རང་ལུས་མེར་སྲེགས་གནང་མཁན་ཚོར་ཆོས་ལུགས་རིས་མེད་ཀྱི་སྨོན་ལམ།
བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་བྱང་ཕྱོགས་ཞུ་གཏུགས་ལས་འགུལ་ཚོགས་ཆུང་གི་གོ་སྒྲིག་འོག ཕྱི་ཚེས་༢༠ ཉིན་གྱི་ཞོགས་པ་གནས་མཆོག་རྡོ་རྗེ་གདན་དུ་དཔལ་སྔ་འགྱུར་རྙིང་མའི་སྨོན་ལམ་དང་སྟབས་བསྟུན་སྨོན་ལམ་ཞིག་འཚོགས་ཡོད་པ་རེད།
དེ་ཡང་སྤྱི་འཐུས་རྨོག་རུ་བསྟན་པས་གནས་ཚུལ་མཁོ་སྤྲོད་གནང་བ་ལྟར་ན། སྨོན་ལམ་ཐོག་དེར་སྟག་ལུང་རྩེ་སྤྲུལ་རིན་པོ་ཆེ་དང་། ཞི་ཆེན་རབ་འབྱམས་རིན་པོ་ཆེ། སྨན་གླིང་མཁན་རྩེ། རྣམ་གྲོལ་གླིང་ཇོ་ཀོང་རིན་པོ་ཆེ་སོགས་དབུ་བཞུགས་ཀྱིས་མཁན་བླ་འདུས་ཚོགས་བརྒྱད་སྟོང་ལྷག་དང་། ཧིན་རྡུའི་ཆོས་ལུགས་ཀྱི་སྐུ་ཚབ་དང་། ཡེ་ཤུ་ཆོས་ལུགས་ཀྱི་སྐུ་ཚབ། ཁ་ཆེ་ཆོས་ལུགས་ཀྱི་སྐུ་ཚབ། ཐེག་དམན་ཆོས་ལུགས་ཀྱི་སྐུ་ཚབ་སོགས་མཉམ་བཞུགས་ཀྱིས་བོད་བསྟན་སྲིད་ཆེད་རང་ལུས་མེར་སྲེག་གནང་བའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་ཆོས་ལུགས་སོ་སོའི་སྨོན་ལམ་ཞལ་འདོན་གནང་བ་དང་། འདུས་མང་དབུས་སུ་བོད་ནང་རང་ལུས་མེར་བསྲེགས་གནང་བའི་རྒྱལ་གཅེས་དཔའ་བོ་དཔའ་མོ་༩༧ གྱིས་སྐྱེ་བ་ནས་ཚེ་རབས་ཐམས་ཅད་དུ་མངོན་མཐོ་ལྷ་མིའི་རྟེན་བཟང་རིམ་པར་བརྒྱུད་རྫོགས་བྱང་གི་གོ་འཕང་མྱུར་དུ་ཐོབ་པ་དང་། དཔའ་བོ་དཔའ་མོ་དེ་དག་གི་ཉེ་འབྲེལ་ལྟོས་བཅས་ཀུན་ཡང་མྱ་ངན་སྡུག་བསྔལ་གྱི་མུན་པ་རབ་ཏུ་ཞི་ནས་ཆོས་མཐུན་བསམ་དོན་ཡིད་བཞིན་འགྲུབ་པའི་བསྔོ་སྨོན་སྐྱབས་འཇུག་གནང་ཡོད་པ་རེད།
མཇུག་མཐར་རྡོར་གདན་ཆོས་ལུགས་ལྷན་ཚོགས་ཀྱི་དྲུང་ཆེ་སྐུ་ཞབས་ཁཱན་མཆོག་གིས། ཆོས་ལུགས་ཚང་མས་ངོས་ནས་འགྲོ་བ་མིའི་ཐོབ་ཐང་དང་། གཞན་ཕན་སྙིང་རྗེ་ལ་བརྩི་བཀུར་དང་ཉམས་ལེན་བྱེད་ཀྱིན་ཡོད་པ་རེད། རྒྱ་མི་རིགས་ཀྱི་ནང་དུའང་ཆོས་ལུགས་འདྲ་མིན་བྱེད་མཁན་ཡོད་པ་རེད། བོད་ནང་ལ་ཆོས་དད་རང་དབང་མེད་པ་སོགས་ཀྱིས་དཀའ་ངལ་མང་པོ་སྤྲད་ཀྱིན་ཡོད་པ་རེད། རྒྱ་ནག་གཞུང་གིས་བོད་ཐོག་ལ་མནར་གཅོད་དང་དྲག་གནོན་བྱས་པས་རྐྱེན་གྱིས་མི་གྲངས་༩༧ གྱིས་རང་ལུས་མེར་བསྲེགས་བཏང་ཡོད་པ་རེད། རྒྱ་ནག་གཞུང་གི་དྲག་པོའི་གདུག་རྩུབ་ཀྱི་བྱ་སྤྱོད་དེ་ལ་ངོ་རྒོལ་ཡོད། དེ་རིང་འདིར་སྨོན་ལམ་བརྒྱབ་པ་བཞིན་རྒྱ་ནག་གཞུང་གི་དཔོན་རིགས་ཁག་གི་བསམ་བློ་ལ་འགྱུར་བ་སོང་སྟེ་འགྲོ་བ་མིའི་ཐོབ་ཐང་དང་རང་དབང་གུ་ཡངས་ཡོང་བའི་སྨོན་འདུན་ཞུ་རྒྱུ་ཡིན་ཞེས་སོགས་གསུངས་ཡོད་པ་རེད།།
