ལྡི་ལི་བོད་སྒར་བསམ་ཡས་གླིང་བཙུགས་ཏེ་ལོ་ངོ་ ༥༠ འཁོར་བ།
ཟླ་འདིའི་ཚེས་ ༢༦ ཉིན་རྒྱ་གར་གྱི་རྒྱལ་ས་ལྡི་ལི་མན་ཇུ་ཀ་ཊི་ལར་རྟེན་གཞི་བྱས་པའི་བོད་སྒར་བསམ་ཡས་གླིང་དང་ལ་དྭགས་རྡ་རམ་ས་ལ་བཅས་སུ་བོད་མི་གནས་སྡོད་བྱེད་སའི་གཞིས་སྒར་བཙུགས་ཏེ་ལོ་ངོ་ ༥༠ འཁོར་བའི་དུས་དྲན་ཐོག་༧གོང་ས་མཆོག་ཕེབས་ཡོད་པ་རེད།
ཉིན་དེ་བོད་ཁྱིམ་ཉིན་སློབ་ཏུ་དུས་དྲན་སྲུང་བརྩིའི་མཛད་སྒོ་འཚོགས་པ་དང་། བོད་སྒར་བསམ་ཡས་གླིང་ས་གནས་འགོ་འཛིན་ལེགས་སྐྱེས་རྡོ་རྗེས་༧གོང་ས་མཆོག་ལ་མཎྜལ་རྟེན་གསུམ་འདེགས་འབུལ་ཞུས་གྲུབ་མཚམས་ལས་བསྡོམས་སྙན་སྒྲོན་ཞུས་ཡོད་པ་རེད།
དེ་རྗེས་སྲིད་སྐྱོང་བློ་བཟང་སེང་གེས་རྒྱ་གར་གཞུང་མང་གཉིས་ཀྱིས་བོད་མི་རྣམས་ལ་མཐུན་འགྱུར་དང་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་ཆབས་ཅིག བོད་མི་རྣམས་ད་ལྟ་རང་ཁ་རང་གསོ་བྱེད་ཐུབ་པ་དེ་རྒྱ་གར་གཞུང་གི་མཐུན་འགྱུར་དང་རྒྱབ་སྐྱོར་ལ་བརྟེན་ནས་བྱུང་བ་ཡིན། རྒྱ་གར་གེ་རྒན་གྱི་སློབ་ཁྲིད་ལམ་སྟོན་འོག་འཚར་ལོངས་བྱུང་བའི་བོད་རིགས་རྣམས་ད་ཆ་བོད་དོན་ལས་འགུལ་གྱི་འགོ་ཁྲིད་བྱེད་མཁན་ཆགས་ཡོད། བོད་དོན་ལས་འགུལ་དེ་བཞིན་རྒྱ་གར་གྱི་མཐུན་མིན་མེས་པོ་དམ་པ་གྷན་དྷི་མཆོག་གིས་འཚེ་མེད་ཞི་བའི་ལྟ་གྲུབ་ལ་གཞི་བཅོལ་ཡོད་པར་བརྟེན། བོད་མིའི་རྒྱལ་ཁ་དེ་བཞིན་རྒྱ་གར་གྱི་རྒྱལ་ཁ་ཆགས་ཡོད། ཅེས་སོགས་ཀྱི་གསུང་བཤད་གནང་གྲུབ་བསྟུན། ནང་སྲིད་བཀའ་བློན་རྒྱ་རི་སྒྲོལ་མས་ལྡི་ལི་མངའ་སྡེའི་བློན་ཆེན་ཤི་ལ་ དིག་ཤི་ཏི་(Sheila Dixit) མཆོག་གིས་གཙོས་རྒྱ་གར་གྱི་གནད་ཡོད་མི་སྣ་གཞན་རྣམས་ལ་བོད་སྒར་བསམ་ཡས་གླིང་དེ་བཞིན་ཁྲིམས་མཐུན་གཏན་འཇགས་བཟོ་རྒྱུར་རོགས་རམ་གནང་བར་ཐུགས་རྗེ་ཆེ་ཞུས་ཡོད་པ་རེད།
དེ་རྗེས་༧གོང་ས་མཆོག་གི་ཕྱག་ནས་མཛད་སྒོར་ཕེབས་པའི་རྒྱ་གར་གྱི་གནད་ཡོད་མི་སྣ་རྣམ་པར་བོད་སྒར་འདི་ཁྲིམས་མཐུན་གཏན་འཇགས་བཟོས་བའི་དྲན་རྟེན་དུ་སྟོན་པའི་སྐུ་བརྙན་རེ་གསོལ་རས་བསྩལ། ཐེངས་འདིའི་མཛད་སྒོའི་ཐོག་སྐུ་མགྲོན་གཙོ་བོ་རྒྱ་གར་གྲོས་ཚོགས་ཀྱི་འཐུས་མི་པར་ལ་དི་སིངྒ་སོ་ནེ་(Shri Pralhad Singh Sawhney) གཙོས་གྲངས་ཉུང་མི་རིགས་ཚོགས་ཆུང་གི་ཚོགས་གཙོ་ཝ་ཇ་ཧ་དི་ཧ་བྷིབ་ཨུ་ ལ་ (Mr Wajahad Habibullah) དང། བོད་གཞུང་བདེ་སྲུང་བཀའ་བློན་འབྲོང་ཆུང་དངོས་གྲུབ་སོགས་ཕེབས་ཡོད་པ་རེད། སྤྱིར་བོད་སྒར་བསམ་ཡས་གླིང་ནི་ཕྱི་ལོ་ ༡༩༦༣ ལོར་གསར་འཛུགས་བྱུང་ཡོད་པ་དང། བསམ་ཡང་གླིང་ཞེས་པའི་གཞིས་ཆགས་ཞེས་༧གོང་ས་མཆོག་གིས་བཏག་པ་ཞིག་ཡིན་འདུག ཉེ་ཆར་ལྡི་ལིའི་མངའ་སྡེའི་བློན་ཆེན་ལྕམ་སྐུ་ཤི་ལ་དིག་ཤི་ཏིས་གཞིས་ སྒར་འདི་བཞིན་ཁྲིམས་མཐུན་གཏན་འཇགས་ཆགས་རྗེས་( New Aruna nagar) ཞེས་མིང་རྟགས་ཡོད་པ་རེད།
༧གོང་ས་མཆོག་གིས་མཛད་སྒོར་ཕེབས་པའི་སྐུ་མགྲོན་རྣམ་པར་འཚམས་འདྲི་དང་སྦྲགས་བོད་ཀྱི་ཆོས་དང་རིག་གཞུང་སྦྱང་བརྩོན་དགོས་སྐོར་གསུངས་དོན། བོད་ཀྱི་ཆོས་རྒྱལ་ཚོས་དེ་དག་ལ་དོ་སྣང་བྱུང་སྟེ་རྒྱ་གར་ན་ལེནྡྲའི་མཁས་པ་བོད་ལ་གདན་ཞུས་གནང་ནས་བོད་དུ་སངས་རྒྱས་ཆོས་ན་ལེནྡྲའི་ཆོས་བརྒྱུད་དེ་བཙུགས་འདུག ད་ལྟ་བཀའ་འགྱུར་བསྟན་འགྱུར་པོ་ཏི་སུམ་བརྒྱ་ཡོད་པ་དེ་དག་བཅོམ་ལྡན་འདས་ཀྱིས་བཀའ་གནང་བའི་ཐོག་ལེནྡྲའི་མཁས་པ་གཙོ་བོར་གྱུར་བའི་རྒྱ་གར་གྱི་མཁས་པ་ཚོས་བརྩམས་པའི་གཞུང་དེ་དག་ཧ་ཅང་གལ་ཆེན་པོ་རེད་འདུག དེ་ང་ཚོའི་ཕ་མེས་ཀྱི་གཅེས་ནོར་རེད། བཀའ་འགྱུར་བསྟན་འགྱུར་དེ་དག་སྨོན་ལམ་རྒྱག་རྒྱུར་བཞག་ན་ནོར་འཁྲུལ་རེད། དེ་དག་ལ་སློབ་དེབ་ཀྱི་འདུ་ཤེས་བཞག་སྟེ་སློབ་སྦྱོང་བྱེད་དགོས། ང་ཚོ་བོད་པ་ཞིག་ཡིན་པའི་ཆ་ནས་བཤད་ནའང། གང་ལྟར་མི་རིགས་ཀྱི་ལྟ་བ་ཞེས་པ་དེ་བྱབ་ཆུང་གི་ལྟ་བ་འཁྱེར་ན་ནོར་འཁྲུལ་རེད། རྒྱུ་མཚན་ལྡན་པའི་ཐོག་ནས་མི་རིགས་ཀྱི་ཞེན་ཁོག་དང་མི་རིགས་ཀྱི་སྤོབས་སེམས་འཁྱེར་རྒྱུ་དེ་ཧ་ཅང་གལ་ཆེན་པོ་རེད། ང་ཚོའི་ཐ་སྙད་ནང་ང་རྒྱལ་དང་སྤོབས་པ་ཁག་ཁག་རེད། ང་དང་ང་ཚོ་ཧ་ལས་པ་ཡིན་ཞེས་པ་དེ་ང་རྒྱལ་རེད། དེར་སྐྱོན་ཡོད་པར་བརྟེན་མིར་མཐོང་ཆུང་བྱེད་ཀྱི་རེད། རྒྱུ་མཚན་ལྡན་པའི་ཐོག་ནས་ངས་ཐུབ་པ་དང་ནུས་ཞེས་པ་དེ་སྤོབས་པ་ཡིན་པས་དགོས་ངེས་ཤིག་ཆགས་ཡོད། སྤོབས་པ་ཡོང་རྒྱུར་རྒྱུ་མཚན་ཤེས་དགོས། དངོས་པོ་ཡར་རྒྱས་ཐོག་ང་ཚོ་བོད་པས་ཁབ་དང་གཟེར་མ་ཞིག་ཀྱང་བཟོ་ཤེས་ཀྱི་མེད། བསམ་བློའི་སྐོར་དཔེ་ཆའི་ནང་ཡོད་པ་དེར་སློབ་སྦྱོང་བྱས་ཡོད་པ་དེ་འཛམ་གླིང་སུ་གཅིིག་ལ་སྨོན་མི་དགོས་པ་ཞིག་རེད། ངོས་ཀྱིས་རྒྱ་གར་བ་ཚོར་རྟག་པར་ཁྱེད་རང་ཚོ་ང་ཚོའི་གུ་རུ་རྗེ་རེད། ཅེས་བརྗོད་ཀྱི་ཡོད། གུ་རུ་རྗེས་སོ་སོའི་གཅེས་ནོར་དེ་དག་གང་ཙམ་ལྷོད་གཡེང་ཕྱིན་ནས་དེ་ཙམ་གསལ་པོ་མེད། དེར་བརྟེན་ངོས་ཀྱིས་རྩེད་མོ་བརྩེས་ནས་རྒྱ་གར་གྱི་གྲོགས་པོ་ཚོ་ཆོས་ལ་དད་པ་ཡོད་པ་དང་ལེགས་སྦྱར་ཤོ་ལོ་ཀ་བཏོན་པ་དང་ཆབས་ཅིག་སྤོས་སྤར་ཏེ་མེ་ཏོག་ཕུལ་གྱི་ཡོད། ལེགས་སྦྱར་འདོན་གྱི་ཡོད་ཀྱང་དོན་དག་ཤེས་ཀྱི་མེད།
ང་ཚོ་བོད་པ་མང་དག་ཅིག་གིས་འདོན་པ་འདོན་གྱི་ཡོད་ཀྱང་དོན་དག་མ་ཤེས་མཁན་མང་པོ་འདུག དེར་བརྟེན་སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་རེད། བོད་ཀྱི་རིག་གཞུང་ཞེས་བརྗོད་ན་སངས་པའི་ཆོས་དང་སངས་རྒྱས་པའི་ལྟ་གྲུབ་དང་ འབྲེལ་བའི་རིག་གཞུང་ཆགས་ཡོད། དེར་བརྟེན་བོད་ཀྱི་རིག་གཞུང་བདག་པོ་རྒྱོབས་ཞེས་པ་དེ་ལྷ་མོ་དང་བཀྲིས་ཞོལ་པ་ འཁྲབ་རྒྱུ་དེ་རིག་གཞུང་ཁོ་ན་མ་རེད། ང་ཚོ་བོད་ཀྱི་རིག་གཞུང་དེ་བསམ་བློའི་ནང་གཏིང་རིང་པོ་ཞིག་གི་རིག་གཞུང་རེད་མ་གཏོགས། དེ་ལྟ་བུའི་ཞབས་བྲོ་དང་འབག་འདྲ་མིན་གྱོན་པ་དེས་རིག་གཞུང་དང་སངས་རྒྱས་ཀྱི་ཆོས་ངོས་འཛིན་གྱི་མེད། ཞབས་བྲོ་འཁྲབ་རྒྱུ་དེ་དག་རིག་གཞུང་གི་ཆ་ཤས་ཤིག་རེད་ཀྱང་གཙོོ་བོ་མིན། གཙོ་བོ་བཀའ་འགྱུར་བསྟན་འགྱུར་པོ་ཏི་སུམ་བརྒྱ་ཡོད་པ་དེའི་ནང་བཤད་ཡོད་པ་དེ་ང་ཚོས་རྡོག་སྒྲུག་རྒྱག་རྒྱུ་དེ་ཧ་ཅང་གལ་ཆེན་པོ་རེད། ལོ་གཅིག་གི་གོང་ནས་ང་ཚོས་འགོ་ཞིག་བཙུགས་ཡོད། ནམ་རྒྱུན་ང་ཚོས་བཀའ་འགྱུར་བསྟན་འགྱུར་བྱས་ཏེ་དཀྱུས་གཅིག་སྡོད་ཀྱི་ཡོད། བཀའ་འགྱུར་བསྟན་འགྱུར་ནང་ནས་ཚན་རིག་སེམས་ཁམས་རིག་པ་དང་དངོས་ཁམས་རིག་པའི་ སྐོར་ཡོད་པ་དེ་དག་སྡེ་ཚན་གཅིག་ཏུ་ཕྱེ། དེ་ནས་ལྟ་གྲུབ་སྐོར་སྡེ་ཚན་གཅིག་ཏུ་ཕྱེ། ལྷག་འཕྲོས་དེ་དག་ནང་ཆོས་རང་ཆགས་ཡོད། དེ་ལྟར་བྱས་ནས་དུམ་བུ་གསུམ་བཟོས་ན་ཞེས་པའི་ལས་འགོ་བཙུགས་ཟིན་པས་རིམ་བཞིན་ དཔེ་ཆ་འཐོན་ཡོང་གི་རེད། དེ་བཞིན་དབྱིན་ཡིག་དང་རྒྱ་ཡིག ཧིན་རྡིའི་ནང་བསྒྱུར་རྣམས་རིམ་བཞིན་བྱེད་ཀྱི་རེད། ཅེས་སོགས་ཀྱི་བཀའ་སློབ་ཟབ་རྒྱས་བཀའ་སློབ་སྩལ་ཡོད། །
