སྔ་འགྱུར་རྙིང་མའི་ཐུན་མིན་ལྟ་གྲུབ་བགྲོ་གླེང་ཐེངས་བཅུ་གཅིག་པ་འཚོགས་འདུག
རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་སུ་ཡོད་པའི་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་གི་ཡན་ལག་སྔ་འགྱུར་མཐོ་སློབ་མདོ་སྔགས་རིག་པའི་འབྱུང་གནས་གླིང་དུ། ཕྱི་ཚེས་༢༤ ནས་༢༥ བར་ཉིན་གྲངས་གཉིས་རིང་བརྗོད་གཞི་ངེས་ཤེས་རིན་པོ་ཆེའི་སྒྲོན་མེའི་ཐོག་སྔ་འགྱུར་རྙིང་མ་པའི་ཐུན་མིན་ལྟ་གྲུབ་བགྲོ་གླེང་ཐེངས་བཅུ་གཅིག་པ་འཚོགས་ཡོད་འདུག་ཅིང་། སྐབས་དེ་དུས་བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཛད་སྒོའི་དབུ་འབྱེད་ཐོག་ཏུ་ཕེབས་ནས་གསུང་བཤད་ཀྱང་གནང་འདུག
ཕྱི་ཚེས་༢༧ ཉིན་བོད་མིའི་སྒྲིག་འཛུགས་ཀྱི་དྲྭ་རྒྱའི་ཐོག་ཏུ་གནས་ཚུལ་སྤེལ་གསལ་ལྟར་ན། ཕྱི་ཚེས་༢༤ ནས་༢༥ བར་ཉིན་གཉིས་རིང་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་གི་ཡན་ལག་སྔ་འགྱུར་མཐོ་སློབ་མདོ་སྔགས་རིག་པའི་འབྱུང་གནས་གླིང་དུ། བརྗོད་གཞི་ངེས་ཤེས་རིན་པོ་ཆེའི་སྒྲོན་མེའི་སྐོར་སྔ་འགྱུར་རྙིང་མའི་ཐུན་མིན་ལྟ་གྲུབ་བགྲོ་གླེང་ཐེངས་བཅུ་གཅིག་པའི་དབུ་འབྱེད་མཛད་སྒོའི་ཐོག་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་གི་དབུ་འཛིན་མཁན་སྤྲུལ་གྱང་ཁང་རིན་པོ་ཆེ་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ། པད་ནོར་རིན་པོ་ཆེའི་དགེ་རྩ་ཚོགས་པའི་འགན་འཛིན་སྤྲུལ་སྐུ་ཆོས་དར། བཀའ་ཟུར་ཚེ་རིང་ཕུན་ཚོགས། སྔ་འགྱུར་མཐོ་སློབ་མདོ་སྔགས་རིག་པའི་འབྱུང་གནས་གླིང་དང་། བཙུན་དགོན་མཚོ་རྒྱལ་བཤད་སྒྲུབ་ཐོས་བསམ་དགའ་བའི་ཚལ་གྱི་བཤད་གྲྭ་ཁག་གཉིས་ཀྱི་ཚོགས་གཙོ་མཁན་པོ་པ་སངས་བསྟན་འཛིན་མཆོག སྔ་འགྱུར་མཐོ་སློབ་ཆེན་མོའི་ཚོགས་གཞོན་མཁན་པོ་རྒྱ་མཚོ། གཞན་ཡང་སྡེ་ཚན་ཁག་གི་འགན་ཁུར་བཞེས་མཁན་དང་། རྒྱ་བལ་འབྲུག་གསུམ་ནང་ཡོད་པའི་སྔ་འགྱུར་རྙིང་མའི་དགོན་སྡེ་ཁག་གི་གཙོས་པའི་དགོན་སྡེ་ཁག་གི་མཁན་སློབ་དང་སློབ་གཉེར་བ་རྣམ་པ། སྔ་འགྱུར་མཐོ་སློབ་མདོ་སྔགས་རིག་པའི་འབྱུང་གནས་གླིང་དང་བཙུན་དགོན་མཚོ་རྒྱལ་བཤད་སྒྲུབ་ཐོས་བསམ་དགའ་བའི་ཚལ་གྱི་བཤད་གྲྭ་ཁག་གཉིས་ཀྱི་སློབ་གཉེར་བ་བཅས་ཕེབས་ཡོད་འདུག མཛད་སྒོའི་ཐོག་ཏུ་ཚོགས་གཙོ་མཁན་པོ་བསོད་ནམས་བསྟན་འཕེལ་གྱིས་རྒྱ་ནག་དམར་གཞུང་གིས་བོད་ས་ཡོངས་རྫོགས་བཙན་བཟུང་བྱས་པར་བརྟེན། ང་ཚོ་བཙན་བྱོལ་བའི་གནས་བབས་ཆགས་ཡོད་ཅིང་།
དེ་བཞིན་སྔ་འགྱུར་པ་ལྟ་བུར་མཚོན་པ་ཡིན་ན། ༧སྐྱབས་རྗེ་གྲུབ་དབང་རིན་པོ་ཆེ་མཆོག་གི་ཐུགས་བསྐྱེད་ལ་བརྟེན་ནས་ཕྱི་ལོ་༡༩༦༣ ལོར་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་ཞེས་པའི་དགོན་པ་ཕྱག་བཏབ་ཅིང་། སྐབས་དེ་དུས་དཔལ་འབྱོར་གྱི་དཀའ་ངལ་ཧ་ཅང་ཆེ་ནའང་། ༧སྐྱབས་རྗེ་རིན་པོ་ཆེས་སྐུ་ངལ་ཁྱད་དུ་བསད་ནས་སྔ་འགྱུར་པའི་གདན་ས་འདི་ཡང་བཤད་སྒྲུབ་གཉིས་ཀྱི་ཐོག་ནས་མིག་དཔེར་འོས་པའི་གནས་སྟངས་ཤིག་བྱུང་བསྡད་ཡོད་པ་རེད། དེ་ཡིན་དུས། ༧སྐྱབས་རྗེ་རིན་པོ་ཆེའི་མཛད་པ་འཕྲིན་ལས་དངོས་སུ་མཇལ་མྱོང་མཁན་ཡོད། དེ་བཞིན་ད་ལྟ་རྣམ་ཐར་ཡིག་ཐོག་ལ་བཀོད་པའང་ཡོད། དེ་ཚོར་མིག་ལྟོས་བྱས་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་། ༧སྐྱབས་རྗེ་རིན་པོ་ཆེའི་ཐུགས་དགོངས་འགྲུབ་རྒྱུར་འབད་འབུངས་བྱེད་དགོས་པ་དེ་གལ་ཆེན་པོ་གཅིག་ཆགས་ཀྱི་འདུག
དེ་རིང་བགྲོ་གླེང་གི་བརྗོད་གཞི་དེ་”ངེས་ཤེས་རིན་པོ་ཆེའི་སྒྲོན་མེའི་སྐོར་”ཆགས་ཀྱི་ཡོད། ངེས་ཤེས་རིན་པོ་ཆེའི་སྒྲོན་མེ་ལྟ་བུར་མཚོན་པ་ཡིན་ན། ད་ལྟ་གོང་དུ་ཞུས་པ་ནང་བཞིན་རེད། འཇམ་མགོན་མི་ཕམ་རིན་པོ་ཆེ་མཆོག་གིས་དགུང་ལོ་བདུན་བཞེས་སྐབས་ལྗགས་རྩོམ་གནང་བ་རེད་ཅེས་བཤད་སྲོལ་ཡོད། ཕལ་ཆེར་བཤད་སྲོལ་དེ་ནི་རྫོགས་ཆེན་ཤྲཱི་སེང་བཤད་གྲྭ་ནས་མར་ངག་རྒྱུན་ཞིག་ཡོད་པ་འདྲ། རྣམ་ཐར་མཇལ་ཡོང་དུས། དགུང་ལོ་བདུན་ནས་སྡོམ་གསུམ་རྣམ་ངེས་བློ་འཛིན་དང་། དགུང་ལོ་བཅུ་ཕྲག་ནས་ལྗགས་རྩོམ་རིགས་གནང་གི་ཡོད་པའི་སྐོར་འཁོད་ཡོད། ངག་རྒྱུན་ཐོག་ལ་དགུང་ལོ་བདུན་ལ་སོན་སྐབས་ངེས་ཤེས་རིན་པོ་ཆེའི་སྒྲོན་མེ་ལྗགས་རྩོམ་མཛད་པའི་སྐོར་ཞིག་བཤད་སྲོལ་ལ་ཡོད། འཇམ་མགོན་མི་ཕམ་རིན་པོ་ཆེ་མཆོག་ནི་ཆོས་བརྒྱུད་སྤྱི་དང་། ལྷག་པར་སྔ་འགྱུར་བར་བཀའ་དྲིན་ཆེན་པོ་ཆགས་ཀྱི་ཡོད་པ། དེ་བཞིན་བོད་དང་། ཧི་མ་ལ་ཡའི་ཁུལ་ལ་ཧ་ཅང་གི་བཀའ་དྲིན་ཆེན་པོ་ཆགས་བསྡད་ཡོད་པ་རེད། ནང་ཆོས་ནི། རིག་གནས་ཆེ་བ་ལྔ་དང་། ཆུང་བ་ལྔའི་གྲས་ནས་རིག་གནས་ཆེ་བ་གཅིག་ཆགས་ཀྱི་ཡོད་ཅིང་། འཇམ་མགོན་མི་ཕམ་རིན་པོ་ཆེ་མཆོག་ནི་རིག་གནས་ཆེ་ཆུང་མཐའ་དག་ལ་མཁས་པ་དང་། འབུར་དུ་ཐོན་པའི་ཕྱག་རྗེས་མང་པོ་བཞག་ཡོད་པ་རེད།
མི་ཕམ་རིན་པོ་ཆེས་ལྗགས་རྩོམ་གནང་བའི་སྨན་གྱི་སྐོར་མང་པོ་ཞིག་ད་ལྟ་བོད་ཀྱི་སྨན་རྩིས་ཁང་ནས་ལག་ལེན་བསྟར་བཞིན་ཡོད་པ་མ་ཟད། སྙན་ངག་དང་། སྡེབ་སྦྱོར། མངོན་བརྗོད་སོགས་ཀྱི་རིག་གནས་མཐའ་དག་ནང་ལའང་དེ་མཚུངས་ཕྱག་རྗེས་བཞག་ཡོད་པ་ཞིག་ཆགས་བསྡད་ཡོད་པ་རེད། ཁོང་གི་མཁྱེན་རྟོགས་ལྟ་བུར་མཚོན་པ་ཡིན་ན། ཚད་མ་རྣམ་འགྲེལ་གཟིགས་པའི་དུས་ཚོད་ལ་རྨི་ལམ་ཞིག་བྱུང་ནས་ངོ་བོ་དེ་ས་པཎ་ཡིན་པ་ལ་རྣམ་པ་རྒྱ་གར་གྱི་པཎ་གྲུབ་ཀྱི་ཆས་ཅན་ཤངས་རྩེ་ཅུང་ཟད་གུག་པ་ཞིག་གིས་ཚད་མ་རྣམ་འགྲེལ་ལ་མི་ཤེས་རྒྱུ་ཅི་ཡོད། དགག་སྒྲུབ་གཉིས་རེད་གསུངས་ནས་ཚད་མའི་འགྲེལ་པའི་ཕྱག་དཔེ་ཞིག་དུམ་བུ་གཉིས་སུ་བྱས་པ་དེ་གཉིས་ཕྱོགས་གཅིག་ཏུ་སྡོམས་གསུངས་པས། མི་ཕམ་རིན་པོ་ཆེས་དེ་ཕྱོགས་གཅིག་ཏུ་བསྡམས་པ་དང་ལམ་སེང་དེ་རལ་གྲིའི་རྣམ་པ་ཆགས། ཁོང་གིས་མདུན་ན་ཤེས་བྱའི་ཆོས་ཐམས་ཅད་ཡོད་པ་ལྟ་བུར་ཤར་བ་ལ། རལ་གྲི་དེ་གཅིག་གཡུགས་ཡོང་དུས་ཚང་མ་ཅིག་ཅར་དུ་ཆོད་པའི་གཟིམ་ལམ་གསལ་པོ་ཞིག་བྱུང་བ་དང་། སང་ཉིན་ཚད་མར་བལྟས་ཡོང་དུས། ཚད་མ་རྣམ་འགྲེལ་ལ་མི་ཤེས་པ་གཅིག་ཀྱང་མ་བྱུང༌ཞེས་ཁོང་གིས་ཞལ་ནས་གསུངས་ཡོད་པ་རྣམ་ཐར་ནང་མཇལ་རྒྱུ་ཡོད། དེ་ལྟར་ལྷག་པའི་ལྷ་ཡང་མཇལ་ཡོད་པ་གསལ་པོ་ཞེ་དྲག་རེད། སྐུ་ལས་བསྐྱོན་སྟངས་བལྟས་པ་ཡིན་ན། འཇམ་མགོན་མི་ཕམ་རིན་པོ་ཆེས་བཀའ་འགྱུར་པོད་བརྒྱ་ལྷག་ཡོད་པ་གཅིག་པུ་ཚར་བདུན་དཔེ་གཟིགས་གནང་ཡོད་རེད་ཅེས་གསུང་གི་ཡོད་ཅིང་། ང་ཚོས་ཚར་གཅིག་ཀྱང་ཡག་པོ་ཀློག་ཐུབ་རྒྱུ་ཁག་པོ་ཆགས་བསྡད་ཡོད། དེ་བཞིན་ཁོང་སྙུང་གཞི་བཞེས་པའི་སྐབས་སུའང་ཉེ་འཁོར་ནས་བསྟན་འགྱུར་ཕྱག་དཔེ་ཚུར་གཡར་ནས་དཔེ་གཟིགས་གནང་བ་སོགས་དེ་འདྲའི་ཐོག་ནས་སྔ་འགྱུར་བསྟན་པ་ཡོངས་རྫོགས་ཀྱི་ཤིང་རྟ་ཆེན་པོ་ཞིག་ཆགས་ཡོད། དེ་རིང་ཁོང་གི་གཞུང་དང་འབྲེལ་བ་ཡོད་དུས། གཞུང་གི་ཐོག་ནས་ཐོས་བསམ་སློབ་གཉེར་བྱ་རྒྱུ་དང་། དེ་འདྲ་བའི་མཁྱེན་པ་དང་ཤེས་རབ་ཇི་ལྟར་བྱུང་བའི་བརྒྱུད་རིམ་སྐོར་རྩད་གཅོད་བྱས་ནས་ང་རང་ཚོ་ལའང་དེའི་མཁྱེན་པ་དང་རྟོགས་པ་ཡོང་ཐུབ་རྒྱུར་འབད་བརྩོན་ཞུ་ཐུབ་དགོས་པ་དེ་གལ་ཆེན་པོ་ཆགས་བསྡད་འདུག
དེ་བཞིན་ཁོང་གི་གཞུང་གི་ཁུངས་གཏུགས་ས་གཙོ་བོ་དེ། རོང་ཀློང་རྣམ་གཉིས་ཞེས། རོང་ཟོམ་མ་ཧཱ་པཎྜི་ཏ་ཆེན་པོ་དང་། ཀུན་མཁྱེན་ཀློང་ཆེན་པ་གཉིས་ཆགས་བསྡད་ཡོད་རེད། རོང་ཟོམ་མ་ཧཱ་པཎྜི་ཏ་ལྟ་བུར་མཚོན་པ་ཡིན་ན་མཁས་པ་ཆེན་པོ་ཞིག་ཡིན་པ་དང་། སྐབས་དེ་དུས་རྒྱ་གར་གྱི་ པཎྜི་ཏ་དེ་ཚོ་བོད་ལ་སླེབས་པའི་དུས་སྐབས་ཆགས་བསྡད་ཡོད་རེད། རྣམ་ཐར་ནང་བཤད་སྲོལ་ཞིག་ཡོད་རེད། ཕྱོགས་ཀྱི་གླང་པོའི་ཤེས་རབ། ཆོས་ཀྱི་གྲགས་པའི་བརྒལ་བརྟག དབྱིག་གཉེན་ཞབས་ཀྱི་ཐོས་པ། ཙནྡྲ་གོ་མའི་བརྗོད་པ། སློབ་དཔོན་དཔའ་བོའི་རྩོམ་པ། ཞེས་སྐབས་དེ་དུས་ཀྱི་རྣམ་ཐར་ནང་བྲིས་ཡོད་རེད། ད་ལྟ་བཤད་པ་ཡིན་ན། ང་ཚོས་རྙིང་མའི་ཕྱོགས་ཞེན་བྱེད་ཀྱི་འདུག་ཅེས་གསུང་སྲིད། སྐབས་དེ་དུས་ཀྱི་གནས་སྟངས་དེ་གསར་རྙིང་དབར་ཁྱད་པར་ཞེ་པོ་ཡོད་མ་རེད། བོད་སྔ་རབས་པའི་དུས་ཚོད་ལ་མཁས་པ་དེ་དག་བྱུང་ཡོད་རེད། ཁོང་གིས་གསུངས་པ་ཞིག་ལ། བདག་ཐོས་པ་ཆུང་བ་ཡང་མ་ཡིན་ཏེ། ཆོས་ཐམས་ཅད་ལ་མ་ཐོས་པ་མེད། ཐོས་པ་ཆེ་བ་ཡང་མ་ཡིན་ཏེ། ཆོས་ཕལ་ཆེ་བ་ཚར་རེ་ལས་མ་ཐོས། ཞེས་ཐོས་བསམ་སློབ་གཉེར་གནང་སྟངས་ཧ་ལས་པའི་ཤུགས་ཆེན་པོ་ཆགས་བསྡད་ཡོད་རེད། ད་ལྟ་ངེས་ཤེས་རིན་པོ་ཆེའི་སྒྲོན་མེའི་ཁུངས་གཅིག་རོང་ཟོམ་ལ་གཏུགས་ཡོད་རེད། དེའི་ནང་ནས། ལྟ་བ་དགག་གཉིས་གང་ལྟར་སྨྲ།། དྲི་བ་དྲུག་པའི་ནང་ཡོད་པ། མི་གཅིག་མཐུན་སྣང་ལྟ་བྱ་གང་།། ཞེས་པ་དེ་གཉིས་རོང་ཟོམ་མ་ཧཱ་པཎྜི་ཏའི་གསུངས་ལ་ཁུངས་གཏུགས་ཤིང་ཁོང་གི་མཚན་ཡང་ཚུར་དྲངས་ཡོང་གི་འདུག དེ་བཞིན་ཀུན་མཁྱེན་ཀློང་ཆེན་པ་ལྟ་བུར་མཚོན་པ་ཡིན་ན། སྐབས་དེ་དུས་ཇོ་བོ་རྗེ་བོད་ལ་ཕེབས་བསྡད་ཡོད་རེད། ཇོ་བོ་རྗེའི་སློབ་མ་ཁུ་རྔོག་བྲོམ་གསུམ་ཡོད་པའི་ནང་ནས། རྔོག་ལེགས་པའི་ཤེས་རབ་ཀྱིས་གསང་ཕུ་ནེའུ་ཐོག་དགོན་པ་ཕྱག་བཏབ་ཅིང་། དེ་ཡང་ཇོ་བོ་རྗེས་དགོན་པ་ཕྱག་མ་བཏབ་བར་གསང་བ་བྱེད་ཅེས་གསུངས་པར་བརྟེན་ནས་གསང་ཕུ་ཞེས་པ་མིང་ཐོགས་འདུག ཀུན་མཁྱེན་ཀློང་ཆེན་པ་གདན་ས་དེའི་ནང་ནས་ཐོན་པ་ཆགས་བསྡད་ཡོད། དེ་བཞིན་ས་སྐྱ་པཎྜི་ཏ་དང་། རྗེ་ཙོང་ཁ་པ་ལ་སོགས་པ་མཁས་པ་བསམ་གྱིས་མ་ཁྱབ་པ་མང་པོ་ཞིག་གདན་ས་དེ་ནས་ཐོན་ཡོད་པ་རེད། དཔལ་སྤྲུལ་རིན་པོ་ཆེས་བསྟོད་པ་ཆེན་པོ་ཞིག་ཕུལ་ཡོད་རེད། ལྔ་རིགས་ཉིན་བྱེད་སྨྲ་བ་ས་པཎ་རྗེ།། མདོ་སྔགས་བསྟན་པའི་འབྱུང་གནས་ཙོང་ཁ་པ།། ཡོངས་རྫོགས་བསྟན་པའི་མངའ་བདག་ཀློང་ཆེན་ཞབས།། ཅེས་ཀུན་མཁྱེན་ཀློང་ཆེན་རབ་འབྱམས་པ་དང་། ས་སྐྱ་པཎྜི་ཏ། རྗེ་ཙོང་ཁ་པ་བཅས་གསུམ་ལ་གངས་ཅན་འཇམ་དབྱངས་རྣམ་གསུམ་ཞེས་བསྟོད་པ་ཆེན་པོ་ཕུལ་ཡོད་རེད། ཁོང་རྣམ་པ་གསུམ་གྱི་གཙོ་འདོན་བྱེད་སྟངས་དེ་ཏོག་ཙམ་མི་འདྲ་བ་ཡོད་རེད། ཀློང་ཆེན་པས་གཙོ་བོ་སྔ་འགྱུར་གྱི་ལྟ་གྲུབ་དང་། དེའི་ནང་ནས་རྫོགས་ཆེན་གྱི་གཞི་ལམ་འབྲས་གསུམ་གྱི་རྣམ་གཞག་མཛོད་བདུན་དང་། རང་གྲོལ་སྐོར་གསུམ། ངལ་གསོ་སྐོར་གསུམ་སོགས་ཀྱི་ཕྱག་དཔེ་ང་ཚོས་མཇལ་རྒྱུ་ཡོད་པ་དང་། ས་པཎ་ནི་རིག་པའི་གནས་ལྔ་ལ་མཁས་པ་ཡིན་པ་གང་ཞིག་ལ་ཚད་མ་ལ་གཙོ་འདོན་གནང་སྟེ་ཚད་མ་རིགས་གཏེར་ལྗགས་རྩོམ་མཛད་པ། སྐབས་དེ་དུས་ཁ་ཆེའི་པཎ་ཆེན་ཤཱཀྱ་ཤྲཱི་བོད་ལ་ཕེབས་ནས་ཚད་མ་རིགས་གཏེར་ལེགས་སྦྱར་སྐད་ལ་བསྒྱུར་ཞེས་གསུངས་འདུག རྒྱ་ཆོས་བོད་སྐད་ལ་འགྱུར་བ་ཡོད་རེད། བོད་ཆོས་རྒྱ་ལ་འགྱུར་བ་ཐོག་མ་དེ་རེད་ཅེས་བསྔགས་བརྗོད་མཛད་འདུག རྗེ་ཙོང་ཁ་བ་ལྟ་བུར་ཆ་བཞག་ན། གཞུང་ཆེན་བཀའ་པོད་ལྔ་ལ་མཁས་པར་གྲགས་ཤིང་། དམིགས་བསལ་དབུ་མའི་ཐོག་ལ་གཙོ་འདོན་གནང་ནས་དེ་ནས་རྣམ་དཔྱོད་ཤུགས་ཆེ་ཡོང་བསྡད་འདུག གཙོ་བོ་ཞུ་རྒྱུ་དེ་མི་ཕམ་རིན་པོ་ཆེ་ཡིས་ཁུངས་གཏུགས་ས་གཅིག་དེ་ཀློང་ཆེན་པ་ཆགས་བསྡད་ཡོད་རེད། དྲི་བ་གཉིས་པ་ཉན་རང་བདག་མེད་གཉིས་རྟོགས་སམ།། ཅེས་དང་། དྲི་བ་བདུན་པ་དབུ་མ་ཁས་ལེན་ཡོད་དང་མེད། ཅེས་མི་ཕམ་རིན་པོ་ཆེས་ཀློང་ཆེན་པའི་མཚན་དྲངས་ནས་འགྲེལ་བཤད་གནང་ཡོད་རེད། དེ་རིང་དུས་ཚོད་གཅིག་དེ། ཀུན་མཁྱེན་ཆེན་པོ་རིག་འཛིན་འཇིགས་མེད་གླིང་པའི་འདས་མཆོད་དུས་དྲན་ཁེལ་བསྡད་ཡོད་རེད། རྩ་བས་ཁོང་གི་རྣམ་ཐར་ནང་གསལ་ཡོད་རེད། ཡི་གེ་འབྲི་ཀློག་ནས་བཟུང་སྟེ་བཀའ་འགྱུར། བསྟན་འགྱུར། རིག་འཛིན་བརྒྱུད་པའི་གཞུང་དེ་ཚོར་སྤྲོ་བ་རྒྱུན་མི་ཆད་པའི་ཐོག་ནས་ཉིན་སྣང་བ་དང་མཚན་སྒྲོན་མེ་ལ་བསྟེན་ནས་སྤྲོ་བ་རྒྱུན་མི་ཆད་པས་དཔེ་གཟིགས་གནང་བ་ལས། དེང་སང་ཞོགས་པ་དགེ་རྒན་གྱིས་དཔེ་ཁྲིད་དང་། ཉིན་གུང་སྐྱོར་དཔོན་གྱིས་དཔེ་ཁྲིད་གནང་བ་ལྟ་བུ་ཁོང་གིས་དེ་འདྲའི་དགེ་རྒན་བསྟེན་མྱོང་མེད་ཅིང་། ཡིན་ནའང་ཁོང་དཔལ་གྱི་བསམ་ཡས་མཆིམས་ཕུར་སྒྲུབ་པ་བཞུགས་སྐབས་སུ་ཀུན་མཁྱེན་ཀློང་ཆེན་པས་ཡེ་ཤེས་ཀྱི་སྐུའི་རྗེས་སུ་བཟུང་བ་ཚར་གསུམ་བྱུང་འདུག དེའི་ཐོག་ནས་དམིགས་བསལ་རྫོགས་ཆེན་གྱི་གཞུང་ལུགས་ལ་མཁྱེན་རྟོགས་ཆེན་པོ་ཆགས་འདུག དོན་ལ་ངེས་པའི་གདེང་རྙེད་ན།། ཐུགས་ནི་ཆོས་དར་འབུམ་ཕྲག་བརྡོལ།། གསུངས་པ་བཞིན་བཀའ་དྲིན་ཆེན་པོ་ཆགས་བསྡད་འདུག གཞན་བཀའ་དྲིན་གཅིག་དེ། སྐབས་དེ་དུས་སྔ་འགྱུར་རྒྱུད་འབུམ་རིན་པོ་ཆེ་དཔེ་འཚོལ་བསྡུ་དང་འབྲི་བཞེངས་གནང་འདུག དེ་རྗེས་སྡེ་དགེའི་རྒྱལ་པོ་ཡུམ་སྲས་དང་འབྲེལ་བ་གནང་ནས་ད་ལྟ་རྒྱུད་འབུམ་རིན་པོ་ཆེ་དཔེ་མ་འདྲ་བ་ཁག་ཅིག་ཡོད་རེད། ད་ལྟ་ང་ཚོར་པར་ཤིང་ཡོད་མཁན་རྒྱུད་འབུམ་སྡེ་དགེའི་དེ་གཅིག་པུ་རེད། དེ་མ་ཡིན་པའི་བྲིས་མ་གཞན་བཅུ་གསུམ་བཅུ་བཞི་ཙམ་ཞིག་འདུག དེ་རིང་དུས་དྲན་དེ་ཀུན་མཁྱེན་ཆེན་པོ་རིག་འཛིན་འཇིགས་མེད་གླིང་པའི་འདས་མཆོད་དང་འབྲེལ་བ་ཡོད་དུས་ཁོང་ཡང་བཀའ་དྲིན་ཆེན་པོ་ཆགས་བསྡད་ཡོད་རེད། མདོར་ན་ངས་ཞུ་རྒྱུ་དེ་ཡིན་ཞེས་གསུངས་འདུག །
གསར་འགོད་པ། བསོད་ནམས་ཕུན་ཚོགས།
