རྒྱ་ནག་ནང་ཨ་རིའི་སྲིད་འཛིན་འོས་བསྡུར་ཊོམ་ལ་རྒྱལ་ཁ་བསྐྱར་དུ་ཐོབ་རྒྱུར་རྒྱབ་སྐྱོར་བྱེད་བཞིན་ཡོད་འདུག
ཨ་རིའི་སྲིད་འཛིན་དུ་ཌོ་ནལ་ཊོམ་འདེམས་ཐོན་བྱུང་བ་ནས་བཟུང་། ཨ་རྒྱ་གཉིས་ཚོང་དམག་སོགས་ཀྱི་གདོང་ཐུག་ཁག་ཅིག་འབྱུང་བཞིན་ཡོད་ཀྱང་། རྒྱ་ནག་གི་མཐོ་རིམ་ལས་བྱེད་ནང་དུ་འདི་ལོའི་སྲིད་འཛིན་འོས་བསྡུར་ཊོམ་བསྐྱར་དུ་འདེམས་ཐོན་བྱུང་རྒྱུར་རྒྱབ་སྐྱོར་བྱེད་བཞིན་འདུག་པ་དང་། དེའི་རྒྱུ་མཚན་ནི་ཊོམ་ལ་བརྟེན་ནས་ཨ་རི་དང་མཐུན་ཕྱོགས་རྒྱལ་ཁབ་ཀྱི་འབྲེལ་ལམ་ཉམས་རྒུད་འགྲོ་ཡི་ཡོད་པས་ཡིན་འདུག
ཟླ་༦ པའི་ཚེས་༡༧ ཉིན་རྒྱལ་སྤྱིའི་བརྒྱུད་ལམ་ཨལ་ཇི་ཛེ་རཱ་ཐོག་ཏུ་གནས་ཚུལ་སྤེལ་བར་གཞིགས་ན། ཉེ་བའི་ཆར་ནས་ཨ་རིའི་སྲིད་འཛིན་ལས་ཁུར་བ་ཌོ་ནལ་ཊོམ་གྱིས་བརྒྱུད་ལམ་ཁག་ཏུ། རྒྱ་ནག་གིས་འདི་ལོའི་ཨ་རིའི་སྲིད་འཛིན་འོས་བསྡུར། མང་གཙོ་ཚོགས་པའི་སྲིད་འཛིན་འོས་མི་སྲིད་འཛིན་གཞོན་ཟུར་ཇཱོ་བྷེ་ཌན་ལ་རྒྱལ་ཁབ་ཐོབ་རྒྱུར་རྒྱབ་སྐྱོར་བྱེད་བཞིན་ཡོད་པ་དང་། དེ་ཡང་རྒྱ་ནག་གིས་མངོན་འདོད་དེ་སྒྲུབ་ཆེད་དུ་ག་རེ་ཡིན་ཡང་བྱེད་ངེས་ཡིན་སྐོར་བརྗོད་བཞིན་ཡོད་པ་རེད། དེ་ལྟར་བརྗོད་དོན་དེ་ཡང་འོས་བསྡུ་སླེབས་ལ་ཉེ་བ་དང་བསྟུན། ཨ་རིའི་མི་མང་ལ་ཊོམ་གྱི་ངོས་ནས་རྒྱ་ནག་ལ་ཁ་གཏད་ཆེན་པོ་གཅོག་བཞིན་ཡོད་པ་དྲན་སྐུལ་ཁྱབ་བསྒྲགས་བྱེད་ཆེད་ཡིན་པ་ངོས་འཛིན་བྱེད་མཁན་ཡང་འདུག
འོན་ཀྱང་རྒྱ་ནག་གི་ད་ཡོད་དང་དེ་སྔོན་མཐོ་རིམ་ལས་བྱེད་ཟུར་པ་བརྒྱད་ལ་བཅར་འདྲི་བྱས་པ་བརྒྱུད། ཨ་རིའི་སྲིད་འཛིན་དུ་ཌོ་ནལ་ཊོམ་འདེམས་ཐོན་བྱུང་བ་ནས་བཟུང་། ཚོང་དམག་དང་ལྷོ་རྒྱ་ནག་རྒྱ་མཚོའི་བདག་དབང་སོགས་ཀྱི་གདོང་ཐུག་ཐད། ཨ་རིས་རྒྱ་ནག་ལ་ཁ་གཏད་གཅོག་བཞིན་ཡོད་ཀྱང་། གདོང་ཐུག་དེ་ལ་བརྟེན་ནས་འཕྲད་བཞིན་པའི་དཀའ་ངལ་རྣམས་ལས། ཨ་རིའི་སྲིད་འཛིན་ཊོམ་ཡིན་པར་བརྟེན་ནས་ཨ་རི་དང་མཐུན་ཕྱོགས་རྒྱལ་ཁབ་ཀྱི་འབྲེལ་ལམ་ཉམས་རྒུད་འགྲོ་བཞིན་པ་དེས་རྒྱ་ནག་ལ་ཆབ་སྲིད་ཀྱི་གོ་སྐབས་དང་ཁེ་ཕན་ཐོབ་བཞིན་པ་དེ་གལ་ཆེ་བར་ངོས་འཛིན་བྱེད་མཁན་མང་བ་ཡོད་པས། ཨ་རིའི་སྲིད་འཛིན་འོས་བསྡུར་ཌོ་ནལ་ཊོམ་ལ་བསྐྱར་དུ་རྒྱལ་ཁ་ཐོབ་རྒྱུར་རྒྱབ་སྐྱོར་བྱེད་ཀྱི་ཡོད་འདུག
དེ་སྔོན་རྒྱ་ནག་གི་ཚོང་འབྲེལ་གྲོས་མོལ་པ་དང་སུད་སི་ཇི་ནི་ཝར་རྒྱ་ནག་གི་སྐུ་ཚབ་གཞོན་པ་ཀྲའོ་ཤའོ་མིང་གིས། གལ་སྲིད་མང་གཙོ་ཚོགས་པའི་སྲིད་འཛིན་འོས་མི་བྷེ་ཌན་ལ་རྒྱལ་ཁ་ཐོབ་ཚེ། རྒྱ་ནག་ལ་ཉེན་ཁ་ཆེ་བ་མཐོང་གི་ཡོད་པ་དང་། དེ་ཡང་ཁོང་གིས་ཨ་རིའི་མཐུན་ཕྱོགས་རྒྱལ་ཁབ་རྣམས་དང་མཉམ་ལས་བྱས་ཏེ་རྒྱ་ནག་ལ་དམིགས་འབེན་བྱེད་རྒྱུ་ཡིན་པ། འོན་ཀྱང་ཊོམ་གྱིས་ཨ་རི་དང་མཐུན་ཕྱོགས་རྒྱལ་ཁབ་ཀྱི་འབྲེལ་ལམ་གཏོར་སྐྱོན་གཏོང་བཞིན་ཡོད་སྐོར་བརྗོད་འདུག བཅར་འདྲི་བྱེད་ཡུལ་ལས་བྱེད་བཞི་ཡིས་བརྗོད་ཚུལ་ལ། རྒྱ་ནག་གཞུང་ནང་གི་དཔོན་རིགས་མང་པོ་ཞིག་གིས། རྒྱ་ནག་གི་ཤུགས་རྐྱེན་འཕེལ་རྒྱས་གཏོང་བར་བཀག་འགོག་བྱེད་མཁན་གཙོ་བོ་དེ་ཨ་རི་དང་མཐུན་ཕྱོགས་རྒྱལ་ཁབ་ཁག་གི་འབྲེལ་ལམ་དང་མཉམ་ལས་ཀྱི་ནུས་པ་དེ་ཡིན་པས། ཊོམ་གྱི་རྒྱལ་ཁ་ཡིས་ནུས་པ་ཉམས་རྒུད་གཏོང་རྒྱུ་ཡིན་པས། རྒྱ་ནག་ལ་ཁེ་ཕན་ཐོབ་རྒྱུ་ཡིན་པར་ཡིད་ཆེས་བྱེད་ཀྱི་ཡོད་འདུག
དེ་ཡང་རྒྱ་ནག་གི་མཐོ་རིམ་ལས་བྱེད་ཁོངས་སུ། ཨ་རིའི་སྲིད་འཛིན་དུ་སུ་སླེབས་ཡང་ཕྱོགས་གཉིས་ཀྱི་འབྲེལ་ལམ་ཡག་ཏུ་འགྲོ་ཐབས་མེད་པ་དང་། ཊོམ་གྱི་ལས་ཡུན་སྐབས་སུ་ཨ་རིའི་སྲིད་དོན་ཚོགས་པ་གཉིས་ཀས་རྒྱ་ནག་ལ་ཁ་གཏད་གཅོག་པར་ཐུན་མོང་གིས་རྒྱབ་སྐྱོར་ཡོད་པ་གསལ་སྟོན་བྱུང་ཡོད་པས། གཙོ་བོ་དེ་ཨ་རི་མིན་པའི་ཡུ་རོབ་དང་ཨེ་ཤི་ཡ་སོགས་རྒྱལ་ཁབ་གཞན་དང་འབྲེལ་ལམ་ཡར་རྒྱས་དང་། ཁྲོམ་ར་རྒྱ་བསྐྱེད་བཏང་ནས་ཨ་རིས་རྒྱ་ནག་རྒྱལ་སྤྱིའི་ཚོགས་སྡེ་ནས་ཟུར་ཕུད་ཀྱི་འབད་བརྩོན་ལ་འཐབ་རྒོལ་གྱི་གྲ་སྒྲིག་བྱེད་རྒྱུ་གལ་ཆེན་འཛིན་མཁན་མང་པོ་ཡོད་འདུག །
གསར་འགོད་པ་སྐལ་བཟང་དོན་གྲུབ།
