རང་ལུས་མེར་སྲེག་མཁན་གྱི་དགོས་འདུན་ཤེས་ཐུབ་དགོས།
རང་ལུས་མེར་སྲེག་གཏོང་མཁན་གྱི་དཔའ་བོ་དཔའ་མོ་ཚོའི་དམིགས་ཡུལ་དང་དགོས་འདུན་ངོ་མ་གང་ཡིན་པ་དེ་གསལ་པོ་ཤེས་ཐུབ་པའི་འགན་ཁུར་ལེན་དགོས།
ཕྱི་ལོ་༢༠༠༢ ནས་བཟུང་ང་ཚོའི་ཁྲིམས་ཀྱི་དབང་བསྒྱུར་དེ་གལ་ཆེན་དོན་ཆེན་ལ་བརྩིས་ནས། རྒྱ་ནག་གི་རྩ་ཁྲིམས་ལ་སྐྱབས་བཅོལ་ནས་བོད་རྒྱ་འབྲེལ་མོལ་ཐེངས་བརྒྱད་པའི་སྐབས། ང་ཚོའི་སྐུ་ཚབ་ནས་རྒྱ་ནག་གི་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་བསྡད་ནས། མི་རིགས་ས་གནས་རང་སྐྱོང་གི་བཅའ་ཁྲིམས་ནང་གསལ་བའི་རང་སྐྱོང་གི་གནས་བབས་ཚད་ལྡན་ཞིག་རྩོད་རྒྱུའི་ང་ཚོའི་དགོས་འདུན་གྱི་ཡིག་ཆ་དེ་རྒྱ་ནག་ལ་སྤྲད་པ་དང་། ཐེངས་དགུ་པའི་སྐབས་འབྲེལ་མོལ་ཐེངས་བརྒྱད་པའི་སྐབས་སྤྲད་པའི་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་གྱི་འགྲེལ་བརྗོད་དོན་ཚན་བདུན་ཅན་གྱི་ཡིག་ཆ་དེ་སྤྲད་པ་ནས་བཟུང། བོད་ནང་རྒྱལ་ཞེན་གྱི་བསམ་བློ་དང་། མི་རིགས་ཀྱི་ལྟ་བ་བརྟན་པོ་ཡོད་པའི་ལྷག་བསམ་དང་སྙིང་སྟོབས་གཏོང་ཕོད་ཅན་གྱི་དཔའ་བོ་དཔའ་མོ་བརྒྱ་དང་སུམ་བཅུ་སོ་གཅིག་གིས་གཅེས་པའི་རང་ལུས་མེེར་སྲེག་བཏང་བ་དེ་དག་རང་གི་ཕ་མེས་ནས་བརྒྱུད་པའི་བོད་རྒྱལ་ཁབ་དང། བོད་མི་རིགས་ཀྱི་བདག་དབང་གི་དོན་དུ་རང་ལུས་མེར་སྲེག་གཏོང་གི་ཡོད་པ་ཡིན་དང་། རྒྱ་ནག་གི་རྩ་ཁྲིམས་ཀྱི་སྒྲོམ་གཞིའི་འོག་བསྡད་ནས་མི་རིགས་ས་གནས་རང་སྐྱོང་གི་བཅའ་ཁྲིམས་ནང་གསལ་བའི་རང་སྐྱོང་གི་གནས་བབས་ཚད་ལྡན་ཞིག་རྩོད་རྒྱུའི་དོན་དུ་རང་ལུས་མེར་སྲེག་གཏོང་གི་ཡོད།
དེ་ཡང་ང་ཚོས་ཞིབ་འཇུག་ནན་མོ་ངེས་པར་དུ་གནང་དགོས་པ་ནི་ཁོང་ཚོའི་དམིགས་ཡུལ་དང་དགོས་འདུན་གྱི་ཁ་ཆེམས་ལ་གོ་བ་ལོག་པ་དང་། འགྲེལ་བཤད་ལོག་པ་བརྒྱབ་ནས་བོད་རྒྱལ་ཁབ་དང་བོད་མི་རིགས་འདི་རྒྱལ་སྤྱིའི་མདུན་ངོ་གནོང་མི་དགོས་པའི་འགན་དེ། ང་ཚོ་རང་དབང་ལུང་པའི་ནང་ཡོད་པའི་དབུས་བོད་མིའི་སྒྲིག་འཛུགས་དང་གཞུང་འབྲེལ་མ་ཡིན་པའི་ཚོགས་པ་སྒྲིག་འཛུགས་དང་མི་སྒེར་སོགས་རྒྱ་ཆེ་མི་མང་མི་རེ་ངོ་རེས་གཡོལ་ཐབས་མེད་པའི་ལས་འགན་རྗིད་པོ་ཞིག་ཡིན་པ་ནི་ལོ་རྒྱུས་ཀྱི་ངོ་སྤྲད་པའི་བསུབ་ན་ཟུབ་རྒྱུ་མེད་པའི་ཆབ་སྲིད་ཀྱི་བསླབ་བྱ་ནན་པོ་ཞིག་ཡིན།
ཁོང་ཚོའི་དམིགས་ཡུལ་དང་དགོས་འདུན་ངོ་མ་བོད་རྒྱལ་ཁབ་དང་བོད་མི་རིགས་ཀྱི་བདག་དབང་གི་དོན་དུ་ཡིན་ཚེ། ང་ཚོའི་བོད་དོན་འཐབ་རྩོད་ཀྱི་ཁ་ཕྱོགས་ལ་འགྱུར་བ་ངེས་པར་དུ་འགྲོ་དགོས་པ་དང། ཁོང་ཚོའི་དམིགས་ཡུལ་དང་དགོས་འདུན་དེ་རྒྱ་ནག་གི་བཅའ་ཁྲིམས་ཀྱི་སྒྲོམ་གཞིའི་འོག་བསྡད་ནས་མི་རིགས་ས་གནས་རང་སྐྱོང་གི་བཅའ་ཁྲིམས་ནང་འཁོད་པའི་རང་སྐྱོང་གི་གནས་བབས་ཚད་ལྡན་ཞིག་རྩོད་རྒྱུའི་དོན་དུ་ཡིན་ཚེ། རྒྱལ་སྤྱིའི་ནང་རྒྱབ་སྐྱོར་འཚོལ་རྒྱུ་དང་ཁ་དམག་རྒྱག་རྒྱུ་སོགས་ལ་དུས་ཚོད་བསྐྱལ་ནས་མ་བསྡད་པར། རྒྱ་ནག་གི་རྩ་ཁྲིམས་དང་མི་རིགས་ས་གནས་རང་སྐྱོང་གི་བཅའ་ཁྲིམས། རྒྱ་ནག་གི་ཉེས་ཁྲིམས་སོགས་ལ་འགན་ཁུར་ནས་རྒྱ་ནག་གི་ཁྲིམས་ཁང་ལ་ཁྲིམས་གཏུག་དགོས་པ་ནི་རྒྱ་ནག་གི་རྩ་ཁྲིམས་འོག་བསྡད་པའི་ཐོབ་ཐང་ཆེ་ཤོས་དེ་ཡིན་པ་ལས། རྒྱ་ནག་གི་རྩ་ཁྲིམས་ལ་སྐྱབས་བཅོལ་ནས་རྒྱལ་སྤྱིའི་ནང་ཁ་དམག་རྒྱག་རྒྱུ་དང་། རྒྱབ་སྐྱོར་འཚོལ་རྒྱུ་དེ་དག་ཁྲིམས་མཐུན་ལ་ཁ་བསྒྱུར་དཀའ་བ་དང་། དེང་སྐབས་ང་ཚོའི་སྤྱི་ཚོགས་ནང་ཁྲིམས་ལུགས་རིག་པ་དང་ཁྲིམས་རྩོད་རིག་པ་སོགས་ང་ཡིན་ཁོ་ཡིན་ཟེར་མཁན་གྱི་ཁ་ཕོ་ཅན་གྱི་མཁས་པའི་མིང་འཛིན་མཁན་མང་དག་ཅིག་བསྐྱེད་བསྲིང་བྱེད་བཞིན་ཡོད་པ་དེ་ཚོ་ད་ཆ་ཐོན་དགོས་པའི་དུས་ལ་བབས་མེད་པ་མིན་ནམ། དུང་ཕྲུག་འོ་མས་གསོས་པ་དེ། དགྲ་ཆུ་སྲིན་བྱུང་དུས་རྒྱག་རྒྱུ་རེད་ཅེས་པའི་དཔེ་ལྟར། འདས་པའི་མི་ལོ་ལྔ་བཅུ་ཙམ་རིང་ང་ཚོའི་བོད་དོན་བདེན་མཐའ་གསལ་ཐབས་སུ་བོད་མི་གཞིས་བྱེས་གཉིས་ནས་ཉིན་གྱི་མི་དང་མཚན་གྱི་ཁྱི་བྱས་ནས་ལས་འགུལ་འདྲ་མིན་རྒྱལ་སྤྱིའི་ནང་སྤེལ་ཡོད་ནའང་། སྤྱི་མཐུན་ལས་ཀྱི་བསོད་ནམས་དམན་པའམ། ལས་འགུལ་གྱི་ནུས་པ་ཕྱོགས་གཅིག་ཏུ་བསྒྲིལ་མ་ཐུབ་པའམ། ཆབ་སྲིད་བསམ་བློའི་གནས་ཚད་ཀྱི་མ་འདང་ནས་ཁ་ཕྱོགས་ནོར་བའམ། གང་ལྟར་བོད་མི་རིགས་ལ་འཕྲད་པའི་དཀའ་ངལ་སེལ་མ་ཐུབ་པ་ནི་བོད་རྒྱ་མི་རིགས་གཉིས་ལ་བསམ་ནས་བསུབ་ན་ཟུབ་རྒྱུ་མེད་པའི་ལོ་རྒྱུས་ཀྱི་གྱོང་གུད་ཆེན་པོ་ཞིག་ཡིན་པ་ངོ་སྤྲོད་བྱ་འདོད་བྱུང་། བོད་རྒྱའི་འབྲེལ་མོལ་སླར་གསོ་གནང་ནས་བོད་རྒྱ་གཉིས་ཀྱི་འགོ་ཁྲིད་ཕན་ཚུན་བར་མི་དང་མི་གདོང་ཐུག་ནས་ས་སྦྲེལ་ཅན་གྱི་བོད་རྒྱའི་དཀའ་རྙོག་སེལ་དགོས་པ་ལས། རྒྱ་ནག་གི་རྩ་ཁྲིམས་ལ་སྐྱབས་བཅོལ་ནས་རྒྱལ་སྤྱིའི་ནང་རྒྱབ་སྐྱོར་འཚོལ་རྒྱུ་དང་ཁ་དམག་རྒྱག་ཐུབ་པ་ཙམ་གྱིས་བོད་རྒྱའི་དཀའ་རྙོག་དུས་ནམ་ཡང་སེལ་མི་ཐུབ་པ་དེ་ཡང་གསལ་པོར་མཁྱེན་དགོས།
རང་ལུས་མེར་སྲེག་གཏོང་མཁན་གྱི་དམིགས་ཡུལ་དང་དགོས་འདུན་ངོ་མ་གང་ཡིན་གསལ་པོ་ཤེས་པར་བྱས་ནས། ཁོང་ཚོའི་དམིགས་ཡུལ་དང་ཁ་ཆེམས་ལ་ང་ཚོའི་འགན་ཁུར་ནས་མཐུན་ཕྱོགས་ཀྱི་ལས་འགུལ་སྤེལ་དགོས་པ་ལས། འཆར་ཅན་ལྟ་བུའི་ཉི་མ་ཕྱེད་ཙམ་རིང་མཆོད་འབུལ་སྨོན་ལམ་དང་ངོ་སྤྲོད་གཏམ་བཤད། མར་མེའི་ཁྲོམ་སྐོར་སོགས་བྱས་པ་ཙམ་གྱིས་ཁོང་ཚོའི་དམིགས་ཡུལ་དང་། དགོས་འདུན་འགྲུབ་པར་དུས་ནམ་ཡང་ངོས་འཛིན་བྱ་མི་ཉན་པ་ནི། ཆབ་སྲིད་ངོ་སྤྲོད་པས་བསུབ་ན་ཟུབ་རྒྱུ་མེད་པའི་ལོ་རྒྱུས་ཀྱི་རྫོགས་མཐའ་མེད་པའི་བསླབ་བྱ་ནན་པོ་ཞིག་ཡིན་པའི་ངོ་སྤྲོད་ཡང་བྱ་འདོད་བྱུང་། བཅའ་ཁྲིམས་དོན་ཚན་བཅོ་ལྔའི་ནང་དུ་གསལ་བའི་བོད་དོན་བདེན་མཐའ་གསལ་ཐབས་སུ་རང་བཙན་ལ་ཁ་ཕྱོགས་དགོས་ཀྱི་ཡོད་ནའང་རེད། དབུ་མའི་ལམ་ལ་ཁ་ཕྱོགས་དགོས་ཀྱི་ཡོད་ནའང་རེད། བདེན་པའི་ཨུ་ཚུགས་ལ་ཁ་ཕྱོགས་དགོས་ཀྱི་ཡོད་ནའང་རེད། རང་ཐག་རང་གཅོད་ལ་ཁ་ཕྱོགས་དགོས་ཀྱི་ཡོད་ནའང་རེད། མི་རིགས་ས་གནས་རང་སྐྱོང་ལ་ཁ་ཕྱོགས་དགོས་ཀྱི་ཡོད་ནའང་རེད། གང་ལྟར་ཆབ་སྲིད་ཀྱི་ལྟ་གྲུབ་ག་འདྲ་ཞིག་ལ་ང་ཚོའི་སྐྱབས་བཅོལ་ནས་ཁ་ཕྱོགས་དགོས་ཀྱི་ཡོད་ནའང། དེ་དག་བཙན་བྱོལ་བོད་མིའི་ཁྲིམས་ཡིག་བཅའ་ཁྲིམས་རིན་པོ་ཆེའི་ནང་བཀོད་དེ། ཁྲིམས་མཐུན་གྱི་ཐོག་བོད་མི་གཞིས་བྱེས་ཚང་མས་གཅིག་འགྱུར་གྱི་འགོ་ཁྲིད་ཅིག་གི་འོག་ཏུ་དར་ཆ་གཅིག་དང་དམིགས་ཡུལ་གཅིག དགོས་འདུན་གཅིག འབོད་སྒྲ་གཅིག དམ་བཅའ་གཅིག་བརྒྱུད་ནས་བོད་དོན་བདེན་མཐའ་གསལ་ཐུབ་པའི་འགན་ཁུར་དགོས་པའི་འབོད་སྐུལ་ཞུ་འདོད་བྱུང་།
བཙན་བྱོལ་བོད་མིའི་ཁྲིམས་ཡིག་བཅའ་ཁྲིམས་ནང་མ་གསལ་བའི་ཆབ་སྲིད་ཀྱི་ལྟ་གྲུབ་ག་འདྲ་ཞིག་གིས་ཀྱང་བོད་དོན་བདེན་མཐའ་གསལ་མི་ཐུབ་པ་ནི། བཅའ་ཁྲིམས་དོན་ཚན་ལྔ་པ་བཅའ་ཁྲིམས་ཀྱི་ཚད་འཛིན་ཟེར་བ་ནས་ངོ་སྤྲོད་ཐུབ་རྒྱུ་བཅས་བཅའ་ཁྲིམས་དོན་ཚན་བཅུ་གསུམ་ནང་དུ་འཁོད་པའི་བོད་ཀྱི་ཡུལ་མིའི་ལས་འགན་བསྒྲུབས་ནས། མང་གཙོ་དང་རང་དབང་ཁྲིམས་ཀྱི་དབང་བསྒྱུར་དེ་གལ་ཆེར་བརྩིས་ནས་གང་ཟག་སྒེར་གྱི་བསམ་ཚུལ་གླེང་པ་འདིས་ཀྱང་རང་ལུས་མེར་སྲེག་གི་ལས་འགུལ་མཚམས་ཆད་ནས། བོད་དོན་བདེན་མཐའ་མྱུར་དུ་གསལ་ནས་༧གོང་ས་མཆོག་གི་སྐུ་དུས་འདིར་བོད་མི་གཞིས་བྱེས་གཉིས་རང་ཡུལ་དུ་མཉམ་འཛོམས་ཐུབ་སྟེ། བོད་རྒྱ་མི་རིགས་གཉིས་ཀྱི་བུ་རབས་ཚ་རྒྱུད་དང་བཅས་པའི་མི་ཚེའི་མདུན་ལམ་དེ་ལོག་འཚོ་མིན་པའི་བདེ་སྐྱིད་ཀྱི་འཚོ་བའི་ནང་ཡུན་རིང་འཚོ་ཐུབ་པའི་བསྔོ་བ་མང་ཙམ་བགྱིས་ཆོག སླར་སྨྲས་པ། རང་སྲེག་བྱ་བ་ཆོས་སྲིད་གཉིས་ཐད་ནས།། ཁྲིམས་མཐུན་འཕེལ་བའི་གཞུང་ལུགས་མ་མཇལ་ཡང་།། ལྷག་བསམ་གོ་ཆ་བརྟན་པོའི་ཆོད་སེམས་ཀྱི།། བསྐུལ་བའི་རང་སྲེག་ངོ་མཚར་སྨད་དུ་འཕགས།། མ་བཟོད་སེམས་ཀྱིས་བསྐུལ་བའི་དྲང་གཏམ་འདི།། བོད་རྒྱུའི་དཀའ་རྙོག་སེལ་བའི་ཐབས་ལ་སྦྱོར།། གཞིས་བཞུགས་བོད་མིའི་དཀའ་སྡུག་སེལ་འདོད་ན།། བོད་རྒྱའི་འབྲེལ་ལམ་སླར་གསོ་གལ་ཆེར་མངོན།།
ཀོ་ལི་གྷར་གཞིས་ཆགས་གཞུང་པ་ཚེ་དབང་བསོད་ནམས་ཀྱིས་༢༠༡༤། ༥ །༡༥ ཉིན།
