༧གོང་ས་མཆོག་གིས་བླ་མའི་ཆབ་སྲིད་ལ་ངོ་རྒོལ་ཡོད་སྐོར་གྱི་བཀའ་སློབ་གནང་།
ཟླ་འདིའི་ཚེས་ ༢༢ ཉིན་༸གོང་ས་མཆོག་གིས་ལ་དྭགས་ཟངས་དཀར་༸རྒྱལ་བའི་ཕོ་བྲང་དུ་ཟངས་དཀར་སེར་སྐྱ་མང་ཚོགས་རྣམས་ལ་རྗེ་ཙོང་ཁ་པ་ཆེན་པོས་མཛད་པའི་ལམ་རིམ་བསྡུས་དོན་གྱི་བཀའ་ཁྲིད་གནང་བ་དང་། ཆོས་ལུགས་མཐུན་སྒྲིལ་དགོས་སྐོར་དང་། བླ་མའི་ཆབ་སྲིད་ལ་ངོ་རྒོལ་ཡོད་སྐོར་གྱི་བཀའ་སློབ་གནང་།
དེ་ཡང་བོད་མིའི་སྒྲིག་འཛུགས་ཀྱི་དྲ་གནས་ཐོག་གནས་ཚུལ་སྤེལ་བ་ལྟར་ན། བཀའ་ཁྲིད་གནང་སྐབས་༸གོང་ས་མཆོག་གིས་བཀའ་སློབ་བསྩལ་དོན། “གཙོ་ཆེ་སེར་སྐྱ་མི་མང་རྣམས་དད་པ་དང་དམ་ཚིག་གཡོ་བ་མེད་པ་རེད། དེར་བརྟེན་ངོས་ནས་ཀྱང་དད་པ་དང་དམ་ཚིག་གཡོ་བ་མེད་པའི་མི་མང་རྣམས་ཐེངས་གཅིག་ཐུག་ནས་གཙོ་ཆེ་ཤོས་སངས་རྒྱས་པའི་ཆོས་ངོ་སྤྲོད་བྱ་རྒྱུའི་བསླབ་བྱ་ཚིག་གསུམ་ལྟ་བུ་རེད། གང་ལྟར་མི་ལ་ཕན་ཐོགས་དང་སེམས་པ་སྐྱིད་པོ་ཡོང་རྒྱུའི་ཐོག་ནས་མི་ཚེ་སྐྱིད་པོ་ཡོང་རྒྱུ་དེ་ངོས་ཀྱི་དམིགས་ཡུལ་གཙོ་བོ་རེད། དེ་རིང་དེའི་ཐོག་ཁྱེད་ཚོར་སྐད་ཆ་ཤོད་རྒྱུའི་གོ་སྐབས་བྱུང་བར་ཧ་ཅང་དགའ་པོ་བྱུང་” ཞེས་གསུངས་ཡོད་པ་རེད།
༧གོང་ས་མཆོག་གིས་ཐུགས་སྐྱེད་དམ་བཅའ་གཉིས་པ་ཆོས་ལུགས་མཐུན་སྒྲིལ་སྐོར་བཀའ་སློབ་བསྩལ་དོན། “ཆོས་པ་ཞིག་ཡིན་པའི་ངོས་ནས་སངས་རྒྱས་པའི་ཆོས་ཉམས་ལེན་བྱས་པ་དེས་རང་ལ་ཕན་པ་ལྟར་འཛམ་གླིང་ནང་གི་ཆོས་བརྒྱུད་རྒྱ་གར་ནང་ཆ་བཞག་ནའང་གཅེར་བུ་བ་དང་གྲངས་ཅན་པ། རིགས་བྱེད་མཐའ་པ་དང་རྒྱལ་བ་པ། སྤྱོད་པ་བ་ཟེར་བ་ལྟ་བུ་ཆོས་བརྒྱུད་མང་པོ་ཡོད། དེང་སྐབས་ངོས་དང་འབྲེལ་བ་ཤུགས་ཆེ་བ་འདི་གཅེར་བུ་བའི་ཆོས་བརྒྱུད་རེད། རྟོག་གེ་འབར་བའི་ནང་ལྟ་གྲུབ་མི་འདྲ་བ་དེ་དག་ཧ་ཅང་ཞིབ་ཚགས་པོ་གསུང་ཡོད། དེང་སྐབས་མུ་སྟེགས་པ་ཚོས་དེ་ཙམ་ཞིབ་ཚགས་པོ་བཤད་མཁན་ཉུང་ཉུང་རེད་འདུག རྒྱ་གར་ནང་སངས་རྒྱས་བཅོམ་ལྡན་འདས་མ་བྱུང་གོང་ཆོས་བརྒྱུད་གང་ཙམ་ཡོད། སངས་རྒྱས་བཅོམ་ལྡན་འདས་བྱུང་ཚར་རྗེས་རིམ་པས་ཇིའུ་ཆོས་བརྒྱུད། དེ་བཞིན་ཡེ་ཤུ་དང་ཁ་ཆེ། སྔ་མོ་ཛོ་ར་ཨ་སི་ཊིན་Zorastrian ཟེར་བ་པར་ཤི་ཡ་ Persia ནས་བསླེབས་པ་རེད། དེང་སྐབས་གྲོང་ཁྱེར་མུམ་བྷེའི་ནང་མི་འབུམ་གཅིག་མིན་ཙམ་ལས་མེད་སྟབས་ཉུང་ཉུང་རེད། འོན་ཀྱང་ཞི་བདེ་བག་ཕེབས་ངང་གནས་བཞིན་འདུག དེར་བརྟེན་རྒྱ་གར་ནང་རིས་སུ་མ་ཆད་པའི་རྒྱ་གར་རང་ལ་ཡོད་པའི་ཆོས་བརྒྱུད་དེ་དང་རིས་སུ་མ་ཆད་པའི་འཛམ་གླིང་ཕྱི་ནས་ཡོང་བའི་ཆོས་བརྒྱུད་དེ་དག་ཚང་མ་སྤྱི་ཡོངས་ཆ་ནས་བཤད་པ་ཡིན་ན་ཕལ་ཆེར་ཐུགས་མཐུན་ཁྲིམས་གཙང་ཧ་ཅང་ཡག་པོ་རེད་འདུག མཁས་པ་མཁས་པའི་ནང་ན་མཛེས། ཟེར་བ་ལྟར་ལྟ་གྲུབ་ཐོག་ནས་རྩོད་པ་རྒྱག་རྒྱུ་དེ་འདྲ་སྔ་མོ་ནས་ཡོད། སྤྱི་ཡོངས་ཐོག་ནས་གཅིག་གིས་གཅིག་ལ་གུས་བརྩི་བྱས། བརྩི་བཀུར་བྱས་དེ་འདྲའི་ཐོག་ནས་རྒྱ་གར་ནང་འཛམ་གླིང་གི་ཆོས་ལུགས་གཙོ་ཆེ་བ་ཡོངས་རྫོགས་འཆམ་མཐུན་ངང་གནས་མུས་རེད། དེར་ངོས་རང་ཡིད་འཕྲོག་བཞིན་འདུག ལྷག་པར་དེང་སྐབས་འཛམ་གླིང་ནང་ཆོས་ལུགས་མི་འདྲ་བ་རྒྱུ་མཚན་དུ་བྱས་ནས་གསོད་རེས་གཏོང་བཞིན་འདུག འཁྲུག་པ་རྒྱག་བཞིན་འདུག འདི་འདྲ་མཐོང་སྐབས་ཨ་ཙི་ཆག་སྒོ་དཔེ་སྲིད་ཀྱི་མ་རེད། ཆོས་བརྒྱུད་དེ་དག་ཚང་མས་བྱམས་པ་དང་བརྩེ་བ། བཟོད་པ། ཆོག་ཤེས་ཆོས་ལུགས་ཚང་མས་གསུང་བཞིན་ཡོད་”ཅེས་ནང་ཆོས་སློབ་གཉེར་དགོས་སྐོར་གྱི་བཀའ་སློབ་གནང་།
༧གོང་ས་མཆོག་གིས་ཆོས་ལུགས་མཐུན་སྒྲིལ་སྐོར་ལ་བཀའ་སློབ་གནང་དོན། “དེ་སྔ་བོད་ནང་ང་ཚོས་ཆོས་བརྒྱུད་མི་འདྲ་བ་རྒྱུ་མཚན་དུ་བྱས་ནས་འཁྲུག་པ་བརྒྱབ་པ་དེ་འདྲ་བྱུང་ཡོད། ཅོལ་ཆུང་རེད། གླེན་པ་རེད། མིག་རྒྱང་ཐུང་ཐུང་། བློ་རྒྱ་ཆུང་ཆུང་བྱས་པ་རེད། ད་ཆ་ལ་དྭགས་ནང་ལ་ཡིན་ནའང་རེད། འདིར་ཟངས་དཀར་ནང་ལ་མཚོན་ནའང་ཆོས་བརྒྱུད་མི་འདྲ་བའི་རྒྱུ་མཚན་དུ་བྱས་ནས་ཕྲན་བུ་བསམ་བློ་གུ་དོག་པོ་དེ་འདྲ་གལ་སྲིད་ཡོང་བཞིན་ཡོད་ཚེ་འདི་དོར་བྱ་རེད། བསམ་བློ་དེ་འདྲ་རྩ་བ་ནས་གཏོང་མི་རུང་། ཚང་མ་མཐུན་པོ་བྱེད་རྒྱུ་ཧ་ཅང་གལ་ཆེན་པོ་རེད། ངོས་ཀྱི་ལས་འགན་གསུམ་པ་འདི་བོད་ཀྱི་དོན་དུ་རེད། ངོས་རང་བོད་པ་རེད། ༸རྒྱལ་དབང་གི་མིང་ཡོད། བོད་རྒྱ་ཆེ་མི་མང་བོད་མི་ས་ཡ་དྲུག་ལྷག་ཙམ་གྱིས་ངོས་ལ་རེ་བ་རྒྱག་བཞིན་ཡོད། འོན་ཀྱང་ཆབ་སྲིད་ཀྱི་གནས་ཚུལ་ངོས་ཀྱིས་མཚམས་བཞག་པ་རེད། ཕྱི་ལོ་༢༠༠༡ དེ་ནས་༢༠༡༡ ནས་ངོས་ཀྱི་ཆབ་སྲིད་ཀྱི་ལས་འགན་ཆ་ཚང་བཞག་པ་ཡིན། དེ་ཙམ་མ་ཟད་༸རྒྱལ་དབང་ན་རིམ་གྱིས་༸གོང་ས་ལྔ་པའི་སྐབས་ནས་བཟུང་༸རྒྱལ་དབང་ན་རིམ་གྱིས་ཆོས་སྲིད་གཉིས་ཀྱི་དབུ་ཁྲིད་གནང་ནས་ལོ་༤༠༠ ཙམ་ཕྱིན་པ་རེད། ལམ་སྲོལ་དེ་ངོས་ཀྱིས་མ་སྐུལ་དང་བླངས་ཐོག་ནས་སྤོབས་པ་དང་བཅས་མཚམས་བཞག་པ་ཡིན། དེར་བརྟེན་བླ་མས་ཆབ་སྲིད་ནང་དུ་ཐེ་གཏོགས་ལྟ་བུ་བྱས་ནས་འགྲོ་སྐབས་དེ་སྔ་ང་ཚོའི་ལོ་རྒྱུས་ནང་དུ་མཚོན་ནའང་དེས་བསྟན་པ་ལ་ཕན་རྒྱུའི་ཚབ་ཏུ་བསྟན་པ་ལ་གནོད་ཡོད། ངོས་ཀྱིས་ནམ་རྒྱུན་ཤོད་བཞིན་ཡོད། བླ་མའི་ཆབ་སྲིད་lama politics གཅིག་སླེབ་བཞིན་འདུག ལ་དྭགས་ནང་དུའང་བླ་མའི་ཆབ་སྲིད་ཡོང་བཞིན་ཡོད་པ་ལྟ་བུ་འདུག དེ་ཚོའི་གྲས་མི་དགོས་པ་རེད། དེས་བསྟན་པ་ལ་ཕན་རྒྱུའི་ཚབ་ཏུ་བསྟན་པ་ལ་གནོད་རྒྱུ་རེད། འདི་བསམ་བློ་བྱབ་ཆུང་རེད། མིག་རྒྱང་ཐུང་ཐུང་རེད། བློ་གཏི་ཐུག་བྱས་ནས་བླ་མའི་ཆབ་སྲིད་ཡོང་བཞིན་ཡོད། དེ་ཚོའི་གྲས་རྩ་བ་ནས་མི་དགོས་པ་རེད། བླ་མའི་ཆབ་སྲིད་ལ་ངོས་ཀྱིས་ངོ་རྒོལ་མཐར་ཕྱིན་པ་ཡོད། ངོས་ཀྱིས་སྒེར་ལ་མི་དགའ་བ་བྱས་པ་གང་ཡང་མེད། སངས་རྒྱས་བཅོམ་ལྡན་འདས་དང་ཀླུ་སྒྲུབ་ཡབ་སྲས་ཀྱི་བཞིན་རས་ལ་བསམ་བློ་བཏང་ནས་ང་ཚོ་ཀླུ་སྒྲུབ་ཡབ་སྲས་ཀྱི་རྗེས་འབྲང་ཉུང་ཤས་ཤིག་ཡོད་པ་དེ་དག་གིས་ཕན་ཚུན་གཅིག་གིས་གཅིག་ལ་ཆབ་སྲིད་རྩེད་བ་ལྟ་བུ་བྱས་ནས་ཕྱིན་པ་ཡིན་ན་དེ་དག་གང་དགོངས་རྒྱུ་རེད། ༸རྒྱལ་བ་ཞི་ཁྲོ་རབ་འབྱམས་མི་མངོན་དབྱིངས་ནས་གཟིགས་བཞིན་ཡོད། ང་ཚོ་འདིར་ཉུང་ཤས་ཤིག་ཡོད་པ་དེ་དག་གིས་སངས་རྒྱས་ཀྱི་བསྟན་པ་ཕྱོགས་གཅིག་ནས་བསམ་བློ་གཏོང་སྐབས་ཉམས་དམའ་བའི་དུས་ཚོད་རེད། ང་ཚོ་བོད་ལ་མཚོན་ན་གནས་སྟངས་ཧ་ཅང་ཐབས་སྐྱོ་པོ་ཞིག་སྒང་ལ་ཡོད། དེ་འདྲའི་སྐབས་འདིར་ཉུང་ཤས་ཤིག་ལས་མེད་པ་དེ་དག་གིས་ནང་ཁུལ་ང་དང་ཁོ་ཟེར་ནས་བསྡད་པ་ཡིན་ན་བྱབ་ཆུང་རེད། དངོས་གནས་ཆོས་ལ་བརྟེན་ནས་དགེ་བ་གསོག་རྒྱུའི་ཚབ་ཏུ་ཆོས་ལ་བརྟེན་ནས་སྡིག་པ་གསོག་རྒྱུ་ཞིག་ཆགས་བཞིན་ཡོད། འདི་ཁྱེད་ཚོ་ཚང་མས་བསམ་བློ་ཐོངས། ཤེས་པར་བྱོས། ང་ཚོ་མ་འོངས་པར་ཐུག་རྒྱུ་དེ་འདྲ་ཡོང་སྲིད། མུ་མཐུད་ནས་ཐུག་རྒྱུ་བྱུང་ན་ངོས་ཀྱི་སྐད་ཆ་འདི་སྙིང་གཏམ་ཡིན། མ་འོངས་པར་འདི་ཁུལ་ཡོང་རྒྱུ་ཁག་པོ་ཆགས་ན་སྐད་ཆ་འདི་ཁ་ཆེམས་ཡིན། བོད་ཀྱི་རིག་གཞུང་མི་ཉམས་གོང་འཕེལ་དང་ཉམས་པ་སླར་གསོའི་ཆེད་ངོས་ཀྱིས་ནུས་པ་གང་ཡོད་འདོན་བཞིན་ཡོད་”ཅེས་བཀའ་སློབ་བསྩལ་རྗེས་ཐོག་མར་པཎ་གྲུབ་བཅུ་བདུན་གསོལ་འདེབས་བཀའ་ཁྲིད་མཛད། དེ་ནས་རྗེ་ཙོང་ཁ་པ་བློ་བཟང་གྲགས་པས་མཛད་པའི་ལམ་རིམ་བསྡུས་དོན་གྱི་ཆོས་འབྲེལ་དབུ་འཛུགས་མཛད་པ་དང་། ཕྱི་ཚེས་༢༣ ཉིན་ཐུགས་རྗེ་ཆེན་པོ་སྤྱན་རས་གཟིགས་ཀྱི་བཀའ་དབང་བསྩལ་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།
