༧ཀུན་གཟིགས་པན་ཆེན་སྐུ་ཕྲེང་བཅུ་གཅིག་པ་ཆེན་པོ་མཆོག་རྒྱ་ནག་གིས་བཙན་ཁྲིད་བྱས་ནས་མི་ལོ་༢༩ འཁོར་བ།
༧ཀུན་གཟིགས་པན་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག རྒྱ་ནག་གཞུང་གིས་བཙན་ཁྲིད་བྱས་ནས་མི་ལོ་༢༩ འཁོར་བའི་ཉིན་མོ་དུས་དྲན་ཆེད་དུ་བཞུགས་སྒར་ཁུལ་གྱི་གཞུང་ཁོངས་མ་ཡིན་པའི་ཚོགས་པ་ཁག་གི་སྐུ་ཚབ་གཙོས་པའི་སེར་སྐྱ་མི་མང་གིས་རྡ་སར་མེག་ལོར་ནས་ཀ་ཅ་རི་བར་དུ་སྐད་འབོད་རྒྱག་བཞིན་ཞི་བའི་གོམ་བགྲོད་གནང་སོང་། དེ་རིང་ཕྱི་ཚེས་༡༧ ཉིན་བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག ༧ཀུན་གཟིགས་པན་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག རྒྱ་ནག་གཞུང་གིས་བཙན་ཁྲིད་བྱས་ནས་མི་ལོ་༢༩ འཁོར་བའི་ཉིན་མོ་དུས་དྲན་ཆེད་དུ་བཞུགས་སྒར་ཁུལ་གྱི་གཞུང་ཁོངས་མ་ཡིན་པའི་ཚོགས་པ་ཁག་གི་སྐུ་ཚབ་གཙོས་པའི་སེར་སྐྱ་མི་མང་གིས་རྡ་སར་མེག་ལོར་ནས་ཀ་ཅ་རི་བར་དུ་སྐད་འབོད་རྒྱག་བཞིན་ཞི་བའི་གོམ་བགྲོད་གནང་སོང་། དེ་རིང་གི་ལས་འགུལ་དེ་བོད་ཀྱི་བུད་མེད་ལྷན་ཚོགས་ཀྱིས་གཙོ་བོ་གོ་སྒྲིག་གནང་བ་ཞིག་ཡིན་འདུག་ལ། སྐབས་དེ་དུས་བོད་ཀྱི་བུད་མེད་ལྷན་ཚོགས་ནས་དུས་དྲན་གྱི་བསྒྲགས་གཏམ་ཞིག་སྤེལ་གནས་སོང་། བསྒྲགས་གཏམ་དེའི་ནང་ཀུན་གཟིགས་པན་ཆེན་རིན་པོ་ཆེ་སྐུ་ཕྲེང་བཅུ་གཅིག་མཆོག་དང་། ཁོང་གི་སྐུ་འཁོར་ནང་མི་རྣམས། གདན་ས་ཆེན་པོ་བཀྲ་ཤིས་ལྷུན་པོའི་དབུ་འཛིན། ཡང་སྲིད་འཚོལ་ཞིབ་ཚོགས་ཆུང་གི་འགན་འཛིན་སྐུ་ཞབས་བྱམས་པ་འཕྲིན་ལས་རིན་པོ་ཆེ་དང་། བྱམས་པ་ཆུང་བཅས་རྒྱ་གཞུང་གི་བཙན་འཁྲིད་འོག་གར་སོང་ཆ་མེད་དུ་གྱུར་ནས་ལོ་ངོ་ཉི་ཤུ་རྩ་དགུ་ཧྲིལ་པོ་འཁོར་བའི་ཡིད་སྐྱོ་བའི་དུས་ཚིགས་གལ་ཆེན་ཞིག་ཡིན་སོགས་འཁོད་འདུག ༧ཀུན་གཟིགས་པན་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་མཆོག་ནི་ཕྱི་ལོ་༡༩༨༩ ཟླ་བ ༤ ཚེས་༢༥ ཉིན། རྒྱ་ནག་གཞུང་གིས་བཅད་བགོས་བྱས་པའི་བོད་རང་སྐྱོང་ལྗོངས་ཟེར་བའི་ནང་ཡོད་པའི་ནག་ཆུ་ལྷ་རི་རྫོང་དུ་ཡབ་དཀོན་མཆོག་ཕུན་ཚོགས་དང་། ཡུམ་བདེ་ཆེན་ཆོས་སྒྲོན་རྣམ་གཉིས་ཀྱི་སྲས་སུ་སྐུ་འཁྲུངས་ཡོད་འདུག་པ་དང་། ཕྱི་ལོ་༡༩༩༥ ཟླ་བ་༥ ཚེས་༡༤ ཉིན་ཁོང་དགུང་ལོ་དྲུག་ལ་སོན་དུས་༧ གོང་ས་༧ སྐྱབས་མགོན་ཆེན་པོ་མཆོག་གིས་༧ པན་ཆེན་སྐུ་ཕྲེང་བཅུ་པའི་ཡང་སྲིད་འཁྲུལ་བྲལ་དུ་ངོས་འཛིན་ཕྱག་རྟགས་བསྩལ་ཡོད་འདུག བོད་ཀྱི་སྔར་སྲོལ་ལྟར་ན་༧རྒྱལ་བ་ཡབ་སྲས་རྣམ་གཉིས་ཕན་ཚུལ་ཡང་སྲིད་ངོས་འཛིན་གནང་རེས་ཀྱི་ཐུན་མོང་མ་ཡིན་པའི་ལམ་ལུགས་ཤིག་ཡོད་འདུག་པ་མ་ཟད། ལྷག་པར་དུ་༧གོང་ས་སྐུ་ཕྲེང་རིམ་བྱོན་དང་། ༧ཀུན་གཟིགས་པན་ཆེན་རིམ་བྱོན་དབར་ཕན་ཚུན་ཐུན་མིན་བླ་སློབ་ཀྱི་འབྲེལ་བ་དམ་ཟབ་དང་ཐུགས་བསྐྱེད་དམ་ཚིག་འོ་ཆུ་གཅིག་འདྲེས་ཀྱིས། གངས་ལྗོངས་ཆོས་སྲིད་ཀྱི་ལོ་རྒྱུས་རིང་པོའི་བསྐྱངས་པའི་ངོ་མཚར་ཅན་གྱི་ལོ་རྒྱུས་ཡོད་ཀྱང་། ཕྱི་ལོ་༡༩༩༥ ཟླ་བ་༥ ཚེས་༡༥ ཉིན་ཡང་སྲིད་གསལ་བསྒྲགས་བྱས་པའི་ཉིན་གསུམ་གྱི་རྗེས་ཏེ། ཚེས་༡༧ ཉིན་རྒྱ་ནག་གཞུང་གིས་དགུང་ལོ་༦ ལས་སོན་མེད་པའི་༧ ཀུན་གཟིགས་པན་ཆེན་རིན་པོ་ཆེ་མཆོག་བཙན་འཁྲིད་བྱས་ཏེ་ད་བར་ག་སོང་ཆ་མེད་ཀྱི་ཡིད་སྐྱོའི་གནས་སྟངས་འདི་གྱུར། དེ་བཞིན་བསྒྲགས་གཏམ་དེའི་ནང་དུ་སྤྱིར་རྒྱ་ནག་གི་རྩ་ཁྲིམས་ནང་སྤྱི་འབངས་སུ་འདྲ་ཞིག་ཡིན་རུང་རང་ལོ་༡༨ མ་སོན་བར་ཁྲིམས་ཀྱི་འགན་དབང་གང་ཡང་མེད་ཅེས་བཤད་ཡོད་ནའང་ནག་ཉེས་གང་ཡང་མེད་ཅིང་དགུང་གྲངས་དྲུག་ལས་སོན་མེད་པའི་༧ ཀུན་གཟིགས་པན་ཆེན་རིན་པོ་མཆོག་བཙན་འཁྲིད་བྱས་ནས་བཙོན་དུ་བཅུག་པ་ནི། རྒྱ་ནག་རང་གི་རྩ་ཁྲིམས་རང་གིས་རྡོག་རྫིས་བཏང་བ་ཞིག་ཆགས་ཀྱི་ཡོད་པས། དེ་ནི་མི་སྤྱོད་ལས་འདས་པའི་ངོ་ཚ་དགོས་པའི་གནད་དོན་ཞིག་དང་ནག་ཉེས་ཆེན་པོ་རེད་ཅེས་བརྗོད་འདུག དེ་བཞིན་རྒྱལ་སྤྱིའི་ནང་ཡོད་པའི་གཞུང་དང་གྲོས་ཚོགས་འཐུས་མི་སོགས་ཀྱིས་རྒྱ་ནག་ལ་གནོད་ཤུགས་སྤྲད་རྒྱུ་དང་གཤམ་འཁོད་ཀྱི་དོན་ཚན་བཞི་ལ་རྒྱབ་སྐྱོར་ཡོང་ཐབས་འབོད་སྐུལ་ཞུས་འདུག ༡ ༧ཀུན་གཟིགས་པན་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་མཆོག་གི་གནས་སྟངས་དང་ཁོང་གང་དུ་བཞུགས་ཡོད་པ་འཕྲལ་དུ་འཛམ་གླིང་སྟེང་གསལ་སྟོན་བྱེད་དགོས་པ། ༢ ༧ཀུན་གཟིགས་པན་ཆེན་སྐུ་ཕྲེང་བཅུ་གཅིག་པ་མཆོག་གིས་དབུས་པའི་ཉེས་པ་གང་ཡང་མེད་པའི་ཆབ་སྲིད་བཙོན་པ་རྣམས་གང་མགྱོགས་གློད་བཀྲོལ་དགོས་པ། ༣ རྒྱ་ནག་གཞུང་གིས་བོད་རྒྱ་གྲོས་མོལ་སླར་གསོ་བྱས་ཏེ་བོད་རྒྱའི་དཀའ་རྙོག་མྱུལ་དུ་བསལ་ནས་བོད་ནང་གི་བོད་མི་རྣམས་ལ་འགྲོ་འདུག་སྤྱོད་གསུམ་གྱི་རང་དབང་དགོས་པ། ༤ རྒྱ་ནག་གཞུང་གིས་བཅའ་སྡོད་སློབ་གྲྭའི་སྲིད་ཇུས་ཟེར་བ་དེ་བཞིན་མཚམས་འཇོག་བྱས་ཏེ། […]
སི་ལོ་ཝ་ཁི་ཡའི་སྲིད་བློན་ལ་མེ་མདའ་ཕོག་ནས་ཛ་དྲག་གི་སྨན་ཁང་ནང་མྱུར་སྐྱོབ་བྱེད་བཞིན་ཡོད་འདུག
སི་ལོ་ཝ་ཁི་ཡའི་སྲིད་བློན་ལ་མི་ཞིག་གིས་མེ་མདའ་བརྒྱབས་ནས་ད་ལྟ་ཛ་དྲག་སྨན་ཁང་ནང་ཡོད་འདུག གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། སི་ལོ་ཝ་ཁི་ཡའི་སྲིད་བློན་གྱིས་ཡུག་རེན་ལ་གོ་མཚོན་གྱི་རོགས་རམ་བྱེད་རྒྱུར་བཀག་པ་དང་། གཞན་སྲིད་བྱུས་འགའ་ཤས་ཐད་ཕྱོགས་འགལ་ཚོགས་པ་དང་མི་མཐུན་པ་ཡོད་པའི་རྐྱེན་གྱིས་ཁོང་གསོད་ཐབས་བྱས་པ་རེད་ཅེས་བརྗོད་འདུག ཕྱི་ཚེས་༡༦ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། སི་ལོ་ཝ་ཁི་ཡའི་སྲིད་བློན་གྲོང་སྡེ་ཆུང་ཆུང་ཞིག་ལ་ལྟ་སྐོར་འགྲོ་དུས་མི་ཞིག་གིས་གློ་བུར་དུ་མེ་མདའ་བརྒྱབས་ནས་ད་ལྟ་ཛ་དྲག་གི་སྨན་ཁང་ནང་ཡོད་འདུག འོན་ཀྱང་། སྲིད་བློན་གཞོན་པས་ད་ལྟ་སྲིད་བློན་ཛ་དྲག་སྨན་ཁང་ནང་ཡོད་ཀྱང་། ཚེ་སྲོག་ལ་ཉེན་ཁ་དེ་ཙམ་མི་འདུག་ཅེས་བརྗོད་ཡོད་འདུག རྒྱུ་མཚན་གཅིག་ནི་སྲིད་བློན་ལ་གློ་བུར་དུ་མེ་མདའ་ཕོག་རྗེས་གང་མགྱོགས་མྱུར་སྐྱོབ་སྨན་ཁང་དུ་འཁུར་ཐུབ་ཡོད་འདུག་པ་དང་། སྨན་ཁང་ནང་བཤའ་བཅོས་བྱས་ནས་བཤའ་བཅོས་ལེགས་གྲུབ་བྱུང་ཐུབ་ཡོད་པའི་རྐྱེན་གྱིས་ཡིན་འདུག སི་ལོ་ཝ་ཁི་ཡའི་བདེ་སྲུང་བློན་ཆེན་གྱིས་དོན་རྐྱེན་དེ་ནི་ཆབ་སྲིད་ཀྱི་གནད་དོན་རྐྱེན་པའི་ཡིན་པ་དང་། ད་ལྟ་སྲིད་བློན་གྱི་ཚེ་སྲོག་ལ་ཉེན་ཁ་མི་འདུག་ཅེས་བརྗོད་འདུག སྲིད་བློན་གཞོན་པས་བརྗོད་དོན་ལ་སྲིད་བློན་ལ་མེ་མདའ་ཐེངས་ལྔ་བརྒྱབས་ཡོད་འདུག མེ་མདའ་རྒྱག་མཁན་དེ་རང་ལོ་༧༡ ཡིན་པའི་རྩོམ་པ་པོ་དང་སྲིད་དོན་པ་ཞིག་ཡིན་འདུག ཐེངས་འདིའི་དོན་རྐྱེན་ཁྲོད་སྲིད་བློན་ལ་མེ་མདའ་རྒྱག་དགོས་དོན་ནི་སྲིད་བློན་(Robert Fico)ཡིས་ཡུག་རེན་ལ་གོ་མཚོན་ཐོག་རོགས་རམ་བྱེད་རྒྱུར་བཀག་འགོག་བྱེད་ཀྱི་ཡོད་པ་དང་། གཞན་སི་ལོ་ཁི་ཡའི་གཞུང་གི་བརྙན་འཕྲིན་ཁང་(RTVS)་ཟེར་བ་དེ་བཀག་སྡོམ་བྱེད་རྒྱུ་གྲོས་ཚོགས་ནང་གྲོས་བསྡུར་བྱེད་བཞིན་པའི་སྐབས་ཡིན་འདུག མི་མང་པོས་སྲིད་བློན་གྱིས་བརྙན་འཕྲིན་ཁང་དེ་བཀག་འགོག་བྱེད་རྒྱུ་ལ་ངོ་རྒོལ་ཤུགས་ཆེན་བྱེད་ཀྱི་ཡོད་འདུག བརྙན་འཕྲིན་ཁང་དེ་ཡིས་སྲིད་བློན་ཁོང་ལ་རྒྱབ་སྐྱོར་བྱེད་རྒྱུ་ལས་ལྡོག་སྟེ་ཕྱོགས་འགལ་ཚོགས་པ་ལ་རྒྱབ་སྐྱོར་བྱེད་ཀྱི་ཡོད་ཚུལ་རྗོད་ཀྱི་ཡོད་འདུག དེ་སྔོན་ནས་སྲིད་བློན་གྱིས་ཁོང་ལ་གཞན་གྱིས་གནོད་འཚེ་གཏོང་སྲིད་པའི་ཚོད་དཔག་བྱེད་ཀྱི་ཡོད་པ་སྲིད་བློན་གཞོན་པས་བརྗོད་ཡོད་འདུག སྲིད་བློན་(Robert Fico)ཁོང་ལོ་སྔོན་མར་བསྐྱར་དུ་སྲིད་བློན་ལ་བདམས་ཡོད་འདུག་པ་དང་། ཁོང་གི་སྲིད་དོན་ཚོགས་པ་ནི་རྒྱལ་ཞེན་རིང་ལུགས་ཀྱི་ལྟ་བ་མཁྲེགས་འཛིན་ཅན་གྱི་སྲིད་དོན་ཚོགས་པ་འགའ་ཤས་ཀྱིས་མཉམ་འབྲེལ་ཐོག་ནས་བཙུགས་པའི་སྲིད་དོན་ཚོགས་པ་ཞིག་ཡིན་འདུག་པར་བརྟེན། འདི་ལོའི་ཕྱི་ཟླ་༡ ནང་ཡུག་རེན་ལ་གོ་མཚོན་གྱི་རོགས་རམ་བྱེད་རྒྱུར་བཀག་འགོག་བྱས་པའི་རྐྱེན་གྱིས་རྙོག་གླེང་མང་པོ་ཆགས་ཡོད་འདུག ཕྱི་ལོ་༢༠༡༨ ནང་གསར་འགོད་པ་གྲགས་ཅན་ (Jan Kuciak)ཟེར་བ་དེ་དང་དེ་ཡི་བཟའ་ཟླ་གཉིས་སྲིད་བློན་གྱི་ལྐོག་བྱུས་འོག་དམར་གསོད་བཏང་ཡོད་པར་བརྗོད་དེ། མི་མང་གིས་གཞི་རྒྱ་ཆེ་བའི་ངོ་རྒོལ་བྱས་པའི་རྐྱེན་གྱིས། སྲིད་བློན་ཁོང་ལས་གནས་ནས་དགོངས་པ་ཞུ་དགོས་བྱུང་ཡོད་འདུག་པ་དང་། དེ་སྔོན་ཁོང་དང་སྲིད་དོན་ཚོགས་པ་གཅིག་པ་ཡིན་པའི (Pellegrini)ཟེར་བ་དེ་ཡིས་སྲིད་བློན་(Robert Fico)་ཁོང་གཡུགས་ནས་སྲིད་དོན་ཚོགས་པ་གཞན་དང་ལྷན་དུ་མཉམ་འབྲེལ་གྱི་ཐོག་ནས་སྲིད་དོན་ཚོགས་པ་གསར་འཛུགས་བྱས་ནས་གཞུང་སྲིད་བསྐྱངས་ཡོད་འདུག འོན་ཀྱང་། ཏོག་དབྱིབས་ནད་དུག་སྐབས་སུ་མཉམ་འབྲེལ་གྱི་སྲིད་དོན་ཚོགས་པ་དེ་ཡིས་ཏོག་དབྱིབས་ནད་དུག་བཀག་འགོག་ཆེད་དུ་སྲིད་བྱུས་ལག་བསྟར་ཡག་པོ་མ་བྱུང་བའི་རྐྱེན་གྱིས། ད་ལྟའི་ལས་ཐོག་སྲིད་བློན་གྱིས་མི་མང་རྒྱ་ཆེན་སྣེ་ཁྲིད་ནས་ངོ་རྒོལ་རྒྱ་ཆེན་པོ་བྱས་ཡོད་འདུག དུས་དེ་ནས་བཟུང་སྲིད་བློན་ཁོང་མི་མང་ཁྲོད་སྐད་གྲགས་ཆེན་པོ་ཆགས་ཡོད་འདུག མཐར་ཕྱི་ལོ་༢༠༢༣ ཟླ་བ་༡༢ ནང་ཁོང་ལ་བསྐྱར་དུ་སྲིད་བློན་གྱི་གོ་གནས་ཐོབ་ཡོད་འདུག འོན་ཀྱང་། སྐབས་དེ་དུས་ཁོང་སྲིད་བློན་གྱི་འོས་མི་ལ་ལང་དུས་ཡུག་རེན་ལ་རོགས་རམ་བྱེད་རྒྱུར་ཁས་ལེན་བྱས་ཡོད་འདུག་ཀྱང་། ཁོ་རང་སྲིད་བློན་ཆགས་དུས་ཡུག་རེན་ལ་རོགས་རམ་བྱེད་རྒྱུ་བཀག་འགོག་བྱེད་ཀྱི་ཡོད་འདུག་པས། ཕྱོགས་འགལ་ཚོགས་པ་དང་མི་མཐུན་པའི་རྩོད་རྙོག་རྒྱ་ཆེན་འབྱུང་བཞིན་ཡོད་འདུག གསར་འགོད་པ། བསོད་ནམས་ཕུན་ཚོགས།
བཅོས་མའི་རིག་རྩལ་གྱིས་ཡུག་རེན་བུ་མོ་ཞིག་ཨུ་རུ་སུའི་མི་རིགས་སུ་བསྒྱུར་བ།
ཡུག་རེན་གྱི་ཡུ་ཊུབ་སྤྱོད་མཁན་བུ་མོ་ཨོལ་གྷ་Olga Loiek ཟེར་བ་ཞིག་གི་སྐད་དང་གདོང་དེ་བཅོས་མའི་རིག་རྩལ་གྱིས་ཨུ་རུ་སུའི་བུ་མོ་ཞིག་ཏུ་བསྒྱུར་ནས། རྒྱ་ནག་གི་སྤྱི་ཚོགས་དྲ་ལམ་ཁག་ཏུ་ཨུ་རུ་སུ་དང་རྒྱ་ནག་བར་གྱི་འབྲེལ་བའི་སྐོར་དྲིལ་བསྒྲགས་བྱས་པ་དང་། ཨུ་རུ་སུའི་ཅ་ལག་སོགས་རྒྱ་ནག་ནང་དུ་འཚོང་གི་ཡོད་པ་ཤེས་འདུག ཟླ་འདིའི་ཕྱི་ཚེས་༡༥ ཉིན་བྷི་བྷི་སི་ཡིས་གནས་ཚུལ་སྤེལ་གསལ་ལྟར་ན། ཡུག་རེན་ནས་ཡིན་པའི་ཡུ་ཊུབ་སྤྱོད་མཁན་ཨོལ་གྷ་Olga Loiek ཟེར་བའི་བུ་མོ་དེར་མོའི་ཡུ་ཊུབ་ལྟ་མཁན་ཚོས་ཁོང་མོས་རྒྱ་ནག་གི་སྤྱི་ཚོགས་དྲྭ་ལམ་དུ་རྒྱ་སྐད་ཤོད་ཀྱི་ཡོད་པ་མཐོང་བའི་སྐོར་སོགས་ཡི་གེ་མང་པོ་བཏང་ཡོད་འདུག་པས། མོས་འཚོལ་སྐབས་དེ་ནི་༢༠༢༣ ནས་མོས་ཡུ་ཊུབ་ནམ་རྒྱུན་ལྟར་བེད་སྤྱོད་བྱེད་མཚམས་འཇོག་ལ་ཉེ་སྐབས་ནས་རྒྱ་ནག་གི་སྤྱི་ཚོགས་དྲ་རྒྱ་Xiaonhongshu ཞེས་པའི་ཐོག་འགོ་བཙུགས་པ་འདྲ་བོ་ཡོད་པར་བརྗོད་འདུག མོའི་གདོང་དང་སྐད་བེད་སྤྱོད་བྱས་ཏེ་མིང་འདྲ་མིན་ཡོད་པ་མང་པོ་བཟོས་ཡོད་འདུག་པ་དང་། དེ་ཚོས་བཟོས་པའི་བརྙན་ཐུང་རྒྱ་ཆ་༩༠ ཙམ་གྱི་ནང་རྒྱ་ནག་དང་ཨུ་རུ་སུའི་འབྲེལ་བའི་སྐོར་ཤོད་ཀྱི་ཡོད་འདུག ཨོལ་གྷ་ཡི་བཤད་ཚུལ་ལྟར་ན་དེ་རྣམས་བཟོ་མཁན་ནི་HeyGen ཞེས་པའི་བཅོས་མའི་རིག་རྩལ་གྱི་ཚོང་སྡེ་ཞིག་ཡིན་འདུག་པ་དང་། ཚོང་སྡེ་དེ་ནི་ཏོག་དབྱིབས་ནད་ཡམས་སྐབས་སུ་རྒྱ་མི་གཉིས་ཀྱིས་རྒྱ་ནག་ཏུ་འགོ་བཙུགས་ཡོད་འདུག ཨོལ་གྷ་ཡིས་“ངས་ང་རང་གི་གདོང་དེ་མཐོང་སོང་ལ། སྐད་ཀྱང་གོ་སོང་། དེ་ཧ་ཅང་གིས་ཞེད་སྣང་སྐྱེ་དགོས་པ་ཞིག་རེད། གང་ཡིན་ཟེར་ན་ངས་ནམ་ཡང་བཤད་མ་མྱོང་བའི་སྐད་ཆ་དེ་ཚོ་ཤོད་བཞིན་པ་མཐོང་སོང་། ངས་རང་གི་མི་ཚེའི་ནང་སྐད་ཆ་སྡུག་ཅག་དེ་འདྲ་བཤད་ཡོད་རེད་སུས་ཀྱང་མ་བསམ་རོགས། ཨུ་རུ་སུ་ཡར་རྒྱས་གཏོང་ཆེད་དུ་ཡུག་རེན་གྱི་བུ་མོ་བེད་སྤྱོད་བྱས་པ་ནི་སྨྱོན་པ་རེད།” ཅེས་བཤད་འདུག ཁོང་མོའི་ངོ་གདོང་བེད་སྤྱོད་བྱས་ཏེ་ཨུ་རུ་སུ་ནས་ཡིན་ཁུལ་གྱིས་སོ་ཧྥིས་ཡ་Sofiaདང་། ན་ཏ་ཤ་Natasha ཨེབ་རིལ་April སེ་ཏེ་སི་Stacy ལ་སོགས་པའི་མིང་མི་འདྲ་བཅུ་ཕྲག་གིས་བེད་སྤྱོད་བྱས་འདུག་ལ། གཞན་ཡང་ད་བར་ཁོང་མོ་འདྲ་བོ་བཟོས་པའི་ཁ་བྱང་མི་འདྲ་༣༥ ཙམ་རྙེད་སོན་བྱུང་ཡོད་འདུག དེ་དག་གིས་མོས་སྦྱངས་མ་མྱོང་བའི་སྐད་རིགས་རྒྱ་སྐད་ཀྱང་ཤོད་ཀྱི་ཡོད་འདུག མོའི་མིང་འདྲ་མིན་དེའི་ནང་སྐད་གྲགས་ཆེ་ཤོས་དེ་ནི་ “ན་ཏ་ཤ་ཡི་ཟས་རིགས་ནང་འདྲེན་” ཟེར་བ་དེ་ཡིན་འདུག་ཅིང་། དེའི་རྗེས་འཇུག་པ་༣༠༠,༠༠༠ ཡོད་འདུག “ན་ཏ་ཤ་”ཟེར་བ་དེས་ “ཨུ་རུ་སུ་ནི་རྒྱལ་ཁབ་ཡག་ཤོས་རེད། ལུང་པ་གཞན་ཚོས་ང་ཚོའི་རྒྱལ་ཁབ་ལ་མ་དགའ་བ་དེ་སེམས་སྐྱོ་བའི་གནས་ཚུལ་རེད། ང་ཚོ་ཨུ་རུ་སུའི་བུ་མོ་ཚོ་རྒྱ་ནག་ལ་ཡོང་འདོད་ཡོད།”སོགས་ཨུ་རུ་སུའི་ཅ་ལག་མ་བཙོངས་གོང་དུ་སྐད་ཆ་དེ་འདྲ་ཤོད་ཀྱི་ཡོད་འདུག གནས་ཚུལ་དེ་ལྟར་བྱུང་བས་སྒེར་ཐོག་ནས་བཤད་ན་ཡུག་རེན་ནང་ཡོད་པའི་ཨོལ་གྷའི་ནང་མི་རྣམས་ཁོང་ཁྲོ་ལངས་ཡོད་འདུག རྒྱ་ཆེ་ས་ནས་བཤད་ན་ཁོང་མོ་ལ་བྱུང་བའི་གནས་ཚུལ་གྱིས་ཡར་རྒྱས་མྱུར་དུ་འགྲོ་བཞིན་པའི་འཕྲུལ་ལས་ཀྱིས་མི་ཚོ་སྟངས་འཛིན་དང་། སྲུང་སྐྱོབ་བྱེད་རྒྱུ་ཁག་པོ་ཆགས་ཡོད་པ་དང་དེའི་ཉེན་ཚབས་བཅས་ཀྱི་ཐད་ནས་མི་རྣམས་ཀྱིས་དོ་སྣང་སླེབས་ཐུབ་པ་བྱས་འདུག ཡུ་ཊུབ་ནས་Xiaohongshuཞོ་ཧུང་ཧྲོས། མོས་ཡུ་ཊུབ་རྗེས་འཇུག་པའི་བརྒྱུད་ནས་བཅོས་མའི་རིག་རྩལ་གྱིས་མོ་རང་ཨུ་རུ་སུའི་བུ་མོ་ཞིག་ཏུ་བསྒྱུར་བ་ཤེས་རྗེས། མོའི་དགའ་རོགས་ཀྱིས་སྤྱི་ཚོགས་དྲ་རྒྱ་X ཞེས་པའི་ནང་ཤོད་སྐབས་HeyGen ཟེར་བའི་ཚོང་སྡེ་དེ་ཡིས་ལན་འདེབས་ཤིག་བྱས་པའི་ནང་དུ། “ད་བར་མོའི་ངོ་གདོང་བེད་སྤྱོད་བྱས་ནས་ཁྱོན་བསྡོམས་བརྙན་ཐུང་༤,༩༠༠ ལྷག་ཙམ་བཟོས་ཡོད་པ་དང་། ཁོང་ཚོས་མོའི་ངོ་གདོང་་བེད་སྤྱོད་བྱ་རྒྱུ་བཙན་བཀག་བྱས་ཚར་པ་ཡིན།” ཞེས་བརྗོད་ཡོད་འདུག གཞན་ཡང་བྷི་བྷི་སི་ལ་ཁོང་ཚོའི་མགྲིན་ཚབ་ཀྱིས་བཤད་པ་ལྟར་ན། ཁོང་ཚོའི་དྲ་གནས་ནས་སིམ་འཛུལ་བྱས་ཏེ […]
དགེ་སྡིག་ལྗིད་ཚད་གཞལ་མཁན་མ་རེད།
(བོད་ཀྱི་བང་ཆེན་གསར་ཤོག་སྤྱིའི་འདོན་ཐེངས་༩༩༧ ) བོད་ལ་མཚོན་ན་སྲོལ་རྒྱུན་རིག་གནས་ཀྱི་ཤུགས་རྐྱེན་དང་། དེ་ལ་བརྟེན་ནས་བྱུང་བའི་འདུ་ཤེས་འཛིན་སྟངས་ཀྱང་ཡུལ་ལུང་གཞན་དང་མི་འདྲ་བ་མང་པོ་ཡོད། དུས་ཚོད་དང་ཁོར་ཡུག་གི་འགྱུར་ལྡོག་ནི་སུས་ཀྱང་འགོག་མི་ཐུབ་པར་འཚོ་བའི་དགོས་མཁོ་དང་བསྟུན་ནས་འགྱུར་བ་ཆེན་པོ་འགྲོ་བ་ནི་འཇིག་རྟེན་གྱི་ཆོས་ཉིད་རེད། ད་ལྟའི་དུས་འདིར་བོད་ཀྱི་སྲོལ་རྒྱུན་གྱི་བསམ་བློ་གཏོང་སྟངས་ལ་འགྱུར་བ་འགྲོ་བཞིན་པའི་ནང་ནས། ཅུང་ཡ་མཚན་སྐྱེ་དགོས་པ་ཁ་ཤས་ཡོད་པའི་ནང་ནས་མི་ཚེ་གང་ལ་ནང་ཆོས་སྦྱངས་ཀྱང་། དོན་དུ་ལས་འབྲས་ཀྱི་རྣམ་གཞག་ལ་ཡིད་ཆེས་མེད་པ་དང་། རིག་གནས་དང་མི་ཚེའི་མདུན་ལམ། སྤྱི་ཚོགས་ཀྱི་དགོས་མཁོ་ཚང་མ་ཟ་བཏུང་ཁོ་ན་གཞི་རྩར་བཞག་ནས་ངོས་འཛིན་བྱེད་པའི་གོམས་གཤིས་ཤིག་རང་བཞིན་གྱིས་རྒྱུད་ལ་ཡོད་པ་ནི་རྒྱབ་ལྗོངས་དམིགས་བསལ་བ་ཞིག་ལ་བརྟེན་ནས་ཡོང་གི་ཡོད་སྲིད། གང་ལྟར་མིག་གིས་མཐོང་ཐུབ་པ་འབའ་ཞིག་ལས་གཞན་ཁས་མི་ལེན་པ་དང་། དེ་ཡང་ཟ་བཏུང་ཐོག་ནས་ཁེ་གྱོང་ཡོད་མེད་ཚད་འཇལ་བ་དེ་རེད། སྤྱིར་མི་ཙམ་དུ་མ་ཟད་སྲོག་ལྡན་སེམས་ཅན་གང་ཡིན་ཡང་ཟ་བཏུང་མེད་ན་ཚེ་སྲོག་གནས་མི་ཐུབ་པས་ཧ་ཅང་གལ་ཆེ་ཡང་། སྤྱིའི་དངོས་པོ་ཡར་རྒྱས་ཅུང་ཙམ་ཡོད་པའི་ཁོར་ཡུག་ཏུ་སྤྱི་ཚོགས་ཀྱི་ཡར་རྒྱས་ཡོད་མེད་ཀྱི་ཚད་འཛིན་ས་དང་། དམིགས་འདུན་གཙོ་བོའང་ཟ་བཏུང་ཁོ་ན་ཙམ་གཏན་ནས་མིན་ཡང་། ད་ལྟའི་ཆར་བོད་ཕྱི་ནང་གཉིས་སུ་གསུར་བཏང་ན་རྩམ་པ་སོགས་འཕྲོ་བརླག་ཡིན་པ་དང་། བསངས་གཏོང་སྐབས་ཀྱི་བསངས་རྫས་དང་རླུང་རྟ་སོགས་ཀྱང་འཕྲོ་བརླག་ཡིན་ཚུལ། དེ་དག་འཕྲོ་བརླག་མ་བཏང་བར་ཟས་གོས་སུ་བེད་སྤྱོད་བྱས་ན་འཚོ་བ་ལ་ཕན་ཐོགས་ཚུལ་རྗོད་མཁན་ཆོས་མེད་སྨྲ་བའི་ནང་མང་པོ་ཡོད་ཆོག་ཀྱང་། གཞན་ལ་ཆོས་བཤད་བྱེད་མཁན་དག་གི་ནང་དུའང་མཐོང་རྒྱུ་འདུག ད་དུང་ཤ་ཟ་དགོས་པ་དང་ཁ་ཟས་ཀྱི་ཆེད་ནོར་ལུག་མ་བསད་ན་མི་མང་གི་ཟས་གོས་ལ་གྱོང་གུད་ཆེན་པོ་ཡིན་ཚུལ་གྱི་བསླབ་བྱ་གནང་མཁན་ཡང་གཞན་ལ་ཆོས་བཤད་བྱེད་མཁན་ནང་ཡོད་པ་འདིའི་ཐོག་ནས་བལྟས་ན་ཆོས་དང་ཆོས་མིན་གྱི་དབྱེ་བའང་གཞུང་ལུགས་སུ་ཡོད་པ་ཙམ་ལས། སྤྱི་ཚོགས་ནང་ལག་ལེན་དངོས་ཀྱི་ཐོག་ནས་ས་མཚམས་འཛིན་དཀའ་བ་ལྟ་བུར་གྱུར་འདུག་པ་ནི། འཚོ་བ་ལ་བརྟེན་ནས་འདུ་ཤེས་ལ་འགྱུར་བ་སོང་བ་ཞིག་ཏུ་མཐོང་། མི་སྐྱའི་ནང་ནས་དེ་ལྟར་བཤད་མཁན་དང་ལས་འགུལ་སྤེལ་མཁན་མང་པོ་ཡོད་ན་དངོས་ཡོད་འཚོ་བའི་གནས་སྟངས་ལ་བརྟེན་ནས་བརྗོད་པ་ཞིག་ཏུ་ངོས་འཛིན་བྱེད་ཆོག་ཀྱང་། ཆོས་འཆད་ཉན་བྱེད་མཁན་དག་གིས་དེ་ལྟར་བཤད་པ་ནི་ཆོས་ཕྱོགས་དང་འཇིག་རྟེན་པའི་མཐོང་ཕྱོགས་གང་ཐད་ནས་འོས་འཚམས་གཏན་ནས་མེད་པ་ལྟ་བུར་གྱུར་ཡོད། སྤྱིར་ད་ལྟའི་དུས་འདིར་ལག་ལེན་བྱེད་མཁན་ཡོད་མེད་ལ་མ་ལྟོས་པར་བཀའ་སློབ་གནང་མཁན་ཧ་ཅང་མང་བ་ནི། དྲ་རྒྱའི་དུས་རབས་ཀྱི་དམིགས་བསལ་དར་སྲོལ་དུ་གྱུར་འདུག ཕྱོགས་གཅིག་ནས་བཤད་ན་དུས་རྒྱུན་བཀའ་སློབ་གནང་རྒྱུར་དགའ་བ་ཕལ་ཆེ་བའི་བསམ་བློའི་ནང་རང་ཉིད་ཡང་དག་པ་དང་མཁས་པ་ཆེན་པོ་ཡིན་པ་དང་། བཀའ་སློབ་གནང་ཡུལ་དག་ནི་ད་དུང་གླེན་པ་དང་རྨོངས་པ་འབའ་ཞིག་ཏུ་ངོས་འཛིན་བྱེད་མཁན་ཡིན་པ་ལྟ་བུ་འདུག མི་མང་ཤོས་ཀྱིས་དགའ་མོས་གཙོ་བོ་བྱེད་ཡུལ་ཡིན་ན་སུ་གཅིག་ལ་བཅོས་བསྒྱུར་བྱ་རྒྱུའི་དབང་ཚད་མེད། དད་མོས་ཀྱི་ཐོག་ནས་སྤང་བླངས་ག་རེ་བྱས་ཀྱང་དེ་ལ་ངོས་འཛིན་བྱེད་དགོས། ནོར་ལུག་གསོད་དགོས་དང་མི་དགོས། ཤ་ཟ་དང་མི་ཟ། སྲོག་བསླུ་བྱེད་དང་མི་བྱེད་ནི་མི་མང་གི་རང་མོས་ཡིན་པ་ལས་སུ་གཅིག་གིས་བཙན་དབང་བྱེད་མི་ཆོག་ཅིང་། ལྷག་པར་དུ་ཆོས་པའི་མིང་ཐོག་ནས་ནོར་ལུག་གསོད་དགོས་ཚུལ་བཤད་པ་ནི་དེ་བས་ཀྱང་རང་ཉིད་ཀྱི་ཐོབ་ཐང་ཐོག་ནས་བསམ་ཡང་སྐབས་སུ་མ་བབས་པ་ཞིག་རེད། རེ་ཟུང་གིས་ས་ག་ཟླ་བར་དགེ་སྡིག་འབུམ་འགྱུར་ཞེས་པ་རྫུན་ཡིན་པའི་སྒྲུབ་བྱེད་དུ་སྒོར་མོ་གཅིག་སྒོར་མོ་འབུམ་དུ་འགྱུར་མི་སྲིད་ཚུལ་བརྗོད་འདུག་ཀྱང་། དོན་དངོས་སུ་ཟབ་པ་དང་རྒྱ་ཆེ་བའི་གནས་དག་ཕལ་བའི་མིག་གིས་མཐོང་ཐུབ་པ་ཞིག་མིན་པས། སངས་རྒྱས་ཀྱི་གསུངས་ཚད་མ་དང་པཎ་གྲུབ་དག་གི་ལུང་ཚད་མ་ཡིན་པར་ངོས་འཛིན་བྱེད་དགོས། སེམས་ཅན་གསོད་དགོས་མིན་དང་། ཤ་ཟ་དགོས་མིན། སྲོག་བསླུ་བྱེད་འོས་མིན་བཅས་ཀྱང་མཐར་གཏུགས་ན་ཟ་བཏུང་ལ་གཏུགས་འདུག་པས། གཙོ་བོ་ནི་བཀའ་སློབ་གནང་མཁན་གྱི་ངོས་ནས་གཞི་རྩའི་འཚོ་བའི་གནད་དོན་ཙམ་ཡང་ཐག་གཅོད་ཐུབ་མེད་པའི་བསམ་བློའི་རྒྱབ་ལྗོངས་ཐོག་ནས་དེ་ལྟར་དྲན་པ་ཞིག་རེད་སྙམ། མདོར་ན་སྲོག་གཅོད་དང་མི་གཅོད། ཤ་ཟ་དང་མི་ཟ། སྲོག་བསླུ་བྱེད་དང་མི་བྱེད་བཅས་མི་སྒེར་སོ་སོའི་རང་མོས་རེད། དོན་དུ་སྲོག་བསླུ་བྱས་ནས་དུས་ནམ་ཡང་མི་འཆི་བ་ཞིག་བྱེད་ཐབས་མེད་པ་དང་། རང་ཉིད་འཆི་རན་སྐབས་སྲོག་སྐྱོབ་མཁན་ཞིག་བྱུང་ན་དེའི་ཚོར་སྣང་བསམ་བློར་འཁོར་ཐུབ་པ་ཞིག་རེད། འོན་ཀྱང་དགེ་བ་ཡིན་མིན་ནི་སྲོག་བསླུ་བྱེད་མཁན་གྱི་ཀུན་སློང་ཁོ་ན་ལ་རག་ལས་པ་ཞིག་ལས། སྒོར་མོ་དང་ཟ་བཏུང་འབའ་ཞིག་ཚད་གཞི་ལ་བཞག་ནས་ཐག་གཅོད་ཆོག་པ་ཞིག་མ་རེེད། དཔེ་ཆར་ལྟ་མཁན་དག་གིས་དེ་ཁོ་ན་ལས་གཞན་དགེ་བ་མིན་ཚུལ་བརྗོད་པ་ལྟ་བུ་དང་། སྒོམ་སྒྲུབ་དང་། ཁ་ཏོན། མཆོད་སྦྱིན་སོགས་བྱེད་མཁན་དག་གིས་ཀྱང་དེ་ལྟར་བརྗོད་མོད། དོན་དུ་རང་ཉིད་ཀྱི་རྒྱུད་ལ་ཡོད་པའི་ཉོན་མོངས་པ་འདུལ་ཐུབ་ཡོད་མེད་ཁོ་ནར་རག་ལས་ཡོད། རང་ཉིད་ཀྱིས་བྱས་པ་དེ་ཁོ་ན་ལས་གཞན་དག་དགེ་བ་ཡང་དག་མིན་ཚུལ་བརྗོད་རྒྱུ་ཡང་ལས་སླ་པོ་ཞིག་གཏན་ནས་མིན་ལ། རང་ཉིད་གཞན་གྱི་དགེ་སྡིག་གི་ལྗིད་ཚད་གཞལ་མཁན་ངོ་མ་དེ་མིན་པའང་དྲན་དགོས།།
ཇི་ནི་ཝའི་འགྲོ་བ་མིའི་ཐོབ་ཐང་དང་མང་གཙོ་ཞེས་པའི་ལྷན་ཚོགས་ཐེངས་༡༦ པའི་ཐོག་འཆི་མེད་ལྷ་མོའི་གཏམ་བཤད།
བོད་ཀྱི་གཞོན་སྐྱེས་ལས་འགུལ་བ་འཆི་མེད་ལྷ་མོས་བོད་དོན་འཐབ་རྩོད་དང་འབྲེལ་བའི་ཐོག་ཇི་ནི་ཝ་ལ་རྒྱ་གཞུང་གིས་འདས་པའི་ལོ་ངོ་༧༥ རིང་བོད་ནང་དྲག་གནོན་བྱས་ཡོད་པ་མ་ཟད། བཙན་བྱོལ་དུ་ཡོད་པའི་བོད་མི་ཚོ་ལ་ཡང་འཇིགས་སྐུལ་བྱས་ཡོད་ཀྱང་། བོད་མི་བརྒྱ་དང་དྲུག་ཅུ་ལྷག་གིས་རང་ལུས་མེ་བསྲེགས་བཏང་ནས་རྒྱ་གཞུང་ལ་ངོ་རྒོལ་མུ་མཐུད་བྱེད་བཞིན་ཡོད་པ་སོགས་ཀྱི་ཐོག་ལ་གཏམ་བཤད་ཐེངས་གཉིས་གནང་འདུག དེ་སྔ་ནས་ཇི་ནི་ཝ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་མ་ཚོགས་པའི་སྔོན་ལ་ཇི་ནི་ཝ་ལ་འགྲོ་བ་མིའི་ཐོབ་ཐང་དང་མང་གཙོ་(Geneva Summit for Human Right and Democracy) ་ཞེས་པའི་ལྷན་ཚོགས་ཤིག་ཚོགས་སྲོལ་ཡོད་པ་བཞིན། ལོ་འདིའི་ལྷན་ཚོགས་ཐེངས་༡༦ པའི་ཐོག་བོད་མིའི་སྐུ་ཚབ་གཞོན་སྐྱེས་ལས་འགུལ་བ་འཆི་མེད་ལྷ་མོ་གདན་འདྲེན་ཞུས་པ་ལྟར། ཟླ་འདིའི་ཚེས་༡༤ ་ཉིན་གཞོན་སྐྱེས་ལས་འགུལ་བ་འཆི་མེད་ལྷ་མོས་གཏམ་བཤད་གནང་ཡོད་འདུག སྐབས་དེར་འཆི་མེད་ལྷ་མོས་ཨ་རིའི་རང་དབང་ཁང་པས་ལོ་ལྟར་འདོན་སྤེལ་གནང་བའི་སྙན་ཐོའི་ནང་། བོད་ནི་འཛམ་གླིང་ཐོག་རང་དབང་གི་ཚད་དམའ་ཤོས་ཀྱི་ས་ཁུལ་ཞིག་ལ་ངོས་འཛིན་བྱས་ཡོད་པ་དང་། ལྷག་པར་དུ་ལོ་འདིའི་སྙན་ཐོའི་ནང་། བོད་ནང་གི་རང་དབང་གི་ཚད་གཞི་ནི་བརྒྱ་ཆ་བརྒྱ་ནས་ཀླད་ཀོར་ཡིན་པ། དེ་བཞིན་རྒྱ་གཞུང་གིས་བོད་ནང་བཙན་འཛུལ་བྱས་པའི་ལོ་ངོ་༧༥ རིང་། རྒྱ་གཞུང་གིས་བོད་ནང་གི་ཁོར་ཡུག་གཏོར་བཅོམ་དང་སྤྱི་ཚོགས་དང་དཔལ་འབྱོར་ཐོག་དབྱེ་འབྱེད་བྱས་དང་བྱེད་བཞིན་པ། དེ་བཞིན་ཆབ་སྲིད་དང་ཆོས་ལུགས་ཐོག་ལ་དྲག་གནོན་བྱས་ཡོད་ན་ཡང་། བོད་མི་ཚོས་ད་དུང་ཡང་མུ་མཐུད་ནས་འཐབ་རྩོད་བྱེད་བཞིན་ཡོད་པ་མ་ཟད། ང་ཚོ་ལ་མཚོན་ན་ཕྱི་ལོ་༡༩༥༩ ལོ་རྗེས་སུ་སྐྱེས་པའི་གཞོན་སྐྱེས་ཚང་མ་ནི་འཐབ་རྩོད་པ་ཞིག་ཆགས་ཀྱི་ཡོད་པ། ང་ཚོ་གསོན་པོ་གནས་པ་ཙམ་གྱིས་འཐབ་རྩོད་ཀྱི་ཆ་ཤས་ཤིག་ཆགས་ཀྱི་ཡོད་ཅེས་དང་། སྒེར་གཅོད་པ་དག་གིས་མཉམ་ལས་བྱེད་ཀྱི་ཡོད་ན་ང་ཚོས་མཉམ་ལས་མི་བྱེད་དོན་ཅི་རེད་སོགས་ཀྱི་གསུང་བཤད་གནང་ཡོད་འདུག གཞན་ཡང་ཟླ་འདིའི་ཚེས་༡༥ ་ཉིན་ལྷན་ཚོགས་ཐོག་ཏུ་སྐར་མ་བཅུ་གཅིག་ལྷག་གི་གཏམ་བཤད་ཅིག་གནང་ཡོད་འདུག་ལ། གཏམ་བཤད་དེའི་ནང་དུ། ཁོང་གིས་རྒྱ་གཞུང་གིས་བོད་ཀྱི་རིག་གཞུང་དང་སྐད་ཡིག བོད་མིའི་ཚོའི་ཉིན་རེའི་འཚོ་བ་སོགས་ཀྱི་ཐོག་ལ་གཏོར་བཅོམ་བཏང་དང་གཏོང་བཞིན་པ་མ་ཟད། རྒྱ་གཞུང་གིས་རྒྱལ་མཚམས་ལས་བརྒལ་ནས་བཙན་བྱོལ་བོད་མི་ཚོ་ལ་ཡང་འཇིགས་སྐུལ་དང་དྲག་གནོན་བྱེད་ཀྱི་ཡོད་པའི་སྐོར་དང་། ༧གོང་ས་མཆོག་བོད་ལ་གདན་འདྲེན་ཞུ་རྒྱུ་དང་བོད་ལ་རང་དབང་དགོས་པའི་རྒྱུ་མཚན་དུ་བྱས་ནས་ད་བར་བོད་ནང་གི་བོད་མི་བརྒྱ་དང་དྲུག་བཅུ་ལྷག་གིས་རང་ལུས་མེ་བསྲེགས་བཏང་ནས་རྒྱ་གཞུང་ལ་ངོ་རྒོལ་བྱས་ཡོད་པའི་སྐོར་གཏམ་བཤད་གནང་སོང་། འཆི་མེད་ལྷ་མོའི་གཏམ་བཤད་གཉིས་པོ་ཇི་ནི་ཝ་ལྷན་ཚོགས་ཞེས་པའི་ཡུ་ཊུབ་དྲྭ་ཚིགས་ཐོག་ཏུ་སྤེལ་རྗེས་ལྟ་མཁན་སྟོང་ཕྲག་མང་པོ་བྱུང་འདུག་པ་མ་ཟད། བོད་མི་མང་པོས་ཁོང་ཉིད་ལ་བསྔགས་དང་ཁོང་གི་གཏམ་བཤད་དྲྭ་ཚིགས་སྣ་ཚོགས་ཐོག་བརྒྱུད་སྤེལ་བྱས་དང་བྱེད་བཞིན་འདུག། གསར་འགོད་པ། བློ་བཟང་རྒྱ་མཚོ།
རྒྱ་གར་རྒྱལ་ཡོངས་ཡིག་རྒྱུགས་ཆེན་མོའི་སྐབས་བོད་པའི་སློབ་ཕྲུག་ཚོས་གྲུབ་འབྲས་ཡག་པོ་བླངས་འདུག
ཟླ་འདིའི་ཚེས་༡༥ ཉིན་བོད་མིའི་སྒྲིག་འཛུགས་ཀྱི་དྲྭ་བའི་ཐོག་སྤེལ་བའི་གནས་ཚུལ་ལྟར་ན། འདི་རྒྱ་གར་རྒྱལ་ཡོངས་ཡིག་རྒྱུགས་ཆེན་མོའི་ཁྲོད་བོད་སློབ་འཛིན་ཚོགས་ཀྱི་ཁྱབ་ཁོངས་བོད་སློབ་ཁག་གི་འཛིན་རིམ་བཅུ་གཉིས་ཀྱི་གྲུབ་འབྲས་རྒྱ་གར་སློབ་གྲྭ་ཁག་ལས་མཐོ་བ་སོན་པའི་གཏམ་བཟང་གི་གནས་ཚུལ་ཐོན་འདུག དེ་ཡང་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཀྱིས་ཕྱི་ལོ ༢༠༢༤ ཟླ་ ༥ ཚེས་ ༡༣ ཉིན་འཛིན་རིམ་བཅུ་གཉིས་དང་བཅུ་པའི་རྒྱལ་ཡོངས་ཡིག་རྒྱུགས་ཀྱི་གྲུབ་འབྲས་གསལ་བསྒྲགས་བྱས་ཡོད་འདུག་པ་དང་། འདི་ལོར་བཙན་བྱོལ་བོད་མིའི་སློབ་གྲྭ་ ༡༣ ནས་ཁྱོན་བསྡོམས་སློབ་ཕྲུག་ ༩༦༢ ཀྱིས་ཕྱི་ལོ ༢༠༢༤ ཟླ་ ༣ ཚེས་ ༡༥ ནས་ཟླ་ ༤ ཚེས་ ༢ བར་འཛིན་རིམ་བཅུ་གཉིས་ཀྱི་རྒྱ་གར་རྒྱལ་ཡོངས་ཡིག་རྒྱུགས་ནང་མཉམ་ཞུགས་བྱས་ཏེ། སློབ་གྲྭ་ ༡༡ གི་རྒྱུགས་འཕྲོད་བརྒྱ་ཆ་ ༡༠༠ ཡིན་པའི་ཐོག་སྤྱི་ཡོངས་ཀྱི་རྒྱུགས་འཕྲོད་བརྒྱ་ཆ་ ༩༩་༦༩ དང་། ཆ་སྙོམས་བརྒྱ་ཆ་ ༧༥་༠༡ ཐོབ་ཡོད་འདུག་པ་དང་།འཛིན་རིམ་བཅུ་གཉིས་ཁྲོད་ནས་གོ་པལ་པུར་བོད་ཁྱིམ་སློབ་གྲྭའི་སློབ་མ་སྐལ་ལྡན་ཚེ་རིང་གིས་བརྒྱ་ཆ་ ༩༥་༢ དང་། རིན་ཆེན་ཀརྨ་མཚོ་མོས་བརྒྱ་ཆ་ ༩༥ བླངས་ཏེ་ཤེས་རིག་ལས་ཁུངས་ཀྱི་ཕུལ་བྱུང་བྱ་དགའ་ཐོབ་ཡོད་ཅིང་། ཁོང་གཉིས་ལ་ཕྱི་ལོ་ ༢༠༢༤ ཟླ་ ༩ ཚེས་ ༢ བོད་ལྗོངས་མང་གཙོའི་ཉིན་མོའི་གཞུང་འབྲེལ་མཛད་སྒོར་ལག་ཁྱེར་དང་པང་ཐོག་ཀམ་པུ་ཊར་རེ་གནང་རྒྱུ་གཏན་འཁེལ་ཡིན་འདུག གཞན་ཡང་ཕྱི་ལོ་ ༢༠༢༤ ཟླ་ ༢ ཚེས་ ༡༥ ནས་ཟླ་ ༣ […]
ནུབ་ཕྱོགས་རྒྱལ་ཁབ་ཚོས་ཨུ་རུ་སུ་ལ་དཔལ་འབྱོར་གྱི་ཉེས་ཆད་བཅད་ཀྱང་རྒྱ་ནག་གིས་རོགས་རམ་བྱེད་བཞིན་པ།
ཨུ་རུ་སུས་ཡུག་རེན་ལ་བཙན་འཛུལ་བྱེད་བཞིན་ཡོད་པའི་རྐྱེན་གྱིས་ནུབ་ཕྱོགས་རྒྱལ་ཁབ་ཚོས་ཨུ་རུ་སུ་ལ་དཔལ་འབྱོར་གྱི་ཉེས་ཆད་གཅོད་ཀྱི་ཡོད་ཀྱང་། རྒྱ་ནག་གིས་ཨུ་རུ་སུ་དང་ལྷན་དུ་ཚོང་འབྲེལ་སྔར་ལས་ཇེ་ཆེར་བཏང་ནས་རོགས་རམ་རྒྱ་ཆེན་པོ་བྱེད་བཞིན་ཡོད་འདུག ཕྱི་ཚེས་༡༥ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། བདུན་ཕྲག་འདིའི་ནང་ཨུ་རུ་སུའི་སྲིད་འཛིན་དང་རྒྱ་ནག་གི་སྲིད་འཛིིན་གཉིས་ཐུག་འཆར་ཡོད་འདུག་པ་དང་། ཐེངས་འདིའི་ཐུག་འཕྲད་དེ་འདས་པའི་ཟླ་བ་བདུན་ནང་ཐེངས་གཉིས་པ་དེ་ཆགས་ཀྱི་ཡོད་འདུག་ལ། ཨུ་རུ་སུས་ཡུག་རེན་ལ་དམག་འཁྲུག་འགོ་བཙུགས་པ་ནས་བཟུང་ཐེངས་བཞི་པ་དེ་ཆགས་ཀྱི་ཡོད་འདུག དུས་ཡུན་དེ་དག་གི་ནང་ཨུ་རུ་སུ་ལ་ནུབ་ཕྱོགས་རྒྱལ་ཁབ་ཚོས་དཔལ་འབྱོར་གྱི་ཉེས་ཆད་དུ་མ་བཅད་ཡོད་ཀྱང་། རྒྱ་ནག་གིས་ཨུ་རུ་སུ་དང་ལྷན་དུ་ཚོང་འབྲེལ་སྔར་ལས་ཇེ་མང་དང་རྒྱ་ཇེ་ཆེར་བཏང་ནས་ཨུ་རུ་སུ་ལ་དཔལ་འབྱོར་ཐོག་ནས་རོགས་རམ་བྱེད་ཀྱི་ཡོད་འདུག དེ་བཞིན་ནུབ་ཕྱོགས་རྒྱལ་ཁབ་ཚོས་རྒྱ་ནག་གིས་ཨུ་རུ་སུ་ལ་གོ་མཚོན་འཚོང་གི་ཡོད་ཚུལ་རྗོད་ཀྱི་ཡོད་ཀྱང་རྒྱ་ནག་གིས་ངོས་ལེན་བྱེད་ཀྱི་མེད་པ་རེད་འདུག དེ་སྔོན་ཨ་རིའི་ཕྱི་སྲིད་དྲུང་ཆེ་རྒྱ་ནག་ལ་ལྟ་སྐོར་དུ་འགྲོ་དུས་རྒྱ་ནག་གི་ངོས་ནས་ཨུ་རུ་སུ་ལ་གོ་མཚོན་རང་འཚོང་གི་མེད་ཚུལ་བརྗོད་ཡོད་འདུག་ཀྱང་། དོན་དངོས་ཐོག་རྒྱ་ནག་གིས་ཨུ་རུ་སུའི་གོ་མཚོན་ལ་དགོས་པའི་རྒྱུ་ཆའི་རིགས་འཚོང་གི་ཡོད་ཚུལ་ནུབ་ཕྱོགས་རྒྱལ་ཁབ་ཚོས་སྐྱོན་བརྗོད་བྱེད་ཀྱི་ཡོད་འདུག དེ་བཞིན་ཨ་རིའི་ཕྱི་སྲིད་དྲུང་ཆེ་ཡིས་ཨུ་རུ་སུས་གོ་མཚོན་མེ་སྒྱོགས་དང་། འབར་རྫས་རིགས་སོགས་ཀྱི་རྒྱུ་ཆ་བརྒྱ་ཆ་༧༠ རྒྱ་ནག་ནས་ནང་འདྲེན་བྱེད་ཀྱི་ཡོད་པ་དང་། གོ་མཚོན་ནང་ནས་འཕྲུལ་རིགས་ཁག་གི་ནང་དུ་ཡོད་པའི་གློག་གི་རྒྱུ་ཆ་བརྒྱ་ཆ་༩༠ རྒྱ་ནག་ནས་ཡོང་གི་ཡོད་པར་བརྗོད་ཡོད་འདུག འདི་ལོའི་ཕྱི་ཟླ་༤ ནང་ཨ་རིའི་གཞུང་གིས་ཨུ་རུ་སུ་ལ་གོ་མཚོན་གྱི་ཡོ་ཆས་སྤྲོད་མཁན་བཟོ་ཚོང་ཁང་༢༠ ཙམ་ཞིག་ལ་དཔལ་འབྱོར་གྱི་ཉེས་ཆད་བཅད་ཡོད་པ་དང་། བཟོ་ཚོང་ཁང་དེ་དག་མང་ཆེ་བ་རྒྱ་ནག་དང་། ཧོང་ཀོང་ནང་ཡོད་པའི་བཟོ་ཚོང་ཁང་རྐྱང་རྐྱང་ཡིན་འདུག བཟོ་ཚོང་ཁང་དེ་དག་གིས་ཨུ་རུ་སུའི་མི་མེད་གནམ་གྲུ་བཟོ་ཆེད་ཀྱི་རྒྱུ་ཆ་དང་ཡོ་ཆས་འཚོང་གི་ཡོད་འདུག་ལ། དེ་བཞིན་རྒྱ་ནག་ནི་གློག་གི་འཕྲུལ་ཆས་ནང་མཁོ་བའི་(semiconductors)ཟེར་བའི་ཡོ་ཆས་དེ་མང་ཤོས་འཚོང་མཁན་ཡིན་པ་དབྱིན་ཡུལ་ནང་རྟེན་གཞི་བྱས་པའི་ཉམས་ཞིབ་ལྟེ་གནས་ཁང་(the International Institute of Strategic Studies)ཟེར་བ་དེའི་ཉམས་ཞིབ་པ་(Maria Shagin)ཟེར་བ་ཡིས་བརྗོད་འདུག འོན་ཀྱང་། རྒྱ་ནག་གིས་རང་ལ་ཚོང་ཟོག་བཀག་སྡོམ་དང་དཔལ་འབྱོར་ཉེས་ཆད་མ་བཅད་པའི་ཆེད་དུ་ཨུ་རུ་སུ་ལ་གོ་མཚོན་འཚོང་གི་མེད་ཀྱི་རྗོད་ཀྱི་ཡོད་འདུག ནུབ་ཕྱོགས་རྒྱལ་ཁབ་ཚོས་ཨུ་རུ་སུ་ལ་དཔལ་འབྱོར་ཉེས་ཆད་བཅད་པ་ནས་བཟུང་རྒྱ་ནག་གིས་ཨུ་རུ་སུ་ལ་རླངས་འཁོར་དང་གྱོན་ཆས། དངོས་ཟོག་རིགས་ཀྱི་རྒྱུ་ཆ་སོགས་ཅ་དངོས་མང་པོ་འཚོང་གི་ཡོད་འདུག ཕྱི་ལོ་༢༠༢༣ ནང་ཨུ་རུ་སུ་དང་རྒྱ་ནག་བར་ཨ་སྒོར་ཐེར་འབུམ་༢༤༠ ཡི་ཚོང་འབྲེལ་བྱུང་སྟེ། ལོ་རྒྱུས་ཁྲོད་ཚོང་འབྲེལ་ཆེ་ཤོས་དེ་ཡིན་འདུག་ལ། བརྒྱ་ཆ་༦༤ ཙམ་ཡར་འཕར་ཡོད་འདུག ཨུ་རུ་སུའི་ནང་རྒྱ་ནག་ནས་བཟོས་པའི་རླངས་འཁོར་མང་པོ་ཡོད་འདུག རྒྱ་ནག་ནི་ཨུ་རུ་སུའི་ཚོང་འབྲེལ་ཆེ་ཤོས་ཀྱི་རྒྱལ་ཁབ་གཅིག་ཡིན་འདུག་ལ། ཨུ་རུ་སུ་ནི་རྒྱ་ནག་གི་ཚོང་འབྲེལ་ཆེ་ཤོས་ཀྱི་རྒྱལ་ཁབ་དྲུག་པ་དེ་ཡིན་འདུག ཨུ་རུ་སུའི་ལོ་གཅིག་གི་ཡོང་འབབ་ནས་བརྒྱ་ཆ་༥༠ སྣུམ་དང་རླངས་རྫས་སོགས་ཀྱི་ནུས་ཤུགས་ཐོན་ཁུངས་ནས་ཡོང་གི་ཡོད་འདུག་པར་བརྟེན། རྒྱ་ནག་དང་རྒྱ་གར་གཉིས་ནི་ཨུ་རུ་སུའི་སྣུམ་ཉོ་མཁན་མང་ཤོས་དེ་ཡིན་འདུག མ་འོངས་པར་རྒྱ་ནག་གིས་ཨུ་རུ་སུའི་ས་ཆ་(Siberia)ཟེར་བ་ནས་རྒྱ་ནག་བར་སྣུམ་ནང་འདྲེན་བྱེད་ཆེད་ཀྱི་སྦུག་དོང་ཐེན་ནས་སྣུམ་ཉོ་རྒྱུ་མང་དུ་གཏོང་རྒྱུ་ཡིན་འདུག གསར་འགོད་པ། བསོད་ནམས་ཕུན་ཚོགས།
སྲིད་སྐྱོང་ཡོ་རོབ་ཁུལ་དུ་འཚམས་གཟིགས་དང་གཏན་འཇགས་ཐབས་བྱུས་ཚོགས་འདུ།
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ཡོ་རོབ་རྒྱལ་ཁབ་སུད་སི་དང་། ཨོ་སི་ཊེ་རི་ཡ་(Austria) ཨི་ཊ་ལི། ཇར་མ་ནི་བཅས་ཡོ་རོབ་ཀྱི་རྒྱལ་ཁབ་ཁག་བཞིའི་ནང་གཞུང་དོན་འཚམས་གཟིགས་ཕེབས་ཏེ། རྒྱལ་ཁབ་དེ་དག་གི་གནད་ཡོད་མི་སྣ་དང་དངོས་སུ་མཇལ་འཕྲད་ཀྱིས་བོད་དོན་ངོ་སྤྲོད་དང་བོད་དོན་ལ་རྒྱབ་སྐྱོར་སྔར་ལྷག་དགོས་པའི་ཞུ་སྐུལ། གཞོན་སྐྱེས་གཙོས་ས་གནས་བོད་མི་ཚོར་བོད་དོན་ལམ་སྟོན་གཏམ་བཤད་སོགས་གནང་ཡོད་འདུག ཟླ་བ་འདིའི་ཚེས་༡༢ཉིན་སྲིད་སྐྱོང་སྤེན་པ་ཚེ་རིང་ནས་སུད་སིའི་གྲོང་ཁྱེར་ཛུ་རིག་ས་གནས་ཀྱི་དང་བླངས་བོད་དོན་ཞུ་གཏུག་པ་རྣམས་ལ་བོད་དོན་གཏམ་བཤད་གནང་ཡོད་འདུག་པ་དང་། སྐབས་དེར་སྲིད་སྐྱོང་གིས་༧གོང་ས་སྐྱབས་མགོན་ཆེན་པོས་ཆོས་སྲིད་གཉིས་ཐོག་བསྩལ་བའི་བཀའ་སློབ་ལམ་སྟོན་ཡིད་ལ་འཛིན་པ་དང་།༧གོང་ས་མཆོག་གི་བཀའ་དྲིན་དྲན་པ། བོད་ཀྱི་སྔ་ཕྱིའི་ལོ་རྒྱུས་ཤེས་པ། བོད་དོན་ཞུ་གཏུག་བྱེད་ཡུལ་གྱི་རྒྱལ་ཁབ་སོ་སོའི་ཆབ་སྲིད་ཀྱི་གནས་སྟངས་སོགས་ཤེས་པའི་ཐོག་ནས་བོད་དོན་ཞུ་གཏུག་གནང་རྒྱུ་གལ་ཆེ་བའི་སྐོར་སོགས་དང་། བོད་དོན་དེ་ཡང་བོད་མི་ཙམ་ལ་གལ་ཆེན་མ་ཡིན་པར་བོད་ཀྱི་ས་ཁམས་ཆགས་བབ་ཀྱི་ཐད་ནས་འཛམ་གླིང་ལ་གལ་ཆེན་ཡིན་པ་འགྲེལ་བཤད་རྒྱག་ཐུབ་དགོས་པ། བོད་མི་གཞོན་སྐྱེས་ཚོས་བོད་རང་གི་སྐད་ཡིག་དང་རིག་གཞུང་ལ་དོ་སྣང་ཆེ་ཙམ་གནང་དགོས་གལ་ཆེ་བའི་སྐོར་སོགས་བཀའ་སློབ་དང་ལམ་སྟོན་གནང་འདུག དེ་བཞིན་ཟླ་འདིའི་ཕྱི་ཚེས་༩ ཉིན་ཨི་ཊ་ལིའི་རྒྱལ་ས་རོམ་དུ་ཨི་ཊ་ལི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་མཇལ་འཕྲད་གནང་སྟེ། ད་ལྟའི་བོད་ནང་གི་གནས་སྟངས་ངོ་སྤྲོད་དང་། འཛམ་གླིང་ལ་བོད་གལ་ཆེ་ཚུལ་སོགས་ངོ་སྤྲོད་གནང་འདུག གཞན་ཡང་ཚེས་༡༠དང་༡༡ བཅས་ལ་ཨོ་སི་ཊི་རེ་ཡཱའི་གྲོས་ཚོགས་འཐུས་མི་དང་། ལྗང་ཁུ་སྲིད་དོན་ཚོགས་པའི་མགྲིན་ཚབ་པ། ཨོསྟྲི་ཡཱ་མི་མང་སྲིད་དོན་ཚོགས་པའི་མགྲིན་ཚབ་པ་བཅས་ལ་མཇལ་འཕྲད་གནང་སྟེ། བོད་མིའི་སྒྲིག་འཛུགས་ཀྱི་སྒྲོམ་གཞི་དང་། བཀའ་ཤག་སྐབས་བཅུ་དྲུག་པའི་ངོས་ནས་བོད་རྒྱའི་དཀའ་རྙོག་སེལ་ཐབས་དབུ་མའི་ལམ་གྱི་སྲིད་བྱུས་གཞིར་བཞག་ཐོག ལོ་རྒྱུས་ཐོག་བོད་དེ་རང་བཙན་རྒྱལ་ཁབ་ཅིག་ཡིན་པའི་གནས་བབ་ལ་ནན་བརྗོད་གནང་གི་ཡོད་པ་གསལ་བཤད་དང་། རྒྱ་ནག་གཞུང་གིས་བོད་ཁྲིམས་འགལ་གྱིས་བཙན་འཛུལ་བྱས་པས། ད་ལྟ་རྒྱ་ནག་གིས་རྒྱལ་སྤྱིའི་སྤྱི་ཚོགས་ནས་བོད་རྒྱ་ཁོངས་ཡིན་ཚུལ་ངོས་འཛིན་ཐོབ་ཐབས་སུ་འབད་རྩོལ་ལྷོད་མེད་བྱེད་ཀྱི་ཡོད་ལ། གལ་ཏེ་རྒྱལ་སྤྱིའི་སྤྱི་ཚོགས་ནས་རྒྱ་ནག་གི་བཤད་ཚུལ་རྗེས་སུ་འབྲངས་ན་རྒྱལ་སྤྱིའི་ཁྲིམས་དང་འགལ་གྱི་ཡོད་པའི་སྐོར་གསུངས་འདུག དེ་བཞིན་དེ་གའི་གསར་ལམ་ཆེ་ཁག་ནང་བཅར་འདྲིར་ལན་འདེབས་གནང་བ་དང་། ལོ་རྗེས་མར་༧གོང་ས་སྐྱབས་མགོན་ཆེན་པོ་མཆོག་དགུང་ལོ་༩༠ ལ་ཕེབས་སྐབས་ལོ་དེར་ཞི་བདེའི་ལོ་ཞེས་སྲུང་བརྩི་ཞུ་རྒྱུའི་ལས་གཞིའི་སྐོར་འགྲེལ་བརྗོད་སོགས་གནང་ཡོད་འདུག ཟླ་འདིའི་ཕྱི་ཚེས་ ༡༣ ནས་ཉིན་གྲངས་གསུམ་རིང་སུད་སིའི་གྲོང་ཁྱེར་ཛུ་རིག་ཏུ་བོད་མིའི་སྒྲིག་འཛུགས་ཀྱི་གཏན་འཇགས་ཐབས་བྱུས་ཚོགས་ཆུང་གི་ཚོགས་འདུ་ཐེངས་ ༦ པ་འཚོག་བཞིན་འདུག་ཅིང་། ཐེངས་འདིའི་ཚོགས་ཐོག་ཏུ་གཏན་འཇགས་ཐབས་བྱུས་འཆར་འགོད་ཚོགས་ཆུང་གི་སློབ་སྟོན་པ་བཀའ་ཟུར་འབྲོང་ཆུང་དངོས་གྲུབ་ཕུད་པའི་སློབ་སྟོན་པ་དང་ཚོགས་ཆུང་གི་ཚོགས་མི་རྣམས་དང་། བདེ་སྲུང་བཀའ་བློན་རྒྱ་རི་སྒྲོལ་མ་དང་ཕྱི་དྲིལ་བཀའ་བློན་ནོར་འཛིན་སྒྲོལ་མ་གཉིས་ཀྱང་མཉམ་ཞུགས་གནང་ཡོད་འདུག གཏན་འཇགས་ཐབས་བྱུས་ཚོགས་ཆུང་ནི་བཀའ་ཤག་སྐབས་༡༦ པས་དེ་སྔའི་བོད་རྒྱ་འབྲེལ་མོལ་ལས་དོན་ཚོགས་ཆུང་ཞེས་པ་ཕྱིར་བསྡུ་གནང་སྟེ་གསར་འཛུགས་བྱས་པ་ཞིག་ཡིན་ཞིང་། ཚོགས་ཆུང་འདིའི་སློབ་སྟོན་པ་བཀའ་ཟུར་བསྟན་པ་ཚེ་རིང་། བཀའ་ཟུར་འབྲོང་ཆུང་དངོས་གྲུབ། དགའ་ལྡན་ཕོ་བྲང་གི་དྲུང་ཆེ་རྔ་བ་ཚེ་རྒྱམ། གོང་ས་མཆོག་གི་དམིགས་བསལ་སྐུ་ཚབ་ཟུར་པ་སྐལ་བཟང་རྒྱལ་མཚན་བཅས་ཡིན་འདུག་ལ། ཚོགས་མིའི་ཁོངས་སུ་སྲིད་སྐྱོང་སྤེན་པ་ཚེ་རིང་། བདེ་སྲུང་དྲུང་ཆེ་ཀརྨ་རིན་ཆེན། ཆབ་སྲིད་དྲུང་ཆེ་བཀྲ་ཤིས་རྒྱ་མཚོ། ཕྱི་དྲིལ་དྲུང་ཆེ་ཀརྨ་ཆོས་དབྱིངས། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་བཅས་ཡོད་པ་རེད། ད་ལྟ་འཚོག་བཞིན་པ་འདི་གཏན་འཇགས་ཐབས་བྱུས་ཚོགས་འདུ་ཐེངས་དྲུག་པ་དེ་ཡིན་འདུག གོང་གསལ་གནས་ཚུལ་དག་བོད་མིའི་སྒྲིག་འཛུགས་ཀྱི་དྲྭ་བ་སོགས་ནས་ཕྱོགས་བསྡུས་བྱས། གསར་འགོད་པ། བསྟན་འཛིན་ལམ་བཟང་།
ཏོག་དབྱིབས་ནད་དུག་ཐོག་མ་ཁྱབ་དུས་ཕྱིར་བསྒྲགས་བྱེད་མཁན་རྒྱ་མོ་དེ་བཙོན་ནས་གློད་འདུག
རྒྱ་ནག་ནང་ཝུ་ཧན་ཏོག་དབྱིབས་ནད་དུག་ཐོག་མ་ཁྱབ་དུས་རྒྱ་རིགས་བུད་མེད་གཅིག་གིས་ཕྱིར་བསྒྲགས་བྱས་པའི་རྐྱེན་གྱིས་བུད་མེད་དེ་རྒྱ་ནག་གཞུང་གིས་འཛིན་བཟུང་བཀག་ཉར་བྱས་ནས་མི་ལོ་བཞིའི་རིང་བཙོན་འཇུག་བྱས་རྗེས་ཁ་སང་གཟའ་ཟླ་བའི་ཉིན་གློད་དཀྲོལ་བཏང་ཡོད་འདུག ཕྱི་ཚེས་༡༤ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། ཁ་སང་གཟའ་ཟླ་བའི་ཉིན་རྒྱ་ནག་ནས་ཏོག་དབྱིངས་ནད་དུག་ཐོག་མ་ཁྱབ་དུས། རྒྱ་རིགས་བུད་མེད་(Zhan Zhang)ཟེར་བ་དེས་ཕྱིར་བསྒྲགས་བྱས་པའི་རྐྱེན་གྱིས་རྒྱ་ནག་གཞུང་གིས་ཁོང་མོ་ལོ་བཞིའི་རིང་བཙོན་འཇུག་བྱས་རྗེས་གློད་དཀྲོལ་བཏང་ཡོད་འདུག འོན་ཀྱང་། ཁོང་མོ་དོན་ངོ་མ་གློད་དཀྲོལ་བཏང་ཡོད་དམ། ཡང་ན་ཁོང་མོ་ལ་རྒྱབ་སྐྱོར་བྱེད་མཁན་ཚོའི་ཆེད་དུ་གློད་དཀྲོལ་བཏང་ཡོད་མདོག་བྱེད་པ་ལས་དོན་དངོས་ཐོག་གློད་བཀྲོལ་བཏང་ཡོད་མེད་ཤེས་རྟོགས་ཐུབ་ཀྱི་ཡོད་མི་འདུག རང་ལོ་༤༠ ཡིན་པའི་ཁྲིམས་རྩོད་པ་(Zhan Zhang)་ཟེར་བའི་བུད་མེད་དེ་རྒྱ་ནག་ནས་ཐོག་མ་ཏོག་དབྱིབས་ནད་དུག་ཁྱབ་དུས་ཕྱིར་བསྒྲགས་བྱེད་མཁན་མང་པོ་ཡོད་པའི་ཁྲོད་ནས་གཅིག་ཡིན་འདུག ཏོག་དབྱིབས་ནད་དུག་མི་མང་ལ་ཕྱིར་བསྒྲགས་བྱས་རྗེས་རྒྱ་ནག་གཞུང་གིས་འཛིན་བཟུང་བཙོན་འཇུག་བྱས་པ་དང་གར་སོང་ཆ་མེད་དུ་གྱུར་པ་ཁོང་མོ་འདྲ་བའི་མི་མང་པོ་ཡོད་འདུག ཁོང་མོ་ལ་ཏོག་དབྱིབས་ནད་དུག་སྐབས་སུ་རྒྱ་ནག་ནང་ལས་འགུལ་ཡང་ཡང་སྤེལ་བའི་ཉེས་མིང་དང་ཁ་རྩོད་རྒྱག་པ་སོགས་ཀྱི་ཉེས་མིང་ཕོག་ཡོད་འདུག འགྲོ་བ་མིའི་ཐོབ་ཐང་ལྟ་ཞིབ་བྱེད་མཁན་ཚོགས་པ་ཁག་གིས་(Zhan Zhang)ཟེར་བའི་བུད་མེད་དེ་འཛིན་བཟུང་བཀག་ཉར་བྱས་པ་ནི་ནོར་འཁྲུལ་ཤོར་ཡོད་པ་དང། ད་ཆར་ཁོང་མོའི་འཕྲོད་བསྟེན་ལ་དཀའ་ངལ་ཡོད་པས་གློད་བཀྲོལ་གཏོང་རྒྱུའི་འབོད་སྐུལ་ཤུགས་ཆེན་བྱས་པ་ཡིན་ཞེས་བརྗོད་འདུག་ལ། དེ་བཞིན་ད་དུང་སེམས་ཁྲལ་ཆེ་ཤོས་གཅིག་ནི། ཁོང་མོ་གློད་དཀྲོལ་བཏང་རྗེས་བདེ་འཇགས་ཀྱི་གནད་དོན་ཐད་ཡིན་པར། རྒྱལ་མཚམས་བརྒལ་བའི་གསར་འགོད་པ་ཞེས་པའི་ལས་ཁུངས་ཀྱི་ལས་བྱེད་(Aleksandra Bielakowska)ཟེར་བ་དེས་བརྗོད་འདུག་ལ། ད་དུང་ལས་བྱེད་བུད་མེད་དེས་རྒྱ་ནག་ནང་གསར་འགོད་པ་ཚོ་རྒྱ་ནག་གཞུང་གིས་འཛིན་བཟུང་བཀག་ཉར་བྱས་ནས། མཐར་གློད་བཀྲོལ་བཏང་རྗེས་ཀྱང་གཞུང་གི་ལྟ་རྟོགས་འོག་འགྲོ་འདུག་ལ་རང་དབང་མེད་པར་བརྟེན། དྲང་པོ་བཤད་ན་ད་ལྟ་གློད་བཀྲོལ་གཏོང་ཡོད་ཚུལ་བརྗོད་པའི་བུད་མེད་དེའི་སྐོར་ཤེས་རྟོགས་གང་ཡང་མེད་ཅེས་བརྗོད་འདུག (Zhan Zhang་ཟེར་བའི་བུད་མེད་དེའི་ཁྲིམས་རྩོད་པ་གཅིག་གིས་བྷི་བྷི་སི་གསར་ཁང་ལ། ཁོང་མོ་ད་ལྟ་ (Shanghai)གྲོང་ཁྱེར་ནང་ཕ་མ་དང་ལྷན་དུ་བསྡད་ཡོད་ཀྱང་། ད་དུང་གཞུང་གི་དམ་དྲག་འོག་འགྲོ་འདུག་ལ་རང་དབང་མེད་པ་རེད་ཅེས་བརྗོད་ཡོད་འདུག ཁོང་མོས་དྲྭ་ཐོག་ཏུ་ཐད་གཏོང་དང་རྩོམ་ཡིག་མང་པོ་སྤེལ་བ་དག་ལ་དྲྭ་ཐོག་ནས་མི་མང་པོ་ཞིག་གིས་ལྟ་ཀློག་བྱེད་ཀྱི་ཡོད་འདུག་པར་བརྟེན། རྒྱ་ནག་གཞུང་གིས་དམ་དྲག་བྱེད་ཀྱི་ཡོད་འདུག བུད་མེད་དེ་ཡིས་(An indenpendent filmmaker)ཟེར་བ་ཞིག་གིས་བུད་མེད་དེ་ལ་བཅར་འདྲི་བྱས་པའི་བརྙན་ཐུང་ཞིག་བྷི་བྷི་སི་ལ་རག་ཡོད་འདུག་པ་དང་། བརྙན་ཐུང་དེའི་ནང་བུད་མེད་དེས་ང་ནི་ཕལ་ཆེར་གྱེན་ལོག་པའི་ཚེ་སྲོག་ཞིག་ཡིན་པ་འདྲ། ངས་བདེན་པ་ཤོད་ཀྱི་ཡོད། བདེན་པ་ག་རེ་བྱས་ནས་བཤད་ཆོག་གི་མ་རེད། ང་ལ་གནད་དོན་ག་རེ་བྱུང་ཡང་ངས་བདེན་པ་བཤད་མཚམས་འཇོག་རྒྱུ་མིན། རྒྱུ་མཚན་ནི་ངའི་རྒྱལ་ཁབ་དེ་ཕྱིར་ལོག་རྒྱག་འཇུག་འདོད་མི་འདུག་ཅེས་བརྗོད་ཡོད་འདུག ཁོང་མོས་ཐོག་མ་ཕྱི་ལོ་༢༠༢༠ ཟླ་བ་༤ ཚེས་༡༤ བར་གྱི་སྔོན་ལ་སྐད་འཕྲིན་དང་(YouTube)(Twitter)་སོགས་ཀྱི་ཐོག་ཏུ་བརྙན་བརྒྱ་ལྷག་ཙམ་སྤེལ་ཡོད་འདུག དེའི་རྗེས་ཀྱི་ཉིན་མོ་ནས་ཁོང་མོ་གཞུང་གི་ཉེན་རྟོག་པས་འཛིན་བཟུང་བཙན་ཁྲིད་བྱས་ནས་བཙོན་འཇུག་བྱས་ཡོད་འདུག ཐོག་མ་ཁོང་མོས་བཙོན་ཁང་ནང་ཟླ་བ་འགའ་ཤས་རིང་ཟས་བཅད་ངོ་རྒོལ་བྱས་ཡོད་འདུག་པ་དང་། ཟས་བཅད་ངོ་རྒོལ་བྱས་པའི་རྐྱེན་གྱིས་ཁོང་མོའི་གཟུགས་གཞི་ལ་ན་ཚ་བྱུང་ནས་དཀའ་ངལ་ཆེན་པོ་བྱུང་ཡོད་འདུག རྒྱ་ནག་ནང་ནད་དུག་ཁྱབ་དུས་གཞུང་གིས་སྤྱི་ཚོགས་བརྒྱུད་ལམ་ཚང་མ་བཀག་འགོག་ཆེན་པོ་བྱེད་ཀྱི་ཡོད་པའི་སྐབས་སུ། མི་མང་གསར་འགོད་པ་ཚོས་དངོས་ཡོད་གནས་ཚུལ་མང་པོ་ཞིག་ཕྱིར་བསྒྲགས་བྱེད་ཐུབ་ཡོད་འདུག་ལ། གཞུང་གིས་ཁོང་མོ་འདྲ་བའི་མི་མང་གསར་འགོད་པ་མང་པོ་འཛིན་བཟུང་དང་བཀག་ཉར། གར་སོང་ཆ་མེད་དུ་འགྱུར་མཁན་མང་པོ་ཡོད་འདུག དཔེར་ན། སྨན་པ་(Dr Li )ཟེར་བ་ཁོང་གིས་ནད་དུག་སྐོར་ཕྱིར་བསྒྲགས་བྱས་རྗེས་གཞུང་གིས་འཛིན་བཟུང་བྱས་ནས་མཐར། ཕྱི་ལོ་༢༠༢༠ ཟླ་བ་༡ ནང་གྲོངས་ཡོད་འདུག […]
རྒྱ་ནག་གིས་རྒྱལ་མཚམས་ལས་བརྒལ་བའི་འཇིགས་སྐུལ་བྱས་ཏེ་རྒྱ་ནག་དང་ཧོང་ཀོང་གི་སློབ་མ་ཚོའི་དཀའ་ངལ།
ཁ་སང་རྒྱལ་སྤྱིའི་ཉེས་ཡངས་ཚོགས་པས་སྙན་ཐོ་གསར་པ་ཞིག་བཏོན་ཡོད་པའི་ནང་། རྒྱལ་མཚམས་ལས་བརྒལ་བའི་དྲག་གནོན་གྱི་ལས་འགུལ་འོག་ཕྱི་རྒྱལ་ཡུལ་གྲུ་ཁག་ཏུ་ཡོད་པའི་རྒྱ་ནག་དང་ཧོང་ཀོང་གི་སློབ་གཉེར་བ་ཚོ་ལ་དོགས་ཟོན་དང་འཇིགས་སྐུལ་བྱས་ནས་དཀའ་ངལ་འཕྲད་བཞིན་ཡོད་འདུག ཟླ་འདིའི་ཚེས༡༣ ཉིན་རྒྱལ་སྤྱིའི་ཉེས་ཡངས་ཚོགས་པས་(AMNEST INTERNATIONAL) ངའི་སློབ་གྲྭའི་ནང་། ང་ཞེད་ཀྱི་འདུག་ཅེས་པའི་སྙན་ཐོ་ཞིག་གསར་སྤེལ་བྱས་འདུག་པ་དང་། དེའི་ནང་དུ་རྒྱ་ནག་གི་དཔོན་པོ་ཚོས་རྒྱ་ནག་དང་ཧོང་ཀོང་གི་སློབ་མ་རྣམས་ཕྱི་རྒྱལ་དུ་སློབ་སྦྱོང་བྱེད་སྐབས། ཚོར་སྣང་སྐྱེན་པའི་གནད་དོན་དང་ཆབ་སྲིད་ཀྱི་གནད་དོན་དང་འབྲེལ་བ་བྱེད་པར་བཀག་འགོག་བྱེད་ཆེད། སློབ་ཕྲུག་ཚོ་ལ་འཇིགས་སྐུལ་དང་སུན་གཙེར་བཟོ་བ། དོགས་སྲུང་བྱེད་ཀྱི་ཡོད་པ་སོགས་ལ་བརྟེན། སློབ་ཕྲུག་ཚོ་ཞེད་སྣང་ཅན་གྱི་ཁོར་ཡུག་ནང་གནས་ཡོད་ཅེས་འཁོད་འདུགངའི་སློབ་གྲྭའི་ནང་དུ། ང་ཞེད་ཀྱི་འདུག་ཅེས་འགོ་བརྗོད་དུ་བྲིས་པའི་སྙན་ཐོ་དེའི་ཆེད་དུ་ཡུ་རོབ་དང་བྱང་ཨ་མེ་རི་ཁ་ལ་གནས་སྡོད་བྱེད་མཁན་སློབ་མ་ཁག་ཅིག་ལ་བཅར་འདྲི་བྱས་ཡོད་པའི་ནང་། སློབ་མ་དག་གིས་ཁོང་ཚོས་གྲོང་ཁྱེར་སོ་སོའི་ནང་ངོ་རྒོལ་བྱེད་སྐབས་རྒྱ་ནག་གི་གསང་བའི་མི་སྣས་པར་རྒྱག་པ་དང་རྗེས་འདེད་གཏོང་གི་ཡོད་སྐོར་འགྲེལ་བརྗོད་བྱས་ཡོད་པ་དང་། སློབ་མ་མང་པོས་རྒྱ་ནག་ཏུ་ཡོད་པའི་ཁྱིམ་མི་ཚོར་ཕྱི་ལོགས་སུ་སློབ་མ་ཚོས་སྤེལ་བའི་ལས་འགུལ་དང་འབྲེལ་བ་ཡོད་རབས་བརྗོད་ནས་ཉེན་རྟོག་པས་ཁྱིམ་མི་ཚོ་དམིགས་འབེན་དུ་བཟུང་ནས་འཇིགས་སྐུལ་བྱས་ཡོད་པར་བརྗོད་འདུག རྒྱ་ནག་གི་དབང་འཛིན་པ་ཚོས་འགྲོ་བ་མིའི་ཐོབ་ཐང་གི་ལས་འགུལ་ལ་རྒོལ་རྡུང་བྱེད་བཞིན་པ་དེ་ད་ཆ་རྒྱ་ནག་དང་ཧོང་ཀོང་གི་སློབ་ཕྲུག་ཡོད་པའི་ཕྱི་རྒྱལ་གྱི་གཙུག་ལག་སློབ་གཉེར་ཁང་མང་པོའི་འཛིན་ཁང་དང་བར་ཁྱམས་སུ་སྤེལ་བཞིན་ཡོད་པ་དང་། རྒྱ་གཞུང་གི་རྒྱལ་མཚམས་ལས་བརྒལ་བའི་དྲག་གནོན་གྱི་ཤུགས་རྐྱེན་གྱིས་ཤེས་ཡོན་རང་དབང་གི་སྙིང་པོར་གྱུར་པའི་རང་དབང་གི་བསམ་ཚུལ་བརྗེ་རེས་ལ་ཉེན་ཁ་ཚབས་ཆེན་བཟོ་བཞིན་ཡོད་པས་སྲིད་གཞུང་དང་སློབ་ཆེན་ཁག་གིས་ངེས་པར་དུ་དེ་ལ་ཁ་གཏད་གཅོག་དགོས་པར་བརྗོད་འདུག སྙན་ཐོ་དེའི་ཆེད་དུ་རྒྱལ་སྤྱིའི་ཉེས་ཡངས་ཚོགས་པས་ཨ་རི་དང་ཁེ་ན་ཌ། ཧྥ་རན་སི་དང་ཇར་མན། སྦེལ་ཇམ་དང་སུད་སི། དབྱིན་ཡུལ་དང་ཧོ་ལན་ཌི་བཅས་རྒྱལ་ཁབ་བརྒྱད་ཀྱི་ནང་ཧོང་ཀོང་གི་སློབ་གཉེར་བ་༡༢ གཙོས་པའི་ཁྱོན་རྒྱ་ནག་གི་སློབ་ཕྲུག་༣༢ ལ་བཅར་འདྲི་བྱས་ཡོད་འདུགརོ་ཝང་ཞེས་འབོད་པའི་སློབ་མ་ཞིག་གིས། ཁོང་ཉིད་༡༩༨༩ ་ལོའི་དྲུག་བཞིའི་དོན་རྐྱེན་རྗེས་དྲན་མཛད་སྒོར་ཞུགས་ནས་ཆུ་ཚོད་ཁ་ཤས་སོང་བའི་རྗེས། རྒྱ་ནག་ཏུ་ཡོད་པའི་ཨ་ཕའི་རྩ་ནས་ས་གནས་ཉེན་རྟོག་པས་འབྲེལ་བ་བྱས་ཏེ། ཕྱི་རྒྱལ་ལ་ཡོད་པའི་བུ་མོ་ལ་རྒྱ་གཞུང་གི་མཚན་སྙན་ལ་གནོད་པའི་དོན་རྐྱེན་གང་ལ་ཡང་མཉམ་ཞུགས་བྱེད་མི་རུང་བའི་སློབ་གསོ་སྤྲོད་དགོས་ཞེས་བརྗོད་འདུགརོ་ཝང་གིས་ལས་འགུལ་བ་སུ་གཅིག་ལ་ཁོང་མོའི་མིང་ངོ་མ་བཤད་མེད་པ་མ་ཟད་དྲྭ་ཐོག་ཏུ་ཡང་རང་ཉིད་ལས་འགུལ་ནང་མཉམ་ཞུགས་བྱས་ཡོད་པ་སྤེལ་མེད་ན་ཡང་། རྒྱ་ནག་གཞུང་གིས་དུས་ཡུན་ཐུང་ངུ་ཞིག་གི་ནང་ཁོང་མོ་ལས་འགུལ་ནང་ཡོད་པ་ངོ་རྟགས་ཆོད་པ་དང་ཁོང་གི་ཨ་ཕ་གང་དུ་ཡོད་པ་རྩད་གཅོད་བྱས་ཡོད་པས་ཁོང་མོ་ཧོན་འཐོར་ཡོད་པ་དང་། ཁོང་གིས་ང་ཚོ་སའི་གོ་ལའི་ཕྱོགས་གཞན་ཞིག་ལ་ཡོད་ན་ཡང་རྒྱ་ནག་གཞུང་གིས་ལྟ་སྲུང་བྱེད་ཀྱི་ཡོད་པའི་བརྡ་ལན་གསལ་བོ་རེད་ཅེས་རྒྱལ་སྤྱིའི་ཉེས་ཡངས་ཚོགས་པ་ལ་བརྗོད་འདུགཉེ་བའི་ལོ་ཤས་ནང་ཕྱི་རྒྱལ་དུ་ཡོད་པའི་རྒྱ་ནག་གི་སློབ་ཕྲུག་མང་པོས་རྒྱ་ནག་ལ་སྐྱོན་རྗོད་ཀྱི་ལས་འགུལ་ནང་མཉམ་ཞུགས་བྱས་ཡོད་འདུག དཔེར་ན། ཕྱི་ལོ་༢༠༢༢ ལོར་རྒྱ་ནག་ནང་ཤོག་བུ་དཀར་པོའི་ལས་འགུལ་དང་། ཕྱི་ལོ་༢༠༡༩ ལོར་ཧོང་ཀོང་ནང་དམངས་གཙོ་དོན་གཉེར་བ་ཚོའི་ངོ་རྒོལ་ལས་འགུལ། དེ་བཞིན་ཕྱི་ལོ་༡༩༨༩ ལོར་པེ་ཅིང་གི་གནམ་བདེ་སྒོ་མོའི་ཐང་ཆེན་ལ་དྲག་གནོན་བྱས་པའི་རྗེས་དྲན་དུས་ཆེན་སོགས་ཀྱི་ནང་མཉམ་ཞུགས་བྱས་ཡོད་འདུག རྒྱལ་སྤྱིའི་ཉེས་ཡངས་ཚོགས་པས་བཅར་འདྲི་བྱས་པའི་སློབ་མ་སུམ་ཆ་གཅིག་གིས་རྒྱ་གཞུང་ལ་སྐྱོན་བརྗོད་བཀག་འགོག་ཆེད་རྒྱ་ནག་གི་དཔོན་རིགས་ཚོས་ཕ་མ་ཚོར་ལས་གནས་ནས་གནས་དབྱུང་གཏོང་རྒྱུ་དང་། རྒས་ཕོགས་འགོག་རྒྱུ། ལས་ཀའི་གནས་རིམ་སྤར་རྒྱུ་མིན་པ་སོགས་བརྗོད་ནས་འཇིགས་སྐུལ་བྱས་ཡོད་པར་བརྗོད་འདུག ད་ལྟའི་ཆར་ཕྱི་རྒྱལ་ཡུལ་གྲུ་ཁག་ལ་སློབ་སྦྱོང་བྱེད་མཁན་རྒྱ་ནག་གི་སློབ་ཕྲུག་འབུམ་༩ ཙམ་ཡོད་པ་དང་། རྒྱལ་སྤྱིའི་ཉེས་ཡངས་ཚོགས་པས་འབྲེལ་ཡོད་སྲིད་གཞུང་དང་གཙུག་ལག་སློབ་ཆེན་ཁག་གི་རྒྱལ་མཚམས་ལས་བརྒལ་བའི་དྲག་གནོན་མྱོང་མཁན་སློབ་ཕྲུག་ཚོའི་ཐོབ་ཐང་སྲུང་སྐྱོབ་བྱ་རྒྱུའི་ཐོག་ལས་དོན་མང་ཙམ་བརྩམ་རྒྱུའི་འབོད་སྐུལ་ཞུས་ཡོད་འདུག། གསར་འགོད་པ། བློ་བཟང་རྒྱ་མཚོ།