ཉི་ཧོང་གི་འཕྲུལ་ལས་གཙུག་ལག་སློབ་གཉེར་ཁང་ནས་བོད་མིར་སློབ་ཡོན་གནང་འཆར།
ཟླ་འདིའི་ཚེས་༡༡ ཉིན་སྲིད་སྐྱོང་བློ་བཟང་སེང་གེས་ཉི་ཧོང་འཕྲུལ་རིག་བསྟི་གནས་ཁང་གྲགས་ཅན་(Chiba Institute of Technology) ནང་དུ་དགེ་སློབ་ལས་བྱེད་རྣམས་ལ་ད་ལྟའི་བོད་ནང་གི་ཛ་དྲག་གནས་སྟངས་སྐོར་གསུང་བཤད་གནང་ཡོད་པ་རེད།
སྐབས་དེར་སྲིད་སྐྱོང་བློ་བཟང་སེང་གེས་རྒྱ་ནག་གིས་བོད་ལ་བཙན་འཛུལ་བྱས་པའི་བརྒྱུད་རིམ་དང་། ༸གོང་ས་མཆོག་གི་ཐུགས་རྗེའི་བཀའ་དྲིན་འོག བཙན་བྱོལ་བོད་མིའི་ནང་མང་གཙོའི་སྒྲིག་འཛུགས་བཙུགས་པ་དང་ད་ལྟའི་གནས་སྟངས་སྐོར། བོད་དེ་ལོ་རྒྱུས་ཐོག་ནས་རང་བཙན་ཡི་སྐོར་དང་འབྲེལ་ནས་“ཕྱི་ལོ་ ༨༢༡ ལོར་བོད་དང་རྒྱ་ནག་དབར་ཞི་བའི་ཆིངས་ཡིག་བཞག་པའི་རྡོ་རིང་དེང་སྐབས་སུའང་མཐོང་རྒྱུ་ཡོད་པ་མ་ཟད། ལོ་རྒྱུས་ཀྱི་དཔང་རྟགས་དེ་དག་ལ་གཞི་བཅོལ་ནས་རྒྱ་རིགས་བྱུང་རབས་ལོ་རྒྱུས་སྨྲ་བ་འགའ་རས་རྒྱ་ནག་དམར་ཤོག་ཚོགས་པས་བོད་ཐོག་ལོ་རྒྱུས་ཀྱི་འཁྱོག་བཤད་བྱས་དང་བྱེད་བཞིན་པ་དེ་དག་ནོར་བ་ཡིན་པར་སྐྱོན་བརྗོད་བྱེད་མཁན་ཡང་བྱུང་ཡོད་”ཅེས་གསུངས་ཡོད་པ་རེད།
སྲིད་སྐྱོང་མཆོག་གིས། “རྒྱ་ནག་གཞུང་གིས་བོད་སར་དབང་བསྒྱུར་བྱས་པ་དེ་ཞི་བའི་བཅིངས་བཀྲོལ་བཏང་བ་ཞིག་རྩ་བ་ཉིད་ནས་མིན་པར་དམག་མིས་དྲག་ཤུགས་ཐོག་བཙན་འཛུལ་བྱས་པ་ཞིག་ཡིན། སྤྱིར་རྒྱ་ནག་གུང་ཁྲན་ཏང་གིས་བོད་ནང་ཡར་རྒྱས་གཏོང་རྒྱུའི་ཁས་ལེན་བྱས་ཡོད་ཀྱང་རྒྱ་ནག་བཅིངས་བཀྲོལ་དམག་མིས་བོད་མི་སྟོང་ཕྲག་མང་པོ་དམར་བསད་བཏང་བ་སོགས་ལ་བརྟེན། ཕྱི་ལོ་ ༡༩༦༣ ལོར་ཀུན་གཟིགས་པཎ་ཆེན་སྐུ་ཕྲེང་བཅུ་པ་མཆོག་གིས་ཡིག་འབྲུ་ཁྲི་བདུན་གྱི་ཞུ་སྙན་ཞིག་ཏང་གི་གཙོ་འཛིན་མའོ་ཙེ་ཏུང་ལ་ཕུལ་བ་བརྒྱུད་བོད་ནང་དུ་རྒྱ་ནག་གཞུང་གིས་ལག་བསྟར་བྱེད་བཞིན་པའི་སྲིད་བྱུས་དེ་དག་ལ་སྐྱོན་བརྗོད་ཤུགས་ཆེ་གནང་བ་རེད་”ཅེས་གསུངས་པ་དང་སྦྲགས་སྲིད་སྐྱོང་གིས་དེང་སྐབས་བོད་ཀྱི་འཁྱགས་རོམ་དེ་དག་གོ་ལའི་ཚ་དྲོད་འཕེལ་བཞིན་པའི་ཤུགས་རྐྱེན་འོག་ཞུ་ཚད་མྱུར་དུ་འགྲོ་བཞིན་ཡོད་སྟབས། འབྱུང་འགྱུར་འཐུང་ཆུའི་ཐོག་དམག་འཐབ་ཤོར་ཉེན་ཡོད་པའི་གནས་སྟངས་ཐོག་སེམས་འཚབ་ཡོད་སྐོར་གསུངས།
དེ་བཞིན་སྲིད་སྐྱོང་གིས། “བོད་ནང་དུ་རྒྱལ་གཅེས་པ་གྲངས་༡༤༢ གྱིས་༸གོང་ས་མཆོག་བོད་ལ་གདན་འདྲེན་ཞུ་དགོས་པ་དང་། བོད་ལ་རང་དབང་དགོས་པའི་འབོད་སྒྲ་བསྒྲགས་བཞིན་དུ་རང་ལུས་མེར་སྲེག་བཏང་ཡོད་པར་བརྟེན། རྒྱལ་གཅེས་པ་ཁོང་རྣམས་ལ་གུས་འདུད་ཞུས་པ་དང་སྦྲགས། བོད་མིའི་སྒྲིག་འཛུགས་ཀྱིས་བོད་མི་རྣམས་ལ་རང་ལུས་མེར་སྲེག་གིས་གཙོས་ཚབས་ཆེའི་ལས་འགུལ་རིགས་མ་སྤེལ་རོགས་ཞེས་ཡང་ཡང་འབོད་སྐུལ་ཞུ་བཞིན་ཡོད་ནའང་ཕྱི་ལོ་ ༢༠༠༩ ནས་ད་བར་བོད་མི་ ༡༤༢ རང་ལུས་མེར་སྲེག་བཏང་ནས་རྒྱ་ནག་གཞུང་གིས་སྲིད་བྱུས་ལ་ཞི་རྒོལ་གནང་ཡོད་སྟབས། དེང་སྐབས་སུའང་བོད་ནང་དུ་གནས་སྟངས་ཛ་དྲག་ཡོད་པ་དང་། གཞིས་ལུས་བོད་མི་ཚོས་༸གོང་ས་མཆོག་ལ་དད་གུས་ཧ་ཅང་ཞུ་བཞིན་ཡོད་པ་གསལ་པོར་མཚོན་ཐུབ་ཅེས་གསུངས།
གཞན་ཡང་སྲིད་སྐྱོང་གིས་“དེང་སྐབས་རྒྱ་ནག་གཞུང་གིས་ཕྱོགས་གཅིག་ནས་༸གོང་ས་ཏཱ་ལའི་བླ་མ་མཆོག་བདུད་རེད། ལུག་ལྤགས་གྱོན་པའི་སྤྱང་ཀི་རེད་ཅེས་གཞི་མེད་ཀྱི་སྒྲོ་བཀུར་སྣ་ཚོགས་ཞུ་བཞིན་ཡོད་ཀྱང་། ༸སྐུའི་ཡང་སྲིད་ཐོག་རྒྱ་ནག་གཞུང་ལ་བདག་དབང་ཡོད་ཚུལ་ངོ་ཚ་སྤངས་ཏེ་འཁྱོག་བཤད་སྣ་ཚོགས་བྱས་དང་བྱེད་མུས་ཡིན་པ་དེ་ནི་ཧ་ཅང་ཡ་མཚན་ཞིག་ཡིན་སྐོར་གསུངས། དེ་རྗེས་སྲིད་སྐྱོང་ཚོགས་བཅར་བ་རྣམས་ཀྱི་དྲི་བར་ལན་འདེབས་གནང་ཡོད་པ་རེད།
སྤྱིར་ཆི་བཱ་འཕྲུལ་ལས་གཙུག་ལག་སློབ་གཉེར་ཁང་དེས་རྒྱ་གར་ནང་ཡོད་པའི་བོད་པའི་སློབ་ཕྲུག་གྲངས་ལྔ་ལ་སློབ་ཡོན་གནང་རྒྱུའི་ཞལ་བཞེས་གནང་ཡོད་པ་དང་། སློབ་ཡོན་གྱི་གསལ་བསྒྲགས་དངོས་གཞི་རིང་མིན་གནང་རྒྱུ་ཡིན་པ་རེད།།
གསར་འགོད་པ་ཆོས་ཉིད་འོད་ཟེར།