སྲིད་སྐྱོང་ཡུ་རོབ་ཁུལ་དུ་གཞུང་འབྲེལ་ཕྱོགས་ཕེབས་གནང་གྲུབ་འདུག
ཟླ་འདིའི་ཚེས་༡༥ ནས་བཟུང་དཔལ་ལྡན་སྲིད་སྐྱོང་ཧྥ་རན་སི་དང་བྷར་སི་ལོ་ན་བཅས་སུ་གནད་ཡོད་མི་སྣ་མཇལ་འཕྲད་དང་ས་གནས་བོད་མི་ཚོར་གཏམ་བཤད། དེ་བཞིན་བོད་དོན་ཞུ་སྐུལ་སོགས་གནང་ཡོད་འདུག
ཟླ་འདིའི་ཚེས་༡༧ ཉིན་སྲིད་སྐྱོང་སྤེན་པ་ཚེ་རིང་གིས་ཧྥ་རན་སིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གྲོས་ཚོགས་གོང་མའི་འཐུས་མི་ཇ་ཁ་ལིན་ཨུས་ཏ་ཆི་(Jacqueline Eustache-Brinio) ་དང་པེ་རི་སིའི་གྲོང་སྡེའི་སྤྱི་ཁྱབ་ཇུ་ལིན་བྷ་ཇཊ་(Julien Bachard) གཉིས་མཇལ་འཕྲད་གནང་རྗེས། པེ་རི་སིར་གནས་སྡོད་བོད་མི་རྣམས་ལ་བོད་དོན་སྐོར་གསུང་བཤད་གནང་ཡོད་འདུག སྐབས་དེར་སྲིད་སྐྱོང་གིས་༸གོང་ས་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བོད་མི་རྣམས་བཙན་བྱོལ་དུ་རྒྱུན་གནས་ཐོག་བོད་དོན་འཐབ་རྩོད་ལ་འབད་འབུངས་ལྷོད་མེད་གནང་བཞིན་ཡོད་པ་དང་། ད་ལམ་མགོན་པོ་གང་ཉིད་མཆོག་སྐུ་ན་བགྲེས་པོ་ཡིན་དུས་སྔར་རྒྱུན་བཞིན་མཛད་པ་སྐྱོང་དཀའ་བས། བོད་མི་རྣམས་ནས་མགོན་པོ་གང་ཉིད་ཀྱི་དབུ་འོག་དཔུང་འདེགས་ཞུས་ཏེ། བོད་དོན་རང་དབང་འཐབ་རྩོད་ཐོག་ཤུགས་སྣོན་རྒྱག་དགོས་པ་དང་། སྲིད་སྐྱོང་ནས་ཀྱང་འཛམ་གླིང་ཡུལ་གྲུ་མང་པོར་ཆེད་བཅར་གྱིས་བོད་དོན་ཐོག་རྒྱབ་སྐྱོར་ཐབས་འཚོལ་དང་། བོད་ཀྱི་གནད་དོན་སྐོར་གོ་རྟོགས་དྲིལ་བསྒྲགས་གནང་བཞིན་ཡོད་ཅེས་དང་། ད་ལྟའི་རྒྱ་ནག་གི་སྲིད་འཛིན་ཞི་ཅིན་ཕིང་གི་སྲིད་དབང་སྒེར་གཅོད་ཀྱི་ལམ་ལུགས་འོག་རྒྱ་ནག་གིས་དབང་སྒྱུར་བྱས་པའི་མི་རིགས་རྣམས་རྒྱ་རིགས་སུ་བཙན་སྒྱུར་གྱི་ལས་གཞི་གཞི་རྒྱ་ཆེན་པོ་སྤེལ་མུས་ལྟར། བོད་ནང་དུ་བོད་བརྒྱུད་ནང་བསྟན་གཙོས་པའི་བོད་ཀྱི་ཐུན་མོང་མ་ཡིན་པའི་རིག་གཞུང་རྣམས་ཐབས་ལམ་སྣ་ཚོགས་སྤྱད་དེ་རྩ་མེད་བཏང་དང་གཏོང་བཞིན་པ་མ་ཟད། བོད་ཡིག་སློབ་གྲྭ་ཁག་བཙན་པོས་སྒོ་བརྒྱབ་སྟེ་བོད་ཕྲུག་རྣམས་མི་སེར་སྤེལ་ཡུལ་གཏན་འཇགས་སློབ་གྲྭ་ཁག་ཏུ་བཙན་འཇུག་བྱས་ནས། བོད་མི་རིགས་ཀྱི་ངོ་བོ་རྩ་མེད་གཏོང་རྒྱུའི་འབད་རྩོལ་བྱེད་བཞིན་པ་གསལ་བཤད་དང། ལྷག་པར་དུ་རྒྱ་ནག་གཞུང་གིས་བོད་མིའི་བླ་སྤྲུལ་རྣམ་པའི་ཡང་སྲིད་ངོས་འཛིན་གནང་སྒོར་ཐེ་བྱུས་བྱེད་ཆེད་ཕྱི་ལོ་༢༠༠༧ ལོར་བཀའ་རྒྱ་ཨང་ ༥ པ་ཞེས་པ་གཏན་འབེབས་བྱས་ཡོད་པ་དང་། དེ་ཉིད་ཀྱི་རྒྱ་ནག་རང་གི་ཆབ་སྲིད་ཀྱི་ཁེ་ཕན་ཆེད་ཡིན་ཞིང་། དེ་ཡང་གཙོ་བོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་ཆེད་དམིགས་པ་ཞིག་ཡིན་པ་གསལ་བཤད་གནང་བའི་ཐོག བོད་མི་རྣམས་ནས་དེ་དོན་རང་གི་ཆོས་དང་རིག་གཞུང་། སྐད་ཡིག་ངོ་བོ་སྲུང་སྐྱོབ་བྱ་རྒྱུར་སྔར་བས་དོ་སྣང་དང་དོ་ཁུར་ཆེ་བ་བཞེས་དགོས་པའི་ལམ་སྟོན་གནང་ནས་སྲིད་སྐྱོང་གི་ཡུ་རོབ་ཁུལ་གྱི་མཛད་འཆར་མཐའ་མ་དེ་གྲུབ་སྟེ་ཚེས་༡༧ ཕྱི་དྲོར་རྒྱ་གར་དུ་ཕེབས་ཐོན་གནང་ཡོད་འདུག
བོད་མིའི་སྒྲིག་འཛུགས་ཀྱིས་སྤེལ་བའི་གནས་ཚུལ་ལྟར་ན། ཟླ་འདིའི་ཚེས་༡༥ ཉིན་སྲིད་སྐྱོང་གིས་བྷར་སི་ལོ་ནར་གནས་སྡོད་བོད་མི་རྣམས་ལ་གལ་ཏེ་རྒྱ་ནག་གི་སྲིད་འཛིན་དང་ལྷན་དུ་འབྲེལ་བ་སླར་གསོ་བྱུང་ནའང་རེ་བ་བྱ་རྒྱུ་ཧ་ཅང་ཁག་པོ་ཡིན་ཚུལ་དང་། རྒྱལ་སྤྱིའི་སྤྱི་ཚོགས་ནང་བོད་དེ་རང་བཙན་རྒྱལ་ཁབ་ཡིན་པའི་གནས་བབ་ཐོག་ཤུགས་རྒྱག་བཞིན་པའི་སྐོར་གསུང་བཤད་གནང་བ་དང་། ལོ་རྒྱུས་མཁས་པ་མ་ཧི་ཀལ་ཝེན་ཝལ་གྱིས་བརྩམས་པའི་བོད་ཀྱི་གནད་བསྡུས་ ༢༠།༢༠ དང་། རྒྱ་ནག་གི་སློབ་དཔོན་ལའོ་ཡིས་བརྩམས་པའི་དཔེ་དེབ་གཉིས་ངོ་སྤྲོད་གནང་ཞིང་། རྒྱལ་སྤྱིའི་སྤྱི་ཚོགས་ཀྱིས་བོད་དེ་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ཆ་ཤས་རེད་ཅེས་བརྗོད་ཚེ་རྒྱལ་སྤྱིའི་ཁྲིམས་དང་འགལ་གྱི་ཡོད་སྐོར་གསུངས་ཡོད་འདུག ཉིན་དེར་ཀ་ཊ་ལན་རང་སྐྱོང་མངའ་སྡེའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་དུ་བོད་དོན་དང་འབྲེལ་བའི་ཉན་ཞིབ་གནང་བ་དང་། བི་ལན་ཀུར་ན་གཙུག་ལག་སློབ་གཉེར་ཁང་(Blanquerna University) དུ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གསུང་བཤད་ཀྱང་གནང་ཡོད་འདུག།
གསར་འགོད་པ། བློ་བཟང་རྒྱ་མཚོ།
