ནོར་གླིང་མཐོ་སློབ་ཏུ་སྐབས་བཅུ་པའི་སློབ་འཇུག་གསལ་བསྒྲགས།
དཔྱད་རྩོམ་འགྲན་བསྡུར་གྱི་གསལ་བསྒྲགས།
ས་མིག་གསལ་བསྒྲགས།
གུ་རུ་འབུམ་ཚོགས་ཀྱི་གསལ་བསྒྲགས།
རྡོར་གདན་འདས་མཆོད་སྨོན་ལམ་སྐབས་ ༢༠ བའི་གསལ་བསྒྲགས།
བོད་ནང་རྒྱ་གཞུང་གིས་གདུག་རྩུབ་ཆེ་བའི་བཙོན་ར་མང་དུ་གཏོང་བཞིན་ཡོད་འདུག
ཉེ་ཆར་ཡུ་རོབ་ནང་རྟེན་གཞི་བྱེད་པའི་ཉམས་ཞིབ་ལྟེ་གནས་ཁང་ཞིག་གིས་བརྗོད་དོན་ལ། བར་སྣང་གི་འཁོར་སྐར་བརྒྱུད་ནས་མཐོང་གསལ་ལ་ད་ཆར་བོད་ནང་གདུག་རྩུབ་ཆེ་བའི་བཙོན་ར་མང་དུ་ཕྱིན་ཡོད་པར་བརྗོད་འདུག ཕྱི་ཚེས་༢༧ ཉིན་རྒྱ་གར་གྱི་( wion ) གསར་ཁང་གིས་གནས་ཚུལ་ལྟར་ན། ཡུ་རོབ་ནང་རྟེན་གཞི་བྱས་པའི་( Rand Europe Research Institute)ཟེར་བའི་ཉམས་ཞིབ་ཁང་གིས་བརྗོད་དོན་ལ། ད་ཆར་བོད་ནང་རྒྱ་ནག་གཞུང་གིས་གདུག་རྩུབ་ཆེ་བའི་བཙོན་ཁང་མང་དུ་གཏོང་བཞིན་ཡོད་པ་བར་སྣང་གི་འཁོར་སྐར་བརྒྱུད་ནས་ཤེས་རྟོགས་བྱུང་ཡོད་པར་བརྗོད་འདུག་ལ། དམིགས་བསལ་བོད་རང་སྐྱོང་ལྗོངས་ཟེར་བའི་ས་ཁུལ་དེའི་ནང་ཁྱོན་བཙོན་ཁང་༧༩ ཡོད་པ་དང་། བཙོན་ཁང་གི་མཚན་མོའི་གློག་སྒྲོན་གྱི་འོད་མང་ཉུང་ལ་བལྟས་ནས་ཚོད་དཔག་བྱས་དོན་ལ་བཙོན་ཁང་༡༤ ཧ་ཅང་གིས་ལྟ་སྲུང་ནན་པོ་ཡོད་པར་བརྗོད་འདུག ཕྱི་ལོ་༢༠༡༧ ཙམ་ནས་བཙོན་ཁང་ལྟ་སྲུང་ཆེད་དུ་གློག་སྒྲོན་མང་པོ་བཙུགས་ཡོད་པ་དང་། ཕྱི་ལོ་༢༠༡༩་ནས་༢༠༢༠ བར་གློག་སྒྲོན་དེ་ལས་མང་དུ་ཕྱིན་ཡོད་འདུག ཕྱི་ལོ་༢༠༢༡ ནས་༢༠༢༢ བར་སྔར་ལས་ལྡབ་མང་དུ་ཕྱིན་ཡོད་པས། བཙོན་ཁང་དེ་དག་ཧ་ཅང་གིས་ལྟ་སྲུང་ནན་པོ་བྱེད་བཞིན་ཡོད་པར་བརྗོད་འདུག བར་སྣང་གི་འཁོར་སྐར་བརྒྱུད་ནས་བཙོན་ཁང་གི་གློག་སྒྲོན་འོད་ལ་བལྟས་ནས་ཚོད་དཔག་བྱས་དོན་ལ། ད་ཆར་བོད་ནང་ཡུ་གུར་ཁ་ཆེ་མི་རིགས་ཡོད་ས་ལྟ་བུར་བཙོན་ཁང་མང་དུ་གཏོང་བཞིན་ཡོད་པ་ཚོད་དཔག་བྱེད་བཞིན་འདུག་ལ། དེ་བཞིན་སྔར་ཡོད་པ་རྣམས་རྒྱ་བསྐྱེད་བྱེད་ཀྱི་ཡོད་པ་ཡང་བརྗོད་འདུག རྒྱུ་མཚན་ནི་གློག་སྒྲོན་མང་དུ་ཕྱིན་ཡོད་པ་ནི་བཙོན་ཁང་ཆེ་རུ་བཏང་ཡོད་པ་མཚོན་གྱི་ཡོད་པ་ལས་དོན་མེད་གློག་སྒྲོན་མང་པོ་འཛུགས་དགོས་དོན་མེད་པར་བརྗོད་འདུག ཡུ་གུར་དང་བོད་གཉིས་མཚུངས་བསྡུར་བྱེད་དོན་ལ། ཉམས་ཞིབ་པས་དེ་སྔོན་ཡུ་གུར་ནང་ཤེས་ཡོན་གྱི་བསྟི་གནས་ཡིན་ཞེས་བརྗོད་ནས་དོན་ལ་བཙོན་ཁང་མང་པོ་བཙུགས་ནས་མི་མང་པོ་ཞིག་དེར་གཏོང་གི་ཡོད་པ་བཞིན། ད་ཆར་བོད་ནང་བཙོན་ཁང་མང་པོ་ཞིག་གསར་རྒྱག་བྱེད་ཀྱི་ཡོད་པ་ཚོད་དཔག་བྱེད་བཞིན་འདུག བོད་ཀྱི་ཁྱིམ་མཚེས་ས་ཁུལ་སོག་པོ་དང་ཡུ་གུར་སོགས། གྲངས་ཉུང་མི་རིགས་ཀྱི་ཆོས་ལུགས་དང་རིག་གཞུང་། དེ་བཞིན་ཧན་མི་རིགས་མ་ཡིན་མཁན་དག་ལ་རྡུང་རྡེག་ཚབས་ཆེན་བཏང་དང་གཏོང་བཞིན་པ་ལྟར་བོད་ནང་དེ་ལྟར་ཡོང་སྲིད་པའི་ཚོད་དཔག་བྱེད་ཀྱི་འདུག འོན་ཀྱང་། བོད་རང་སྐྱོང་ལྟ་བུར་མཚོན་ན་ཧ་ཅང་གིས་དམ་དྲག་ཆེ་དྲགས་པའི་དབང་གིས་གནས་ཚུལ་ཁུངས་ལྡན་རག་རྒྱུ་ཁག་པོ་ཡིན་པར་བརྟེན། ད་ཆར་བོད་ཐོག་རྒྱལ་སྤྱིས་དོ་སྣང་ཡོང་ཐུབ་ཀྱི་མེད་པ་རེད་ཅེས་བརྗོད་འདུག ཡུ་གུར་ས་ཁུལ་དུ་རྒྱལ་སྤྱིས་དོ་སྣང་ཆེན་པོ་བྱེད་བཞིན་ཡོད་པ་མ་ཟད། གནས་ཚུལ་ཡང་མང་པོ་ཞིག་ཐོན་ཡོང་གི་ཡོད་འདུག ཉམས་ཞིབ་ཁང་གི་ཉམས་ཞིབ་པ་(Ruth Harris) བརྗོད་དོན་ལ་བོད་ནང་གི་གནས་ཚུལ་ཤེས་རྟོགས་བྱེད་རྒྱུ་ཧ་ཅང་གིས་ཁག་པོ་ཡོད་པ་དང་། ཕྱི་རྒྱལ་བ་ད་ཆར་བོད་ནང་འགྲོ་རྒྱུར་སྔར་ལས་དམ་དྲག་ཆེན་པོ་ཡོད་པར་བརྗོད་འདུག དེ་བཞིན་འགྲོ་བ་མིའི་ཐོབ་ཐང་ཚོགས་པ་ཁག་གིས་བོད་ནང་བོད་མི་མང་པོ་འཇུ་བཟུང་བྱེད་པ་དང་། ཆོས་ལུགས་ཀྱི་བྱེད་སྒོ་ཁག་བཀག་སྡོམ་བྱེད་པ། བོད་པའི་ཕྲུག་གུ་མང་པོ་བཅའ་སྡོད་སློབ་གྲྭར་བཅུག་པ། བོད་ཡིག་མེད་པ་བཟོས་པ་སོགས་ཀྱི་སྐོར་ལ་གླེང་སློང་བྱེད་བཞིན་ཡོད་འདུག གསར་འགོད་པ། བསོད་ནམས་ཕུན་ཚོགས།
༄༅། །གདན་ས་དཔལ་སྤུངས་ཤེས་རབ་རྣམ་པར་རྒྱལ་བའི་གླིང་གི་རིག་གནས་མཐོ་སློབ་དོན་གཉིས་ནོར་བུའི་དགའ་ཚལ་གྱི་སྐབས་གསུམ་པའི་སྨན་རྩིས་བསྡུས་ར་བ་དང་དཀའ་བཅུ་པའི་སློབ་མ་གསར་བསྡུའི་གསལ་བསྒྲགས།
༄༅། །མཁྱེན་པའི་སྤྱན་རས་ཡངས་ཤིང་བསླབ་གསུམ་ནོར་གྱིས་ཕྱུག་པའི་རིས་མེད་དགོན་སྡེ་ཁག་གི་འགན་འཛིན་རྣམ་པ་དང་འབྲེལ་ཡོད་ལྷན་དྲུང་དུ། ཆེད་དུ་ཞུ་གསོལ། འགེངས་ཤོག་ཕབ་ལེན། འཕགས་ཡུལ་གདན་ས་དཔལ་སྤུངས་ཤེས་རབ་རྣམ་པར་རྒྱལ་བའི་གླིང་གི་རིག་གནས་མཐོ་སློབ་དོན་གཉིས་ནོར་བུའི་དགའ་ཚལ་ནི། སྤྱི་ལོ་ ༡༧༠༠ ལོར་མདོ་ཁམས་སྡེ་དགེ་ཨ་ལོའི་ཡུལ་དུ་འཁྲུངས་པ་༸བྱམས་མགོན་ཀྭན་ཏིང་ཏཱའི་སི་ཏུ་༸མ་ཧཱ་པཎྜི་ཏ་ཀུན་མཁྱེན་ཆོས་ཀྱི་འབྱུང་གནས་མཆོག་གིས་སྤྱི་ལོ་ ༡༧༢༧ ལོར་མདོ་སྔགས་རིག་གནས་ཆ་ལག་དང་བཅས་པའི་དཔལ་ཀུན་སྤུངས་པའི་གདན་ས་ཆེན་པོ་ཤར་དཔལ་སྤུངས་ཐུབ་བསྟན་ཆོས་འཁོར་གླིང་ཕྱག་བཏབ། དེའི་ཆ་ལག་ཏུ་དཔལ་སྤུངས་ལྔ་རིག་སློབ་གླིང་ཆེན་མོ་ཞེས་ཐུན་མིན་ནང་དོན་རིག་པ་དང་། ཐུན་མོང་སྒྲ་སྙན་བརྡ་སྤྲོད། བཟོ་གསོ་རྩིས་རིག་སོགས་སློབ་གཉེར་གྱི་བསྟི་གནས་གསར་དུ་བཙུགས་ཏེ་གཞིས་བྱེས་སློབ་ཚོགས་མཁས་དབང་རིམ་ཐོན་གྱིས་བོད་ཁམས་ཡོངས་ལ་རིག་གནས་ཀྱི་ཞབས་འདེགས་རྒྱ་ཆེན་སྒྲུབ་པ་ནས་བཟུང། ༸ཀྭན་ཏིང་ཏཱའི་སི་ཏུ་སྐུ་ཕྲེང་རིམ་བྱོན་གཙོས་ཡབ་སྲས་བརྒྱུད་པར་བཅས་པས་རྒྱུན་འཁྱོངས་གནང་བའི་མཛད་བཟང་མུ་མཐུད་རྒྱུ་དགོས་གལ་ཆེར་གཟིགས་ཀྱིས། ༸བྱམས་མགོན་རྡོ་རྗེ་འཆང་ཀྭན་ཏིང་ཏཱའི་སི་ཏུ་པདྨ་དོན་ཡོད་གྲུབ་པ་མཆོག་གིས་སྤྱི་ལོ་ ༢༠༡༡ ལོར་འཕགས་ཡུལ་གདན་ས་དཔལ་སྤུངས་ཤེས་རབ་གླིང་དུའང་སྨན་དང་རྩིས། བརྡ་སྤྲོད་སོགས་ཐུན་མོང་རིག་གནས་སློབ་གཉེར་གྱི་བསྟི་གནས་གསར་དུ་བཙུགས་པར་མཛད།༸བྱམས་མགོན་རྡོ་རྗེ་འཆང་མཆོག་ནས་བོད་ཀྱི་རྩ་ཆེའི་རིག་གནས་མི་ཉམས་རྒྱུན་གནས་ལ་དགོངས་པ་ཆེར་གཟིགས་ཀྱིས་རིས་མེད་ཆོས་སྡེ་ཁག་གི་དགེ་འདུན་པ་རྣམས་སློབ་ཞུགས་ཀྱི་གོ་སྐབས་འབུལ་རྒྱུ་གལ་ཆེའི་བཀའ་སློབ་ལམ་སྟོན་ལྟར་སྤྱི་ལོ་ ༢༠༡༡ ནས་ ༢༠༡༧ བར་སྐབས་དང་པོའི་གསོ་རྩིས་ཆེད་སྦྱོང་སློབ་གཉེར་བ་གྲངས་ ༥༠ སློབ་ཐོན་ཟིན་པ་དང་། སྤྱི་ལོ་ ༢༠༡༧ ནས་ ༢༠༢༣ བར་སྐབས་གཉིས་པའི་གསོ་རྩིས་ཆེད་སྦྱོང་སློབ་གཉེར་བ་གྲངས་ ༣༧ སློབ་ཞུགས་ཀྱིས་སློབ་པ་མཐར་སོན་ལ་ཉེ།ད་ལམ་སྐབས་གསུམ་པ་ལའང་རིས་སུ་མ་མཆིས་པའི་དགོན་སྡེ་ཁག་གི་དགེ་འདུན་ཞལ་གྲངས་ ༢༥ ལ་གོ་སྐབས་འབུལ་གཏན་འཁེལ་བ་ལགས་ན་རིས་མེད་དགོན་སྡེ་གང་ཞིག་ནས་གཞུང་འབྲེལ་གྱིས་གཏང་བའམ། རང་ཁུངས་དགོན་སྡེའི་ཆོག་མཆན་འོག་དོན་གཉེར་ཆེ་བའི་སྒེར་པ་སུ་ཞིག་ཞུགས་འདོད་ཡོད་པ་རྣམས་ཀྱིས་གཤམ་འཁོད་ཁ་བྱང་ཐོག་འབྲེལ་བ་གནང་རྒྱུ་དང་། གསོ་རྩིས་རིག་པའི་གཞུང་ལུགས་ལ་སློབ་གཉེར་གྱི་རྨང་གཞིའི་མཐུན་རྐྱེན་བརྡ་སྤྲོད་ཚུད་རྒྱུགས་མཐོ་སློབ་ཀྱི་ལམ་ལུགས་གཞིར་བཟུང་གདམ་གསེས་བྱ་རྒྱུ་ཡིན། གལ་ཏེ་ཚུད་རྒྱུགས་ཀྱི་བརྒྱ་ཆ་མ་ལོན་ཚེ་སྐབས་གསུམ་པའི་སློབ་ཁོངས་སུ་ཚུད་ཐབས་མེད།སློབ་ཞུགས་པའིི་མཚན་ཐོ་ཁ་གསལ་སྤྱི་ལོ་ ༢༠༢༣ ཟླ་ ༧ ཚེས་ ༢༠ སྔོན་ཚུད་ངེས་པར་འདིར་ལས་ཁུངས་སུ་འབྱོར་བ་གནང་དགོས། སློབ་མའི་གྲངས་ཚད་ཀྱི་མཚན་ཐོ་འབྱོར་སྔ་ཕྱིའི་གོ་རིམ་ལྟར་སློབ་ཞུགས་ཆོག་རྒྱུ་དང་། མཚན་ཐོ་དུས་ཐོག་མ་འབྱོར་ཚེ་སྙན་ཞུ་རྩིས་མེད་འགྲོ་རྒྱུ་ཡིན་པ་བཅས་ཐུགས་ལ་འཇོག་གནང་དགོས།ཚུད་རྒྱུགས་གྲུབ་འབྲས་ལེགས་སོན་ཐོག་སློབ་ཞུགས་ཟིན་རྗེས་དངོས་གཞི་སློབ་སྦྱོང་གི་མཐུན་རྐྱེན་ཆ་ཚང་གདན་སའི་མཐོ་སློབ་ནས་སྔར་རྒྱུན་ལྟར་འབུལ་རྒྱུ་དང་། སློབ་མ་རང་ངོས་ནས་ཆ་རྐྱེན་གང་དགོས་དང་སློབ་ཁྲིད་ཀྱི་བརྒྱུད་རིམ་དང་བཅའ་ཁྲིམས་སོགས་མཁྱེན་པར་འདོད་ཚེ་གཤམ་འཁོད་འགན་འཛིན་རྣམ་པའི་ཁ་བྱང་ཐོག་འབྲེལ་བ་གནང་རོགས་ཞུ། དཔལ་སྤུངས་རིག་གནས་མཐོ་སློབ་དོན་གཉིས་ནོར་བའི་དགའ་ཚལ་གྱི་ཡིག་ཚང་ནས།སྤྱི་ལོ་ ༢༠༢༣ ཟླ་ ༦ ཚེས་ ༡༠ ཉིན། སློབ་སྤྱི་གཞོན་པ། སྨན་དགེ་སྐྱིད་ལུས། +91(0) […]
ཤར་ནུབ་ཀྱི་ཁེ་ཕན་དང་སྲིད་དོན།
རྩོམ་སྒྲིག་པའི་གཏམ། བོད་ཀྱི་བང་ཆེན་གསར་ཤོག་སྤྱིའི་འདོན་ཐེངས། ༩༥༢། འཛམ་གླིང་ཤར་ཕྱོགས་ཀྱི་རྒྱལ་ཁབ་ཕལ་མོ་ཆེས་གནས་སྐབས་ཀྱི་ཁེ་ཕན་དོན་གཉེར་གཙོ་བོ་བྱེད་པ་དང་། ཨ་རིས་གཙོས་ནུབ་ཕྱོགས་ཀྱི་རྒྱལ་ཁབ་ཁག་གིས་འཕྲལ་གྱི་བློས་གཏོང་ལ་བརྟེན་ནས་ཕུགས་ཀྱི་ཁེ་ཕན་གཙོ་བོར་བཟུང་བའི་སྲིད་དོན་གྱི་དམིགས་ཡུལ་ཞིག་ལག་བསྟར་བྱེད་བཞིན་ཡོད་པས། མིག་སྔར་འཛམ་གླིང་ཤར་ནུབ་གཉིས་ལས་ཕྱིའི་དངོས་པོའི་དཔལ་ཡོན་ཡར་རྒྱས་འགྲོ་སྟངས་ཀྱི་ཐོག་ནས་ཀྱང་རོབ་ཙམ་རྟོགས་ཐུབ་པ་ཞིག་རེད། ཤར་ཕྱོགས་སུ་མི་འབོར་མང་ཞིང་ཚན་རིག་དང་ལག་རྩལ་ཡར་རྒྱས་ཀྱི་ཐོག་ནས་ད་ལྟའི་ཆར་ཡང་ནུབ་ཕྱོགས་པ་དང་འགྲན་སྡུར་བྱེད་ཐབས་བྲལ་ཡོད། མང་པོ་ཞིག་གིས་དུས་རབས་ཉེར་གཅིག་པ་ཨེ་ཤི་ཡར་དབང་བ་ཞིག་ཡིན་པའི་ལྟ་ཚུལ་རྗོད་མཁན་ཡོད་པ་དང་། དེ་ཡང་གཙོ་བོ་ནུབ་ཕྱོགས་སུ་ཚན་རིག་དང་ལག་རྩལ་ལ་བརྟེན་ནས་དཔལ་འབྱོར་ཡར་རྒྱས་ཕྱིན་ཟིན་པས། རྒྱ་གར་དང་། རྒྱ་ནག་གཉིས་ཀྱིས་གཙོས་ཤར་ཕྱོགས་སུ་ཡར་རྒྱས་འགྲོ་རྒྱུ་ད་དུང་ལྷག་ཡོད་པའི་དོན་རེད། འོན་ཀྱང་དུས་རབས་ཉེར་གཅིག་པའང་ནུབ་ཕྱོགས་པར་དབང་བ་ཞིག་ཏུ་འགྱུར་ངེས་ཡིན་པ་འདྲ།ནོ་སྦེལ་ཞི་བདེའི་གཟེངས་རྟགས་བཞེས་མཁན་འབར་མའི་ལྕམ་ཨང་སན་སུ་ཀེ་ལ་ནུབ་ཕྱོགས་པས་བསྟོད་བསྔགས་མང་པོ་བཏང་བ་དང་། འབར་མའི་དམག་གཞུང་ལ་ཁ་རྡུང་དང་དཔལ་འབྱོར་གྱི་ཉེས་ཆད་ཡང་ཡང་བཏང་། ལྕམ་ཨང་སན་སུ་ཀེ་བཙོན་ཁང་ནས་གློད་གྲོལ་ཐོབ་རྗེས་འབར་མའི་ནང་འོས་བསྡུའི་ལམ་ནས་མཐོ་རིམ་དཔོན་རིགས་ཀྱི་གོ་གནས་སུ་སླེབས་ཀྱང་། དོན་དམ་པའི་དབང་ཆ་ཁོང་ལ་མེད་པ་ཤེས་བཞིན་དུ་ནུབ་ཕྱོགས་པས། འབར་མའི་རོང་གྷ་ཡའི་གྱེན་ལོག་དང་། དམག་དཔུང་གིས་དྲག་གནོན་བྱེད་སྐབས་ཁོང་གིས་གཞུང་གི་དྲག་གནོན་ལ་བཀག་འགོག་མ་བྱས་པར་བསྙད་ནས་ཁ་རྡུང་ཡང་ཡང་བཏང་བ་དང་། གནད་ཡོད་རེ་ཟུང་གིས་ཁོང་ལ་ཕུལ་བའི་ནོ་སྦེལ་ཞི་བདེའི་གཟེངས་རྟགས་ཕྱིར་བསྡུ་དགོས་པའི་བསམ་ཚུལ་ཡང་བཏོན་ཡོད། ལྕམ་ཨང་སན་སུ་ཀེ་ལ་ཕྱོགས་གཅིག་ནས་མིང་ཙམ་ལས་དོན་གྱི་དབང་ཆ་མེད་པ་དང་། ཕྱོགས་གཅིག་ནས་ནུབ་ཕྱོགས་པས་མཛུབ་མོས་གར་བསྟན་ཤར་བྱེད་ཐུབ་པ་ཙམ་གྱིས་འབར་མ་རྒྱལ་ཁབ་ལ་དེ་ཙམ་ཕན་ཐོགས་ཡོད་མེད་ཀྱང་ངེས་པར་དུ་བལྟ་དགོས་ངེས་རེད།ལྕམ་ཨང་སན་སུ་ཀེ་ལ་ནུབ་ཕྱོགས་པའི་རྒྱབ་སྐྱོར་མེད་པ་གསལ་པོར་གྱུར་རྗེས་འོས་བསྡུའི་ཐོག་ནས་མང་གཙོ་ཚོགས་པར་རྒྱལ་ཁ་ཆེན་པོ་ཐོབ་ཀྱང་།འབར་མའི་དམག་དཔུང་གིས་སྲིད་དབང་བཙན་འཕྲོག་དང་། ལྕམ་ཁོང་ཡང་ཡུན་རིང་བཙོན་འཇུག་བྱ་རྒྱུའི་ཁྲིམས་ཐག་བཅད། ད་ལྟའི་ཆར་ནུབ་ཕྱོགས་པས་དེ་ལ་ཡ་ལན་དང་གདོང་ལེན་ནན་པོ་ཞིག་གང་ཡང་བྱེད་ཀྱི་མེད་པས། འབར་མའི་ནང་དྲག་པོའི་དཔུང་གིས་གང་བྱེད་ཉག་གཅིག་ཏུ་གྱུར་ཡོད། ད་དུང་ཨི་རག་ལ་མཚོན་ན་རྡུལ་ཕྲན་མཚོན་ཆ་ཡོད་པར་བསྙད་དེ་ཨ་རིས་དཔུང་འཇུག་བྱས་ནས། སཱ་དྷམ་ཧོ་སན་གྱི་སྲིད་གཞུང་མགོ་རྟིང་བསློགས་པ་དང་། མང་གཙོའི་སྲིད་གཞུང་ཞིག་བཙུགས་ཡོད་ཅེས་ཡང་ཡང་ཁྱབ་བསྒྲགས་བྱས་ཀྱང་། དོན་དུ་ཨ་རིས་དམག་དཔུང་ཨི་རག་ནས་ཕྱིར་འཐེན་བྱས་མ་ཐག ཐ་ལི་བྷན་དྲག་པོའི་ཤོག་ཁག་གིས་ཨི་རག་གཞུང་བཙན་འཕྲོག་བྱས་ནས་ད་ཆ་གནའ་སྔ་མོ་ལས་ཀྱང་སྡུག་ཏུ་ཕྱིན་ཡོད། འོན་ཀྱང་ཨི་རག་ནང་ཡོད་པའི་སྣུམ་སོགས་ཐོན་ཁུངས་ཀྱི་ཐོག་ནས་ཨ་རི་ཕྱུག་པོར་གྱུར་ཡོད་པ་ནི་ཡོངས་གྲགས་ཡིན། དེ་དང་དེས་མཚོན་པའི་གནས་སྟངས་སྣ་ཚོགས་ཤིག་ལོ་རྒྱུས་ནང་གསལ་པོ་ཡོད་པ་དང་། ནུབ་ཕྱོགས་པའི་བཤད་སྟངས་དང་བྱེད་སྟངས་གཉིས་གཏན་ནས་མི་འདྲ་བས། ཁ་ནས་ཞི་བདེ་དང་འཆམ་མཐུན་གྱི་འབོད་སྒྲ་ལ་བརྟེན་ནས་དོན་དུ་ཨ་རིས་གཙོས་འབྲེལ་ཡོད་རྒྱལ་ཁབ་ཁག་གི་ཁེ་ཕན་ཁོ་ན་དོན་གཉེར་བྱ་རྒྱུར་དམིགས་ཡོད། ད་ལྟའི་ཆར་ཤར་ཕྱོགས་ནས་རྒྱ་དམར་དྲག་པོའི་གཞུང་གིས་ཨ་རི་ལ་ལད་མོ་ལྟ་བུ་བྱེད་བཞིན་ཡོད་པ་ལས། གཞན་ཤར་ཕྱོགས་ཀྱི་རྒྱལ་ཁབ་ཕལ་ཆེ་བ་ནི་གནས་སྐབས་ཀྱི་ཁེ་ཕན་ཙམ་དོན་གཉེར་བྱེད་མཁན་ལྟ་བུར་གྱུར་ཡོད། རྒྱ་གར་ལ་མཚོན་ན་ས་རྒྱ་དང་མི་འབོར། ཤེས་ཡོན་སོགས་གང་ཐད་ནས་ཡར་རྒྱས་དང་རེ་བ་ཆེ་བའི་རྒྱལ་ཁབ་ཅིག་ཡིན་ནའང་། ཕྱོགས་ཚང་མར་བསྟུན་མཁས་ཁོ་ན་བྱ་རྒྱུ་ལས། སྟོབས་ཆེན་རྒྱལ་ཁབ་འགྲན་ཟླ་བྲལ་བ་ཞིག་བྱ་རྒྱུའི་འདུན་པ་དང་བློ་སྤོབས་གདེང་ཚོད་བཅས་དེ་ཙམ་མེད་པས། ནུབ་ཕྱོགས་པའི་བསམ་བློ་གཏོང་སྟངས་བཞིན་ཕུགས་ཀྱི་འཆར་གཞི་ལྡན་པའི་རྒྱལ་ཁབ་ཅིག་ཤར་ཕྱོགས་སུ་ཕལ་ཆེར་མེད་པ་ལྟ་བུར་གྱུར་ཡོད།མདོར་ན་ཤར་ཕྱོགས་ཀྱི་རྒྱལ་ཁབ་ཕལ་ཆེ་བར་ནུབ་ཕྱོགས་པའི་ཤུཌ་རྐྱེན་ཡོད་པ་དང་། རྒྱ་དམར་གཞུང་གིས་ཤྲི་ལངྐ་དང་། པ་ཀི་སི་ཐན་སོགས་འབྲེལ་ཡོད་རྒྱལ་ཁབ་ཁག་ཅིག་ལ་དཔལ་འབྱོར་ཐོག་གྱོང་གུད་ཆེན་པོ་སྤྲད་ཐུབ་ཡོད་ཀྱང་། དམག་དོན་དང་ཚན་རིག་སོགས་ཕྱོགས་ཡོངས་ནས་ནུབ་ཕྱོགས་པའི་ཤུགས་རྐྱེན་ལྟ་བུ་ཐེབས་ཐུབ་མེད། རྒྱ་ནག་གཞུང་དཔལ་འབྱོར་ཐོག་སྔོན་ཐོན་གྲས་སུ་ཚུད་ཙམ་ལས། ཨ་རི་ལྟ་བུ་སྤྱི་ཚོགས་རང་བཞིན་གྱི་ཆ་ནས་འབྱོར་ལྡན་ཆགས་ཐུབ་མེད་པས། ཨ་རི་ལ་ལད་མོ་བྱས་པ་ནི། སྟག་མཆོང་སར་ཝ་མཆོངས་པ་ལྟ་བུར་གྱུར་ཡོད། རྒྱ་ནག་གིས་ཨ་རི་ལ་ཁ་གཏད་ཀྱི་རྣམ་པ་ཙམ་བསྟན་ཡང་། དོན་དམ་པར་ཨ་རིས་ཐའེ་ཝན་ལ་རྒྱབ་སྐྱོར་གྱི་རྣམ་པ་ཆེན་པོ་བསྟན་པར་རྒྱ་གཞུང་གིས་དམིགས་བསལ་གང་ཡང་བྱེད་ཐུབ་མ་སོང་། རཱ་ཤི་ཡས་ཀྱང་ཨ་རི་ལ་ཁོང་ཁྲོ་ཟ་ནས་ཡུ་ཁུ་རེན་ལ་དམག་བརྒྱབ་པའི་བརྗོད་བབས་ནི་ཁོང་ཁྲོ་རྟ་ལ་ཟོས་ནས་ལྕག་ཚན་ཀ་བར་གཞུས་པ་ལྟ་བུར་གྱུར་ཡོད་པས། མུ་མཐུད་དུས་རབས་ཉེར་གཅིག་པ་ཡང་ཨ་རིས་སྣེ་ཁྲིད་པའི་ནུབ་ཕྱོགས་པའི་འཇིག་རྟེན་ཞིག་ཏུ་གྱུར་འདུག
དྲུག་བཞིའི་དོན་རྐྱེན་དང་བོད།
རྩོམ་སྒྲིག་པའི་གཏམ། བོད་ཀྱི་བང་ཆེན་གསར་ཤོག་སྤྱིའི་འདོན་ཐེངས། ༩༤༩། ཕྱི་ལོ་༡༩༨༩ ལོའི་ཟླ་༦ པའི་ཚེས་༤ ཉིན་རྒྱ་ནག་གི་རྒྱལ་ས་པེ་ཅིང་དུ་མཐོ་སློབ་ཁག་གི་སློབ་ཕྲུག་གིས་གཙོས་མི་མང་གིས་རྒྱ་དམར་གཞུང་གི་སྲིད་དབང་སྒེར་གཅོད་ཀྱི་ལམ་ལུགས་ལ་ངོ་རྒོལ་སྐད་འབོད་དང་། རྒྱ་ནག་ལ་མང་གཙོ་དང་རང་དབང་དགོས་པའི་དགོས་འདུན་བཏོན་པར་སྐབས་དེའི་རྒྱ་ནག་གི་དབང་འཛིན་པ་ཏིང་ཞའོ་ཕིང་གིས་བཙན་བཀའི་འོག་དྲག་པོའི་ཐོག་ནས་ཞི་རྒོལ་བ་མང་པོ་ཞིག་དམར་གསོད་བཏང་བའི་ཉིན་མོ་ཡིན་ཞིང་། སྐབས་དེའི་ལས་འགུལ་དང་འབྲེལ་བ་ཡོད་པའི་རྒྱ་མི་དུ་མ་ཞིག་སྔ་རྗེས་སུ་ཨ་རིས་གཙོས་ཕྱིའི་རྒྱལ་ཁབ་ཁག་ཏུ་སྐྱབས་བཅོལ་ཞུས་ནས། རྒྱ་དམར་གཞུང་གི་ལས་དོན་ལ་དངོས་ཤུགས་བརྒྱུད་གསུམ་ནས་ངོ་རྒོལ་གྱི་རྣམ་འགྱུར་སྟོན་བཞིན་ཡོད། གནད་དོན་དེ་ལ་བརྟེན་ནས་ཡུ་རོབ་ཀྱི་རྒྱལ་ཁབ་ཁག་གིས་གཙོས་རྒྱ་གཞུང་ལ་འབྲེལ་ལམ་སྡུག་ཏུ་བཏང་ཡོད་ཀྱང་། དུས་རབས་ཉེར་གཅིག་པ་འཆར་ལ་ཉེ་བའི་སྐབས་ཨ་རིས་འགན་ཁུར་གཙོ་བོ་བླངས་ནས་རྒྱ་དམར་གཞུང་ལ་རྒྱལ་སྤྱིའི་ཐོག་ནས་ཚོང་གི་གོ་སྐབས་གང་མང་ཞིག་སྤྲད་དེ་ད་ལྟའི་གནས་བབས་འདིར་སླེབས་ཐུབ་ཡོད། རྒྱ་ནག་གི་དྲུག་བཞིའི་དོན་རྐྱེན་དང་འབྲེལ་ཏེ་རྒྱ་མི་མང་པོས་མང་གཙོའི་དགོས་འདུན་བཏོན་ནས་ཡར་ལངས་བྱེད་པ་སོགས་ནི་བོད་དོན་འཐབ་རྩོད་ཀྱི་ཐོག་ནས་གོ་སྐབས་གལ་ཆེན་ཞིག་ཏུ་མཐོང་མཁན་མང་པོ་བྱུང་ཡོད། རྒྱ་ནག་ནང་མང་གཙོ་དང་རང་དབང་གི་གོ་སྐབས་ཤིག་བྱུང་ན་ཕྱོགས་གཅིག་ནས་བོད་ནང་དུ་ཡོད་པའི་བོད་མི་རྣམས་ལ་ཕན་ཐོགས་ཡོད་སྲིད་ཅིང་། དེ་ལ་བརྟེན་ནས་ཆོས་དང་རིག་གནས། ཡུལ་སྲོལ་གོམས་གཤིས་སོགས་རྒྱུད་འཛིན་གྱི་ཐོག་ལ་ཕན་ཐོགས་ཆེན་པོ་ཡོང་རྒྱུའི་རེ་བ་ཡོད། ཕྱོགས་གཅིག་ནས་རྒྱ་ནག་ནང་མང་གཙོའི་ལམ་ལུགས་དར་ཁྱབ་ཆེན་པོ་འབྱུང་སྲིད་པའི་དབང་དུ་བཏང་ཡང་། རྒྱ་ནག་ནང་མི་རིགས་རིང་ལུགས་ཀྱི་བསམ་བློའི་དུག་རྒྱུན་དེ་འདོར་མ་ཐུབ་ན། བོད་པ་སོགས་གྲངས་ཉུང་མི་རིགས་རྣམས་ལ་སྔར་བཞིན་གཉའ་ནོན་དང་བཤུ་གཞོག་འབའ་ཞིག་ལས། ཁྱེད་རྣམས་ལ་རང་དབང་དང་མང་གཙོ་ཡོད་ཅེས་ལྷོད་ཡང་གཏོང་མཁན་ཞིག་ཡོང་རྒྱུའི་རེ་བ་ཆེན་པོ་མེད། དེ་ནི་རྒྱ་ནག་ཙམ་མ་ཡིན་པར་མང་གཙོ་དར་ཁྱབ་ཆེ་ཤོས་ཀྱི་ཡུལ་གྲུ་ཁག་ལ་བལྟས་ན་ཤེས་ཐུབ། འཛམ་གླིང་འདིར་མང་གཙོ་དང་རང་དབང་ཆེ་ཤོས་ཀྱི་རྒྱལ་ཁབ་རྒྱ་གར་ཡིན་པ་དང་། རྒྱ་གར་མི་མང་ལ་རང་དབང་དང་ཐོབ་ཐང་ཆེན་པོ་ཡོད་པ་མ་ཟད། ཆབ་སྲིད་ཀྱི་འགན་ཁུར་བ་རྣམས་ཀྱིས་རྒྱ་གར་མི་མང་ལ་བསྟུན་མཁས་ཆེན་པོ་མ་བྱས་ན་རྐུབ་སྟེགས་འཆོར་ངེས་པས། ཆབ་སྲིད་དང་། ཁོར་ཡུག དཔལ་འབྱོར་སོགས་གང་ཐད་ནས་བསམ་ཚུལ་མི་འདྲ་བ་ཡོད་མཁན་གྱི་དབུ་ཁྲིད་སུ་སླེབས་ཀྱང་གཙོ་བོ་མི་མང་གི་འདོད་པ་དང་མི་མཐུན་པའི་རིགས་ལ་བསྒྱུར་བཅོས་བྱ་རྒྱུར་དཀའ་ངལ་ཧ་ཅང་ཆེན་པོ་ཡོད། མ་འོངས་པར་རྒྱ་ནག་ནང་ཆབ་སྲིད་ཀྱི་ཐོག་ནས་མང་གཙོའི་ལམ་སྲོལ་སླེབས་སྲིད་པའི་དབང་ཏུ་བཏང་ཡང་། བོད་དང་། ཤར་ཏུར་ཀི་སི་ཐན། ལྷོ་སོག་པོ་སོགས་ལ་རང་དབང་ཆ་ཚང་བ་ཞིག་འཐོབ་རྒྱུའི་རེ་བ་མེད། དཔེར་ན་རྒྱ་གར་གྱི་རྩ་ཁྲིམས་ནང་མི་ལོ་བདུན་ཅུའི་སྔོན་དམིགས་བསལ་སྤྲད་པའི་ཇ་མུ་དང་ཀསྨྲིར་གྱི་རང་སྐྱོང་དེ་བྷི་ཇེ་བྷི་སྲིད་གཞུང་གིས་དུས་ཐུང་ནང་ཕྱིར་བསྡུ་བྱས་པ་དེའི་ཐོག་ནས་ཀྱང་། མང་གཙོའི་ལམ་ལུགས་ནང་འོས་བསྡུས་ཐག་གཅོད་བྱས་པར་གྲངས་མང་ཉུང་གི་ཐོག་ནས་ཞེད་སྣང་མེད་པ་ཞིག་མིན་པ་བསྟན་ཡོད། སྤྱིར་རྒྱ་དམར་སྲིད་གཞུང་འཐོར་ཞིག་ཏུ་འགྲོ་རྒྱུར་རེ་བ་རྒྱག་ཆོག་ཀྱང་། བོད་པས་འབད་བརྩོན་གང་ཡང་མི་དགོས་པར་རྒྱ་ནག་ནང་མང་གཙོའི་འགྱུར་བ་ལ་བརྟེན་ནས་བོད་རང་བཙན་བསྐྱར་གསོ་ཐུབ་པའི་གོ་སྐབས་ཤིག་ཡོད་པའི་རེ་བ་རྒྱག་ཆེ་དྲགས་ན། དོན་དངོས་སུ་“བོད་རེ་བས་ཕུང་”ཞེས་པའི་གནའ་བོའི་སྡོམ་ཚིག་དེའི་ཕྱོགས་ལ་ཐག་ཉེ་རུ་འགྲོ་བཞིན་པའི་རྣམ་པ་གསལ་པོ་ཡོད། འཐབ་རྩོད་སོགས་ལས་དོན་གང་ཡིན་ཡང་རེ་བ་གང་ཡང་མེད་ན་འགྲུབ་མི་ཐུབ་པ་མ་ཟད། རེ་བ་དང་དམིགས་ཡུལ་རྒྱ་ཆེན་པོ་ཞིག་བཟུང་ནས་འབད་བརྩོན་བྱེད་དགོས། བོད་རེ་བས་ཕུང་ཞེས་པའི་གོ་དོན་འཇུག་ཡུལ་གཙོ་བོ་བོད་པས་དཀའ་ལས་གང་ཡང་རྒྱག་མི་དགོས་པར་གཞན་འབའ་ཞིག་ལ་རེ་བ་བརྒྱབ་ན། ཚེ་འདི་ཕྱི་གཉིས་ཀྱི་དམིགས་ཡུལ་ཐམས་ཅད་འགྲུབ་ཐུབ་སྙམ་པ་དེ་ལ་དམིགས་ནས་བཤད་པ་ཞིག་ལས། རང་ཉིད་ཀྱི་འབད་བརྩོན་དང་ནུས་པ་ལ་བརྟེན་ནས་མ་འོངས་པར་གྲུབ་འབྲས་རྒྱ་ཆེན་པོ་ཞིག་འབྱུང་བར་རེ་བ་བརྒྱབ་ནས་བོད་ཕུང་སོང་བར་གཏན་ནས་མི་གོ་བས་རེ་བ་གཏན་ནས་བྱེད་མི་རུང་བ་ག་ལ་ཡིན། མདོར་ན་རྒྱ་མི་མང་གཙོ་དོན་གཉེར་བ་ཡིན་ཟེར་མཁན་གང་མང་ཞིག་གིས་དོན་དངོས་སུ་བོད་དོན་ལ་རྒྱབ་སྐྱོར་དེ་ཙམ་མེད་ཀྱང་། ༧གོང་ས་མཆོག་གི་མཚན་སྙན་དང་། བཙན་བྱོལ་གཞུང་གི་ནུས་པ་རྣམས་ཁོང་ཚོའི་དམིགས་ཡུལ་འགྲུབ་ཆེད་བེད་སྤྱོད་གཏོང་རྒྱུའི་བསམ་བློ་ཞིག་ཏུ་ངོས་འཛིན་བྱེད་ཆོག མ་འོངས་པར་དྲུག་བཞིའི་དུས་དྲན་སོགས་གཏན་ནས་བྱེད་མི་འོས་པའི་སྐད་ཆ་མིན་ཡང་། གཙོ་བོ་རྒྱ་ནག་ནང་འགྱུར་ལྡོག་ཆེན་པོ་འབྱུང་སྲིད་པའི་དབང་དུ་བཏང་ན། སྐབས་དེར་བོད་པས་རང་དབང་རང་བཙན་གྱི་གོ་སྐབས་དམ་འཛིན་ཐུབ་པ་ཞིག་དང་། དེའི་བར་དུ་བོད་དོན་འཐབ་རྩོད་ཀྱི་བསམ་བློ་ཡོད་པ་རྣམས་རྒྱུན་གནས་དང་། མེད་པ་རྣམས་ལ་སླར་གསོ་བྱ་རྒྱུའི་འབད་བརྩོན་ཕྱོགས་ཡོངས་ནས་བྱ་རྒྱུ་དེ་གལ་ཆེ་ཤོས་སུ་གྱུར་ཡོད། རྒྱ་གཞུང་གི་གཅིག་སྡུད་དབང་འཛིན་གྱི་ལམ་ལུགས་འོག་མི་མང་ལ་གཉའ་ནོན་བཤུ་གཞོག་བྱེད་ཆེ་བས་ཉིན་གཅིག་རྒྱ་ནག་འཐོར་ཞིག་འགྲོ་མི་སྲིད་པ་མིན་ཡང་། ད་ལྟའི་གནས་སྟངས་ལ་བལྟས་ན་སྐབས་དེ་དུས་བོད་པས་དམ་འཛིན་བྱེད་ཐུབ་པའི་རེ་བ་ཕལ་ཆེར་མེད་པ་ལྟ་བུར་གྱུར་ཡོད།།
བདེན་དོན་བོར་བའི་ཁ་ཕྱོགས།
རྩོམ་སྒྲིག་པའི་གཏམ། བོད་ཀྱི་བང་ཆེན་གསར་ཤོག་སྤྱིའི་འདོན་ཐེངས། ༩༤༨། ད་ལྟའི་ཆར་ཨུ་རུ་སུས་ཡུག་རེན་ལ་བཙན་འཛུལ་དམག་འཁྲུག་བྱས་ནས་མི་ལོ་ཧྲིལ་པོ་གཅིག་དང་ཟླ་གསུམ་ལྷག་འདས་ཟིན་པ་དང་། ཡུག་རེན་གྱིས་ཨུ་རུ་སུ་ལ་གདོང་ལེན་བྱས་ནས་མི་རྒྱུ་གཉིས་ལ་ཚད་ལས་འདས་པའི་གོད་ཆག་བྱུང་ཡོད། ཨུ་རུ་སུ་ལ་མཚོན་ནའང་དམག་མི་འབུམ་ཕྲག་ཁ་ཤས་ཀྱི་ཚེ་སྲོག་ཤོར་ཡོད་པ་དང་། གོ་མཚོན་ཇི་སྙེད་ཅིག་འཕྲོ་བརླག་ཏུ་སོང་བ་མ་ཟད། རྒྱལ་ཁབ་མང་པོ་ཞིག་གི་དཔལ་འབྱོར་བཀག་སྡོམ་ལ་བརྟེན་ནས་རྒྱུ་ནོར་ལ་གྱོང་གུད་ཆེན་པོ་ཐེབས་ཡོད། ལྷག་པར་དུ་རྒྱལ་སྤྱིའི་སྟེང་ནས་ཨུ་རུ་སུ་ལ་ཆེ་མཐོང་ཉམས་པ་སོགས་ཕྱོགས་གང་ཐད་ནས་ཁེ་ལས་གྱོང་ཆེ་བ་ཆགས་ཡོད། རྒྱ་ནག་དང་། ཨི་རན། བྷེ་ལ་རུ་སུ་སོགས་ཀྱིས་ཨུ་རུ་སུ་ལ་མངོན་གསལ་དང་མངོན་གསལ་མིན་པའི་ཐོག་ནས་རྒྱབ་སྐྱོར་བྱེད་བཞིན་ཡོད་པ་དང་། ཡུག་རེན་ལ་ཨ་རི་དང་། ཡུ་རོབ་ཀྱི་རྒྱལ་ཁབ་ཕལ་ཆེ་བས་གཙོས་རྒྱལ་ཁབ་མང་པོས་མངོན་གསལ་དོད་པོའི་ཐོག་ནས་རྒྱབ་སྐྱོར་བྱེད་བཞིན་ཡོད་པས། འཛམ་གླིང་གི་རྒྱལ་ཁབ་རྣམས་ཕྱོགས་ཁག་གཉིས་སུ་གྱེས་ཡོད།དམག་འཁྲུག་དེའི་སྐོར་གླེང་སྐབས་ཨུ་རུ་སུ་ལ་ཁག་མེད་པར་ཨ་རི་དང་། བྱང་ཆིངས་སྒྲིག་འཛུགས་ཀྱི་བྱེད་སྟངས་ལ་བརྟེན་ནས་ཡུག་རེན་ལ་དམག་མི་རྒྱག་ཀ་མེད་དུ་གྱུར་པ་རེད་ཟེར་བ་དང་། རྐྱེན་རྩ་གཙོ་བོ་ཨ་རི་དང་བྱང་ཆིངས་སྒྲིག་འཛུགས་ལ་ཐུག་ཡོད་ཟེར། དོན་དངོས་སུ་ཨུ་རུ་སུ་དང་། ཨ་རིས་སྣེ་ཁྲིད་པའི་བྱང་ཆིངས་སྒྲིག་འཛུགས་དབར་འགལ་ཟླ་ཡོད་པ་དང་། ཡུག་རེན་ས་ཁོངས་དང་ཆབ་སྲིད་གནས་སྟངས་གང་ཐད་ནས་ཨུ་རུ་སུ་ལ་གལ་གནད་ཆེན་པོ་ཇི་ལྟར་ཡིན་ཡང་། ཡུག་རེན་གྱི་ངོས་ནས་ཨུ་རུ་སུ་ལ་ལྟ་སྟངས་ག་རེ་ཡོད་ཀྱང་། ཨུ་རུ་སུས་ཡུག་རེན་ལ་དྲག་པོའི་དཔུང་གིས་བཙན་འཛུལ་བྱས་པར་རྒྱུ་མཚན་ཡག་པོ་གང་ཡང་བགྲང་རྒྱུ་མེད། ཨ་རི་དང་། བྱང་ཆིངས་སྒྲིག་འཛུགས་ཨུ་རུ་སུ་ལ་ཉེན་ཁ་ཞིག་ཡིན་པའི་དབང་དུ་བཏང་ཡང་། དེ་ལ་ཐད་ཀར་དམག་འཁྲུག་གམ་ཁ་གཏད་གཅོག་དགོས་པ་ལས། ཡུག་རེན་རྒྱལ་ཁབ་ཆུང་ཆུང་ཞིག་ལ་བཙན་འཛུལ་བྱས་པ་ནི། ཁོང་ཁྲོ་རྟ་ལ་ཟོས་ནས། རྡུང་རྒྱག་ཀ་བ་ལ་གཞུས་པ་ལྟ་བུར་གྱུར་ཡོད།ཡུག་རེན་གྱི་ངོས་ནས་རྒྱལ་ཁབ་ཤོར་ཡང་། འཛུགས་སྐྲུན་ཁག་ལ་གཏོར་བཤིག་མི་འགྲོ་བ་དང་། ཆབ་འབངས་ཀྱི་ཚེ་སྲོག་མི་འཆོར་བའི་ཆེད་དུ་ཁ་གཏད་གཏན་ནས་མི་གཅོག་པར་ལག་པ་གནམ་ལ་བཀྱགས་ནས་ཨུ་རུ་སུར་འགོ་འགོགས་ཞུ་དགོས་པའི་ལྟ་ཚུལ་བརྗོད་མཁན་དག་ནི། རྒྱལ་ཁབ་སྐྱོང་སྟངས་ཀྱི་ཆབ་སྲིད་ལམ་ལུགས་ཐོག་ནས་བཤད་ན་ཕུགས་རྒྱང་ཀྱི་བསམ་བློ་གང་ཡང་མེད་པའི་གླེན་པ་ཤ་སྟག་ཏུ་གྱུར་ཡོད། ད་ལན་ཡུག་རེན་རྒྱལ་ཁབ་སྤྱི་དང་བྱེ་བྲག་སྲིད་འཛིན་ཛ་ལེན་སི་ཀེའི་ཡིས་ཐག་གཅོད་དང་གདོང་ལེན་གནང་ཕྱོགས་ནི། ཡུག་རེན་རྒྱལ་ཁབ་ཀྱི་ཕུགས་རྒྱང་རིང་པོའི་བསམ་བློ་ཉག་གཅིག་ཏུ་གྱུར་ཡོད། བོད་པ་རེ་ཟུང་གིས་ཀྱང་ཨུ་རུ་སུའི་བྱེད་སྟངས་ལ་མོས་མཐུན་ཡོད་པའི་རྣམ་འགྱུར་ཡོད་མཁན་མཐོང་ཐོས་བྱུང་བ་ནི། རྒྱ་གཞུང་གིས་བོད་ལ་བཙན་འཛུལ་བྱས་པ་དང་། བོད་མི་འབུམ་བཅུ་གཉིས་ལྷག་དུས་མིན་རྐྱེན་འདས་སུ་བཏང་བ། རྒྱལ་ཁབ་ཀྱི་བདག་དབང་དང་། མི་རིགས་ཀྱི་རང་དབང་འཕྲོགས་པར་སེམས་ཚོར་གང་ཡང་མེད་པ་རེད།དོན་དངོས་སུ་བོད་པ་ཞིག་ཡིན་ཕྱིན་ཆད་ནས་དམག་འཁྲུག་དེ་དང་འབྲེལ་བའི་ཐོག་ནས། བཙན་གནོན་མྱོང་མཁན་གཅིག་པ་ཡིན་པའི་རྒྱུ་མཚན་ལ་བརྟེན། བསམ་བློའི་ཐོག་ནས་ཡུག་རེན་གྱི་རྒྱབ་ཏུ་ཡོད་ན་དེ་ནི་དྲང་བདེན་ལ་རྒྱབ་སྐྱོར་བྱས་པ་ཞིག་ཏུ་གྱུར་ཡོད། ཨ་རིའི་མང་གཙོ་ཚོགས་པ་དང་། སྤྱི་མཐུན་ཚོགས་པ་གང་རུང་གི་རྒྱབ་ཏུ་ལངས་ནས་ཚོར་བ་དང་ལངས་ཕྱོགས་བསྟན་པ་ནི་མི་སྒེར་གྱི་ལངས་ཕྱོགས་ཙམ་ལས། བཙན་འཛུལ་བྱེད་མཁན་དང་། བཙན་གནོན་མྱོང་མཁན་བར་གྱི་འགལ་འབྲེལ་ལྟ་བུ་མིན་པས། དེ་ལ་དོ་སྣང་གནང་རིན་དེ་ཙམ་མེད་པ་ལྟ་བུར་གྱུར་ཡོད། ད་ལྟ་ཡུག་རེན་གྱི་གནས་སྟངས་ལ་ཨ་རིས་གཙོས་རྒྱལ་ཁབ་མང་པོ་ཞིག་གིས་རྒྱབ་སྐྱོར་གནང་བཞིན་པའི་རྒྱབ་ལོགས་སུ་རང་ཉིད་ཀྱི་ཆབ་སྲིད་ཁེ་ཕན་དང་འབྲེལ་བ་ཡོད་མི་སྲིད་པ་མིན་ཡང་། ཡུག་རེན་ལ་བཙན་འཛུལ་བྱེད་སྐབས་འདི་ལྟ་བུའི་རྒྱབ་སྐྱོར་ཞིག་མེད་ན་དུས་ཡུན་ཐུང་ངུའི་ནང་ཨུ་རུ་སུས་ཡུག་རེན་གྱི་སྣོད་བཅུད་ཡོངས་རྫོགས་ཁྱུར་མིད་བཏང་ཚར་བ་རེད།མདོར་ན་རང་ཉིད་ལ་ནུས་གང་ཡོད་པ་གཞིར་བཞག་ནས་ཧམ་ཤེད་ཅན་ལས། དྲང་བདེན་གྱི་རྒྱབ་ཏུ་ལང་ཐུབ་དགོས། ཡུག་རེན་ལ་རྒྱབ་སྐྱོར་གནང་མཁན་དག་ནི་དྲང་བདེན་ལ་རྒྱབ་སྐྱོར་གནང་བ་ཞིག་ཏུ་ངོས་འཛིན་བྱེད་མ་ཐུབ་ན་བཙན་བྱོལ་བོད་མི་ཞིག་ལ་མཚོན་ན་འཐབ་རྩོད་ཀྱི་བསམ་བློ་མེད་མཁན་ཞིག་ཏུ་གྱུར་ཟིན་པ་རེད། བོད་མི་རྣམས་རྒྱ་དམར་གཞུང་གི་བཙན་གནོན་གདུག་རྩུབ་འོག་ཡོད་སྟབས་དེའི་ཚོར་བ་དེ་ཡོད་དགོས་ངེས་རེད། ཨུ་རུ་སུའི་སྟོབས་ཤུགས་ལ་མགོ་འཁོར་ནས་འཕྲལ་གྱི་ཁེ་ཕན་ཙམ་ལས་བསམ་བློ་མ་བཏང་ན། འཐབ་རྩོད་དང་འབྲེལ་བའི་ཐོག་ནས་དྲང་བདེན་ཤོད་རྒྱུའི་སྤོབས་པ་དང་བྲལ་ཟིན་པ་རེད། གང་ལྟར་བོད་ལ་རྒྱ་དམར་གཞུང་གིས་བཙན་འཛུལ་བྱས་པ་དང་། ཨུ་རུ་སུས་ཡུག་རེན་ལ་བཙན་འཛུལ་བྱེད་སྟངས་དང་དམིགས་ཡུལ། ཐ་ན་བརྗོད་ཚིག་ཀྱང་གཅིག་པ་རེད། […]