༸གོང་ས་མཆོག་གིས་དགེ་བཤེས་རྣམ་པར་བཀའ་སློབ་ལམ་སྟོན་གནང་།

ཟླ་འདིའི་ཚེས་༤ ཉིན་༧གོང་ས་མཆོག་གིས་དྷ་ས་༸རྒྱལ་བའི་ཕོ་བྲང་དུ་སྟོད་རྒྱུད་གྲྭ་ཚང་དུ་ཆོས་ཐོག་འགྲིམ་པར་ཕེབས་པའི་དགེ་བཤེས་རྣམ་པར་གཟིམ་ཆུང་མཇལ་ཁ་གནང་བ་དང་། དབང་རྣོན་ཆོས་ཀྱི་རྗེས་འབྲང་གི་འགྲོ་སྟངས་དེ་བྱས་པ་ཡིན་ན་སངས་རྒྱས་ཀྱི་བསྟན་པ་བརྒྱ་ཕྲག་གཉིས་གསུམ་བར་བསྡད་ཐུབ་རྒྱུ་ཡིན་སྐོར་གྱི་བཀའ་སློབ་གནང་ཡོད་པ་རེད།

༧གོང་ས་མཆོག་གིས། “ཁྱེད་ཚོས་གྲྭ་ས་འགྲིམས། གཞུང་ཆེན་བཀའ་པོད་ལྔ་སྦྱངས། དེ་ནས་རྒྱུད་པ་གྲྭ་ཚང་དུ་ཞུགས། གསང་བ་འདུས་པ་གཙོ་བོར་གྱུར་བའི་གསང་སྔགས་ཆོས་དེ་དག་སྦྱངས་ནས་རང་གིས་ཉམས་ལེན་ཇི་ཙམ་ཐུབ་མིན་ལ་མ་ལྟོས་པར་སློབ་སྦྱོང་དེ་མདོ་སྔགས་ཟུང་འབྲེལ་གྱི་གཞུང་དེ་དག་ཆ་ཚང་རྒྱུས་ཡོད་ཆགས་ཡོད། རང་གིས་ཇི་ཙམ་ཤེས་པ་དེ་ཐོས་དོན་སྒྲུབ་ལ་གཞོལ་ནས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་པ་སྨྲ་བྱེད་དང་། །སྒྲུབ་པར་བྱེད་པ་ཁོ་ན་ཡིན། །ཞེས་གསུངས་པ་ལྟར་སློབ་སྦྱོང་གང་བྱས་པ་དེ་དག་རྒྱུད་ཐོག་ལ་བཀལ་ནས་ལག་ལེན་བྱ་རྒྱུ་ཧ་ཅང་གལ་ཆེན་པོ་རེད། ཇི་ཙམ་གྱིས་སོ་སོས་ཐོས་དོན་སྒྲུབ་ལ་གཞོལ་ནས་གང་བསླབས་པ་དེ་དག་མྱོང་བ་ལ་སྦྱར་ནས་ཡོད་པ་ཞིག་བྱུང་ན་གཞན་ལ་འཆད་སྐབས་དེའི་ཚོད་ཀྱིས་ཕན་ཐོག་ཀྱང་ཆེ་བ་ཡོད། ཚིག་སྐམ་པོ་རྐྱང་རྐྱང་སྐོར་བ་བརྒྱབ་ན་དེ་ཙམ་ཕན་རྒྱུ་མེད། སྔ་མོ་ངོས་ཀྱིས་ཝཱ་རཱ་ཎ་སིར་དམ་བཅའ་ཚུགས་སྐབས་ལུང་རྩ་བ་ནས་བགྲང་པར་རིགས་ལམ་རྐྱང་རྐྱང་ཐོག་ནས་རྩོད་པ་བྱ་རྒྱུ་ཡིན་ཞེས་ཞུ་མྱོང་།  སྐབས་དེར་རྒན་པདྨ་རྒྱལ་མཚན་དང་། ཕལ་ཆེར་རྒན་ཉི་མ་ཡང་ཡོད།  རིང་མིན་རྒྱ་གར་ལྷོ་ཕྱོགས་སུ་འབྱོར་སྐབས་ལུང་འདྲེན་རྩ་བ་ནས་མེད་པར་བྱས་ནས་རིག་པ་ཁོ་ནས་བསྒྲུབ་རྒྱུ་ཞིག་བྱ་རྒྱུ་ཡིན་ཞེས་བརྗོད་དགོས་དྲན་བྱུང་། མཛོད་འདུ་གཉིས་དམིགས་བསལ་རེད། དབུ་མ་དང་། ཕར་ཕྱིན། རྣམ་འགྲེལ་གསུམ་པོ་དེ་རིག་པ་རང་གིས་བསྒྲུབ་རྒྱུ་ཡིན། དེ་མིན་ལུང་དྲངས་ནས། ཞེས་གསུངས་པའི་ཕྱིར། ཞེས་བརྗོད་སྐབས་བཙན་དབང་གི་གཡའ་ཏོག་ཙམ་ཡོད།  ༼བཞད་མོ་བཞད།༽ ལན་རྒྱག་མཁན་དེས་ཀྱང་ཞྭ་མོ་དེ་མར་ཕུད་ནས་དེ་ཙམ་འགུལ་རྒྱུ་མེད་པ་ལྟ་བུ་ཆགས་པ་རེད། དེ་འདྲ་མི་དགོས་པ་བྱོས། རིགས་པ་ཁོ་ནས་བསྒྲུབ་རྒྱུ་ཞིག་དགོས། ཐེངས་འདིར་རྒྱ་གར་ལྷོ་ཕྱོགས་སུ་དེ་འདྲ་བརྗོད་དགོས་བསམ་པ་དྲན་བཞིན་ཡོད།  སངས་རྒྱས་པའི་ཆོས་འདི་རིག་པ་དང་ལྡན་པ་ཞིག་ཡིན་པ་ཧ་ཅང་གསལ་པོ་རེད་”ཅེས་བཀའ་སློབ་གནང་།

༧གོང་ས་མཆོག་གིས་དབང་རྣོན་ཆོས་ཀྱི་རྗེས་འབྲང་དགོས་སྐོར་ལ་བཀའ་སློབ་གནང་དོན། “ལྷག་པར་དུའང་དཔལ་ནཱ་ལེནྡྲའི་ཆོས་བརྒྱུད་དེ་རིགས་པ་དང་ལྡན་པ་ཞིག་རེད། དེར་བརྟེན་ཚན་རིག་དང་ལྷན་དུ་དཔུང་པ་མཉམ་གཤིབས་བྱས་ནས་འགྲོ་ཐུབ་པ་རེད། ཆོས་ལུགས་གཞན་དག་གིས་འགྲོ་ཐུབ་རྒྱུ་རྩ་བ་ནས་མེད། དེར་བརྟེན་འགྲེལ་བ་དོན་གསལ་ནང་དུ་མཆོད་བརྗོད་ཉན་ཐོས་ཞི་འཚོ་འགྲེལ་བཤད་བྱེད་སྐབས་དབང་རྟུལ་དད་པའི་རྗེས་འབྲང་དང་དབང་རྣོན་ཆོས་ཀྱི་རྗེས་འབྲང་གསུངས་ཡོད། དབང་རྣོན་ཆོས་ཀྱི་རྗེས་འབྲང་གི་འགྲོ་སྟངས་དེ་བྱས་ནས་ཡུམ་ཟེར་བ་དེ་གཞི་ལམ་རྣམ་གསུམ་བདེན་མེད་དུ་བསྒྲུབས་ནས་བདེན་མེད་ཀྱི་གོ་བ་ཆགས་ཡོང་སྐབས་ཡུམ་ཤེར་ཕྱིན་ལ་གཞི་ནས་དད་པ་སླེབ་རྒྱུ་རེད། དབང་རྣོན་ཆོས་ཀྱི་རྗེས་འབྲང་གི་འགྲོ་སྟངས་དེ་བྱས་པ་ཡིན་ན་སངས་རྒྱས་ཀྱི་བསྟན་པ་བརྒྱ་ཕྲག་གཉིས་གསུམ་བར་བསྡད་ཐུབ་རྒྱུ་རེད་བསམ་པ་དྲན་གྱི་འདུག  གང་ཡིན་བརྗོད་ན་ཚན་རིག་དང་མཉམ་དུ་འགྲོ་ཐུབ་པ་རེད། དབང་རྟུལ་དད་པའི་རྗེས་འབྲང་ཐོག་ནས་སྐྱབས་སུ་མཆི་ཟེར་ནས་ཕྱིན་པ་ཡིན་ན་ང་ཚོ་མི་རབས་གཅིག་ཙམ་ཕྱིན་པའི་རྗེས་ལ་གནས་ཐུབ་རྒྱུ་ཁག་པོ་རེད། དེར་བརྟེན་གཞུང་ཆེན་སྦྱང་རྒྱུ་དེ་ཧ་ཅང་གལ་ཆེན་པོ་རེད་འདུག་”ཅེས་བཀའ་སློབ་གནང་།

༧གོང་ས་མཆོག་གིས་ནང་ཆོས་དབྱེ་བ་གསུམ་ལ་བཀལ་དགོས་སྐོར་བཀའ་སློབ་གནང་དོན། “བཀའ་འགྱུར་བསྟན་འགྱུར་པོ་ཏི་གསུམ་བརྒྱ་ལྷག་ཙམ་ཡོད་པ་དེ་དག་བརྗོད་བྱ་དབྱེ་བ་ཕྱེ་བ་ཡིན་ན་སེམས་ཁམས་རིག་པ་གཙོ་བོར་གྱུར་བའི་ཚན་རིག་གི་སྡེ་ཚན་གཅིག ལྟ་གྲུབ་སྐོར་སྡེ་ཚན་གཅིག   ཆོས་ཀྱི་སྡེ་ཚན་གཅིག  ཆོས་ཀྱི་སྡེ་ཚན་དེ་ནང་པ་ལ་མ་གཏོགས་འབྲེལ་བ་མེད། སེམས་ཁམས་རིག་པ་གཙོ་བོར་གྱུར་བའི་ཚན་རིག་གི་སྡེ་ཚན་དང་།  རྟེན་འབྱུང་གི་དེ་ཁོ་ན་ཉིད་ཟེར་བའི་ལྟ་གྲུབ་ཀྱི་སྡེ་ཚན་དེར་ཚན་རིག་པ་ཚོས་ཧ་ཅང་དགའ་མོས་བྱེད་ཀྱི་འདུག དེང་དུས་ཤེས་ཡོན་ལམ་ལུགས་ནང་ངོས་ཀྱི་དབྱེ་བ་དེ་ལྟར་ཕྱེ་བཞིན་ཡོད།  གཞུང་དེ་ནང་པའི་གཞུང་ཡིན་ཡང་བརྗོད་བྱ་དེ་ང་ཚོས་ཤེས་ཡོན་སྡེ་ཚན་ནང་བཞག་ནས་བསླབ་ཐུབ་རྒྱུ་ཞིག་དགོས། ཤེས་ཡོན་སྡེ་ཚན་ནང་བཞག་ནས་སློབ་ཁྲིད་བྱས་པ་ཡིན་ན་ཆོས་དད་མེད་མཁན་ཚོར་ཡང་སློབ་ཁྲིད་བྱེད་དགོས་རྒྱུ་དང་ཤེས་དགོས་རྒྱུ་རེད། དཔེར་ན་གུང་ཁྲན་ཏང་མི་ཆོས་ལ་ངོ་རྒོལ་བྱེད་མཁན་ཚོར་ཡང་སེམས་ཁམས་རིག་པ་དང་དེ་ཚོའི་གྲས་བཤད་པ་ཡིན་ན་ཁོ་པ་ཚོས་དེར་དགག་པ་རྒྱག་ཐུབ་རྒྱུ་གང་ཡང་མེད་ཅེས་དང་། འཛམ་གླིང་འདིའི་སྟེང་ཆོས་དད་མེད་མཁན་མི་དུང་ཕྱུར་བཅུ་ཙམ་ཡོད་པ་བརྗོད་ཀྱི་འདུག  རྒྱ་ནག་ལ་མཚོན་ནའང་ཁ་ཞེ་གཉིས་གུང་ཁྲན་ཡིན་པ་དེ་ཚོའི་གྲས་ལ་ཆོས་དད་མེད།  དེང་སྐབས་ཁ་ནས་གུང་ཁྲན་ཏང་ཡོན་ཡིན་ནའང་སེམས་ནང་ཆོས་དད་ཡོད་མཁན་དེ་འདྲ་ཡོང་བཞིན་འདུག  གུང་ཁྲན་ཏང་ཡོན་ཆོས་ལ་དད་པ་མེད་མཁན་ཞིག་ལའང་ང་ཚོའི་སེམས་ཁམས་རིག་པ་དང་བྱམས་བརྩེའི་བསླབ་བྱས་ཕན་ཐོགས་ངེས་ཡིན་”ཞེས་བཀའ་སློབ་གནང་།

༧གོང་ས་མཆོག་གིས་བོད་དང་འབྲེལ་ནས་བཀའ་སློབ་གནང་དོན། “བོད་དུ་འགྲོ་རྒྱུའི་གོ་སྐབས་བྱུང་བ་ཡིན་ན་དེ་བས་ཀྱང་བོད་ནང་གི་རྒྱ་ཆེ་མི་མང་ཚོ་ཆོས་ལ་དད་པ་ཡོད། དད་པ་བྱེད་སའི་ཆོས་དེ་གང་འདྲ་ཡིན་པ་འགྲེལ་བཤད་ཡག་པོ་བརྒྱབ་ན་ཕན་ཐོགས་ཧ་ཅང་ཡོད།  ནམ་རྒྱུན་ཡོངས་གྲགས་ལམ་རིམ་ནང་དང་པོ་བཤེས་གཉེན་བསྟེན་ཚུལ།  དེ་ནས་དལ་འབྱོར་དོན་ཆེ་རྙེད་དཀའ། ཕྱི་མ་མི་རྟག་པ་ཞེས་སོགས་བང་བསྒྲིགས་ནས་གསུང་བཞིན་ཡོད་”ཅེས་བཀའ་སློབ་གནང་།།
གསར་འགོད་པ་ཆོས་ཉིད་འོད་ཟེར།