གནམ་གྱི་ཚོར་སྣང་དང་ས་ཡི་མཐོང་ཐོས།
མར་གྱི་ས་གཞི་ཐོག་ནས་ཡར་ལ་འཕུར།།
ཡར་གྱི་བར་སྣང་ཁམས་ནས་ཐད་ལ་བརྒྱུགས།།
གཡས་གཡོན་མི་རྣམས་ག་ལེར་གཉིད་ལ་ཡུར།།
སྒེའུ་ཁུང་ནང་ནས་ཕྱི་རོལ་ཡུལ་དུ་བལྟས།།།
མཁའ་ལམ་སྤྲིན་དཀར་ཐམ་ཅད་འོག་ནས་རྒྱུག།
གངས་དཀར་རི་བོས་ཐད་ནས་སུ་མཐོ་འགྲན།།
འདི་ནས་ཕར་ལ་ཅུང་ཙམ་འཕུར་འགྱུར་ན།།
ཡང་ལུང་གཙང་པོའི་འགྲམ་ལ་ཐག་ཉེ་རེད།།
གངྒའི་ཆུ་མོས་རྒྱབ་ནས་འཕྲེང་སེམས་བྱེད།།
ཇོ་མོ་གླང་མས་མདུན་ནས་ལག་གཡུག་མང་།།
མར་ལ་ལྟ་དུས་ས་གཞི་བར་ཐག་རིང་།།
དྲན་པའི་སེམས་འདུན་ཕ་ཡུལ་ཕྱོགས་ལ་ཆས།།
ནམ་མཁའི་བྱ་ལམ་གོང་མའི་ཡར་ནང་ནས།།
ཁྲི་གདུག་ཉི་མ་ཁོང་ལ་ཐད་མཇལ་བྱས།།
འདི་ནས་ཡར་ལ་ཅུང་ཙམ་བཀྱག་འགྱུར་ན།།
བརྒྱ་བྱིན་ཕོ་བྲང་རྩེ་རུ་ཐུག་སྣང་ཤར།།
ཡར་བལྟས་མཁང་དབྱིངས་ཚང་མ་སྟོང་པ་རེད།།
མར་བསྟས་སྤྲིན་པ་ཐམས་ཅད་བྲེལ་འཚུབ་འཚུབ།།
ཞབས་ཞུ་མཛེས་མ་ཟུར་ནས་འཛུམ་པའི་ཚེ།།
བརྒྱ་བྱིན་ལྷ་ཆེན་ང་རང་ཡིན་ན་བསམ།།
མཚམས་རེ་ངོ་ནག་སྤྲིན་པ་མཐུག་ཆེ་བས།།
མཁའ་གྲུ་གཡུག་རྡེབ་བྱེད་པའི་བར་གསེང་ནས།།
སྙིང་ཤ་འདར་བའི་སྐྲག་སྣང་དུ་མ་ཞིག།།
ཡ་ཁོག་དཀྱིལ་ནས་ཕན་ཚུན་འཛིང་པར་བྱས།།
གནམ་རྡོ་ས་ལ་ལྷུང་བའི་དཔེ་བཞིན་དུ།།
མར་གྱི་ས་རུ་འབབ་སའི་གྲོང་ཁྱེར་དེ།།
བལ་ཡུལ་ཡབ་བུའི་རྒྱལ་ས་དང་པོ་དེ།།
ཀ་ཐ་མན་གྲུ་གནམ་གྲུ་འབབ་ཚིགས་རེད།།
དེ་ནས་ཕར་ལ་ཅུང་ཙམ་ཕྱིན་གྱུར་ན།།
པདྨ་བཀའ་ཐང་ནང་གི་ལོ་རྒྱུས་ལྟར།།
བྱ་རྫི་བུ་ཡིས་བཞེངས་པའི་མཆོད་རྟེན་དེ།།
བྱ་རུང་ཁ་ཤོར་རྩེ་མོ་གནམ་ལ་བསླངས།།
མཆོད་རྟེན་དེའི་སྐོར་ལམ་ཕྱི་ནང་དུ།།
བལ་བོད་སུ་ཡིན་ངོ་ཐག་མ་ཆོད་པའི།།
སྣ་ཐུང་ངོ་རིལ་ཅན་གྱི་སྐྱེ་བོ་རྣམས།།
ཕྱག་མཆོད་སྐོར་ར་བྱེད་མཁན་འཚང་ཁ་རྒོད།།
ལག་ཏུ་དབྱུག་པ་གཟུང་བའི་དམག་མི་དང་།།
ཁ་ནས་མ་ཎི་འདོན་པའི་ཆོས་པ་གཉིས།།
སྐོར་ལམ་དེ་རུ་སུ་མང་མི་ཤེས་པ།།
ཆོས་པས་ཆབ་སྲིད་བྱས་པའི་ནག་ཉེས་ཤིག།
རྒྱ་ཡི་ལོ་གསར་གཏོང་བའི་བོད་མི་དང་།།
ཁྲིམས་འགལ་ནག་ཚོང་ཅན་གྱི་ཚོང་པ་རྣམས།།
འབྱོར་ལྡན་རྒྱུ་ཡི་བང་མཛོད་ཡོད་རབས་ཀྱི།།
གཏམ་རྒྱུད་དུ་མ་ཇ་ཁང་ནང་ནས་གླེང་།།
དགོན་པ་ཕར་ཆེར་གྲྭ་པས་སྟོང་བ་དང་།།
གྲྭ་བཙུན་ཕལ་ཆེར་སྡོམ་མེད་ཡིན་རབས་ཀྱི།།
ཉན་ན་རྣ་བ་ཚ་བའི་སྐད་ཆ་དང་།།
བསམ་ན་སེམས་པ་སུན་པའི་ལོ་རྒྱུས་མང་།།
མཁའ་ལམ་བརྒྱུད་དེ་རྒྱ་གར་ནས་བལ་ཡུལ་དུ་ཕྱིན་པའི་གཏམ་རྒྱུད།