རྒྱལ་ཁབ་སོ་སོས་བདེ་སྲུང་གི་ཆེད་དུ་འགྲོ་གྲོན་མང་པོ་བཏང་བས་དམག་འཁྲུག་ཡོང་རྒྱུའི་ཉེན་ཁ།
འདི་ལོ་ནི་རྒྱལ་སྤྱིའི་ཁྱོན་ཡོངས་སུ་རྒྱལ་ཁབ་སོ་སོས་བདེ་སྲུང་གི་ཆེད་དུ་བཏང་བའི་འགྲོ་གྲོན་གྱི་མ་དངུལ་དེ་འདས་པའི་ལོ་རྒྱུས་ནང་མང་ཤོས་སུ་གྱུར་ཡོད་འདུག་པར་བརྟེན། མ་འོངས་པར་འཛམ་གླིང་ནང་དམག་འཁྲུག་ཆེན་པོ་ཞིག་ཡོང་རྒྱུའི་ཉེན་ཁ་ཆེན་པོ་ཡོད་པར་བརྗོད་འདུག
ཕྱི་ཚེས་༢༣ ཉིན་ཐའེ་པེ་དུས་བབ་(TaipeiTime)གནས་ཚུལ་སྤེལ་གསལ་ལྟར་ན། རྒྱ་ནག་གིས་འདས་པའི་ལོ་༡༩ རིང་བདེ་སྲུང་ངམ་དམག་སྟོབས་ཡར་རྒྱས་ཀྱི་ཆེད་དུ་འགྲོ་གྲོན་ལོ་རེ་ནས་མང་དུ་གཏོང་གི་ཡོད་པ་དང་། ལོ་རེར་བརྒྱ་ཆ་༦ སྤར་གྱི་ཡོད་འདུག རྒྱ་ནག་གིས་ལོ་སྔོན་མར་བདེ་སྲུང་གི་ཆེད་དུ་མ་དངུལ་འགྲོ་གྲོན་ཨ་སྒོར་ཐེར་འབུམ་༢༩༦ ཙམ་བཏང་ཡོད་འདུག་ལ། ཐའེ་ཝན་ལྟ་བུར་མཚོན་ན་ལོ་སྔོན་མར་ཨ་སྒོར་ཐེར་འབུམ་༡༦་༦ ཙམ་བཏང་ནས་ལོ་རེར་བརྒྱ་ཆ་༡༡ ཙམ་སྤར་གྱི་ཡོད་འདུག གོ་ལའི་ཞི་བདེའི་ལྟེ་གནས་ཁང་ཟེར་བའི་ཉམས་ཞིབ་ལྟེ་གནས་ཁང་དེས་བརྗོད་དོན་ལ། འཛམ་གླིང་སྤྱི་ཡོངས་སུ་རྒྱལ་ཁབ་སོ་སོས་བདེ་སྲུང་གི་ཆེད་དུ་དམག་དཔུང་གི་སྟོགས་ཤུགས་གོང་མཐོར་གཏོང་རྒྱུའི་ཆེད་དུ་མ་དངུལ་འགྲོ་གྲོན་ཕོན་ཆེན་གཏོང་གི་ཡོད་འདུག་པར་བརྟེན། ལོ་སྔོན་མའི་རྒྱལ་ཁབ་སོ་སོའི་དམག་དོན་འགྲོ་གྲོན་དེ་ཕྱི་ལོ་༢༠༠༩ ནས་ད་བར་མང་ཤོས་དེ་ཆགས་ཀྱི་ཡོད་འདུག ལོ་སྔོན་མའི་གོ་ལའི་སྤྱི་ཡོངས་ཀྱི་དམག་དོན་ཆེད་དུ་འགྲོ་གྲོན་ཨ་སྒོར་ཁྲག་ཁྲིག་ཆེན་པོ་༢་༤ བཏང་ཡོད་འདུག་ལ། སྤྱི་ཡོངས་ཀྱི་བརྒྱ་ཆ་༦་༨ འཕར་ནས་མ་དངུལ་མང་ཤོས་གཏོང་མཁན་ནི་ཡུ་རོབ་དང་། དཀྱིལ་ཤར་ཡུལ་གྲུ ཨེ་ཤེ་ཡ་བཅས་ཡིན་འདུག་པར་བརྟེན། མ་འོངས་པར་ས་ཁུལ་དེ་དག་ནང་དམག་འཁྲུག་ཡོང་རྒྱུའི་ཉེན་ཁ་ཆེན་པོ་ཡོད་པ་དང་། གོ་ལའི་ཁྱོན་ཡོངས་སུ་བདེ་འཇགས་དེ་ཙམ་མེད་པར་སྟོན་གྱི་ཡོད་པ། དམིགས་བསལ་ཡུ་རོབ་དང་། ཨེ་ཤེ་ཡ། དཀྱིལ་ཤར་ཡུལ་གྲུ་ཁག་ནང་བདེ་འཇགས་སྲུང་སྐྱོབ་ཐད་སྔར་ལས་གནས་སྟངས་བཟང་དུ་འགྲོ་རྒྱུ་ལས་ལྡོག་སྟེ་དཀའ་ངལ་ཆེ་རུ་འགྲོ་བཞིན་ཡོད་པར་མངོན་པ་རེད་ཅེས་ཉམས་ཞིབ་ལྟེ་གནས་ཁང་དེའི་ཉམས་ཞིབ་པ་རྒན་པ་(Nan Tian)ཟེར་བ་ཞིག་གིས་བརྗོད་ཡོད་འདུག མངའ་ཁུལ་དེ་དག་གི་ནང་ནས་རྒྱ་ནག་དང་། ཨུ་རུ་སུ། རྒྱ་གར། སོ་དྷི་ཨ་རབ་བཅས་ནི་བདེ་སྲུང་གི་ཆེད་དུ་འགྲོ་གྲོན་མང་ཤོས་གཏོང་མཁན་དག་ཆགས་ཀྱི་ཡོད་འདུག ཉམས་ཞིབ་ལྟེ་གནས་ཁང་དེ་ཡིས་མུ་མཐུད་བརྗོད་དོན། ཨུ་རུ་སུ་དང་ཡུག་རེན་བར་དམག་འཁྲུག་གི་རྐྱེན་པས་ཨུ་རུ་སུས་ལོ་སྔོན་མར་ཨ་སྒོར་ཐེར་འབུམ་༡༠༩ བཏང་ཡོད་པ་དང་། ཨུ་རུ་སུས་ཡུག་རེན་གྱི་ས་ཆ་ཁེ་མར་ཡ་བཙན་བཟུང་བྱས་རྗེས་བདེ་སྲུང་གི་ཆེད་དུ་འགྲོ་གྲོན་བརྒྱ་ཆ་༥༧ ཙམ་སྤར་ཡོད་འདུག ཡུག་རེན་གྱིས་ལོ་སྔོན་མར་བདེ་སྲུང་ཆེད་དུ་མ་དངུལ་འགྲོ་གྲོན་ཨ་སྒོར་ཐེར་འབུམ་༦༤་༨ བཏང་ཡོད་འདུག་པ་དང་བརྒྱ་ཆ་༥༡ ཙམ་ཡིན་འདུག འོན་ཀྱང་། ཡུག་རེན་ལ་དམག་དོན་ཆེད་དུ་རོགས་རམ་ཨ་སྒོར་ཐེར་འབུམ་༣༥ ཙམ་རག་ཡོད་འདུག་པ་དང་། དེ་དག་ལས་མང་ཆེ་བ་ཨ་རི་ནས་ཡིན་འདུག ཡུག་རེན་ལ་རག་པའི་དམག་དོན་རོགས་རམ་གྱི་མ་དངུལ་རྣམས་བསྡོམས་ན་ཨུ་རུ་སུའི་དམག་དོན་གྱི་འགྲོ་གྲོན་བརྒྱ་ཆ་༩ ནས་༡༠ ཙམ་ཡིན་འདུག ལོ་སྔོན་མར་ཡུག་རེན་གྱི་དམག་དོན་ཆེད་དུ་འགྲོ་གྲོན་དང་ཨུ་རུ་སུའི་དམག་དོན་ཆེད་དུ་འགྲོ་གྲོན་གཉིས་འདྲ་བོར་གྱུར་ཡོད་འདུག ཡུག་རེན་གྱི་ལོ་གཅིག་གི་རྒྱལ་ཁབ་ཀྱི་ཡོང་བབས་(GDP)ལས་བརྒྱ་ཆ་༣༧ ཙམ་དང་སྤྱི་ཡོངས་ཀྱི་རྒྱལ་ཁབ་ཀྱི་ཡོང་འབབ་ལས་བརྒྱ་ཆ་༥༨ ཙམ་བཏང་ཡོད་འདུག འོན་ཀྱང་། དེ་ལས་ལྡོག་སྟེ་ཨུ་རུ་སུས་(GDP)་ལས་བརྒྱ་ཆ་༥་༩ ལས་བཏང་མི་འདུག ཡུ་རོབ་གླིང་ཕྲན་ནང་པོ་ལན་ཌིའི་རྒྱལ་ཁབ་ནི་དམག་དོན་ཆེད་དུ་འགྲོ་གྲོན་མང་ཤོས་གཏོང་མཁན་དེ་ཡིན་འདུག་ལ། ལོ་སྔོན་མར་ཨ་སྒོར་ཐེར་འབུམ་༣༡་༦ དང་བརྒྱ་ཆ་༧༥ ཙམ་བཏང་ཡོད། དཀྱིལ་ཤར་ཡུལ་གྲུ་ནང་ཨི་སི་རེལ་མང་ཤོས་ཡིན་འདུག་པ་དང་། ལོ་སྔོན་མར་ཨ་སྒོར་ཐེར་འབུམ་༧༥་༨ དང་བརྒྱ་ཆ་༤་༣ ཙམ་བཏང་ཡོད་འདུག ཨ་རི་ནི་རྒྱལ་ཁབ་ཚང་མ་ལས་མང་ཤོས་ཡིན་འདུག་པ་དང་ལོ་སྔོན་མར་ཨ་སྒོར་ཐེར་འབུམ་༩༡༦ དང་བརྒྱ་ཆ་༢་༣ ཡིན་འདུག རྒྱ་ནག་གི་འགྲོ་གྲོན་དེ་འདས་པའི་ལོ་༡༩ ལས་མང་ཤོས་ཆགས་ནས་ཨ་སྒོར་ཐེར་འབུམ་༢༩༦ དང་བརྒྱ་ཆ་༦ ཡིན་འདུག རྒྱ་ནག་གིས་རང་གི་ཁྱིམ་མཚེས་རྒྱལ་ཁབ་ཚོའི་བར་རྩོད་རྙོག་བཟོ་ཡི་ཡོད་པར་བརྟེན། ཁྱིམ་མཚེས་རྒྱལ་ཁབ་ཚོས་དམག་དོན་ཆེད་དུ་འགྲོ་གྲོན་མ་བཏང་རང་བཏང་འབྱུང་བཞིན་ཡོད་པ་རེད་ཅེས་ཉམས་ཞིབ་ལྟེ་ཁང་དེ་ཡིས་བརྗོད་འདུག དེ་བཞིན་ལོ་སྔོན་མ་ཐའེ་ཝན་གྱིས་ཨ་སྒོར་ཐེར་འབུམ་༡༦་༦ དང་། ཉི་ཧོང་གིས་ཨ་སྒོར་ཐེར་འབུམ་༥༠་༢ བཏང་ཡོང་འདུག རྒྱལ་ཁབ་དེ་གཉིས་ཀྱིས་ཁྱོན་བརྒྱ་ཆ་༡༡ ཡར་སྤར་ཡོད་འདུག རྒྱ་གར་གྱི་དམག་དོན་ཆེད་དུ་ལོ་སྔོན་མར་ཨ་སྒོར་ཐེར་འབུམ་ ༨༣ དང་བརྒྱ་ཆ་༤་༣ ཡིན་འདུག དེ་དང་དེ་བཞིན་ཡུལ་གྲུ་མང་པོ་ཞིག་གི་ནང་དམག་དོན་ཆེད་དུ་འགྲོ་གྲོན་ལོ་རེ་ནས་ལོ་རེར་མང་དུ་གཏོང་གི་ཡོད་འདུག །
གསར་འགོད་པ། བསོད་ནམས་ཕུན་ཚོགས།
