ཊོམ་གྱིས་ཡུག་རེན་དང་ཨུ་རུ་སུའི་སྲིད་འཛིན་གཉིས་ལ་བཀའ་མོལ་གནང་འདུག
ཟླ་འདིའི་ཚེས་༡༡ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། སྤྱི་མཐུན་ཚོགས་པའི་སྲིད་འཛིན་འོས་མི་ཊོམ་ལ་སྲིད་འཛིན་གྱི་རྒྱལ་ཁ་ཐོབ་ནས་ཉིན་གཅིག་གི་རྗེས། ཊོམ་གྱིས་ཡུག་རེན་གྱི་སྲིད་འཛིན་དང་བཀའ་མོལ་གནང་ནས་ཡུག་རེན་ལ་རྒྱབ་སྐྱོར་བྱེད་རྒྱུ་ཡིན་ཞེས་བརྗོད། སྲིད་འཛིན་གྱི་རྒྱལ་ཁ་ཐོབ་ནས་ཉིན་གཉིས་ཀྱི་རྗེས། ཊོམ་གྱིས་ཨུ་རུ་སུའི་སྲིད་འཛིན་དང་བཀའ་མོལ་གནང་ནས་དམག་འཁྲུག་ཇེ་ཆེར་གཏོང་མི་རུང་བ་དང་། ཡུ་རོབ་ཏུ་ཨ་རིའི་དམག་དཔུང་གང་འཚམ་ཡོད་པའི་དྲན་སྐུལ་ཡང་བྱས་ཡོད་འདུག
སྤྱི་མཐུན་ཚོགས་པའི་སྲིད་འཛིན་འོས་མི་ཊོམ་ལ་སྲིད་འཛིན་གྱི་རྒྱལ་ཁ་ཐོབ་ནས་ཉིན་གཉིས་ཀྱི་རྗེས། ཟླ་འདིའི་ཚེས་༧ ཉིན་ཊོམ་དང་ཨུ་རུ་སུའི་སྲིད་འཛིན་གཉིས་ཁ་པར་བརྒྱུད་ནས་བཀའ་མོལ་གནང་བའི་སྐབས། ཊོམ་གྱིས་ཡུག་རེན་ནང་གི་དམག་འཁྲུག་ཇེ་སྡུག་ཏུ་གཏོང་མི་རུང་བའི་བཀའ་མོལ་གནང་བ་མ་ཟད། ཡུ་རོབ་ནང་ཨ་རིའི་དམག་དཔུང་གང་འཚམ་ཡོད་པ་དྲན་སྐུལ་ཡང་བྱས་ཡོད་འདུག ཊོམ་ལ་སྲིད་འཛིན་གྱི་རྒྱལ་ཁ་ཐོབ་ནས་ཨུ་རུ་སུའི་སྲིད་འཛིན་དང་བཀའ་མོལ་གནང་བ་ཐོག་མ་དེ་ཆགས་ཡོད་འདུག
དེ་བཞིན་ཨ་རིའི་གནད་ཡོད་མི་སྣ་ཞིག་གིས་བདུན་ཕྲག་སྔོན་མའི་རེས་གཟའ་ཕུར་བུའི་ཉིན་ཨུ་རུ་སུའི་སྲིད་འཛིན་གྱིས་ཊོམ་ལ་སྲིད་འཛིན་གྱི་རྒྱལ་ཁ་ཐོབ་པར་འཚམས་འདྲི་ཞུས་ཡོད་པ་དང་། འཚམས་འདྲིའི་ནང་ཁོང་གིས་ཊོམ་དང་ལྷན་དུ་གོ་བསྡུར་བྱ་རྒྱུའི་གྲ་སྒྲིག་ཡོད་པ་དང་། ཨུ་རུ་སུ་དང་ཨ་རི་བར་གྱི་འབྲེལ་ལམ་བསྐྱར་གསོ་དང་ཡུག་རེན་གྱི་དམག་འཁྲུག་མཚམས་འཇོག་ཆེད་ལས་དོན་བསྒྲུབ་རྒྱུ་གལ་ཆེན་ཡིན་པ་ནན་བརྗོད་བྱས་ཡོད་པ་བརྗོད་འདུག
གཞན་ཡང་། བདུན་ཕྲག་སྔོན་མར་ཨུ་རུ་སུའི་གྲོང་ཁྱེར་སོ་ཆི་(Sochi) རུ་མང་ཚོགས་ཀྱི་མཛད་སྒོ་ཞིག་གི་སྐབས། སྲིད་འཛིན་པུ་ཊིན་གྱིས་ཊོམ་དང་ཁ་པར་བརྒྱུད་བཀའ་མོལ་གནང་རྒྱུ་དེ་ནོར་འཁྲུལ་ཞིག་ལ་བསམ་མི་རུང་བ་དང་། གལ་སྲིད་འཛམ་གླིང་གི་དབུ་ཁྲིད་ཁག་གིས་འབྲེལ་ལམ་བསྐྱར་གསོ་བྱེད་ཐབས་བྱས་ན། ཁོང་(པུ་ཊིན)ལ་དགག་བྱ་མེད་ཅེས་དང་། ཕྱི་ཟླ་༦ པའི་ནང་ཊོམ་ལ་ལྐོག་གསོད་ཀྱི་ཉེན་ཁ་འབྱུང་པའི་སྐབས། ཊོམ་གྱི་སྟངས་འཛིན་བྱེད་སྟངས་དེས་ཁོང་ཉིད་སེམས་འགུལ་ཐེབས་ཡོད་པ་དང་། ཊོམ་ནི་ཕོ་རྒོད་པོ་ཞིག་ཡིན་པ་བརྗོད་འདུག
ཊོམ་གྱིས་ཨུ་རུ་སུའི་སྲིད་འཛིན་དང་བཀའ་མོལ་མ་གནང་བའི་སྔ་ཉིན། བདུན་ཕྲག་སྔོན་མའི་རེས་གཟའ་ལྷག་པའི་ཉིན་ཡུག་རེན་གྱི་སྲིད་འཛིན་དང་ལྷན་སྐར་མ་༢༥ རིང་བཀའ་མོལ་གནང་། སྐབས་དེར་ཊོམ་གྱིས་ཡུག་རེན་ལ་རྒྱབ་སྐྱོབ་བྱེད་རྒྱུ་ཡིན་ཞེས་བརྗོད་ཀྱང་། ཞིབ་ཕྲའི་གནས་ཚུལ་གང་ཡང་བརྗོད་མེད། ཡུག་རེན་གྱི་སྲིད་འཛིན་གྱིས་བཀའ་མོལ་ལེགས་པོ་བྱུང་བ་དང་། ཊོམ་ལ་སྲིད་འཛིན་གྱི་རྒྱལ་ཁ་ཐོབ་པ་དེས་ཁོང་གི་སེམས་འཚབ་ཇེ་ཆེར་བཏང་མ་སོང་ཞེས་བརྗོད་འདུག རྒྱལ་ཁབ་གཉིས་ཀྱི་སྲིད་འཛིན་བར་བཀའ་མོལ་གནང་སྐབས། ཨ་རིའི་ཕྱུག་བདག་དང་ཊོམ་གྱི་རྒྱབ་སྐྱོར་བ་ཨེ་ལོན་མ་སི་ཁེས་(Elon Musk) ཀྱང་ཡུག་རེན་གྱི་སྲིད་འཛིན་དང་བཀའ་མོལ་གནང་ནས། ཁོང་གི་སྐུད་མེད་དྲྭ་རྒྱ་(Starlink Satellites) ཞེས་པ་བརྒྱུད་ནས་ཡུག་རེན་ལ་རྒྱབ་སྐྱོར་མུ་མཐུད་བྱེད་རྒྱུ་ཡིན་ཞེས་བརྗོད་འདུག ཨུ་རུ་སུས་ཡུག་རེན་ལ་གཏོར་རྒོལ་བྱས་ནས་ཡུག་རེན་གྱི་དམག་མི་ཚོར་དྲྭ་རྒྱའི་དཀའ་ངལ་ཤུགས་ཆེན་འཕྲད་པའི་སྐབས། ཁོང་གིས་ཡུག་རེན་ལ་དྲྭ་རྒྱུའི་རོགས་རམ་བྱས་ཡོད་འདུག
འོས་བསྡུའི་དྲིལ་བསྒྲགས་སྐབས། ཊོམ་གྱིས་གལ་སྲིད་ཁོང་ཉིད་སྲིད་འཛིན་གྱི་རྒྱལ་ཁ་ཐོབ་ཚེ། ཆུ་ཚོད་༢༤ ནང་དམག་འཁྲུག་མཇུག་སྒྲིལ་རྒྱུའི་བཀའ་མོལ་གནང་ཡོད་ཀྱང་། ཇི་ལྟར་མཇུག་སྒྲིལ་རྒྱུའི་སྐད་ཆ་གང་ཡང་བཤད་མེད་པ་རེད་འདུག
ཨ་རིའི་དཔོན་རིགས་ཟུར་པ་ཞིག་གིས་ཝ་ཤིན་ཌོན་ཉིན་རེའི་ཚགས་པར་ཁང་ལ་བརྗོད་གསལ་ལྟར་ན། ཡུག་རེན་གྱི་དམག་འཁྲུག་ཛ་དྲག་ཆེ་རུ་འགྲོ་བཞིན་པའི་སྐབས་སུ་ཊོམ་གྱིས་རང་ཉིད་ཀྱི་སྲིད་འཛིན་གྱི་ལས་ཡུན་གཉིས་པ་འགོ་འཛུགས་འདོད་བྱེད་ཀྱི་མེད་པར་བརྟེན། ཁོང་གིས་དམག་འཁྲུག་ཇེ་ཆེ་རུ་མི་འགྲོ་བའི་རེ་བ་བྱེད་ཀྱི་ཡོད་འདུག
བྷི་བྷི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། ཊོམ་གྱི་སློབ་སྟོན་པ་ཟུར་པ་ཞིག་གིས་འཛིན་སྐྱོང་གསར་པས་ཨུ་རུ་སུས་བཙན་བཟུང་བྱས་པའི་ས་ཁུལ་རྣམས་ཡུག་རེན་ལ་ཕྱིར་སློག་ཡོང་བར་རྒྱབ་སྐྱོར་བྱེད་རྒྱུའི་ཚབ་ཏུ་ཡུག་རེན་ནང་ཞི་བདེ་སྐྲུན་ཐབས་ཁོ་ནར་དམིགས་ཡུལ་འཛིན་བཞིན་ཡོད་འདུག
རོའུ་ཊར་གསར་ཁང་གིས་གནས་ཚུལ་སྤེལ་གསལ་ལྟར་ན། སྲིད་འཛིན་བྷ་ཌན་གྱི་དུས་སུ་གྲོས་ཚོགས་ཀྱིས་ཡུག་རེན་ལ་ཨ་སྒོར་ཐེར་འབུམ་༡༧༤ ལྷག་གི་རོགས་དངུལ་བཀའ་འཁྲོལ་གནང་ཡོད་ན་ཡང་། ད་ལྟའི་ཆར་གྲོས་ཚོགས་གོང་མའི་ནང་སྤྱི་མཐུན་ཚོགས་པར་རྒྱལ་ཁ་ཐོབ་ཡོད་པར་བརྟེན། ཊོམ་གྱི་སྐབས་ཡུག་རེན་ལ་རོགས་དངུལ་སྤྲད་རྒྱུ་ཉུང་དུ་འགྲོ་སྲིད་པ་དང་། ཨ་རིའི་གྲོས་ཚོགས་འོག་མའི་ནང་རྒྱལ་ཁ་ཐོབ་པར་ཆབ་སྲིད་ཚོགས་པ་ཞིག་ལ་ཞབས་སྟེགས་༢༡༨ འཐོབ་དགོས་ཀྱི་ཡོད་པ་དང་། ད་ལྟའི་ཆར་སྤྱི་མཐུན་ཚོགས་པར་ཞབས་སྟེགས་༢༡༣ ཐོབ་ཟིན་པས། གལ་སྲིད་གྲོས་ཚོགས་གོང་འོག་གཉིས་ཀའི་ནང་སྤྱི་མཐུན་ཚོགས་པར་རྒྱལ་ཁ་ཐོབ་ཚེ། ཊོམ་གྱི་ལས་འཆར་རྣམས་གྲོས་ཚོགས་བརྒྱུད་ནས་འགྲོ་རྒྱུ་ལས་སླ་རུ་འགྲོ་ངེས་པ་ཡིན་འདུག།
གསར་འགོད་པ། བློ་བཟང་རྒྱ་མཚོ།
