མདོ་སྨད་བླ་བྲང་དུ་རང་སྲེག་ངོ་རྒོལ།
ཟླ་འདིའི་ཕྱི་ཚེས་༡༧ ཉིན་གྱི་ཕྱི་དྲོར་བླ་བྲང་བསང་ཆུ་རྫོང་ཐོག་ཏུ་བོད་མི་གནམ་ལྷ་ཚེ་རིང་ཞུ་བ་ཞིག་གིས་རྒྱ་གཞུང་ལ་ངོ་རྒོལ་གྱིས་རང་ལུས་མེར་སྲེག་བཏང་སྟེ་སྐུ་གྲོངས་ཡོད་འདུག
དེ་ཡང་ཁོང་ནི་བླ་བྲང་བསང་ཆུ་རྫོང་རྒན་གྱ་ཡུལ་ཚོའི་རི་སྔོན་སྡེ་བ་ནས་ཡིན་པ་དང་། རང་ལོ་༤༩ ཡིན་ཞིང་ཕ་མིང་ལ་བསམ་འགྲུབ་དང་མ་མིང་ལ་བསོད་ཁོ། སྐྱེས་དམན་གྱི་མིང་ལ་འཚོ་ལོ་ཟེར་གྱི་ཡོད་པ་རེད། ཁོང་གིས་བསང་ཆུ་རྫོང་བླ་བྲང་གྲོང་ཁྱེར་གྱི་གློག་བརྙན་ཁང་ཆེན་མོའི་མདུན་ནས་རྒྱ་གཞུང་ལ་ངོ་རྒོལ་གྱིས་རང་ལུས་མེར་སྲེག་བཏང་ནས་སྐུ་གྲོངས་ཡོད་འདུག་པ་དང་།
སྐབས་དེར་ལོ་གསར་གྱི་དུས་ཚོད་དང་ཁེལ་བར་བརྟེན་སྲང་ལམ་དུ་བོད་མི་ཧ་ཅང་ཉུང་ཉུང་ཡིན་སྟབས། ཁོང་གི་སྐུ་ཕུང་ལམ་སང་བདག་པོ་རྒྱག་མཁན་བྱུང་མེད་པར་བརྟེན་རྒྱ་གཞུང་གི་ཉེན་རྟོག་པས་ སྐུ་ཕུང་དང་འཕྲུལ་རྟ་སོགས་བཙན་ཁྱེར་བྱས་ཡོད་འདུགཁོང་ལ་ཤུལ་ལུས་ཕྲུ་གུ་བཞི་ཡོད་པ་ལས་ཆེ་བ་གྲྭ་བ་ཡིན་འདུག
