་ཟེར་ན། རྒྱ་མིས་གྲོས་མོལ་བྱེད་ཟེར་ན་ང་ཚོས་གླེང་རིན་ཡོད་པ་ཞིག་དང་། རྒྱལ་སྤྱིའི་སྤྱི་ཚོགས་ཀྱིས་རྒྱབ་སྐྱོར་ཡོད་པ་ཞིག་གླེང་དགོས་རེད་ལ། རྩོད་དགོས་རེད། དེ་མིན་ང་ཚོས་རྩོད་བཞིན་པ་དེ་དབུ་མའི་ལམ་མི་ཆགས་པར་རྒྱ་མིའི་ལམ་ཆགས་ངེས་པ་རེད་བསམ་གྱི་ཡོད། དེར་བརྟེན་གྲོས་ཚོགས་ནས་དགོངས་པ་ཟབ་བཞེས་དང་འབྲེལ་ནས་བཀའ་ཤག་ལ་ལས་དོན་བྱེད་བདེ་བཟོ་དགོས་པ་རེད་བསམ་གྱི་འདུག ༢༠༡༠།༠༣ ནང་བཞག་པའི་དབུ་མའི་ལམ་གྱི་གྲོས་ཆོད་དམིགས་བསལ་བ་དེ་ནི་ངེས་པར་ཕྱིར་བསྡུ་བྱེད་དགོས་པ་ཞིག་རེད། དེ་ཧ་ཅང་སྦུག་དོགས་པའི་གྲོས་ཆོད་ཅིག་དང་། ལས་དོན་བྱེད་ཕྱོགས་ཀྱི་བཀག་རྡོ་ཆེན་པོ་ཞིག་ཏུ་གྱུར་ཡོད་པ་ངེས་པར་ངོས་འཛིན་དགོས་པ་ཞིག་རེད་བསམ་གྱི་འདུག
དོན་ཚན་ལྔ་པ། ཆོས་བརྒྱུད་ཆེན་པོ་བཞི་དང་། གཡུང་དྲུང་བོན་བཅས་ཀྱི་བླ་ཆེན་རྣམ་པ་དང་། ཕྱི་རྒྱལ་ཡུལ་གྲུ་གང་སར་ཆོས་ཚོགས་བཙུགས་ཏེ་ཡོད་པའི་མཁན་པོ་དང་། དགེ་བཤེས། སྔགས་པ་སོགས་མདོར་ན་གཞིས་ལུས་དགོན་སྡེ་ཁག་གིས་རེ་བ་བྱེད་ཡུལ་ཚོས་ཐུགས་དགོངས་ཡག་པོ་བཞེས་དགོས་པ་འདུག་སྙམ་གྱི་འདུག གང་ཡིན་ཟེར་ན། ཁྱེད་རྣམ་པར་དད་པ་དང་དམ་ཚིག་བཅངས་ནས་ཁྱེད་རྣམས་ཀྱི་གཅིན་ཚུན་འཐུང་བ་དང་། ཨ་རི་སྒྲོ་ལོ་དང་ཡུ་རོབ་ཡུ་རོ་སོགས་ཕུལ་རྒྱུ་མེད་ཀྱང་རང་གི་ཚེ་སྲོག་ཚུན་ཁྱེད་རྣམས་ཀྱི་དོན་དུ་གཏོང་ནུས་པའི་གཞིས་ལུས་དགོན་པ་དང་། སྡེ་མི་སེར་དེ་དག་བོད་བསྟན་སྲིད་ཀྱི་ཆེད་དུ་རྒྱ་མིས་སྡུག་སྦྱོང་མྱོང་བཞིན་ཡོད་པ་རེད། ཁྱེད་རྣམས་ནས་བོད་མི་ཞིག་ཡིན་པའི་འགན་ཁུར་འདོད་མེད་པ་སྟེ་ཁྱེད་རྣམས་ཐར་བ་དོན་གཉེར་ཡིན་ཟེར་གྱི་ཡོད་པ་དང་ཡིན་ན་དེས་ཆོག་པས། ཁྱེད་རྣམས་ནས་ཆབ་སྲིད་ཀྱི་བཀའ་མོལ་མ་གནང་ན་ཆོག་ཀྱང་། བོད་བརྒྱུད་ནང་བསྟན་རྩ་མེད་གཏོང་བཞིན་པའི་རྒྱ་མིའི་ལས་དོན་བྱེད་ཕྱོགས་དེ་ལ་དཔག་ནས། འཛམ་གླིང་དང་། རྒྱ་ནག་གཞུང་ལ་ཆོས་ལུགས་རྩ་མེད་གཏོང་བཞིན་པ་མཚམས་འཇོག་དགོས་པ་དེ་བསྟན་པ་དང་རང་གི་གདུལ་བྱའི་དོན་དུ་ག་རེ་བྱས་ནས་གསུང་ཐུབ་ཀྱི་མེད་པ་རེད། དེ་ངེས་པར་གསུང་དགོས་རེད་སྙམ། དེ་གསུང་ཐུབ་ཀྱི་མེད་ན་བསྟན་འགྲོའི་དོན་ཟེར་བ་ཡང་དགོད་བྲོའི་གནས་ལས་ཅང་རིན་ཐང་འདུག་གམ།
དོན་ཚན་དྲུག་པ། བཙན་བྱོལ་བོད་མིའི་སློབ་གྲྭ་ཁག་ཏུ་བོད་ཀྱི་སྲིད་དོན་ལོ་རྒྱུས་སྤྱི་དང་། ལྷག་པར་རྒྱ་ནག་གི་སྲིད་གཞུང་རིམ་བྱུང་གིས་བོད་དུ་བཙན་འཛུལ་དང་། དམར་གསོད། བཙན་གཡེམ་སོགས་བོད་ཀྱི་གནོད་བཅུད་གཉིས་ཀ་ཇི་ལྟར་རྩ་མེད་གཏོང་བཞིན་པའི་སྐོར་དང་། བོད་མིས་སྔ་ཕྱི་བར་གསུམ་དུ་གདོང་ལེན་ཁ་གཏད་ཇི་ལྟར་བྱས་དང་བྱེད་བཞིན་པའི་སྐོར་དེ་སློབ་ཕྲུག་ཚོར་ངེས་པར་སློབ་དགོས་ཀྱི་འདུག ད་བར་བཙན་བྱོལ་བའི་སློབ་གྲྭ་རེ་རེ་དང་། དམག་སྒར་རེ་རེ་ཚུན་ཆད་དུ་ཆོས་དགེ་རེ་གཉིས་བཙུགས་ཡོད་ཀྱང་སྲིད་དགེ་གཅིག་ཀྱང་བཙུགས་མེད་པ་དེ་རྩ་བ་ནས་བཅོས་བསྒྱུར་གཏོང་དགོས། མདོར་ན་ཕ་ཡི་ལོ་རྒྱུས་བུ་ཡིས་མ་ཤེས་ན། བུ་དགྲ་གཉེན་ངོ་མི་ཤེས་མཁན་ཅིག་ཏུ་འཚར་རྒྱུ་རེད། འདི་ཚང་མའི་ཐུགས་ལ་འཇོག་རོགས་ཟེར་གྱི་ཡོད།
དོན་ཚན་བདུན་པ། བོད་ནང་གི་བོད་མིའི་རེ་འབོད་དེ་དག་ཆབ་སྲིད་པའི་བཟོ་བཅོས་ཀྱིས་ལྷད་མ་འདྲེས་པའི་སྒོ་ནས་སྐད་རིགས་འདྲ་མིན་ཐོག་ཁྱབ་བསྒྲགས་བྱེད་པ་དང་། རྒྱལ་སྤྱིའི་ཁྱོན་དུ་དཔང་རྟགས་རང་བཞིན་གྱི་དཔེ་དེབ་འགྲེམས་སྤེལ་བྱེད་དགོས་པ་དང་། ཕྱི་རྒྱལ་ཡུལ་གྲུ་ཁག་ཏུ་ཡོད་པའི་དོན་གཅོད་ཁང་ཁག་གི་ལས་དོན་ཇི་བྱེད་ཕྱོགས་ལ་ལེགས་བཅོས་ཤུགས་ཆེན་ངེས་པར་བྱས་ཏེ་རྒྱལ་ཚོགས་ཀྱི་ལས་ཁུངས་ལྟེ་བ་དང་། འགྲོ་བ་མིའི་ཐོབ་ཐང་གི་ལས་ཁང་། རྒྱལ་སྤྱིའི་བྱིས་པའི་ལྷན་ཚོགས། རྒྱལ་སྤྱིའི་ཉེས་ཡངས་ཚོགས་པ་སོགས་གཞུང་དང་གཞུང་འབྲེལ་མིན་པའི་ཚོགས་སྡེཁག་ལ་རྒྱུན་ཆད་མེད་པར་ཛ་དྲག་གིས་ཞུ་གཏུགས་བྱེད་དགོས་པར་མཐོང་།
དོན་ཚན་བརྒྱད་པ། གཞུང་འབྲེལ་མིན་པའི་ཚོགས་པ་ཁག་གིས་ལས་འགུལ་སྤེལ་ཕྱོགས་དེ་ངེས་པར་གསར་གཏོད་ཀྱི་རང་བཞིན་ལྡན་པ་དང་། བོད་མི་མང་གི་བསམ་བློའི་མངོན་འདོད་རང་བཞིན་ལྡན་པ། བཙན་པོའི་སྙིང་སྟོབས་ཀྱི་རང་བཞིན་ལྡན་པ་ཡོངས་ཐབས་ལ་བསམ་གཞིག་བྱེད་དགོས་པ་ལས་བྱང་ཆུབ་སེམས་མཆོག་གི་གསོལ་འདེབས་རེ་འབོད་ཀྱི་དུས་ཡུན་དེ་ཡོངས་སུ་རྫོགས་པར་བྱེད་དགོས་ལ། མདོར་ན་བོད་ནང་གི་བོད་མིའི་རྣམ་དཔྱོད་གཟིགས་རྒྱང་ལ་མཐོང་ཆུང་བྱེད་པ་དེ་ངེས་པར་མཚམས་འཇོག་གིས་ང་ཚོའི་དབུ་ཁྲིད་དེ་བོད་ནང་གི་བོད་མི་ཡིན་པ་ཁ་མིན་དོན་གྱིས་ངེས་ཤེས་ཐོབ་པར་བྱས་ཏེ་ཆབ་སྲིད་ལམ་ལུགས་ལ་ཁྱོན་ཡོངས་ནས་ལེགས་བཅོས་དང་གསར་གཏོད་བྱེད་དགོས།
