ཁམས་སེར་ཤུལ་རྫོང་དུ་བོད་མི་ལྔ་རྒྱ་གཞུང་གིས་འཇུ་བཟུང་།
དེ་རིང་ཟླ་འདིའི་ཚེས་༡༠ ཉིན་ཁམས་དཀར་མཛེས་བོད་རིགས་རང་སྐྱོང་ཁུལ། སེར་ཤུལ་རྫོང་ཐོག་ཏུ་གྲྭ་པ་གསུམ་གྱིས་༧གོང་ས་མཆོག་གི་སྐུ་པར་འཕྱར་སྟེ། བོད་དོནསྐད་འབོད་དང་། རྒྱ་གཞུང་ལ་ངོ་རྒོལ་བྱས་པར་བརྟེན། གྲྭ་པ་གསུམ་དང་མི་སྐྱ་གཉིས་རྒྱ་གཞུང་གིས་འཇུ་བཟུང་བྱས་འདུག
ཟླ་འདིའི་ཚེས་༡༠ ཉིན་སྟེ་བོད་མིའི་གསུམ་བཅུའི་དུས་དྲན་ཉིན། ཁམས་དཀར་མཛེས་བོད་རིགས་རང་སྐྱོང་ཁུལ། སེར་ཤུལ་རྫོང་ཐོག་ནས་གྲྭ་བློ་བཟང་བསམ་གཏན་དང་། བསོད་ནམས་རྣམ་རྒྱལ། ཐུབ་བསྟན་དགེ་ལེགས་གསུམ་གྱིས་རང་དབང་དང་མང་གཙོ་སོགས་ཀྱི་སྐད་འབོད་བསྒྲགས་ཤིང་། འཕྲེད་དར་ཐོག་ཏུ་གོང་ས་མཆོག་གི་སྐུ་པར་གདན་ཞུས་ཀྱིས་རྔམ་སྟོན་ཁྲོམ་སྐོར་གནང་བ་དང་། སྐབས་དེར་མི་སྐྱ་བློ་བཟང་སྐལ་བཟང་དང་། ངག་དབང་རྒྱ་མཚོ་གཉིས་ཀྱིས་སྐད་འབོད་བྱས་ཏེ་དགེ་འདུན་པ་གསུམ་འཛིན་བཟུང་བྱེད་པར་བཀག་འགོག་བྱས་སྟབས་རྒྱ་གཞུང་གིས་ཉེན་རྟོག་པའི་ཁོང་ལྔ་པོ་མཉམ་དུ་འཛིན་བཟུང་བྱས་འདུག
དགེ་འདུན་པ་གྲྭ་བློ་བཟང་བསམ་གཏན་དང་། བསོད་ནམས་རྣམ་རྒྱལ། ཐུབ་བསྟན་དགེ་ལེགས་གསུམ་ནི་རྫ་ཆུ་ཁའི་མང་དགེ་དགོན་པའི་གྲྭ་པ་ཡིན་པ་དང་། མི་སྐྱ་བུ་བློ་བཟང་སྐལ་བཟང་ནི་རྫ་ཆུ་ཁའི་འབུམ་རྙིང་སྡེ་བའི་ཕ་འཇམ་དབྱངས་ཚེ་རིང་། མ་འཇམ་དབྱངས་སྒྲོལ་མ་ཟེར་བ་གཉིས་ཀྱི་བུ་ཡིན་པ་དང་། ད་ལྟ་རང་ལོ་ ༡༧ ཙམ་ཡིན་འདུག མི་སྐྱ་ངག་དབང་རྒྱ་མཚོ་ནི་རྫ་ཆུ་ཁའི་འབུམ་གསར་སྡེ་བ་ནས་ཡིན་པའི་ཕ་མིང་བསོད་སྐྱབས། མ་འདས་པོ་ཚེ་དབང་ལྷ་མོ་ཟེར་བ་གཉིས་ཀྱི་བུ་ཡིན་པ་དང་། ད་ལྟ་རང་ལོ་ ༤༡ ཡིན་འདུག མི་སྐྱ་འདི་གཉིས་དེ་སྔ་གྲྭ་པ་བྱེད་མྱོང་ཡོད་འདུག
ཕྱི་ལོ་ ༢༠༠༨ ཕྱི་ཟླ་ ༣ ཚེས་ ༡༠ ཉིན་མགོ་ལོག་ལུང་དཀར་དགོན་པའི་དགེ་འདུན་པ་དང་། རྫ་ཆུ་ཁའི་དབོན་པོ་དགོན་པ་དང་། མང་དགེ་དགོན་པ། ཀ་བཞི་དགོན་པ་བཅས་ནས་ཡིན་པའི་ལྷ་ས་སེ་ར་དགོན་པའི་དགེ་འདུན་པ་བཅུ་བཞི་ཡིས་ལྷ་སའི་བར་སྐོར་དུ་སྐད་འབོད་ཁྲོམ་སྐོར་གནང་བ་ནས་བཟུང་། རྫ་ཆུ་ཁ་ཁུལ་དུ་ངོ་རྒོལ་རིམ་པར་བྱུང་ཡོད་ལ། ད་ལྟའི་ཆར་ཡང་སེར་ཤུལ་རྫོང་གི་ཁྱབ་ཁོངས་སུ་འཕྲིན་ཕྲན་སོགས་ཕྱི་ཕྱོགས་ལ་འབྲེལ་ལམ་བྱེད་བདེ་བའི་མཉེན་ཆས་ཁག་སྔ་ས་ནས་བཀག་ཡོད་པ་རེད། མི་སྐྱ་དེ་གཉིས་དེ་སྔ་གྲྭ་པ་བྱེད་མྱོང་ཡོད་འདུག ད་ལྟ་རྫོང་ཡོངས་དམག་གིས་བསྐོར་འདུག །
གནས་ཚུལ་མཁོ་གཏོང་བ་འཇིགས་བྲལ་བསྟན་འཛིན།
