རྒྱ་རིགས་གྲོགས་པོ་ཚོས་ཀུན་དགའ་བཀྲིས་ལ་སྐྱེལ་མའི་གསོལ་སྟོན་བཤམས།
བྱང་ཨ་རིའི་རྒྱ་བོད་འབྲེལ་མཐུད་པ་ཀུན་དགའ་བཀྲ་ཤིས་ཀྱི་ལས་ཁུར་དུས་ཡུན་རྫོགས་ཏེ་རྡ་རམ་ས་ལར་གནས་སྤོས་བྱས་ཡོད་པ་དང་། ཁོང་ཨ་རི་ནས་ཐོན་ཁར་རྒྱ་རིགས་གྲོགས་པོ་རྣམས་ཀྱིས་སྐྱེལ་མའི་གསོལ་སྟོན་ཞིག་བཤམས་འདུག
དེའང་ཕྱིའི་རྒྱ་ཡིག་དྲ་ལམ་ཁག་ཏུ་གནས་ཚུལ་ཐོན་པ་ལྟར་ན། བྱང་ཨ་རིའི་རྒྱ་བོད་འབྲེལ་མཐུད་པ་ཀུན་དགའ་བཀྲ་ཤིས་ལགས་ཀྱི་བྱང་ཨ་རིའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པའི་ལས་ཁུར་དུས་ཡུན་རྫོགས་ཏེ། རྒྱ་གར་རྡ་རམ་ས་ལར་དབུས་བོད་མིའི་སྒྲིག་འཛུགས་སུ་གནས་སྤོས་བྱས་ཡོད་པ་བཞིན། ཟླ་འདིའི་ཕྱི་ཚེས་༧ ཉིན་གྱི་དགོང་མོར་རྒྱ་རིགས་དམངས་གཙོ་དོན་གཉེར་བ་དང་རྩོམ་པ་པོ། སྒྱུ་རྩལ་བ། གསར་འགོད་པ། དགེ་རྒན་ཆེན་མོ། མཁས་དབང་སོགས་གྲོགས་པོ་ཁག་ཅིག་དང་། བྱང་ཨ་རིའི་སྐུ་ཚབ་དོན་གཅོད་ཟུར་པ་བློ་བཟང་སྙན་གྲགས། བོད་ཀྱི་ཐེབས་རྩ་ཚོགས་པའི་འགན་འཛིན་རིན་ཆེན་དར་ལོ་སོགས་སྐྱེལ་མའི་གསོལ་སྟོན་ཐོག་ཕེབས་ཡོད་པ་མ་ཟད། རྒྱ་རིགས་གྲོགས་པོ་མང་པོ་ཞིག་གིས་ཀུན་དགའ་བཀྲ་ཤིས་ཀྱིས་འདས་པའི་ལོ་དྲུག་ལྷག་གི་ལས་ཁུར་དུས་ཡུན་སྐབས། རྒྱ་བོད་འབྲེལ་མཐུད་ཕྱོགས་ལ་བྱས་རྗེས་མི་དམན་པ་བཞག་ཡོད་པའི་བསྟོད་བསྔགས་ཀྱི་གཏམ་བཤད་དང་གཟེངས་རྟགས་སོགས་ཕུལ་ཡོད་འདུག
ཀུན་དགའ་བཀྲ་ཤིས་ལགས་ཀྱིས་གསོལ་སྟོན་ཐོག་རྒྱ་རིགས་གྲོགས་པོ་རྣམས་ལ་བརྗོད་དོན། “ད་ལྟ་ང་ལ་ཧ་ཅང་དགའ་སྤྲོའི་ཚོར་སྣང་བྱུང་། རྒྱུ་མཚན་གང་ལགས་ཞེ་ན། ངས་རྒྱུན་དུ་རྒྱ་བོད་མི་རིགས་བར་ལ་འགལ་ཟླ་གང་ཡང་མེད་ཅེས་བརྗོད་བཞིན་ཡོད། ད་ལྟ་ང་ཚོས་ཁ་གཏད་གཅོག་ས་ནི་རྒྱ་ནག་དམར་ཤོག་སྲིད་གཞུང་གིས་མིག་སྔར་བོད་ཐོག་འཛིན་པའི་སྲིད་ཇུས་རེད། དེར་བརྟེན་རྒྱ་བོད་མི་རིགས་གཉིས་ལོ་རྒྱུས་ཐོག་སྐབས་འགར་མཛའ་མཐུན་མཉམ་འབྲེལ་དང་། མཚམས་རེར་རྩོད་རྙོག་ཀྱང་བྱུང་ཡོད། ཡིན་ནའང་སྤྱིའི་ཆ་ནས་བཤད་ན་ལོ་མང་པོའི་རིང་ལ་མཛའ་མཐུན་ངང་གནས་ཡོད། རྒྱུ་མཚན་དེའི་ཕྱིར་དེ་རིང་གི་གསོལ་སྟོན་འདིའི་ཐོག་རྒྱ་རིགས་གྲོགས་པོ་དེ་འདྲ་མང་པོ་ཞིག་ཕེབས་ཏེ་ང་སྐྱེལ་མ་བྱེད་པ་རེད་ལ། འདི་ནི་ང་སྐྱེལ་མ་གཅིག་པུ་ཞིག་མ་ཡིན་པར། བོད་ལ་རྒྱབ་སྐྱོར་གྱི་རྣམ་པ་ཞིག་ཕྱིར་བསྟན་པ་ཡིན་དུས། ང་ཧ་ཅང་དགའ་པོ་བྱུང་།”
དེ་བཞིན་ཐེངས་དེའི་གསོལ་སྟོན་གཙོ་སྐྱོང་བ་རྩོམ་པ་པོ་དང་ཆབ་སྲིད་དཔྱོད་བརྗོད་པ་ཁྲན་པའོ་ཁང་གིས་ཀུན་དགའ་བཀྲ་ཤིས་དང་རྒྱ་རིགས་གྲོགས་པོའི་བར་གྱི་འབྲེལ་ལམ་སྐོར་ནས། ཀུན་དགའ་ལགས་ནི་རྒྱ་བོད་མཛའ་འབྲེལ་གྱི་ཟམ་པ་ལྟ་བུ་ཞིག་ཡིན་པའི་བསྟོད་བསྔགས་གནང་པ་དང་། སྙན་ངག་པ་དང་དམངས་གཙོ་དོན་གཉེར་མི་སྣ་ཧྥ་ཞང་གིས་ཀུན་དགའ་བཀྲ་ཤིས་ལ་“བོད་སྒང་གི་འོད་ཟེར། ཁྱིམ་གཞིས་ཀྱི་རྒྱང་འབོད།” ཅེས་བྲིས་པའི་རྒྱ་ཡིག་གི་ཡིག་གཟུགས་ལག་བྲིས་མ་ཆེན་པོ་ཞིག་ཕུལ་ཏེ། སྙན་ངག་དེ་ནི་ཁོང་གིས་མིག་ཆུ་གཏོང་བཞིན་བྲིས་པ་ཞིག་ཡིན་པ་དང་། འཛམ་གླིང་ཡོངས་ཀྱི་མི་ཚང་མ་སྤུན་མཆེད་ཡིན་པས། ཚང་མ་ཁྱིམ་ཚང་གཅིག་གི་མི་རེད། བོད་མི་ཅི་ཕྱིར་མིན་ཞེས་བརྗོད་འདུག
ལྕམ་ཁྲན་ལི་ཆུན་གྱིས་ཨེ་ཤི་ཡ་རང་དབང་རླུང་འཕྲིན་ཁང་གི་རྒྱ་སྐད་ཚན་པའི་གསར་འགོད་པར་བརྗོད་དོན། “བོད་མི་༡༠༠ ལྷག་གིས་རང་སྲེག་བྱས་པར་ང་ཚོས་ཧ་ཅང་དོ་སྣང་བྱེད་བཞིན་ཡོད། ང་ཚོའི་བསམ་པར་དེ་ནི་རྒྱ་ནག་གི་ལོ་རྒྱུས་དང་འཛམ་གླིང་ལོ་རྒྱུས་དང་བྱུང་མྱོང་མེད་པ་ཞིག་རེད། ཁོང་ཚོས་རང་སྲོག་གཅོད་པར་བརྟེན་ནས་ང་ཚོར་ཚད་མཐོའི་གདུང་སེམས་མཉམ་བསྐྱེད་དང་དོ་སྣང་བྱེད་དུ་བཅུག་ཡོད།”
གསར་འགོད་པ་ཏྲེ་ཧོར་ཐུབ་བསྟན།
