ཞིན་ཅིང་ཕིང་ཨ་རིར་སྐྱོད་སྐབས་ཞི་རྒོལ་བྱེད་མཁན་རྣམས་ལ་སུན་གཙེར་དང་འཇིགས་སྐུལ་བྱས་པའི་ཐོག་གསར་འགོད་ལྷན་ཚོགས་ཤིག་འཚོགས་འདུག
ཟླ་འདིའི་ཚེས་༡༤ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཨ་རིའི་གྲོས་ཚོགས་ཀྱི་རྒྱ་ནག་སྐོར་གྱི་དམིགས་བསལ་ལས་དོན་ཚོགས་ཆུང་གི་གོ་སྒྲིག་འོག་ཉེ་ཆར་རྒྱ་ནག་གི་སྲིད་འཛིན་ཨ་རི་ལ་སྐྱོད་སྐབས། ངོ་རྒོལ་བ་ཚོ་ལ་རྒྱ་ཞེན་པ་ཚོས་སུན་གཙེར་དང་རྒོལ་རྡུང་བཏང་བའི་ཐོག་ལ་གསར་འགོད་ལྷན་ཚོགས་ཤིག་ཚོགས་ཡོད་འདུག
ལོ་འདིའི་ཕྱི་ཟླ་༡༡ ནང་རྒྱ་ནག་གི་སྲིད་འཛིན་ཨ་རིའི་གྲོང་ཁྱེར་(San Francisco) ་སྐྱོད་སྐབས། བོད་པ་དང་ཡུ་གུར་བ། རྒྱ་ནག་གི་དམངས་གཙོ་དོན་གཉེར་བ་སོགས་ཀྱིས་ཞིན་ཅིང་ཕིང་ལ་ངོ་རྒོལ་གྱི་ལས་འགུལ་རྒྱ་ཆེར་ཞིག་སྤེལ་བའི་སྐབས། ཞི་བའི་ལས་འགུལ་བ་ཚོ་ལ་རྒྱ་ཞེན་པ་ཚོས་སུན་གཙེར་དང་རྒོལ་རྡུང་བཏང་བའི་གནས་ཚུལ་བྱུང་ཡོད་པར་བརྟེན། ཨ་རིའི་གྲོས་ཚོགས་ཀྱི་རྒྱ་ནག་སྐོར་གྱི་དམིགས་བསལ་ལས་དོན་ཚོགས་ཆུང་གིས་གནད་དོན་དེ་དང་འབྲེལ་གསར་འགོད་ལྷན་ཚོགས་ཤིག་ཚོགས་གནང་འདུག
ཚོགས་ཆུང་དེ་ཡིས་ཁྲིམས་དོན་ལྷན་ཁང་ལ་ཞི་བའི་ངོ་རྒོལ་བ་ཚོ་ལ་རྒྱ་ཞེན་པ་ཚོས་སུན་གཙེར་དང་རྒོལ་རྡུང་བཏང་བའི་བྱ་སྤྱོད་ནང་རྒྱ་གཞུང་གི་ཐེ་གཏུགས་བྱས་ཡོད་མེད་རྟོག་ཞིབ་བྱེད་པའི་དགོས་འདུན་བཏོན་ཡོད་འདུག
སྐབས་དེར་ཨ་རིའི་གྲོས་ཚོགས་ཀྱི་རྒྱ་ནག་སྐོར་གྱི་དམིགས་གསལ་ལས་དོན་ཚོགས་ཆུང་གི་ཚོགས་གཙོ་གྲོས་ཚོགས་འོག་མའི་འཐུས་མི་སྐུ་ཞབས་(Christ Smith) ཡིས། ཞི་བའི་ངོ་རྒོལ་གནང་མཁན་ལས་འགུལ་བ་རྣམས་ལ་སུན་གཙེར་ དང་རྒོལ་རྡུང་བཏང་བ། དེ་བཞིན་འཇིགས་སྐུལ་གྱི་དོན་རྐྱེན་ཆེན་པོ་བྱུང་བའི་གནད་དོན་དེ་ནི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཤུགས་ཆེར་བཏང་བར་མ་ཟད། རྒྱ་ནག་གཞུང་གིས་ད་ཆ་ཨ་རིའི་ས་ཐོག་ཏུ་རྒྱལ་མཚམས་ལས་བརྒལ་ནས་དྲག་གནོན་གྱི་བྱ་སྤྱོད་སྤེལ་བ་ཞིག་མཐོང་གི་ཡོད་ཅེས་གསུངས་འདུག
དེ་བཞིན་བོད་རང་བཙན་སློབ་ཕྲུག་ཚོགས་པའི་སྤྱི་ཁྱབ་འགན་འཛིན་པདྨ་སྒྲོལ་མ་ཡང་གསར་འགོད་ལྷན་ཚོགས་ཐོག་མཉམ་ཞུགས་གནང་ཞིང་། ཁོང་མོས་དེ་སྔ་དང་བསྡུར་ན་ཨ་རིའི་ནང་རྒྱ་ཞེན་པ་ཇེ་མང་དང། རྒྱ་ཞེན་པ་དེ་དག་གི་བྱ་སྤྱོད་ཀྱང་དྲག་ཤུགས་ཆེ་རུ་ཕྱིན་ཡོད་པ་སོགས་ཁོང་མོའི་མྱོང་ཚོར་གསུངས་ཡོད་པ་མ་ཟད། ཁོང་གིས་ཟླ་བ་སྔོན་མའི་ནང་རྒྱ་ནག་གི་སྲིད་འཛིན་ཞིན་ཅིང་ཕིང་ཨ་རིའི་གྲོང་ཁྱེར་(San Francisco) འབྱོར་སྐབས། བོད་རང་བཙན་སློབ་ཕྲུག་ཚོགས་པས་སྣེ་ཁྲིད་པའི་བོད་མིས་གཙོས་ཡུ་གུར་བ་དང་། ཧོང་ཀོང་བ་སོགས་ཀྱིས་ངོ་རྒོལ་སྐད་འབོད་གནང་སྐབས། ཁ་རས་ནག་པོ་གྱོན་པའི་རྒྱ་རིགས་ཚོས་བོད་པའི་ལས་འགུལ་བ་རྣམས་ཀྱི་ཕྱག་ནས་བོད་ཀྱི་རྒྱལ་དར་དང་འཕྲེད་དར་སོགས་བཙན་འཕྲོག་བྱས་པ་མ་ཟད། ལས་འགུལ་བ་ཁག་ཅིག་ལ་རུབ་རྡུང་དང་རྗེས་འདེད་བཏང་བ། སློབ་ཕྲུག་ཚོགས་པའི་ལས་འགུལ་བ་ཁག་གཅིག་ལས་འགུལ་སྤེལ་ཡུལ་ཁང་པ་ཐོག་བརྩེགས་ལྔའི་སྟེང་ནས་འབུད་རྒྱག་གཏོང་གྲབས་ཀྱིས་འཇིགས་སྐུལ་བྱས་ཡོད་པ་དང་། ཁོང་ལ་སྔར་བྱུང་མྱོང་མེད་པའི་ཨ་རིའི་རང་དབང་ལུང་པའི་ནང་བདེ་འཇགས་མེད་པའི་ཚོར་སྣང་ཤུགས་ཆེར་བྱུང་ཞེས་བརྗོད་དེ། རྒྱ་གཞུང་གིས་བོད་ཙམ་མིན་པར་ཕྱི་ཕྱོགས་རང་དབང་ལུང་པར་སྨྲ་བརྗོད་རང་དབང་འགོག་ཐབས་བྱེད་བཞིན་ཡོད་པ་ཁག་འཕྲལ་མར་མཚམས་འཇོག་ཡོང་ཐབས་སུ་རྒྱ་གཞུང་ལ་གནོན་ཤུགས་ཆེས་ཆེར་སྤྲོད་དགོས་པའི་ཞུ་སྐུལ་ནན་པོ་གནང་ཡོད་འདུག།
གསར་འགོད་པ། བློ་བཟང་རྒྱ་མཚོ།
