ཟླ་འདིའི་ཚེས་༢༥ ་ཉིན་གྱི་ཞོགས་པའི་ཆུ་ཚོད་༩།༣༠ སྟེང་སྐབས་༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ལས་ཉིན་བདུན་པ་སྤྱི་འཐུས་ཚོགས་གཙོ་དབུ་བཞུགས་ཐོག་དབུ་འཛུགས་གནང་སོང་།
ལས་རིམ་ལྟར་ཐོག་མ་ཁྲིམས་སྒྲིག་བསྐྱར་བཅོས་འཆར་ཟིན་ཚོགས་ཆུང་གི་ཚོགས་གཙོས་ཁྲིམས་སྒྲིག་བསྐྱར་བཅོས་འཆར་ཟིན་ཚོགས་ཆུང་གི་ལས་བསྡོམས་སྙན་སྒྲོན་གནང་རྗེས། ལས་ཁུངས་གོ་རིམ་བཞིན་སྔོན་རྩིས་ཐོག་སྤྱི་ཡོངས་བགྲོ་གླེང་དང་གཏན་འབེབས་ཀྱི་ལས་རིམ་ཐོག་བགྲོ་གླེང་གནང་སོང་།
སྐབས་དེར་སྤྱི་འཐུས་རྣམ་པས་སློབ་གྲྭ་ཟླ་བསྒྲིལ་གྱི་སྐོར་དང་དཔེ་དེབ་པར་བསྐྲུན་དང་འགྲེམས་སྤེལ་བྱེད་ཕྱོགས། གཟའ་མཇུག་སློབ་གྲྭ་སོགས་ཀྱི་ཐོག་ལ་དོགས་འདྲི་དང་དགོངས་ཚུལ་ཕུལ་བར་ཤེས་རིག་བཀའ་བློན་གྱིས་ལན་འདེབས་གསལ་བཤད་གནང་སོང་།
དེ་བཞིན་ནང་སྲིད་ས་ཁང་བདག་གཉེར་ཁང་དང་མཚོ་པདྨའི་དབུ་རྩེ་རི་ཁྲོད་ཀྱི་ས་ཆའི་དཀའ་ངལ། རྗེས་འབྱོར་བའི་སྡོད་ཁང་གསར་རྒྱག་ལས་གཞི ལྷག་པར་དུ་༧གོང་ས་མཆོག་གིས་ཐུགས་ཀྱི་གཟིགས་པ་ཆེན་པོས་འདས་པའི་ལོ་འགའ་ཤས་ནང་བྷན་ད་ར་ནོར་རྒྱས་གླིང་གི་མཉམ་འབྲེལ་ཡར་རྒྱས་དང་འབྲས་པགས་པ་བཤུ་རྒྱུའི་དོན་དུ་འབུམ་༢༦༠ གནང་བ་དག་དོན་ཐོག་ཏུ་ཕྱིན་ཡོད་མེད་དང་། མཉམ་འབྲེལ་དྲུང་ཆེ་བྲོས་ཡོད་མེད་ཀྱི་དོགས་འདྲི་གནང་བར་ནང་སྲིད་བཀའ་བློན་གྱིས་ཟླ་༣ ཚེས་༡༨ ཙམ་ལ་གནས་ཚུལ་དེ་ཤེས་རྟོགས་བྱུང་ཡོད་པ་དང་། ནང་མིའི་ངོས་ནས་མི་བརླག་པའི་སྙན་ཞུ་ཞིག་ས་གནས་སྐོར་སྲུང་བ་(ཉེན་རྟོག་པ་) ལ་ཕུལ་ཟིན་ཡང་ད་ལྟའི་ཆར་མཉམ་འབྲེལ་དྲུང་ཆེ་བཙལ་ཡང་རྙེད་ཀྱི་མེད་པ་དང་མི་ལྔ་ཅན་གྱི་ཚོགས་ཆུང་ཞིག་གིས་གནས་ཚུལ་དེའི་ཐོག་རྟོག་ཞིབ་བྱེད་རྒྱུ་ཡིན་པའི་ལན་འདེབས་གསལ་བཤད་གནང་སོང་།
གསར་འགོད་པ། བློ་བཟང་རྒྱ་མཚོ།
