བུད་མེད་སྒེར་ལངས་ཉིན་མོ་ཐེངས་༦༤ པ་སྲུང་བརྩི་ཞུས་སོང་།
ཟླ་༣ པའི་ཚེས་༡༢ ཉིན་བཞུགས་སྒར་རྡ་སར་དབུས་བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག བོད་ཀྱི་བུད་མེད་སྒེར་ལངས་ཉིན་མོ་ཐེངས་༦༤ པ་སྲུང་བརྩི་གནང་སོང་། བུད་མེད་ལྷན་ཚོགས་ཀྱི་བསྒྲགས་གཏམ་ནང་དུ། བོད་མི་དཔའ་བོ་དཔའ་མོ་རྣམས་ཀྱིས་བོད་མི་རིགས་ཆེད་ལྷག་བསམ་དང་སྙིང་སྟོབས་ཞུམ་པ་མེད་པའི་བློས་གཏོང་ལ་རྗེས་སུ་ཡི་རངས་དང་རྗེས་དྲན་ཞུས་ནས། རྒྱ་ནག་གཞུང་གིས་འདས་པའི་ལོ་ངོ་ ༦༠ ལྷག་གི་རིང་ལ་བོད་ནང་དུ་ཆེས་གདུག་རྩུབ་ཅན་གྱི་སྲིད་བྱུས་སྤེལ་བར་མ་ཟད། དུས་ད་ལྟའང་གཞུང་གི་གཏན་འཇགས་སློབ་གྲྭར་བོད་པའི་བྱིས་པ་རྣམས་བཙན་དབང་གིས་བཅུག་ནས་བོད་མི་རིགས་ཀྱི་ངོ་བོ་རྩ་མེད་བཟོ་ཐབས་བྱེད་བཞིན་པ་དང་། བོད་མིའི་རིགས་རྫས་བསྡུ་རུབ་བྱས་ཏེ། བོད་མིའི་ཐོག་དམ་དྲག་སྔར་ལྷག་བྱེད་བཞིན་པ་རྣམས་ཐེར་འདོན་གྱིས་རྒྱལ་ཚོགས་གཙོས་རྒྱལ་སྤྱིའི་གཞུང་ཚོགས་ཁག་གིས་རྒྱ་ནག་གཞུང་ལ་༸གོང་ས་མཆོག་གམ་མགོན་པོ་༸གང་ཉིད་མཆོག་གི་སྐུ་ཚབ་དང་ལྷན་དུ་བོད་རྒྱ་འབྲེལ་མོལ་བསྐྱར་མཐུད་དགོས་པ་དང་། བོད་མི་ཆབ་སྲིད་བཙོན་པ་རྣམས་གློད་གྲོལ་གཏོང་དགོས་པ། དེ་བཞིན་བོད་མིའི་རིགས་རྫས་བསྡུ་རུབ་དང་བཅའ་སྡོད་སློབ་གྲྭ་སོགས་ཀྱི་ལས་གཞི་འཕྲལ་མར་མཚམས་འཇོག་ཡོང་ཐབས་སུ་རྒྱ་ནག་གཞུང་ལ་གནོན་ཤུགས་ཆེས་ཆེར་སྤྲོད་དགོས་པའི་འབོད་སྐུལ་ནན་པོ་ཞུས་གནང་འདུག སྐུ་མགྲོན་གཙོ་བོ་བཀའ་ཟུར་རིན་ཆེན་མཁའ་འགྲོ་ཡིས། བོད་མི་དཔའ་བོ་དཔའ་མོ་རྣམས་ཀྱིས་བློས་གཏོང་ལ་རྗེས་དྲན་ཞུས་པ་དང་། བཙན་བྱོལ་རང་དབང་ལུང་པའི་ནང་ཡོད་པའི་བོད་མི་རྣམས་ཀྱིས་བོད་ཀྱི་ཆོས་དང་རིག་གཞུང་སྲུང་སྐྱོབ་དང་བོད་དོན་འཐབ་རྩོད་ལ་སྨན་པའི་འབད་བརྩོན་གང་ཐུབ་གནང་དགོས་པ་གལ་ཆེན་ཡིན་པ་དང་། དེ་ལྟར་གནང་ཐུབ་ཚེ་བོད་ཀྱི་རྩ་དོན་སླད་དུ་སྐུ་ལུས་ཞུགས་འབུལ་གནང་མཁན་བོད་མི་ ༡༥༧ ཙམ་བྱུང་བ་རྣམས་ཀྱིས་གཙོས་པའི་བོད་ཀྱི་དཔའ་བོ་དཔའ་མོ་ཡོངས་ཀྱི་སྙིང་སྟོབས་ཞུམ་པ་མེད་པའི་བློས་གཏོང་རྣམས་ལ་དངོས་སུ་རྗེས་དྲན་ཞུ་ཐུབ་རྒྱུ་ཡིན་པ་དང་། གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་པའི་བོད་པའི་མི་རབས་རྒན་པ་ཚོས་སྐུ་ལས་བསྐྱོན་པའི་དབང་གིས་ང་ཚོ་བོད་མི་བཙན་བྱོལ་བ་རྣམས་ནི་བཙན་བྱོལ་བ་གཞན་དང་མི་འདྲ་བའི་གནས་བབས་ཐོག་ནས་བོད་ཀྱི་ཆོས་དང་རིག་གཞུང་མི་ཉམས་གོང་འཕེལ་གནང་བཞིན་ཡོད་པ་སོགས་གསུངས་འདུག མཛད་སྒོ་གྲོལ་རྗེས་མང་ཚོགས་ཀྱིས་མེག་གྷན་ནས་རྡ་ཤོད་ཀ་ཅཱ་རི་བར་དུ་ཞི་བའི་གོམ་བགྲོད་ཀྱི་ལས་འགུལ་ནང་མཉམ་ཞུགས་གནང་སོང་།། གསར་འགོད་པ་སྐལ་བཟང་དོན་གྲུབ།
གཏེར་གྱི་རྣམ་བཤད་ཆེན་མོ་ལག་ཏུ་འབྱོར་བ།
རྫ་ཚེ་རིང་བཀྲ་ཤིས། ཕ་རུས་དཔལ་མཚོ་ཚང་གི་བུ་རབས་ཚ་བརྒྱུད་དུ་གྱུར་པའི་ངོས་ནས་ཕུ་ནུར་ཡང་འགྲོ་ལ། སྤྱིའི་ཆ་ནས་ཀྱང་ཆོས་གྱི་མཆེད་དང་འདྲིས་པའི་གྲོགས་པོར་ཡང་གྱུར་པ། སློབ་དཔོན་སྣ་ཚོགས་གཟུགས་ཅན་མཆོག་གི་ལས་འཕྲོ་གཏེར་གྱི་རྣམ་བཤད་ཆེན་མོ་དེ་ད་ལྟ་དངོས་སུ་ལག་ཏུ་འབྱོར། འདིའི་ཐད་ཁོང་དང་མཉམ་དུ་རོང་ཟོམ་བརྙན་འཕྲིན་དུ་གླེང་མོལ་ཞིག་ཀྱང་གོ་སྒྲིག་ཞུ་བཞིན་པའི་སྒང་ཡིན། ཁོང་ནི་མཁྱེན་རྒྱ་དང་ཤེས་རབ། རྩོམ་རྩལ་གང་ཅི་ནས་ཚད་ཧ་ཅང་མཐོ་ལ། ལོ་མང་པོ་ཞིག་ལ་ཨ་རི་སྒོར་མོའི་ལུང་པ་ནས་ལྟོ་སྐྱ་གོས་ཧྲུལ་གྱིས་དུས་ཚོད་ཡོད་ཚད་ཐོས་པ་དང་རྩོམ་པ་སོགས་ལ་བརྗེས་པ་ཞིག་ཡིན་ཞིང་། ཁོང་གིས་བརྩམས་པའི་གུ་རུ་རིན་པོ་ཆེའི་རྣམ་ཐར་ལ་སྒྲོ་སྐུར་ཟློག་པའི་གཏམ་ལྟ་བུ་ངས་ཀྱང་མང་པོ་ཞིག་ལ་རྟག་ཏུ་འོས་སྦྱོར་ཞུ་བཞིན་ཡོད། བརྗོད་བྱ་བརྗོད་བྱེད་ཤིན་ཏུ་ཕུན་སུམ་ཚོགས་པའི་དཔྱད་རྩོམ་དེ་ལྟ་བུ་མཇལ་རིན་ཡོད་པ་ཞིག་ཡིན། དེབ་འདི་ཡང་དེབ་ཀྱི་བམ་ཁ་ཙམ་གྱིས་ཀྱང་བློ་ཆུང་བརྩོན་པས་བཏང་བ་དག་འཇིགས་པ་སྐྱེ་བ་ཞིག་འདུག་ལ། ནང་དོན་སྤྱི་དང་། གཏེར་དང་འབྲེལ་བའི་རྣམ་པར་བཤད་པ་རྒྱ་ཆེ་བའི་ཁོག་དབུབ་སྟངས་དང་གཞུང་འགྲོལ་སྟངས་སོགས་ནི་ཧ་ཅང་ལེགས་པ་སྨོས་མ་དགོས། ཡིན་ན་ཡང་། འབྲེལ་ཡོད་གཏེར་སྟོན་གྱི་ཁོངས་སུ་ཉེ་རབས་ཀྱི་གཏེར་སྟོན་དུ་སྐད་པའང་འགའ་ཞིག་བསྡུས་ཡོད་པ་དེར་སྒེར་གྱི་ལོག་མཐོང་གི་དབང་དུ་བཏང་ན་འགའ་རེ་ནི་རེ་ཞིག་བཏང་སྙོམས་སུ་བཞག་ནའང་ཆད་སྐྱོན་དུ་མི་འགྱུར་སྙམ་པའི་བསམ་ཚུལ་ཅུང་ཟད་ཡོད་པ་ནི། སྔར་དེབ་ལག་ཏུ་མ་འབྱོར་བའི་གོང་ནས་སེམས་ཀྱི་འཆར་ཆ་ཟོལ་མེད་དུ་ཞུས་པ་ཡིན། འོ་ན། སུ་ཞིག་བཅུག་ན་འགྲིག་དང་། སུ་ཞིག་བཅུག་ན་མི་འགྲིག་པའི་ཁ་གསལ་ནི་གང་ཡང་ཞུ་རྒྱུ་མེད། མ་ཟད་ཁོང་རྣམ་པ་ནི་དག་སྣང་ཆེ་བ་དང་ཆོས་སྤྱན་ལྡན་པས་འདིའི་རིགས་ལའང་ཁོང་རྣམ་པ་རང་གི་ས་མཚམས་ཆུ་མཚམས་ཤིག་ལོས་ཡོད་ཞུ་རྒྱུ་ལས་ཅང་མེད། བོད་ནང་དུ་གཏེར་གསར་ཕྱོགས་བསྒྲིགས་ཀྱི་ལས་དོན་གནང་བཞིན་པའི་ཆོས་གྲོགས་དག་ལའང་བསམ་ཚུལ་འདི་རང་ཡོད་མོད། ང་ལྟ་བུ་ལ་ནི་འཇམ་མགོན་མཁྱེན་ཀོང་རྣམ་གཉིས་ལྟ་བུའི་གཏེར་སྟོན་དག་རྫུན་སོགས་ཀྱི་ཐད་ཁྲིམས་ཐག་གཅོད་པའི་ཡེ་ཤེས་ཀྱི་ཕྱག་རྒྱ་ག་ལ་ཡོད། ཆོས་ཀྱི་རྗེས་སུ་འབྲངས་པའི་རྣམ་དཔྱོད་ཀྱང་ཕལ་བ་ལས་མེད་པས་འདི་དག་གི་ཐད་གང་ཡང་ཞུ་མི་ནུས་པར་སྣང་། གང་ལྟར་ཡང་། ལས་འཕྲོ་གཏེར་གྱི་རྣམ་བཤད་ཆེན་མོ་འདི་ནི་སྔ་ན་མེད་པའི་རྒྱ་ཆེ་བ་དང་། དཔེ་བཤུས་དང་ཕྱོགས་བསྒྲིགས་ལྟ་བུ་མིན་པར་རྩོམ་པ་པོ་རང་གི་ཤེས་རབ་དང་ཐོས་པ་དུས་ཚོད་བཅས་ཀྱིས་གྲུབ་པའི་ནོར་བུ་ལྟ་བུ་ཞིག་ཡིན་པར་མཐོང་སྟེ། ཆ་ཤས་རེ་རེ་ནས་ཀྱང་ད་དུང་དེ་ལས་ཀྱང་ལྷག་པ་བྱུང་ན་སྙམ་པའི་རེ་བ་ཆེ་དྲགས་པའི་ཚོད་དུ་ཡོད་པས། ཞོར་འཕྲོས་ཀྱི་ཚོར་སྣང་ཞིག་ཀྱང་ལབ་ཤོར་བ་ཙམ་ཡིན། མདོར་ན། གུ་རུ་པདྨའི་རྗེས་འཇུག་པདྨའི་ཟབ་གཏེར་ལ་དགའ་གུས་དང་ལས་ཀྱིས་འབྲེལ་བ་དག་གིས་ཅིས་ཀྱང་ཀློག་དགོས་ངེས་དང་། དད་གུས་སྤྲོ་གསུམ་གྱིས་འཆང་དགོས་པའི་དེབ་ཁྱད་པར་བ་ཞིག་ཡིན་ངེས། ཡང་ཕྱོགས་གཞན་ཞིག་ནས་ནི། ཁོང་གིས་ཉེ་ཆར་རྡོར་གདན་རྙིང་མའི་སྨོན་ལམ་སོགས་སུ་འགྲེམ་སྤེལ་བྱེད་སྐབས་ཀྱང་། སྐབས་སྐབས་སུ་ནི་ཁོང་དང་ཁོང་གི་དཀའ་ལས་བརྒྱབ་པའི་བསྟན་པ་སྤྱི་ལ་སྨན་པའི་ཕྱག་ལས་དེར་ཚུར་ཆེ་མཐོང་དང་དཔའ་དར་ཞིག་ཐོབ་འོས་པ་ལ། སོ་སོའི་དཀའ་ལས་བརྒྱབ་ནས་བྲིས་ཤིང་དཔར་བར་མ་ཟད། དུང་ཁ་བཏགས་ཀྱིས་ལྕིབས་ནས་མགོ་སྒུར་ལྕེ་སྣར་ཏེ་བླ་ཆེན་ཚོའི་ཁྲི་ཟུར་ནས་ཡར་འབུལ་ས་ཨེ་རག་ལྟ་དགོས་པ་སོགས་དྲ་ལམ་ནས་མཇལ་སྐབས། དབང་ཐང་གི་མདུན་དུ་ཤེས་རབ་ཅན་གྱི་ཁ་སྟབས་ཉམ་ཆུང་བར་མཐོང་བའི་དཔེ་ཆ་བའི་ང་རྒྱལ་གྱི་འཁང་རའང་ཤོར་ལ་ཁད་པ་རེ་བྱུང་མོད་དེའང་སྒེར་གྱི་ཚོར་སྣང་ཙམ་ཡིན་པའི་རེ་བ་ཡོད ། གང་ལྟར། དོན་ལ་ཁོང་གི་གསུང་རྩོམ་འདི་ཉིད་ལའང་ཁ་བསྐོང་དང་ལེགས་བཅོས་དགོས་ངེས་ཅུང་ཟད་རེ་ནི་ཡོད་སྲིད་མོད། སྤྱིའི་ཆ་ནས་སྔ་འགྱུར་བཀའ་གཏེར་ཟུང་གི་ཡ་གྱར་ལས་འཕྲོ་གཏེར་བརྒྱུད་དང་འབྲེལ་བའི་རྣམ་བཤད་གལ་ཆེན་ཞིག་ཏུ་གྲུབ་འདུག་པའི་བདེན་དོན་ནི་ཡུལ་དང་དུས་ཀྱི་རྒྱ་ལས་བརྒལ་ནས་ཡུན་ནས་ཡུན་དུ་བརྟན་པར་གནས་པར་ངེས་སོ། ། ཤེས་རབ་རྒྱལ་བར་གྱུར་ཅིག ། རྫ་ཚེ་རིང་བཀྲ་ཤིས་ཀྱིས་རི་སྔོན་པོ་ནས་ཡོལ་བུའི་ལོའི་ཆོ་འཕྲུལ་ཟླ་བའི་ཚེས་བཅུ་གཉིས་ཀྱི་ཕྱི་དྲོ་འཕྲལ་བསམ་ཚུལ་ཡི་གེར་བཏགས་སོ།།
རྡ་སར་བོད་མིའི་རང་དབང་སྒེར་ལངས་ཀྱི་དུས་དྲན་ཐེངས་༦༤ པ་སྲུང་བརྩི་ཞུས་སོང་།
ཟླ་༣ པའི་ཚེས་༡༠ ཉིན་བཞུགས་སྒར་རྡ་ས་མེག་གྷན་དུ་རྟེན་གཞི་བྱས་པའི་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་སྒྲིག་འཛུགས་ཀྱི་གོ་སྒྲིག་འོག བོད་མིའི་རང་དབང་སྒེར་ལངས་དུས་དྲན་ཐེངས་༦༤ པའི་མཛད་སྒོ་འཚོགས་གནང་སོང་བ་དང་། སྐབས་དེར་སྐུ་ཞབས་མི་ཀུ་ལ་པེཀ་སཱ་དབུས་པའི་ཡུ་རོབ་མཐུན་ཚོགས་ཀྱི་གྲོས་ཚོགས་འཐུས་མི་བཞི་ལས་གྲུབ་པའི་སྐུ་ཚབ་ཚོགས་ཆུང་དང་ཕྱག་རོགས་ལས་བྱེད། མེཀ་སི་ཀོའི་སྐུ་ཞབས་སལ་ཝ་ཌོར་ཁ་རོ་དབུས་པའི་གྲོས་ཚོགས་འཐུས་མི་ ༩ ལས་གྲུབ་པའི་སྐུ་ཚབ་ཚོགས་ཆུང་དང་། བོད་དོན་རྒྱབ་སྐྱོར་ཚོགས་པའི་ཚོགས་མི་རྣམ་པ། ལི་ཐུའི་ནི་ཡའི་གྲོས་ཚོགས་འཐུས་མི་སྐུ་ཞབས་ཨ་རུ་ན་སི་ཝ་ལིན་སི་ཀསི་དང་། ཨ་རིར་རྟེན་གཞི་བྱས་པའི་རྒྱལ་ཡོངས་མང་གཙོ་ཐེབས་རྩའི་གཙོ་འཛིན་སྐུ་ཞབས་ཌེ་མོན་ཝིལ་སོན་བཅས་ཕེབས་འདུག བཀའ་ཤག་གི་གསུང་བཤད་ནང་དུ། བོད་མིའི་སྒྲིག་འཛུགས་ཀྱི་ངོས་ནས་དབུ་མའི་ལམ་གྱི་སྲིད་བྱུས་གཞིར་བཟུང་རྒྱ་ནག་གཞུང་ལ་བོད་ཀྱི་མ་འོངས་གནས་བབས་སྐོར་གོ་བསྡུར་སྦྱངས་བཤད་བརྒྱུད་གཉིས་མོས་ཀྱི་ཐབས་ལམ་ཞིག་རྙེད་པའི་རེ་བ་འཆང་བཞིན་པ་དང་། དེ་ཡང་ཕན་ཚུན་འདྲ་མཉམ་དང༌། བརྩི་མཐོང་མཛའ་མཐུན། བོད་རྒྱ་གཉིས་ཕན། རྒྱུན་གནས་ཐུབ་པ་བཅས་ཀྱི་ཐབས་ལམ་བརྒྱུད་གོ་བསྡུར་སྦྱངས་བཤད་བྱ་རྒྱུར་གྲ་སྒྲིག་ཨང་བསར་ཡོད་ལ། ལྷག་པར་དུ་བོད་མི་རིགས་རྩ་མེད་གཏོང་བའི་རྒྱ་ནག་དམར་གཞུང་གི་ནོར་འཁྲུལ་སྲིད་བྱུས་འཕྲལ་དུ་མཚམས་འཇོག་དང་ཡོ་བསྲང་ཡོང་བའི་སྐུལ་འདེབས་བྱེད་ཀྱི་ཡོད། ཟླ་བ་སྔོན་མའི་ནང་། ཨ་རིའི་གྲོས་ཚོགས་འོག་མའི་སྤྱི་མཐུན་ཚོགས་པའི་ཕྱི་འབྲེལ་ཚོགས་ཆུང་གི་ཚོགས་གཙོ་མའེ་ཁེལ་མེཀ་ཀཽལ་ (Michael McCaul) ལགས་དང་། མང་གཙོ་ཚོགས་པའི་འཐུས་མི་ཇིམ་མེཀ་གོ་ཝེན་ (Jim McGovern) ལགས། གྲོས་ཚོགས་གོང་མའི་མང་གཙོ་ཚོགས་པའི་འཐུས་མི་ཇེཕ་མེརཀ་ལེ་ (Jeff Merkley) ལགས་དང་། སྤྱི་མཐུན་ཚོགས་པའི་འཐུས་མི་ཊོཌ་ཡངྒ་ (Todd Young) ལགས་བཅས་ནས་གྲོས་ཚོགས་གོང་འོག་སོ་སོར་སྲིད་དོན་ཚོགས་པ་ཐུན་མོང་ཐོག་བོད་རྒྱའི་རྩོད་རྙོག་ཞི་འགྲིག་ལ་སྐུལ་འདེད་ཀྱི་ཁྲིམས་འཆར་ཞིག་བསྐྱར་འདོན་གནང་བ་དང་། སྔ་ལོ་ཕྱི་ཟླ་ ༡༢ པའི་ཚེས་ ༡༤ ཉིན། ཁེ་ན་ཌ་གྲོས་ཚོགས་སུ་དབུ་མའི་ལམ་ལ་རྒྱབ་སྐྱོར་དང་། བོད་རྒྱ་འབྲེལ་མོལ་བསྐྱར་གསོ་ལ་སྐུལ་འདེད་ཀྱི་གྲོས་ཆོད་འཇོག་ཐུབ་ཡོད་པ་བཅས་ནི་སེམས་ཤུགས་འཕེལ་གཞི་ཞིག་ཡིན་ཞིང་། བོད་ཀྱི་ལོ་རྒྱུས་གནས་བབས་དང་། ཛ་དྲག་གནས་སྟངས་ལ་དངོས་ཡོད་དང་མཐུན་པའི་ངོས་འཛིན་གནང་སྟེ་ཞི་འགྲིག་ལ་མངོན་དུ་ཕྱོགས་པའི་ཁྲིམས་འཆར་དང་། གྲོས་ཆོད་འདི་དག་གིས་བོད་རྒྱ་གཉིས་སྨན་གྱི་དབུ་མའི་ལམ་ལ་གདེང་འཇོག་དང་། བོད་དོན་བདེན་མཐའ་གསལ་བར་དོན་ཕན་ལྡན་པའི་སྐུལ་འདེད་ཀྱི་ནུས་པ་ཐོན་རྒྱུར་གདོན་མི་ཟ་ཅེས་དང་། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་བོད་དང་བོད་མིའི་མགོན་སྐྱབས་དང་མཚོན་རྟགས་ཡིན་པ་ཙམ་དུ་མ་ཟད། འགྲོ་བ་མིའི་བཟང་སྤྱོད་གོང་སྤེལ་དང་། ཆོས་ལུགས་མཐུན་འབྲེལ། བོད་ཀྱི་ཆོས་རིག་འཛིན་སྐྱོང་། རྒྱ་གར་གྱི་གནའ་བོའི་དཔལ་ཡོན་བསྐྱར་གསོ་བཅས་མཛད་ཁུར་བཞི་བདག་གིར་བཞེས་མཁན་འཇིག་རྟེན་འདིར་སྤྱི་ཡོངས་ཀྱིས་བཀུར་བའི་དབུ་ཁྲིད་འགྲན་ཟླ་བྲལ་བ་ཞིག་ཡིན་པས། རྒྱ་གཞུང་གིས་མགོན་པོ་མཆོག་ལ་ཁ་བྲལ་རིང་ལུགས་པ་སོགས་དཀར་ནག་ཕྱིན་ཅི་ལོག་པའི་བསྙོན་འཛུགས་དང་། མགོན་པོ་གང་གི་འཇིག་རྟེན་སྤྱི་སྨན་གྱི་མཛད་འཕྲིན་ལ་བར་དུ་གཅོད་པའི་གཏམ་སྤྱོད་སྤེལ་རིགས་ལ་ངོ་རྒོལ་མཐའ་གཅིག་ཏུ་བྱ་རྒྱུ་དང་། ལྷག་པར་དུ་རྒྱ་གཞུང་གིས་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་རིགས་དབར་གྱི་ལོ་རྒྱུས་དང་། ད་ཡོད་གནས་སྟངས་ངོ་མར་དྲང་ཕྱོགས་ཀྱི་ངོས་འཛིན་གསལ་པོ་བྱེད་མ་ཐུབ་ཚེ། བོད་རྒྱའི་དཀའ་རྙོག་སེལ་བའི་དོན་དམ་གྱི་ལྡེ་མིག་བརླགས་ཉེན་ཡོད་ཅེས་སོགས་གསུངས་འདུག བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་ནང་དུ། […]
བུད་མེད་ཉིན་མོ་དང་ཐོབ་ཐང་།
ཆེད་བརྗོད། ཕྱི་ཟླ་༣ པའི་ཚེས་༨ ནི་རྒྱལ་སྤྱིའི་བུད་མེད་ཉིན་མོ་ཡིན་པ་དང་། དུས་ཆེན་འདི་ནི་འཛམ་གླིང་ཤར་ནུབ་ཀྱི་ཡུལ་གྲུ་ཀུན་ཏུ་སྲུང་བརྩི་བྱེད་པའི་ལུགས་སྲོལ་དར་ཡོད། བོད་པའི་ཁ་རྒྱུན་དུ་བུད་མེད་གནམ་གྱི་ཕྱེད་ཀ་ཡིན་ཟེར་སྲོལ་ཡོད་པ་བཞིན། གནའ་སྔ་མོའི་དུས་སུ་འཛམ་གླིང་གི་ཡུལ་གྲུ་མང་པོ་ལས་བོད་ཀྱི་བུད་མེད་རྣམས་ཐོབ་ཐང་དང་ཆེ་མཐོང་ཆེ་བ་ཡོད། ཡུལ་དུས་གནས་བབས་དང་ཁོར་ཡུག་གང་ཐད་ནས་བུ་དང་བུ་མོ་གཉིས་ནུས་པ་གཅིག་མཚུངས་ཡིན་མིན་གྱི་ཁྱད་པར་བྱུང་ཡོད་ཅིང་། གནའ་བོའི་དུས་སུ་རྒྱལ་ཁབ་དང་ཡུལ་སྡེ་གང་ཡིན་ཡང་གཙོ་བོ་དམག་དང་དཔུང་གི་སྟོབས་ལ་བརྟེན་ནས་སྐྱོང་དགོས་པ་དང་། དམག་དོན་གྱི་ཐོག་ནས་སུ་སྟོབས་ཤུགས་ཆེ་བ་ཡོད་ན་དེ་ཡུལ་དེའི་རྒྱལ་པོའམ་བདག་པོར་འགྱུར་རྒྱུ་སྨྲོས་མེད་རེད། ད་ལྟའི་དུས་ཚོད་དང་མི་འདྲ་བར་འཕྲུལ་ཆས་ཡར་རྒྱས་སོང་མེད་པས་གཟུགས་པོའི་སྟོབས་ཤུགས་ཀྱི་ཐོག་ནས་བུད་མེད་ལས་སྐྱེས་པ་ཆེ་བ་ཡོད་པ་བཤད་མི་དགོས་པས། སྐབས་དེའི་ཡུལ་སྡེ་སྐྱོང་རྒྱུ་དང་ཉེན་ཁ་ཆེ་ཤོས་དག་སྐྱེས་པས་གདོང་ལེན་མི་བྱེད་ཐབས་མེད་དུ་གྱུར་ཡོད། བུད་མེད་རེ་ཟུང་བུ་ལས་དཔའ་ངར་ལྡན་པ་བྱུང་བའི་ལོ་རྒྱུས་ཡོད་ཀྱང་། རྒྱ་ཆེ་ས་ནས་བལྟས་ན་ཁྱད་པར་ཆེན་པོ་ཡོད། ཆེད་དུ་བགོ་བཤའ་བརྒྱབ་པ་མིན་ཡང་དམག་འཁྲུག་དང་། རྐུན་ཇག ར་མདར་རྒྱུག་པ་སོགས་གཙོ་བོ་སྐྱེས་པའི་འགན་ཁུར་དང་། ཁྱིམ་ཚང་སྐྱོང་རྒྱུའི་འགན་དེ་གཙོ་བོ་བུད་མེད་རྣམས་ཀྱིས་ཁུར་ཡོད། བོད་ལ་མཚོན་ན་ཤེས་ཡོན་སློབ་སྦྱོང་གི་ཐོག་ནས་གཙོ་བོ་སེར་མོ་བས་སློབ་སྦྱོང་བྱེད་པ་ལས། མི་སྐྱ་སློབ་སྦྱོང་བྱེད་མཁན་ཧ་ཅང་དཀོན་ལ། མི་སྐྱའི་ནང་དུའང་སྐྱེས་པ་ལས་སློབ་སྦྱོང་བྱེད་མཁན་བུད་མེད་ཉུང་བ་ནི་སྨྲོས་མི་དགོས་པ་ལྟ་བུར་གྱུར་ཡོད། དེ་ནི་ཆེད་དུ་དབང་བསྒྱུར་དང་གནའ་གནོན་བྱ་རྒྱུའི་འཆར་གཞི་དང་སྲིད་བྱུས་བཟུང་ནས་བུད་མེད་ལ་ཐོབ་ཐང་འཕྲོགས་པ་ཞིག་གཏན་ནས་མིན་པར། ཡུལ་དུས་གནས་སྟངས་དང་ཁོར་ཡུག་གི་ཁྱད་པར་ལ་བརྟེན་ནས་བྱུང་ཡོད། འདས་པའི་ལོ་རྒྱུས་ཀྱི་གནས་བབས་ལ་བསྐྱར་ཞིབ་བྱེད་དུས་སྐབས་དེའི་གནས་སྟངས་དང་ཁོར་ཡུག་ལ་བལྟ་དགོས་པ་ལས། ད་ལྟའི་གནས་སྟངས་ལ་བརྟེན་ནས་འདས་པའི་ལོ་རྒྱུས་ལ་བསྡོམས་རྒྱག་མི་རུང་། ཚན་རིག་དང་འཕྲུལ་ཆས་དར་རྒྱས་རྩེ་མོར་སོན་པའི་ད་ལྟའི་དུས་རབས་འདིར། ལུས་ཀྱི་ཤེད་ཤུགས་ཁོ་ན་ལ་བརྟེན་ནས་བསྒྲུབ་དགོས་པའི་ལས་དོན་ཧ་ཅང་ཉུང་ལ། དམག་འཁྲུག་ཀྱང་འཕྲུལ་ཆས་ལ་བརྟེན་ནས་བྱེད་པ་ལས་ཤེད་ཤུགས་ཁོ་ན་ལ་བརྟེན་མི་དགོས་པའི་དུས་འདིར། སྐྱེས་པ་ལས་བུད་མེད་བློ་རིག་མྱུར་བ་དང་། སྐྱེས་པ་ལས་བུད་མེད་བྱམས་སེམས་ཆེ་བ་སོགས་བུད་མེད་ཀྱི་ནུས་པ་སྔར་ལས་ལྷག་པ་འདོན་རྒྱུའི་དུས་ཚོད་ཅིག་ཡིན་པ་མ་ཟད། ཤེས་ཡོན་གྱི་ཐོག་ནས་ཀྱང་འདྲ་མཉམ་ཡིན་པ་མ་ཟད། ལས་དོན་མང་པོའི་ཐོག་སྐྱེས་པ་ལས་བུད་མེད་ནུས་ཤུགས་ཆེ་བར་གྱུར་ཡོད་པས། འདས་པའི་ལོ་རྒྱུས་དང་བསྡུར་ན་ད་ལྟ་བུད་མེད་ཀྱི་དུས་རབས་ཞེས་བརྗོད་ཀྱང་མི་འོས་པ་མེད་པ་ལྟ་བུར་གྱུར་འདུག དེར་བརྟེན་བོད་མི་རྣམས་ཀྱི་ངོས་ནས་ཀྱང་དུས་ཚོད་འདིར་བུད་མེད་ཀྱི་ནུས་པ་ངོས་འཛིན་གསལ་པོ་དགོས་པ་དེ་གལ་ཆེན་པོར་གྱུར་ཡོད་པས། ཁོར་ཡུག་དང་གོ་སྐབས་ལ་བསྟུན་ནས་ནུས་པ་འདོན་ཐུབ་པའི་ཐབས་ཤེས་དགོས་པ་ལས། “ངས་ཟ་མ་བཟོ། ཁྱོད་ཀྱིས་སྣོད་ཆས་ཁྲུས་”ཞེས་པ་ལྟ་བུས་ཕན་ཐོགས་མེད། ད་ལྟའི་དུས་འདིར་བུད་མེད་ནུས་སྟོབས་གོང་སྤེལ་གྱི་སྲིད་བྱུས་ཞེས་པ་དང་། དེ་དང་འབྲེལ་བའི་ལས་འཆར་མང་པོ་ཞིག་ཡོད་ཀྱང་། དེ་ལ་བརྟེན་ནས་བུད་མེད་སྣེ་ཁྲིད་པ་མང་པོ་ཐོན་རྒྱུར་ནུས་པ་དེ་ཙམ་ཐོན་ཐུབ་མེད། གལ་སྲིད་བུད་མེད་རྣམས་ཀྱི་ངོས་ནས་བུད་མེད་ལ་ཐོབ་ཐང་གིས་མ་འདེང་པའི་ལྟ་ཚུལ་ཡོད་པའམ། དེ་དང་འབྲེལ་བའི་རྩོད་ལེན་བྱེད་དགོས་པའི་བསམ་ཚུལ་ཡོད་ན་མི་འོས་པ་མེད་ལ། སྐྱེས་པས་བུད་མེད་ལ་ཐོབ་ཐང་མ་སྤྲད་པའི་གནས་ཚུལ་ཡོད་ན་ཐོག་མ་སྐྱེས་པས་བསམ་ཤེས་ལ་བརྟེན་ནས་བུད་མེད་རྣམས་ལ་རྒྱབ་སྐྱོར་དང་གཞོགས་བྱེད་པའི་ཐབས་ཤེས་བྱེད་དགོས་པ་དང་། དེ་ལྟར་མ་བྱས་ན་ཁ་གཏད་གདོང་ལེན་གྱི་ཐོག་ནས་རྩོད་ལེན་བྱས་ཀྱང་མི་འགྲིག་པ་མེད། འོན་ཀྱང་ཞིབ་ཏུ་བསམ་བློ་གཏོང་དགོས་པ་ཞིག་ལ་བུད་མེད་ཀྱི་ནུས་པ་ཐོན་ཐུབ་པར། སྐྱེས་པས་རྒྱབ་སྐྱོར་ཁོ་ན་ལ་བརྟེན་ནས་ཡོང་ཐུབ་པ་ཞིག་གཏན་ནས་མིན་པར། དཔེར་ན་འོས་འཚམས་ཡོད་པའི་བུད་མེད་ཅིག་གིས་འགོ་ཁྲིད་དུ་འོས་འགྲན་བྱེད་བཞིན་ཡོད་ན་བུད་མེད་རྣམས་ཀྱིས་ཀྱང་དེ་ལ་རྒྱབ་སྐྱོར་བྱེད་དགོས་པ་གལ་ཆེན་པོ་ཡིན། མདོར་ན་ད་བར་བུད་མེད་ཀྱིས་བུད་མེད་ལ་རྒྱབ་སྐྱོར་གྱི་འོས་འཕེན་པ་སོགས་བཙན་བྱོལ་བོད་པའི་སྤྱི་ཚོགས་སུ་དཀོན་པ་དང་། གལ་སྲིད་བུད་མེད་ལ་འདྲ་མཉམ་གྱི་ཐོབ་ཐང་མེད་པའི་བསམ་ཚུལ་ཡོད་མཁན་ཞིག་ཡིན་ན། ཨང་དང་པོ་བུད་མེད་ཀྱིས་བུད་མེད་ལ་རྒྱབ་སྐྱོར་ཚད་མཐོ་བྱ་རྒྱུའི་བསམ་བློ་ག་དུས་སླེབས་ཀྱང་། དེ་དུས་བུད་མེད་ཀྱི་ནུས་སྟོབས་གོང་འཕེལ་སོང་བའི་རྟགས་རེད། གཞན་ནང་ལས་ཙག་ཙིག་བགོ་བཤའ་བརྒྱབས་པ་ཙམ་དང་། བུད་མེད་རྣམས་ཀྱིས་ཆང་རག་འཐུང་རྒྱུ་དང་། ཐ་མག་འཐེན་རྒྱུ་ཙམ་གྱི་ཐོག་ནས་སྐྱེས་པ་དང་ཐོབ་ཐང་གཅིག་མཚུངས་རག་ཀྱང་དོན་དུ་ཕན་ཐོགས་དེ་ཙམ་མེད། ཆབ་སྲིད་དང་། […]
རྡ་སར་རྒྱལ་སྤྱིའི་བུད་མེད་ཉིན་མོ་སྲུང་བརྩི་ཞུས་སོང་།
ཟླ་༣ པའི་ཚེས་༨ ཉིན་ནི་ལོ་ལྟར་རྒྱལ་སྤྱིའི་བུད་མེད་ཉིན་མོར་སྲུང་བརྩི་གནང་བཞིན་ཡོད་པ་ལྟར། ཐེངས་འདིར་བཞུགས་སྒར་རྡ་སར་བུད་མེད་ལྷན་ཚོགས་ནས་ཉིན་མོ་དེ་སྲུང་བརྩི་ཞུས་སོང་བ་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་ནས་ཉིན་མོ་དང་འབྲེལ་ནས་གསུང་བཤད་གནང་འདུག དེ་ཡང་དབུས་བོད་ཀྱི་བུད་མེད་ལྷན་ཚོགས་དང་རྡ་ས་བུད་མེད་ལྷན་ཚོགས་གཉིས་ནས། མེག་གྷན་གྱི་ཁྲོམ་གཞུང་དུ། འདི་ལོའི་རྒྱལ་སྤྱིའི་བུད་མེད་ཉིན་མོའི་བརྗོད་གཞི་སྤྱི་སྙོམས་དང་ལེན་དང་བསྟུན་ནས། གཞས་དང་ཞབས་བྲོ། གོ་རྟོགས་ལས་འགུལ། འདྲི་རྩད་ལས་འགུལ་སོགས་སྤེལ་ནས་རྒྱལ་སྤྱིའི་བུད་མེད་ཉིན་མོ་སྲུང་བརྩི་ཞུས་གནང་སོང་། སྐབས་དེར་དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཞོན་ཚེ་རིང་སྒྲོལ་མ་ནས། ལོ་ལྟར་རྒྱལ་ཚོགས་ནས་རྒྱལ་སྤྱིའི་བུད་མེད་ཀྱི་ཉིན་མོའི་ཐོག་བརྗོད་གཞི་འདྲ་མིན་གཏན་འབེབས་གནང་གི་ཡོད་པ་ལྟར་དེ་དང་བསྟུན་ནས་ལས་འགུལ་སྤེལ་གྱི་ཡོད་པ། བཙན་བྱོལ་བོད་མི་ཚོགས་སྒེར་རྣམས་ནས་གཞིས་བཞུགས་བུད་མེད་རྣམས་ལ་རང་དབང་མེད་པའི་གནས་སྟངས་ལ་གཞིགས་ཏེ་ས་གནས་སོ་སོར་དེ་འབྲེལ་ལས་འགུལ་སྤེལ་དགོས་རྒྱུ་གལ་ཆེན་ཡིན་པ། ལྷག་པར་དུ་རྒྱལ་སྤྱིའི་སྤྱི་ཚོགས་ནས་རྒྱལ་སྤྱིའི་བུད་མེད་ཉིན་མོ་སྲུང་བརྩི་དང་འབྲེལ་ནས་གཞིས་བཞུགས་བོད་མི་གཙོས་པའི་སྐྱེས་མ་རྣམས་ཀྱི་རང་དབང་དང་འདྲ་མཉམ་གྱི་ཐོབ་ཐང་མེད་པའི་གནས་སྟངས་ལ་དགོངས་བཞེས་གནང་དགོས་པ་གལ་ཆེན་ཆགས་ཡོད་སྐོར་གསུངས་འདུག བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་གིས་ཉིན་མོ་དང་བསྟུན་ནས། བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་སྤེལ་ཚན་པས་ཟླ་བ་གཅིག་གི་རིང་བུད་མེད་སིལ་སྤོལ་རྩེད་འགྲན་གཙོས་པའི་ལས་གཞི་ཁག་ཅིག་སྤེལ་འཆར་ཡོད་པ། སྤྱིར་བཏང་རྒྱལ་སྤྱིའི་སྤྱི་ཚོགས་གཞན་དང་བསྡུར་ན། བོད་པའི་སྤྱི་ཚོགས་ནང་ཕོ་མོ་འདྲ་མཉམ་གྱི་གནས་བབ་ལེགས་པོ་ཡོད་ཀྱང་། སྐབས་འགར་བུད་མེད་ཐོག་དཀའ་ངལ་འབྱུང་གི་ཡོད་པ་དེ་དག་དཔལ་འབྱོར་ལས་ཁུངས་ཀྱི་ཁྱབ་ཁོངས་བུད་མེད་ནུས་སྟོབས་གོང་སྤེལ་ཚན་པས་རམས་འདེགས་གནང་བཞིན་ཡོད་པ་དང་། ལྷག་པར་དུ་མ་འོངས་པར་སྤྱི་ཚོགས་ནང་བུད་མེད་ཀྱི་འགོ་ཁྲིད་མང་དུ་འགྲོ་རྒྱུར་མཚོན་པའི་བུད་མེད་རྣམས་ནས་སྤྱི་ཚོགས་སྤྱི་ལ་སྨན་པ་དང་། དེ་བཞིན་སྒེར་གྱི་མངོན་འདོད་འགྲུབ་ཐབས་སུ་གོ་སྐབས་དེ་ལྟར་བསྐྲུན་དགོས་པའི་དགོངས་ཚུལ། དེ་བཞིན་དེ་འབྲེལ་གྲངས་ཐོ་ཁ་གསལ་བྱུང་ཚེ། བོད་མིའི་སྒྲིག་འཛུགས་ཀྱི་ངོས་ནས་མཐུན་འགྱུར་སྦྱོང་བརྡར་བསྐྲུན་ཐབས་གནང་རྒྱུ་ཡིན་པ་སོགས་གསུངས་གནང་འདུག ། གསར་འགོད་པ་སྐལ་བཟང་དོན་གྲུབ།
བོད་མིའི་སྒྲིག་འཛུགས་ཀྱིས་མཆོད་འབུལ་སྨོན་ལམ་འཚོགས་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་གིས། རྒྱ་ནག་ནང་དུ་འགྱུར་བ་ཤུགས་ཆེན་པོ་འགྲོ་བཞིན་ཡོད་པ་མ་ཟད། རྒྱལ་སྤྱིའི་ནང་དུའང་འགྱུར་བ་ཤུགས་ཆེན་པོ་འགྲོ་བཞིན་ཡོད། ང་ཚོ་འདིར་ལས་ཀ་བྱེད་མཁན་ཡོངས་ནས་འགན་ཁྱེར་ཏེ་ཧུར་ཐག་འབད་བརྩོན་བྱེད་པ་ཡིན་ན། དོན་འབྲས་སོན་པར་རེ་བ་བརྒྱབ་ཆོག་གི་རེད། རེ་བ་མུ་མཐུད་ནས་ལྷག་དགོས། རེ་བ་ཡལ་བ་ཡིན་ན་འཐབ་རྩོད་རང་བཞིན་གྱིས་བརླག་འགྲོ་རྒྱུ་ཡིན་ཞེས་གསུངས་འདུག ཟླ་༣ པའི་ཚེས་༨ ཉིན་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་གོ་སྒྲིག་འོག རྒྱ་ནག་གཞུང་གིས་ཕྱི་ལོ་ ༡༩༨༩ ལོའི་ཟླ་༣ པའི་ཚེས་༨ ཉིན་བོད་མིར་མི་སྤྱོད་ལས་འདས་པའི་དྲག་གནོན་བྱས་ཡོད་པ་དང་། དུས་ད་ལྟ་བར་དུ་མནར་གཅོད་དང་གཉའ་གནོན། བཤུ་གཞོག་འོག་བོད་མི་རྒྱལ་གཅེས་སེར་སྐྱ་ཕོ་མོ་རྒན་བྱིས་གྲངས་ལས་འདས་པ་ཞིག་དུས་མིན་རྐྱེན་ལམ་དུ་བཏང་བ་དང་། ཉེས་མེད་ཁྲི་ཚོ་མང་པོར་བཙོན་འཇུག་དང་མནར་གཅོད། དེ་བཞིན་གར་སོང་ཆ་མེད་བཟོས་པ་སོགས་ཀྱི་ཀླ་ཀློའི་བྱ་སྤྱོད་འོག་དཀའ་སྡུག་ཚད་མེད་མྱངས་དང་མྱོང་བཞིན་ཡོད་པར་བརྟེན། བོད་ནང་གི་རྒྱལ་གཅེས་པ་རྣམས་ཀྱི་བཀའ་དྲིན་རྗེས་དྲན་དང་། གདུང་སེམས་མཉམ་སྐྱེ་ཞུ་ཆེད་མཆོད་འབུལ་སྨོན་ལམ་འཚོགས་གནང་འདུག སྐབས་དེར་སྲིད་སྐྱོང་སྤེན་པ་ཚེ་རིང་གིས་གསུང་བཤད་གནང་དོན། ཕྱི་ལོ་ ༡༩༨༨ ལོའི་ཕྱི་ཟླ་ ༩་་༡༠ དང་། ཕྱི་ལོ་ ༡༩༨༩ ཕྱི་ཟླ་ ༣ ནང་བོད་ནང་རྒྱ་ནག་གིས་སྲིད་བྱུས་བཟུང་པའི་ཐོག་བོད་མི་རྣམས་ཀྱིས་འདོད་བློ་མེད་པའི་རྣམ་འགྱུར་ཤུགས་ཆེ་བཏོན་པར་བརྟེན་ད་ལྟའི་རང་རེའི་སྤྱི་ཚོགས་ནང་དགུ་བཅུ་གསུམ་ཞེས་པའི་སྒྲིག་འཛུགས་དེ་དག་བཙུགས་པའི་དོན་རྐྱེན་དེ་ནས་བྱུང་བ་རེད། ལྷག་པར་ཕྱི་ལོ་ ༡༩༨༩ ཟླ་བ་ ༣ ཚེས་ ༨ ཉིན་བོད་མི་རྣམས་ནས་ཞི་རྒོལ་བྱས་པ་དང་། རྒྱ་ནག་གཞུང་གི་ངོས་ནས་དམ་བསྒྲགས་ནན་པོ་བྱས་ཏེ་མི་མང་དག་ཅིག་དམར་གསོད་དང་། བཙོན་འཇུག་སོགས་ཀྱི་བྱ་བ་མང་པོ་ཞིག་བརྩམས་ཡོད་པ་རེད། སྤྱིར་གསུམ་བརྒྱད་ཀྱི་མཆོད་འབུལ་སྨོན་ལམ་འདི་ཕྱི་ལོ་ ༡༩༨༩ ཟླ་བ་ ༣ ཚེས་ ༨ དང་བསྟུན་ཏེ་བྱེད་ཀྱི་ཡོད་ནའང་བོད་ས་ཤོར་བ་ནས་བཟུང་བོད་མི་རྣམས་ཀྱིས་སྡུག་རྩུབ་མྱངས་པ་སྤྱི་དང་། ལྷག་པར་ཕྱི་ལོ་ ༡༩༨༩ རྗེས་ས་བྱི་ཞི་རྒོལ་ཆེན་མོ་ཕྱི་ལོ་ ༢༠༠༨ ལོར་བྱུང་བ་རེད། ད་ལྟ་ཡིན་ནའང་བོད་ནང་རྒྱ་ནག་གཞུང་གི་སྲིད་བྱུས་དང་འབྲེལ་ནས་བོད་མི་རྣམས་ལ་གནོད་འཚེ་མང་དག་ཅིག་ཕོག་ཡོད་སྟབས། ཚེ་འདས་ཡོངས་ལ་བསྔོ་བ་སྨོན་ལམ་དང་ད་ལྟ་ཡིན་ནའང་བོད་ནང་སྡུག་སྦྱོང་མྱོང་བཞིན་པ་ཡོངས་ལ་ང་ཚོའི་ངོས་ནས་གདུང་སེམས་མཉམ་སྐྱེ་བྱེད་དགོས་པ་དང་། ང་ཚོའི་རེ་བར་རྒྱ་ནག་གི་ངོས་ནས་ཡ་ལན་ཚད་ལྡན་བྱུང་བ་ཡིན་ན་ང་ཚོའི་ངོས་ནས་ཀྱང་རྒྱ་ནག་ལ་འབྲེལ་བ་བྱེད་རྒྱུ་དང་བོད་རྒྱ་དཀའ་རྙོག་སེལ་ཐུབ་པའི་རེ་བ་ཞུ་བཞིན་ཡོད། […]
༢༠༠༨ ནས་བཟུང་ཉེ་རབས་བོད་ནང་གི་རྩོམ་རིག་རྒྱུན་སྐྱོང་དང་འགྱུར་ལྡོག་ཐོག་ཚོགས་འདུ།
ཟླ་༣ པའི་ཚེས་༨ དང་༩ ཉིན་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག ༢༠༠༨ ནས་བཟུང་ཉེ་རབས་བོད་ནང་གི་རྩོམ་རིག་རྒྱུན་སྐྱོང་དང་འགྱུར་ལྡོག་ཅེས་པའི་ཐོག བོད་མིའི་སྒྲིག་འཛུགས་ཀྱི་ཕྱི་དྲིལ་ཀམ་པུ་ཊར་སྡེ་ཚན་གྱི་ཚོགས་ཁང་དུ་ཚོགས་འདུ་འཚོགས་ཀྱི་ཡོད་པ་རེད། ཚེས་༨ ཉིན་ཚོགས་འདུའི་དབུ་འབྱེད་མཛད་སྒོར་སྐུ་མགྲོན་གཙོ་བོ་ཕྱི་དྲིལ་བཀའ་བློན་ནོར་འཛིན་སྒྲོལ་མ་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་དྲུང་ཆེ་བ་རི་ཟླ་བ་ཚེ་རིང་དང་། འགན་འཛིན་གཞོན་པ་ཀུན་དགའ་རྒྱལ་མཚན་ཕེབས་འདུག སྐུ་མགྲོན་གཙོ་བོ་ཕྱི་དྲིལ་བཀའ་བློན་གྱིས་ཚོགས་བཅར་བར་འཚམས་འདྲི་དང་གཏམ་བཤད་པ་རྣམ་པར་ཚོགས་འདུར་གཏམ་བཤད་གནང་རྒྱུར་དང་ལེན་གནང་བར་ཐུགས་རྗེ་གསུངས། དེ་བཞིན་ཁོང་གིས་གསུང་དོན། དེ་རིང་ཚོགས་འདུའི་བརྗོད་གཞི་འདི་ལྟ་བུ་གནད་འགག་ཆེན་པོ་ཡིན་པ་དང་། ཡང་སྒོས་ས་བྱི་ཞི་རྒོལ་ནས་བཟུང་བའི་རྩོམ་རིག་དེ་དག་བརྒྱུད་ལམ་གལ་ཆེན་པོ་ཞིག་ཡིན་པ་དང་། བོད་ནང་རྒྱ་ནག་གཞུང་གི་དམ་དྲག་ཆེན་པོ་ཡོད་བཞིན་དུ་རྩོམ་རིག་སྤེལ་བ་དེ་དག་ཆེ་མཐོང་དང་གུས་བཀུར་འོས་པ་མ་ཟད། རྩོམ་ཐོག་ཏུ་ཐོན་པ་ཙམ་མིན་པར་མ་ཐོན་པའི་གནས་སྟངས་ལའང་ཐུགས་སྣང་དགོས་ཚུལ། དེ་བཞིན་བཙན་བྱོལ་ནང་རང་དབང་དང་མང་གཙོའི་དཔལ་ལ་ལོངས་སུ་སྤྱོད་རྒྱུ་ཡོད་པ་བཞིན། བོད་ནང་གི་མགྲིན་ཚབ་པ་གནང་དགོས་པ་སོགས་གསུངས། ད་ལན་ཉིན་གཉིས་ཀྱི་ཚོགས་འདུའི་ནང་གཏམ་བཤད་པ་ ༨ དང་། ཚོགས་འདུར་མཉམ་ཞུགས་གནང་མཁན་ཁོངས་བོད་མིའི་སྒྲིག་འཛུགས་ཀྱི་ལས་བྱེད་དང་། མཐོ་སློབ་དང་ལྟེ་གནས་ཁང་ཁག་གི་སྐུ་ཚབ་བཅས་བསྡོམས་མི་གྲངས་ ༤༥ ཡོད་པ་རེད་འདུག ། གསར་འགོད་པ་སྐལ་བཟང་དོན་གྲུབ།
རྒྱ་ནག་གཞུང་གིས་བོད་མི་དབྱངས་མཚོ་འཛིན་བཟུང་བྱས་ཡོད་འདུག
བཙན་བྱོལ་བོད་མིའི་གསར་ཁང་ཁག་གིས་གནས་ཚུལ་སྤེལ་བར་གཞིགས་ན། ཟླ་༣ པའི་ཚེས་༢ ཉིན་གྱི་ཞོགས་པ་བོད་ནང་གི་ཆུ་ཚོད་ ༨ ཡས་མས་ཤིག་ལ། བོད་གཞིས་ཀ་རྩེ་གྲོང་ཁྱེར་གྱི་གངས་རི་ཟ་ཁང་ཞེས་པའི་ནང་ལས་ཀ་བྱེད་བཞིན་པའི་རང་ལོ་ ༢༣ ཅན་གྱི་དབྱངས་མཚོ་ལ། ཕྱི་ཕྱོགས་སུ་པར་རིས་སོགས་བརྒྱུད་སྐུར་བྱས་པའི་ཉེས་མིང་འོག་རྒྱ་ནག་གཞུང་གི་ཉེན་རྟོག་པས་འཛིན་བཟུང་བྱས་ཏེ། རྣམ་གླིང་རྫོང་རྒྱ་མཚོ་ཡུལ་ཚོའི་ས་གནས་ཉེན་རྟོག་ཁང་དུ་བཀག་ཉར་བྱས་ཡོད་འདུག དེ་ཡང་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་བསླེབ་ཉེ་བ་དང་བསྟུན། རྒྱ་ནག་གཞུང་གིས་ལྷ་ས་དང་གཞིས་ཀ་རྩེ་གྲོང་ཁྱེར་སོགས་ཀྱི་ས་གནས་གང་སར་ཐོབ་ཐང་དཔང་ཡིག་དང་མི་མང་གི་ཁ་པར་ལ་ཞིབ་བཤེར་བྱེད་བཞིན་ཡོད་པ་དང་། བུད་མེད་དབྱངས་མཚོ་འཛིན་བཟུང་བྱེད་དགོས་དོན་ནི་ཁ་པར་སྔོག་བཤེར་སྐབས། ཕྱི་ཕྱོགས་སུ་འབྲེལ་བ་བྱས་པ་ཤེས་རྟོགས་བྱུང་ཚུལ་གྱི་ཉེས་མིང་འོག་འཛིན་བཟུང་བྱས་ཡོད་པ་ལས། ད་ལྟའི་ཆར་ནང་མི་ཚོར་ཁོ་མོ་དང་འབྲེལ་བ་བྱེད་འཇུག་གི་མེད་པ་རེད་འདུག དབྱངས་མཚོ་ནི་རང་ལོ་ ༢༣ ཡིན་ཞིང་། ཆུང་དུས་ནས་པ་ལགས་འདས་གྲོངས་སུ་ཕྱིན་ཡོད་པས་སློབ་གྲྭར་འགྲོ་མྱོང་མེད་པ་དང་། ཁྱིམ་དུ་ཨ་མ་དང་སློབ་གྲྭར་འགྲོ་བཞིན་པའི་ལོ་ ༧ ཅན་ཀྱི་གཅུང་པོ་ཞིག་ཡོད་འདུག ། གསར་འགོད་པ་སྐལ་བཟང་དོན་གྲུབ།
རྒྱ་ནག་གིས་དམག་དོན་སྔོན་རྩིས་བརྒྱ་ཆ་༧ ལས་མང་བ་སྤར་རྒྱུ་རེད་འདུག
རྒྱ་ནག་གཞུང་གིས་ཕྱི་ཕྱོགས་ནས་ཉེན་ཁ་ཆེ་རུ་འགྲོ་བཞིན་པའི་ཉེན་བརྡ་བཏང་ནས། དམག་དོན་སྔོན་རྩིས་བརྒྱ་ཆ་༧ ལས་མང་བ་སྤར་རྒྱུ་ཡིན་པའི་གསལ་བསྒྲགས་བྱས་འདུག ཟླ་༣ པའི་ཚེས་༦ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། རྒྱ་ནག་གི་རྒྱལ་ཡོངས་མི་དམངས་འཐུས་མི་ཚོགས་ཆེན་འགྲོ་བཞིན་པ་དང་བསྟུན། སྲིད་བློན་གྱི་ལས་གནས་ནས་འཁྱུར་ལ་ཉེ་བའི་ལི་ཁེ་ཆང་གིས་ཚོགས་ཆེན་ཐོག་ཏུ། ཕྱི་ཕྱོགས་ནས་རྒྱ་ནག་རྩ་མེད་དང་འགོག་ཐབས་བྱེད་མཁན་མང་དུ་འགྲོ་བཞིན་ཡོད་པས། དམག་གི་སྒྲིག་འཛུགས་ཀྱིས་ཕྱོགས་ཡོངས་ནས་དམག་སྦྱོང་དང་གྲ་སྒྲིག་ཤུགས་ཆེ་རུ་གཏོང་དགོས་སྐོར་བརྗོད་འདུག སྐབས་དེར་ལོ་སྔོན་མའི་དམག་དོན་སྔོན་རྩིས་དང་བསྡུར་ན། ལོ་འདིའི་སྔོན་རྩིས་ལ་བརྒྱ་ཆ་༧ སྤར་རྒྱུ་ཡིན་པའི་གསལ་བསྒྲགས་བྱས་འདུག རྒྱ་ནག་གི་དམག་དོན་སྔོན་རྩིས་དེ་ཨ་སྒོར་ཐེར་འབུམ་༢༢༥ ཙམ་ཡིན་འདུག་པ་དང་། ཨ་རི་དང་བསྡུར་ན་ཉུང་ཉུང་ཡིན་འདུག ཨ་རིའི་དམག་དོན་སྔོན་རྩིས་དེ་རྒྱ་ནག་ལས་ལྡབ་བཞི་མང་བ་ཡིན་འདུག་ཀྱང་། དཔྱད་བརྗོད་པ་མང་པོ་ཞིག་གིས་རྒྱ་ནག་གཞུང་གིས་དུས་ལྟར་དམག་དོན་ཆེད་དུ་དངོས་སུ་འགྲོ་སོང་ག་ཚོད་གཏོང་གི་ཡོད་པའི་གནས་ཚུལ་སྦས་གསང་བྱས་ཏེ། དངོས་སུ་བཏང་བའི་འགྲོ་སོང་ལས་ཉུང་བ་ཞིག་གསལ་བསྒྲགས་བྱེད་ཀྱི་ཡོད་པ་ཡིད་ཆེས་བྱེད་ཀྱི་ཡོད་འདུག དེ་བཞིན་ཚོགས་ཐོག་ཏུ་རྒྱ་ནག་གིས་ལོ་སྔོན་མ་དང་བསྡུར་ན། དཔལ་འབྱོར་འཕེལ་རྒྱས་ཀྱི་དམིགས་ཚད་དེ་ཉུང་དུ་བཏང་ནས་བརྒྱ་ཆ་༥ དམིགས་རྒྱུ་ཡིན་འདུག རྒྱ་ནག་གིས་དམག་དོན་སྔོན་རྩིས་སྤར་བའི་གནས་ཚུལ་དེ་ནི། ཡུག་ཀེ་རན་གྱི་དམག་འཁྲུག་དང་འབྲེལ་ནས་ཨ་རི་དང་འབྲེལ་ལམ་སྡུག་ཏུ་དང་། ཨུ་རུ་སུ་དང་འབྲེལ་ལམ་ཡག་ཏུ་འགྲོ་བཞིན་པའི་སྐབས་སུ་བྱུང་བ་ཞིག་ཡིན་འདུག ཐེངས་འདིའི་ཚོགས་ཆེན་སྐབས་སུ་རྒྱ་ནག་གི་སྲིད་བློན་གསར་པ་ཞིག་བསྐོ་གཞག་བྱེད་རྒྱུ་ཡིན་འདུག་པ་དང་། དཔྱད་བརྗོད་པ་ཚོས་བརྗོད་ན་ཞི་ཅིན་ཕིང་གིས་ཡིད་ཆེས་ཆེན་པོ་བྱེད་ཡུལ་ལི་ཆང་ལ་ལས་གནས་དེ་ཐོབ་རྒྱུ་ཡིན་པའི་ཚོད་དཔག་བྱེད་བཞིན་འདུག ། གསར་འགོད་པ་སྐལ་བཟང་དོན་གྲུབ།
ཕྱི་དྲིལ་བཀའ་བློན་གྱིས་ཅེག་ཕྱི་སྲིད་བློན་ཆེན་ལ་མཇའ་འཕྲད།
འཛམ་གླིང་རྒྱལ་ཁབ་ ༢༠ ཡི་ཕྱི་སྲིད་བློན་ཆེན་རྣམས་རྒྱ་གར་གྱི་རྒྱལ་ས་ལྡི་ལི་རུ་འཛོམས་པ་དང་བསྟུན་ནས་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་ཡིས་ཅེག་ཕྱི་སྲིད་བློན་ཆེན་ལ་བོད་ཀྱི་གནད་དོན་སྐོར་ལ་གླེང་སློང་གནང་ཡོད་འདུག ཕྱི་ཟླ་ ༢ པའི་ཚེས་ ༢༨ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་དང་། ལྡི་ལི་སྐུ་ཚབ་དོན་གཅོད་སྤྱི་ཟུར་བློ་བཟང་ཤཱ་སྟྲཱི་དང་དྲུང་ཆེ་དོན་གྲུབ་རྒྱལ་པོ་བཅས་ཀྱིས། འཛམ་གླིང་འབྱོར་ལྡན་རྒྱལ་ཁབ་ ༢༠ ཡི་ཕྱི་སྲིད་བློན་ཆེན་རྣམས་རྒྱ་གར་གྱི་རྒྱལ་ས་ལྡི་ལི་རུ་ཚོགས་ཆེན་བསྐོང་ཚོགས་གནང་བ་དང་བསྟུན། ཅེག་ཕྱི་སྲིད་བློན་ཆེན་སྐུ་ཞབས་ཇཱན་ལི་བྷ་སི་ཀེ་ (Jan Lipavský) དང་ཟུར་མཇལ་གནང་སྟེ། བོད་ཀྱི་འགྲོ་བ་མིའི་ཐོབ་ཐང་དང་། འགྲོ་འདུག་གི་རང་དབང་བཅས་ལ་མུ་མཐུད་རྒྱབ་སྐྱོར་གནང་རྒྱུའི་གླེང་སློང་གནང་ཡོད་འདུག ཐེངས་འདིའི་ཟུར་མཇལ་སྐབས་ཕྱི་དྲིལ་བཀའ་བློན་ནོར་འཛིན་སྒྲོལ་མ་ཡིས། བོད་མིའི་སྒྲིག་འཛུགས་ཀྱིས་རྒྱུན་རིང་སེལ་མ་ཐུབ་པའི་བོད་རྒྱའི་དཀའ་རྙོག་དེ་མིང་དོན་མཚུངས་པའི་རང་སྲིད་རང་སྐྱོང་ཡོང་ཐབས་སུ་གྲོས་མོལ་གྱི་ལམ་ནས་བསལ་རྒྱུར་དམ་བཅའ་བརྟན་པ་ཡོད་སྐོར་དང་། ཅེག་སྤྱི་མཐུན་རྒྱལ་ཁབ་ནི་འགྲོ་བ་མིའི་ཐོབ་ཐང་དང་བོད་ཀྱི་གནད་དོན་ཐད་ཐུགས་ཁུར་ཆེན་པོ་གནང་མཁན་ཞིག་ཡིན་པ་མ་ཟད། བོད་དང་ལོ་རྒྱུས་ཀྱི་ཐོག་ནས་ཀྱང་འབྲེལ་འདྲིས་དམ་ཟབ་ཡོད་པས། ཅེག་སྤྱི་མཐུན་རྒྱལ་ཁབ་ཀྱི་གཞུང་གཉིས་ཀྱིས་མུ་མཐུད་བོད་ཀྱི་གནད་དོན་ཐད་རྒྱབ་སྐྱོར་བྱ་རྒྱུའི་རེ་སྐུལ་གནང་ཡོད་འདུག ཡང་ཕྱི་དྲིལ་བཀའ་བློན་གྱིས། བོད་ནང་གི་གནད་དོན་དང་འབྲེལ་བའི་སྐོར་ལ་གླེང་སློང་གནང་ཡོད་པ་མ་ཟད། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་། བོད་ཀྱི་རང་བྱུང་ཁོར་ཡུག་གཏོར་བཅོམ། བོད་ནང་གི་བྱིས་པ་ཚུད་པའི་བོད་མི་རྣམས་ཀྱིས་རིགས་རྫས་བསྡུ་རུབ། བོད་ནང་གི་བྱིས་པ་རྣམས་གཏན་འཇགས་སློབ་གྲྭ་ཁག་ཏུ་བཙན་བཅུག་བྱས་པ་བཅས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྩིས་མེད་གཏོང་བཞིན་པ་དེར་། ཅིག་གཞུང་མང་གཉིས་ནས་རྒྱབ་སྐྱོར་གནང་རྒྱུའི་རེ་སྐུལ་གནང་ཡོད་འདུག ཅེག་ཕྱི་སྲིད་བློན་ཆེན་སྐུ་ཞབས་ཇཱན་ལི་བྷ་སི་ཀེ་ (Jan Lipavský) ཡིས། རྒྱ་གར་དུ་འཚམས་གཟིགས་སྐབས་སླར་ཡང་བོད་མིའི་སྒྲིག་འཛུགས་ཀྱི་སྐུ་ཚབ་ལྷན་མཇལ་འཕྲད་བྱུང་བ་དགའ་པོ་བྱུང་། ཅེག་སྤྱི་མཐུན་རྒྱལ་ཁབ་ཀྱི་སྲིད་འཛིན་ཐོག་མ་སྐུ་ཞབས་ཝ་སི་ལབ་ཧཱ་ཝེལ་ (Vaclav Havel) དང་༧གོང་ས་༧རྒྱལ་བ་རིན་པ་ཆེ་མཆོག་གཉིས་བར་ཐུགས་འདྲིས་དམ་ཟབ་ཡོད་ཅིང་། བོད་དང་ཅེག་སྤྱི་མཐུན་རྒྱལ་ཁབ་ཀྱི་བར་ལོ་རྒྱུས་ཀྱི་ཐོག་ནས་འབྲེལ་ལམ་དམ་ཟབ་ཡོད་པ་མ་ཟད། ཅེག་མི་མང་དང་། སྲིད་གཞུང་། གྲོས་ཚོགས་གོང་འོག་བཅས་ནས་མུ་མཐུད་དུ་བོད་དང་བོད་མིར་རྒྱབ་སྐྱོར་བྱ་རྒྱུ་ཡིན་སྐོར་སོགས་གསུངས་འདུག གཞན་ཡང་ཅེག་སྤྱི་མཐུན་རྒྱལ་ཁབ་ཀྱི་དབྱིན་ཡིག་གསར་ཁང་ཆེ་ཤོས་ (Expats CZ) ཞེས་ཐོག་གནས་ཚུལ་སྤེལ་བ་ལྟར་ན། ཐེངས་འདིའི་བོད་མིའི་སྒྲིག་འཛུགས་ཀྱི་སྐུ་ཚབ་དང་ཅེག་ཕྱི་སྲིད་བློན་ཆེན་བར་ཟུར་མཇལ་གནང་བའི་གནད་དོན་ཐད། ཅེག་ཏུ་རྟེན་གཞི་བྱེད་པའི་རྒྱ་ནག་གཞུང་ཚབ་ཁང་གིས། “སླར་ཡང་ཅེག་སྤྱི་མཐུན་རྒྱལ་ཁབ་གྱིས་ཕྱོགས་ནས་རྒྱ་ནག་གཅིག་གི་སྲིད་བྱུས་དང་འབྲེལ་བའི་དམ་བཅའ་ལ་བརྩི་སྲུང་བྱེད་མེད་པ་མ་ཟད། རྒྱ་ནག་གི་གནད་དོན་དང་འབྲེལ་བའི་སྐོར་ལ་ཆབ་སྲིད་གཡོ་བཀོལ་བྱ་རྒྱུ་མཚམས་འཇོག་དགོས་དང་། རྒྱལ་ཁབ་གཉིས་ཀྱི་འབྲེལ་ལམ་ཡར་རྒྱས་ཡོངས་རྒྱུར་འགོག་རྐྱེན་དང་བསུན་གཙེར་བྱ་རྒྱུ་འཛེམ་ཟོན་བྱ་དགོས་” ཞེས་སྐྱོན་བརྗོད་བྱས་པར་དེར། ཅིག་ཕྱི་སྲིད་བློན་ཆེན་སྐུ་ཞབས་ཇཱན་ལི་བྷ་སི་ཀེ་ (Jan […]