གྷ་ཛ་བསྐྱར་གསོའི་ཆེད་ཞི་བདེ་མཐུན་ཚོགས་གསར་འཛུགས་དང་དེ་ལ་སྐྱོན་བརྗོད།

ཨ་རིའི་སྲིད་འཛིན་ཊོམ་གྱིས་སྣེ་ཁྲིད་དེ་གྷ་ཛའི་ནང་ཞི་བདེ་སྐྲུན་ཐབས་ཆེད་དུ་ཞི་བདེ་མཐུན་ཚོགས་ཞེས་པ་ཞིག་གསར་འཛུགས་གནང་ཡོད་པ་དང་། མཐུན་ཚོགས་དེའི་ནང་འཛམ་གླིང་ནང་གི་གནད་ཡོད་རྒྱལ་ཁབ་མང་པོ་ཞིག་འཛུལ་ཞུགས་བྱས་མི་འདུག ཁེ་ན་ཌའི་སྲིད་བློན་གྱིས་ཉེ་ཆར་ཨ་རི་ལ་སྐྱོན་བརྗོད་བྱས་པའི་རྐྱེན་གྱིས་མཐུན་ཚོགས་དེའི་ནང་གདན་འདྲེན་ཞུས་མི་འདུག

ཕྱི་ལོ་༢༠༢༦ ཟླ་༡ ཚེས་༢༣ ཉིན་(NBC News) གསར་ཁང་གིས་གནས་ཚུལ་སྤེལ་དོན་ལྟར་ན། ཁ་སང་ཚེས་༢༢ ཉིན་གྷ་ཛའི་ནང་གི་དམག་འཁྲུག་དེ་ཞི་འཇམ་ཡོང་ཐབས་ཆེད་དུ་ཨ་རིའི་སྲིད་འཛིན་ཊོམ་གྱིས་གསར་འཛུགས་གནང་བའི་ཞི་བདེ་མཐུན་ཚོགས་(Board of Peace)ཞེས་པ་ཞིག་ཁ་སང་སུ་སི་ལན་ཌི་ནང་(Switzerland) ནང་འཚོགས་པའི་འཛམ་གླིང་དཔལ་འབྱོར་ཚོགས་འདུའི་ཐོག་ཏུ་གསལ་བསྒྲགས་བྱས་ཡོད་ཅིང་། མཐུན་ཚོགས་དེའི་གཙོ་བོའི་དམིགས་ཡུལ་ནི་གྷ་ཛའི་ནང་ཨི་སི་རེལ་དང་ཧ་མ་སི་གཉིས་བར་གྱི་དམག་འཁྲུག་དེ་མཚམས་འཇོག་ཡོང་ཐབས་དང་། མ་འོངས་པར་འཛིན་སྐྱོང་བྱེད་ཐབས། དམག་འཁྲུག་གི་རྐྱེན་པས་གཏོར་བརླག་ཏུ་ཕྱིན་པའི་འཛུགས་སྐྲུན་རྣམས་བསྐྱར་གསོ་བྱེད་ཐབས་སོགས་ཀྱི་སྐོར་ཡིན་འདུག་ཀྱང་། རྒྱལ་སྤྱིའི་ཐོག་ཏུ་སྐྱོན་བརྗོད་དང་གླེང་སློང་འདྲ་མིན་ཡོང་གི་ཡོད་འདུག
རྒྱུ་མཚན་གཅིག་ནི་གྷ་ཛའི་གནད་དོན་དང་འབྲེལ་བའི་འགན་དེ་འཛམ་གླིང་མཉམ་འབྲེལ་རྒྱལ་ཚོགས་ཀྱི་ (UN Peace Effort) ཚན་པས་འཁུར་བཞིན་ཡོད་ཀྱང་། ཊོམ་གྱིས་ཚོགས་པ་ཞིག་ཟུར་དུ་གསར་འཛུགས་བྱས་ནས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ནུས་པ་ཉམས་རྒུད་གཏོང་ཐབས་སམ། ཁ་གཏད་ལྟ་བུ་ཞིག་ཆགས་སྲིད་པའི་ཉེན་ཁ་མཐོང་གི་ཡོད་འདུག རྒྱུ་མཚན་གཉིས་པ་ནི་མཐུན་ཚོགས་དེའི་ནང་ནུབ་ཕྱོགས་ཀྱི་སྟོབས་ཆེན་རྒྱལ་ཁབ་ཕལ་ཆེ་བ་ཡོད་མི་འདུག་ལ། འཛམ་གླིང་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཚོགས་ཀྱི་ཚོགས་མི་རྒྱལ་ཁབ་རྒྱ་ནག་དང་། ཧྥ་རན་སི། དབྱིན་ཡུལ། ཨུ་རུ་སུ་བཅས་གཅིག་ཀྱང་མཐུན་ཚོགས་དེའི་ཚོགས་མིའི་ཁོངས་སུ་འཛུལ་ཡོད་མི་འདུག རྒྱུ་མཚན་གསུམ་པ་དེ་ཞི་བདེ་མཐུན་ཚོགས་ཞེས་པའི་ཚོགས་པ་དེའི་རྩ་འཛིན་ཡིག་ཆའི་ནང་པ་ལེ་སི་ཐན་གྱི་མངའ་ཁུལ་ (Palestinian territory) ཞེས་པའི་ཚིག་གཅིག་ཀྱང་མཐོང་རྒྱུ་མེད་པས། དོན་དངོས་ཐོག་ཏུ་པ་ལེ་སི་ཐན་གྱི་ཆེད་དུ་ཡིན་མིན་དོགས་པ་ཆེན་པོ་བྱེད་ཀྱི་ཡོད་འདུག
སྤྱིར་བཏང་ཚོགས་མི་རྒྱལ་ཁབ་༦༠ ཙམ་ལ་མགྲོན་ཤོག་བཏང་ཡོད་འདུག་ཀྱང་། དངོས་སུ་ཚོགས་འདུ་འཚོགས་སྐབས་རྒྱལ་ཁབ་༣༥ ལས་མཉམ་ཞུགས་བྱས་མི་འདུག དེ་རིང་གཟའ་པ་སངས་ཉིན་ཡུ་རོབ་ཀྱི་རྒྱལ་ཁབ་ཚོའི་འགོ་ཁྲིད་རྣམས་ཀྱིས་ཨ་རིས་གསར་འཛུགས་བྱས་པའི་མཐུན་ཚོགས་ལ་དོགས་པ་ཆེན་པོ་བྱེད་ཀྱི་ཡོད་འདུག་ཅིང་། དབྱིན་ཡུལ་གྱིས་མཐུན་ཚོགས་དེའི་ནང་ཨུ་རུ་སུ་མཉམ་ཞུགས་བྱ་རྒྱུའི་ཉེན་ཁ་ཆེན་པོར་མཐོང་གི་ཡོད་ཅེས་བརྗོད་འདུག ད་ལྟ་ཡོད་པའི་ཚོགས་མི་༣༥ རྣམས་ནི་པ་ཀི་སི་ཐན་དང་། ཏུར་ཀི། སོ་དྷི་ཨ་རབ། ཧང་གྷ་རི་སོགས་ཀྱི་རྒྱལ་ཁབ་ཁག་ཅིག་ཡིན་འདུག
ད་ལྟ་རྒྱལ་སྤྱིའི་ཐོག་ཏུ་གླེང་སློང་གཞན་ཞིག་བྱེད་བཞིན་པ་ནི་ཁེ་ན་ཌའི་སྲིད་བློན་གྱིས་ཉེ་ཆར་འཛམ་གླིང་དཔལ་འབྱོར་ཚོགས་འདུའི་ཐོག་ཏུ་ད་ཆར་འཛམ་གླིང་གི་སྟོབས་ཆེན་རྒྱལ་ཁབ་ཚོའི་བྱ་སྤྱོད་ལ་བརྟེན་ནས་རྒྱལ་སྤྱིའི་ཆབ་སྲིད་དང་དཔལ་འབྱོར་གྱི་ལམ་ལུགས་ཡོངས་སུ་གཏོར་བརླག་བཏང་ཟིན་པས། མ་འོངས་པར་སྔར་གྱི་ལམ་ལུགས་དེ་དག་བསྐྱར་གསོ་ཐུབ་ཀྱི་མ་རེད་ཅེས་བརྗོད་ནས་ཨ་རི་ལ་སྐྱོན་བརྗོད་བྱས་ཡོད་པས། ཨ་རིའི་སྲིད་འཛིན་ཊོམ་གྱིས་ཁེ་ན་ཌའི་སྲིད་བློན་ལ་བཏང་བའི་མགྲོན་ཤོག་དེ་ཕྱིར་འཐེན་བྱས་ཡོད་འདུག་ལ། ཊོམ་གྱིས་ཁེ་ན་ཌའི་ངོས་ནས་ཨ་རི་ལ་བཀའ་དྲིན་ཆེན་པོ་ཚོར་དགོས། ཁེ་ན་ཌ་ད་བར་ཨ་རི་ལ་བརྟེན་ནས་འཚོ་བཞིན་ཡོད་ཅེས་བརྗོད་པར། དེ་ལ་ཁེ་ན་ཌའི་མི་མང་ཚོས་སྐྱོན་བརྗོད་ཆེན་པོ་བྱེད་བཞིན་འདུག
དེ་བཞིན་དེ་སྔོན་ཨ་རིའི་སྲིད་འཛིན་ཊོམ་གྱིས་ཞི་བདེ་མཐུན་ཚོགས་ཀྱི་ཚོགས་མི་ཚོས་ཨ་སྒོར་ཐེར་འབུམ་གཅིག་རེ་ཚོགས་དངུལ་གྱི་ཆེད་དུ་སྤྲོད་དགོས་ཚུལ་བརྗོད་པ་དེ་ལ་ཁེ་ན་ཌའི་གཞུང་གིས་ངོས་ལེན་བྱས་ཡོད་མི་འདུག།
གསར་འགོད་པ། བསོད་ནམས་ཕུན་ཚོགས།