ཀིརྟི་དགོན་པའི་གྲྭ་པ་ཞིག་རྒྱ་གཞུང་གིས་བཙན་ཁྲིད།
ཟླ་འདིའི་ཚེས་༢༧ ཉིན་དྷ་ས་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ཀ་ཉག་ཚེ་རིང་གཉིས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། ཕྱི་ཚེས་༢༦ ཉིན་གྱི་བོད་ནང་གི་དགོང་མོ་རྔ་བ་ཀིརྟི་དགོན་པའི་གྲྭ་བློ་བཟང་ལུང་རིགས་རྒྱ་གཞུང་གི་བཙན་ཁྲིད་བྱས་ཡོད་འདུག
ཁོང་རྒྱ་ནག་གཞུང་གི་ཉེན་རྟོག་པས་དགོན་པའི་ནང་ནས་འཛིན་བཟུང་གིས་བཙན་ཁྲིད་བྱས་ཡོད་ཀྱང་ས་གནས་གང་དུ་བཀག་ཉར་བྱས་ཡོད་མེད་དང་། རྒྱུ་མཚན་ཅི་ཞིག་ཡིན་སོགས་ཞིབ་ཕྲ་ཤེས་རྟོགས་ཐུབ་ཀྱི་མེད་པ་རེད།
ཁོང་རང་ལོ་༢༠ ཡས་མས་ཡིན་པ་དང་། རྔ་བ་རྫོང་། རྨེའུ་རུ་མ་ཡུལ་ཚོའི་རུ་ཆེན་ལྔ་པའི་ཕ་རས་རས་དང་མ་ལྷ་མོ་སྒྲོན་གཉིས་ཀྱི་བུ་ཡིན་ཞིང་། ཆུང་ཆུང་སྐབས་ནས་རྔ་བ་ཀིརྟི་དགོན་པར་གྲྭ་པ་བྱས་ཏེ་དེང་སྐབས་བློ་རིག་འཛིན་གྲྭ་ཡིན་འདུག །
གསར་འགོད་པ་ཆོས་ཉིད་འོད་ཟེར།
