ཞེ་ས་ཅན་ཁོ་ན་ཡ་རབས་ཡིན་ནམ།
(བོད་ཀྱི་བང་ཆེན་གསར་ཤོག་སྤྱིའི་འདོན་ཐེངས་༡༠༢༣ གི་ཆེད་བརྗོད།)
བོད་དབུས་ཁུལ་དུ་“ཡ་རབས་ཕྱག་དང་ཞེ་སར་མཁས། མ་རབས་གཉིད་དང་གྲོད་པ་ཆེ།”ཞེས་པའི་གཏམ་དཔེ་འདི་དར་སྲོལ་ཧ་ཅང་ཆེན་པོ་ཡོད། བཙན་བྱོལ་བོད་པའི་སྤྱི་ཚོགས་སུའང་སློབ་གྲྭ་ཁག་ཏུ་དམིགས་བསལ་གྱིས་ཞེ་ས་སློབ་པ་དང། ཐོག་མ་བཙན་བྱོལ་དུ་འབྱོར་སྐབས་ལྷ་སའི་ཁ་སྐད་བཤད་མཁན་ཞིག་ཡིན་ཕྱིན་ཡི་གེ་འབྲི་ཀློག་མི་ཤེས་ཀྱང། སྐད་དང་ཞེ་སའི་གོམས་གཤིས་ཀྱི་ཐོག་ནས་སློབ་ཕྲུག་རྣམས་ལ་བག་ཆགས་འཇོག་ཐུབ་པར་དམིགས་ནས་སློབ་གྲྭ་ཁག་གི་ཕ་ཚབ་དང་མ་ཚབ་ཏུ་བཞག་རྒྱུའི་ཐབས་ཤེས་བྱས་འདུག སྐབས་དེར་ཁམས་དང་། ཨ་མདོ། མངའ་རིས། སྟོད་པ་སོགས་བོད་ཀྱི་མཐའ་མཚམས་ས་ཁུལ་དུ་ཞེ་ས་དེ་ཙམ་དར་སྲོལ་མེད་པས། ན་གཞོན་རྣམས་ཀྱིས་ཞེ་ས་ཡག་པོ་ཤེས་ཐུབ་པའི་ཆེད་དུ་རེད། འོན་ཀྱང་དུས་དེ་ནས་བཟུང་ད་ལྟའི་བར་བཙན་བྱོལ་བོད་པའི་སྤྱི་ཚོགས་ནང་སྐྱེས་ཤིང་འཚར་ལོང་བྱུང་བའི་ནང་དུ་ཁ་སྐད་དུ་ཞེ་ས་ཚུལ་དང་མཐུན་པ་ཞིག་བེད་སྤྱོད་བྱེད་ཐུབ་མཁན་ཧ་ཅང་དཀོན་པ་དང། ལྷ་སའི་ཁ་སྐད་གཙང་མ་ཞིག་བཤད་ཐུབ་མཁན་ཞིག་ནི་དེ་བས་ཀྱང་དཀོན།
འོན་ཀྱང་དྷ་རམ་ལར་ཡོད་པའི་བཙན་བྱོལ་བོད་གཞུང་ངམ་བོད་མིའི་སྒྲིག་འཛུགས་ཀྱི་དབུས་ལས་ཁུངས་ཁག་གི་ནང་དུ་ད་ལྟའི་ཆར་ཡང་ཞེ་ས་གཞན་ཡག་པོ་ཤེས་མིན་ལ་མ་ལྟོས་པར། མཆོག་དང་ལགས་དེ་ཚོ་མི་སོ་སོའི་མིང་མཇུག་ཏུ་ཆད་ལུས་གཏན་ནས་མེད་པར་སྦྱར་སྲོལ་ཡོད། ལྷག་པར་དུ་དྷ་རམ་ས་ལས་གཙོས་བཙན་བྱོལ་བོད་མི་གནས་སྡོད་བྱེད་ཡུལ་ཁག་ཏུ་ཡི་གེ་འབྲི་སྐབས་ཀྱང་མཆོག་དང་ལགས། བསྩལ་དང་གནང་སོགས་རྒྱ་ཁྱབ་བེད་སྤྱོད་གཏོང་བཞིན་ཡོད་པས། མི་ལོ་དྲུག་ཅུ་ལྷག་གི་རིང་ཁ་སྐད་ནང་ཞེ་ས་དེ་ཙམ་དར་ཁྱབ་ཐུབ་མེད་ཀྱང། ཡིག་ཐོག་ཏུ་ཞེ་ས་འབྲི་མཁན་ནི་ཕལ་ཆེར་ཡོངས་ཁྱབ་ཏུ་གྱུར་ཡོད། བོད་ཀྱི་གཞུང་ཆེན་ཁག་དང་ལོ་རྒྱུས་ཀྱི་ཡིག་ཆ་ཁག་ཏུ་མཆོག་དང་ལགས་སོགས་བེད་སྤྱོད་བྱས་པ་ཞིག་མཐོང་དཀོན་ལ། ད་ལྟའི་ཆར་བོད་ནང་དཔེ་དེབ་ཁག་ཏུ་མི་སོ་སོའི་མིང་མཇུག་ཏུ་མཆོག་དང་ལགས་སོགས་ཞེ་ས་བེད་སྤྱོད་བྱས་པ་ཞིག་མཐོང་དཀོན་པས། ལགས་དང་མཆོག་སོགས་ཞེ་ས་དང་དབུས་གཙང་གི་ཁ་སྐད་མང་བ་ནི་བཙན་བྱོལ་བོད་མིའི་དམིགས་བསལ་གྱི་ཡིག་སྲོལ་དུ་གྱུར་ཡོད།
གོང་དུ་དྲངས་པའི་“ཡ་རབས་ཕྱག་དང་ཞེ་སར་མཁས་”ཞེས་པའི་གཏམ་དཔེ་དེ་དོན་དངོས་ཡིན་མིན་ཡང་ད་ལྟའི་ཆར་གཏན་ཁེལ་ནས་བཤད་དཀའ་ལ། ལགས་ལགས་སོ་དང། ཡ་ཡ་ཡོ་ཡོ་ཟེར་མཁན་གྱི་ནང་དུ་ལྐོག་ཟ་རུལ་སུངས་བྱེད་མཁན་བྱུང་ཡོད་ལ། སྤྱི་རྒྱུ་སྒེར་བདག་དང། སྤྱི་སྐལ་སྒེར་སྤྱོད་བྱེད་མཁན་ཡང་མང་པོ་བྱུང་ཡོད། ལགས་ལགས་སོ་དང་། ཡ་ཡ་ཡོ་ཡོ་ཟེར་མི་ཤེས་མཁན་གྱི་ནང་དུ་སྤྱི་དོན་ལ་ལྷག་བསམ་རྣམ་དག་གི་ཐོག་ནས་བློས་གཏོང་ཆེན་པོ་བྱེད་མཁན་བྱུང་ཡོད་པས། ཁ་ནས་ཞེ་ས་བཤད་ཤེས་པ་ཙམ་གྱིས་མི་དེ་ཡ་རབས་ཡིན་པའི་ངེས་པ་མེད་ལ། མ་ཤེས་པ་ཙམ་གྱིས་མི་དེ་མ་རབས་ཡིན་པའི་ངེས་པའང་གཏན་ནས་མེད། སྤྱིར་ཞེ་ས་ཞེས་པ་བོད་པའི་སྲོལ་རྒྱུན་གྱི་རིག་གནས་ཤིག་ཡིན་ནའང། དོན་དུ་ཞེ་ས་ཞེས་པ་མི་ལ་མཆོག་དམན་བར་གསུམ་གྱི་དབྱེ་བ་འབྱེད་བྱེད་ཅིག་རེད། མང་གཙོ་དང་འདྲ་མཉམ་གྱི་སྤྱི་ཚོགས་ཤིག་ལ་མཚོན་ན་མཆོག་དམན་གྱི་དབྱེ་བ་འབྱེད་པའི་རིག་གནས་དེ་ཚོ་མུ་མཐུད་རྒྱུན་འཛིན་དགོས་པ་ཞིག་ཡིན་མིན་ཡང་བསམ་བློ་གཏན་ནས་གཏོང་མི་དགོས་པ་ཞིག་མ་རེད་སྙམ།
སྤྱིར་གུས་ཞབས་དང། རྒན་བཀུར་གཞོན་སྐྱོང་དགོས་པའི་སྲོལ་རྒྱུན་དེ་ཧ་ཅང་གལ་ཆེན་པོ་ཡིན་པ་ལས། ཁ་ནས་ཁ་འཇམ་གྱི་འཇའ་ཚོན་འཆར་བཞིན། ཁོག་ནས་བསམ་ངན་གྱི་སྤྲིན་ནག་འཁྲིགས་སྡོད་མཁན་ཞིག་ཡིན་ན། མི་དེའི་ཁ་ནས་ཞེ་ས་ག་ཚོད་བཤད་ཀྱང་དོན་དུ་ཡ་རབས་བཟང་སྤྱོད་ཀྱི་དྲི་མ་ཙམ་ཡང་མེད། འོན་ཀྱང་ད་ལྟ་ང་ཚོའི་ཁོར་ཡུག་གི་དབང་གིས་མི་མང་པོ་ཞིག་ཞེ་ས་ལ་དགའ་བས། དོན་དག་གང་བསྒྲུབ་དགོས་ཀྱང་ཞེ་ས་མི་ཤེས་པར་ཐད་ཀར་བཤད་མཁན་ལ་གཟིགས་སྟངས་ཡག་པོ་ཡོང་དཀའ། དེར་བརྟེན་ཁ་སྐད་ནང་ཞེ་ས་བེད་སྤྱོད་མི་བྱེད་ཐབས་མེད་ཡིན་པས། ཚང་མས་རང་བཞིན་གྱིས་དོ་སྣང་བྱེད་དགོས་པ་ཞིག་ཏུ་གྱུར་ཡོད། མཎྜལ་བཤད་པ་དང། འབུལ་ཡིག སྙན་ཞུ། འཕྲིན་ཡིག་སོགས་དམིགས་བསལ་ཞེ་ས་དགོས་རིགས་ཕུད། དེ་མིན་དཔེ་དེབ་དང་རྩོམ་ཡིག གསར་འགྱུར་སོགས་ཀྱི་ནང་ཞེ་ས་མང་དྲགས་ན། བོད་ཀྱི་སྲོལ་རྒྱུན་གྱི་གཞུང་ཆེན་ཁག་དང་ལོ་རྒྱུས་ཡིག་ཆ་འབྲི་སྲོལ་དང་གཏན་ནས་མི་མཐུན་པས། དེ་དག་ལ་ཞེ་ས་འབྲི་བ་དེ་དགོས་པ་ལས་དགག་བྱ་ཆེ་བ་ལྟ་བུ་མི་འདུག་གམ།
མདོར་ན་དུས་རབས་ཉེར་གཅིག་པར་ཞེ་ས་ཤེས་དང་མ་ཤེས་ཀྱི་ཐོག་ནས་མི་ཡ་རབས་དང་མ་རབས་ཀྱི་དབྱེ་བ་འབྱེད་མི་ཐུབ་ལ། གཞན་གྱི་ལམ་སྟོན་དང་བཀོད་པ་ཁོ་ནར་མི་ཉན་པར་མི་སོ་སོས་རང་ཉིད་ཀྱི་ལྟ་ཚུལ་ཐད་ཀར་བརྗོད་དགོས་པ་དེ་གལ་ཆེན་པོ་ཡིན་པ་ལས། ཡ་རབས་བཟང་སྤྱོད་དང་ལྡན་པ་ཞེས་པ་དེ་རང་གི་བསམ་ཚུལ་མི་བཤད་པར་གཞན་གྱི་བཀོད་པ་ཁོ་ནར་ཉན་མཁན་ཙམ་ལ་གོ་མི་རུང། གཙོ་ཆེ་ཤོས་མི་མ་རབས་ནི་གཞན་ལ་གནོད་སེམས་འཆང་མཁན་དང། རྫུན་དང་གཡོ་སྒྱུས་གཞན་མགོ་སྐོར་མཁན། བཙན་པོ་ལ་སྤྲེལ་ལད་དང། ཉམ་ཆུང་ལ་ཐུབ་ཚོད་གཏོང་མཁན། ལྐོག་ཟ་རུལ་སུངས་དང་སྤྱི་རྒྱུ་སྒེར་བདག་བྱེད་མཁན། ཕ་མ་དང་དགེ་རྒན་ལ་གུས་བཀུར་མེད་ཅིང་དྲིན་ལན་ལོག་འཇལ་བྱེད་མཁན། གྲོགས་ལ་ཕྱི་ཐག་ཐུང་ཞིང་ཁྲེལ་གཞུང་མེད་པ། གང་ལྟར་དགྲ་གཉེན་མགོན་གསུམ་གོ་ལྡོག་ཏུ་སོང་བ་དག་ནི་མ་རབས་ཐ་ཤལ་དུ་ངོས་འཛིན་བྱེད་ཆོག་ལ། གོང་དུ་བརྗོད་པ་དེ་དག་ལས་ལྡོག་པ་རྣམས་ནི་ཡ་རབས་ཚུལ་ལྡན་དུ་བརྩིས་ན་མི་འགྲིག་པ་མེད་པ་ཞིག་ཏུ་ངོས་འཛིན་བྱེད་ཆོག།
