ཕྱི་ལོ་༢༠༢༤ ་ལོའི་སྨོན་ལམ་མངོན་གྱུར་གྱི་མཛད་སྒོ་ཚོགས་སོང་།
ཟླ་འདིའི་ཚེས་༣ ་ཉིན་གྱི་ཕྱི་དྲོར་དྷ་ས་བོད་ཀྱི་ཟློས་གར་ཚོགས་ཁང་དུ་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་གོ་སྒྲིག་འོག་ཕྱི་ལོ་༢༠༢༤ ་ལོའི་སྨོན་ལམ་མངོན་གྱུར་གྱི་མཛད་སྒོ་ཚོགས་སོང་།
སྨོན་ལམ་མངོན་གྱུར་ཞེས་པ་ནི་བརྡ་འཕྲིན་འཕྲུལ་རིག་བརྒྱུད་ནས་བོད་དང་ཧི་མ་ལ་ཡའི་སྐད་ཡིག་རིག་གཞུང་སྲུང་སྐྱོབ་དང་། མི་ཉམས་གོང་འཕེལ་གཏོང་བའི་དམིགས་ཡུལ་དང་གྲུབ་འབྲས་དོན་སྨིན་གྱི་མུ་འབྲེལ་དུས་སྟོན་ཞིག་ལ་གོ་བཞིན་ཡོད་འདུག
ཐེངས་འདིའི་མཛད་སྒོའི་ཐོག་སྨོན་ལམ་མིས་བཟོས་རིག་ནུས་གསར་འཛུགས་གནང་མཁན་དགེ་བཤེས་བློ་བཟང་སྨོན་ལམ་གྱིས་སྐུ་མགྲོན་རྣམ་པར་དགའ་བསུའི་འཚམས་འདྲི་དང་མཛད་སྒོ་ངོ་སྤྲོད་ཀྱི་གསུང་བཤད་གནང་སྐབས། བོད་ལ་ཆོས་དང་རིག་གཞུང་ཡོད་པའི་ཐོག དེང་དུས་འཛམ་གླིང་གི་ཤེས་བྱ་ཡོངས་རྫོགས་བོད་ཡིག་ནང་བླུགས་ནས། རིག་ནུས་(AI) ་གྱི་མགྱོགས་ཚད་དང་མཉམ་པ་འགྲོ་ཐུབ་དགོས་རྒྱུ་གལ་ཆེན་ཡིན་པ་དང་། ད་ལྟའི་འགྲོ་བ་མིའི་ཤེས་ཡོན་གྱི་ལམ་ལུགས་ལ་མགྱོགས་ཚད་ཀྱི་ཆ་ནས་དཀའ་ངལ་འཕྲད་བཞིན་པར་བརྟེན། མ་འོངས་པ་ཤེས་ཡོན་གྱི་ལམ་ལུགས་འགྱུར་བ་གཏོང་དགོས་ཆགས་ཀྱི་ཡོད་པ། མ་འོངས་པའི་ཤེས་ཡོན་གྱི་ཁ་ཕྱོགས་དེ་དྲན་པ་གཙོ་བོ་མིན་པ་ཤེས་རབ་གཙོ་བོ་བྱེད་དགོས་པ་ཆགས་ཀྱི་ཡོད་པ། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་མ་འོངས་པ་འཁོན་འཛིན་ཅན་གྱི་ཤེས་ཡོན་པ་མ་ཡིན་པ། ཕུགས་འདུན་རང་བཞིན་ཅན་གྱི་གཞོན་སྐྱེས་སྐྱེད་སྲིང་བྱེད་རྒྱུའི་རེ་བ་དང་དམིགས་ཡུལ་ཡོད་པ་སོགས་ཀྱི་གསུང་བཤད་གནང་སོང་ལ། འབྲེལ་ཡོད་ལས་བྱེད་ཚོས་སྨོན་ལམ་ཡིག་སྒྱུར། སྨོན་ལམ་མཉམ་རུབ། སྨོན་ལམ་དྲ་རྒྱའི་ཟུར་སྣོན། སྨོན་ལམ་མཐེབ་གཞོང་། སྨོན་ལམ་མེ་ལོང་བཅས་ཀྱི་ཁྱད་ཆོས་དང་ཕན་ནུས་སོགས་ངོ་སྤྲོད་གནང་སོང་།
སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་འགྲེམས་སྤེལ་བྱས་པའི་སྨོན་ལམ་རིག་ནུས་ཞེས་པའི་ནང་། སྨོན་ལམ་མཐེབ་གཞོང་ལ་གསར་གཏོད་རང་བཞིན་ལྡན་པའི་མིང་གཞིའི་སྔོན་རྗེས་དང་ཚིག་གྲོགས་སྔོན་དཔག་གི་ཁྱད་ཆོས་ཡོད་པ་དང་བོད་ཡིག་གི་ཐ་སྙད་སོ་སོའི་བརྩེགས་འདོགས་རེ་རེ་ནས་གཏག་འཚོལ་གྱི་ངལ་བ་བསྟེན་མི་དགོས་པ། འཕྲིན་ཐུང་བསྐུར་བ་དང་གློག་འཕྲིན་འབྲི་བ། ཡང་ན་སྤྱི་ཚོགས་བརྒྱུད་ལམ་ཁག་ཏུ་བསམ་ཚུལ་བརྗེ་རེས་བྱེད་པ་བཅས་གང་ཡིན་རུང་། མགྱོགས་པོ་དང་ལས་སླ་པོ། སྟབས་བདེའི་རང་བཞིན་ཅན་ཞིག་ཆགས་ཡོད་འདུག སྨོན་ལམ་དྲ་རྒྱའི་ཟུར་སྣོན་ནི་དྲ་རྒྱའི་སྟེང་དུ་བོད་སྐད་བཤད་མཁན་རྣམས་ལ་ཕན་ཐོགས་ཆེན་པོ་འབྱུང་བའི་ལག་ཆ་གསར་པ་ཞིག་དང་། དེའི་དམིགས་ཡུལ་གཙོ་བོ་ནི་དྲ་ཚིགས་དང་ཆ་འཕྲིན་རྣམས་བོད་ཡིག་ཏུ་བསྒྱུར་ནས་བོད་མི་ཚོར་བདེ་བླག་ངང་ལྟ་ཀློག་བྱེད་ཐུབ་པ་བཟོ་རྒྱུ་དེ་ཡིན་འདུག དེ་བཞིན་སྨོན་ལམ་ཡིག་སྒྱུར་མཉེན་ཆས་ནི་ཁ་པར་དུ་ཅི་དགར་བེད་སྤྱོད་བྱེད་ཆོག་པ་མ་ཟད་གང་དུ་བཞུགས་ཀྱང་བོད་ཀྱི་སྐད་ཡིག་དང་དབྱིན་སྐད་ཕན་ཚུན་བདེ་བླག་ངང་ཡིག་སྒྱུར་བྱེད་ཐུབ་ཀྱི་ཡོད་འདུག
གཞན་ཡང་སྨོན་ལམ་མེ་ལོང་ཞེས་ཡིག་འབྲུ་ཐེར་འབུམ་བདུན་དང་ཕྱེད་ཀ་ལྷག་སྦྱོང་བརྡར་རྒྱུ་ཆར་བྱས་ཤིང་བོད་རང་གི་སྐད་ཡིག་གི་ཁྱད་ཆོས་ལྡན་པའི་སྨོན་ལམ་བརྡ་མཛོད་ཆེན་མོས་བོད་སྐད་ལམ་ནས་བགྲོ་གླེང་དོན་དང་ལྡན་པ་བྱེད་ཐུབ་པའི་གླེང་སྟེགས་ཤིག་བསྐྲུན་ཐུབ་ཡོད་འདུག བོད་ཡིག་ཁོ་ན་ལས་མི་ཤེས་མཁན་ཞིག་གིས་འཛམ་གླིང་གི་ཤེས་བྱ་ཡོད་དོ་ཅོག་སྐད་ཡིག་གཞན་ལ་བརྟེན་མི་དགོས་པར་བོད་ཡིག་ཁོ་ནའི་ལམ་ནས་རྟོགས་ཐུབ་པ་དང་། སྨོན་ལམ་མེ་ལོང་བརྒྱུད་དེ་བོད་ཀྱི་སྐད་ཡིག་འདི་བརྡ་འཕྲིན་བརྒྱུད་ལམ་ནས་མུ་མཐུད་དུ་གནས་ཐུབ་པར་མ་ཟད། དེང་རབས་ཀྱི་སྐད་ཡིག་གཞན་དང་མཉམ་དུ་དཔུང་པ་མཉམ་གཤིབ་ཀྱིས་འགྲོ་ཐུབ་པ་བྱུང་ཡོད་འདུག
གསར་འགོད་པ།་བློ་བཟང་རྒྱ་མཚོ།
