ཊོམ་གྱིས་ལོ་གཅིག་ཙམ་གྱི་རིང་རྒྱལ་ཁབ་བདུན་ལ་གཏོར་རྒོལ།
ཕྱི་ལོ་༢༠༢༦ ཟླ་༣ ཚེས་༣ ཉིན། རྒྱ་གར་གྱི་གསར་འགྱུར་བརྒྱུད་ལམ་ཁག་ཅིག་གིས་གནས་ཚུལ་སྤེལ་གསལ་ལྟར་ན། ཨ་རིའི་སྲིད་འཛིན་ཊོམ་གྱིས་ཁོང་ཉིད་ནི་འཛམ་གླིང་ཞི་བདེ་སྐྲུན་མཁན་ཞིག་ཡིན་ཟེར་ཡང་། ཁོང་གིས་ལོ་ངོ་གཅིག་གི་ནང་རྒྱལ་ཁབ་ཙམ་གྱི་ནང་གཏོར་རྒོལ་བྱས་ཡོད་ཅེས་བརྗོད་འདུག
ཨ་རིའི་སྲིད་འཛིན་ཊོམ་གྱིས་རང་ཉིད་ནི་ལོ་རྒྱུས་ནང་གི་སྲིད་འཛིན་གཞན་དང་མི་འདྲ་བར། འཛམ་གླིང་ནང་དམག་འཁྲུག་གསར་པ་མི་སློང་མཁན་དང་། ཡོད་བཞིན་པའི་རྙོག་དྲ་རྣམས་སེལ་མཁན་གྱི་ཞི་བདེ་སྐྲུན་མཁན་(Peacemaker) ཞིག་ཡིན་པའི་དྲིལ་བསྒྲགས་ཤུགས་ཆེ་བྱས་ཡོད་པ་དང་། ལྷག་པར་དུ། ཕྱི་ལོ་༢༠༢༦ ལོར་ནོ་སྦེལ་ཞི་བདེའི་གཟེངས་རྟགས་ཐོབ་མཁན་ཝེ་ནེ་ཛུ་ལའི་ཕྱོགས་འགལ་ཆབ་སྲིད་ཚོགས་པའི་འགོ་ཁྲིད་མ་རི་ཡ་(Maria Corina Machado) ཡིས་ཞི་བདེའི་གཟེངས་རྟགས་དེ་ཁོང་ལ་ཕུལ་ཡོད་པ་དེ་ཁོང་གིས་ཁས་ལེན་བྱས་ཡོད་པ་བརྗོད་འདུག
ཕྱི་ལོ་༢༠༢༥ ཟླ་༡ ཚེས་༢༠ ཉིན་གྱི་སྲིད་འཛིན་དམ་འབུལ་གྱི་གསུང་བཤད་ནང་། ཊོམ་གྱིས་”ངའི་སྤོབས་པ་ཆེ་ཤོས་ཀྱི་ཤུལ་བཞག་ནི་ཞི་བདེ་སྐྲུན་མཁན་དང་མཐུན་སྒྲིལ་བཟོ་མཁན་གྱི་བྱེད་པོ་དེ་ཡིན་རྒྱུ་རེད།”ཅེས་ནན་བཤད་བྱས་ཤིང་། ཁོང་གིས་འདས་པའི་ལོ་ངོ་༧༢ ནང་། ཨ་རིའི་སྲིད་འཛིན་གཞན་དང་མི་འདྲ་བར་དམག་འཁྲུག་གསར་པ་མ་བསླངས་བའི་སྲིད་འཛིན་གཅིག་པུ་དེ་ཁོང་ཉིད་ཡིན་ཞེས་དང་། ཁོང་གིས་ཁ་ཆེའི་རྒྱལ་ཁབ་ཀྱི་དྲག་སྤྱོད་པ་(ISIS) ཕམ་ཉེས་བཏང་ཡོད་པ་མ་ཟད། སི་རི་ཡ་དང་ཨི་རག་ནས་དམག་དཔུང་ཕྱིར་འཐེན་བྱས་ཡོད་ཅེས་བརྗོད།
དེ་བཞིན། སྲིད་འཛིན་གྱི་འོས་བསྡུ་དྲིལ་བསྒྲགས་བྱེད་པའི་སྐབས་སུ། ཁོང་གིས་གལ་ཏེ་ཁོང་སྲིད་འཛིན་ཆགས་པ་ཡིན་ན། ཡུག་རེན་དང་། ར་ཤེ་ཡའི་དམག་འཁྲུག་དེ་ཆུ་ཚོད་༢༤ ནང་ཚུན་ལ་མཚམས་འཇོག་བྱེད་རྒྱུའི་དམ་བཅའ་བཞག་ཡོད་པ་དང་། ན་ནིང་ཕྱི་ཟླ་༡༠ པའི་ནང་། ཁོང་གིས་ད་བར་དམག་འཁྲུག་ཆེ་ཁག་བདུན་ནམ་བརྒྱད་ཙམ་མཚམས་འཇོག་བྱས་ཟིན་ཞེས་བསྒྲགས།
ཡིན་ཡང་། ད་ལྟའི་ཆར་དངོས་ཡོད་གནས་ཚུལ་ནི་དེ་ལས་ལྡོག་སྟེ་ཛ་དྲག་ཏུ་འགྲོ་བཞིན་ཡོད་པ་བརྗོད་འདུག དཔེར་ན། ཟླ་བ་འགའ་ཤས་སྔོན། སྲིད་འཛིན་ཊོམ་གྱིས་དམག་དཔུང་བཏང་ནས་ཝེ་ནེ་ཛུ་ལའི་སྲིད་འཛིན་བཙན་ཁྲིད་བྱས་ཡོད་པ་དང་། དོན་རྐྱེན་དེས་རྒྱལ་ཁབ་དེའི་ནང་གི་སྲིད་དོན་བརྟན་ལྷིང་མེད་པ་ཆགས་ནས་ལྷོ་ཨ་རིའི་ཁུལ་དུ་དམག་དོན་གྱི་ཉེན་ཁ་ཆེ་རུ་བཏང་ཡོད་པ་མ་ཟད། སྲིད་འཛིན་ཊོམ་གྱིས་ཕྱི་ལོ་༢༠༢༥ ནས་ད་བར། ཨི་རག་དང་། ཡེ་མེན། སོ་མ་ལི་ཡ། སི་རི་ཡ་སོགས་རྒྱལ་ཁབ་བདུན་གྱི་ནང་དུ་གཏོར་རྒོལ་བྱས་ཡོད་འདུག
ལྷག་པར་དུ་ཉེ་ཆར་ཕྱི་ཟླ་༢ ཚེས་༢༨ ཉིན། ཨ་རི་དང་ཨི་སི་རེལ་གཉིས་ཀྱིས་ཨི་རན་ལ་གཏོར་རྒོལ་བྱས་ནས་ད་བར་ཉིན་གྲངས་བཞིའི་རིང་། ཨི་རན་གྱི་ཆེས་མཐོའི་དབུ་ཁྲིད་གཙོས་མི་གྲངས་༧༠༠ ལྷག་གི་ཚེ་སྲོག་ཤོར་ཡོད་པ་མ་ཟད། ད་ལྟའི་དཀྱིལ་ཤར་གྱི་གནས་བབས་འདིས་འཛམ་གླིང་ཡོངས་ལ་དཔལ་འབྱོར་དང་བདེ་འཇགས་ཀྱི་དཀའ་ངལ་ཞིག་སྤྲད་བཞིན་ཡོད་ཅེས་བརྗོད་འདུག
དེ་བཞིན། ཊོམ་གྱིས་ཆུ་ཚོད་༢༤ ནང་ཡུག་རེན་དང་ར་ཤི་ཡའི་དམག་འཁྲུག་མཚམས་འཇོག་བྱེད་རྒྱུའི་ཁས་ལེན་བྱས་ཡོད་ཀྱང་། དོན་དངོས་ཐོག་ཡུག་རེན་གྱི་གནས་བབས་ནི་དེ་ལས་རྙོག་འཛིང་ཆེ་བ་ཡོད་པ་དང་། ཕྱོགས་གཉིས་ཀྱི་ས་ཆའི་རྩོད་རྙོག་དང་བདག་དབང་གི་གནད་དོན་ལ་འགྲིག་འཇགས་ཡོང་རྒྱུ་ནི་ཊོམ་གྱིས་བཤད་པ་ལྟར་ལས་སླ་པོ་ཞིག་མིན་པ་གསལ་པོ་ཆགས་ཡོད་ཅེས་བརྗོད་འདུག
སྲིད་འཛིན་ཊོམ་གྱིས་རང་ཉིད་ལ་ཞི་བདེ་སྐྲུན་མཁན་ཡིན་ཞེས་བརྗོད་ཀྱང་། ཝེ་ནེ་ཛུ་ལ་ནས་ཨི་རན་བར་གྱི་ད་ལྟའི་དམག་དོན་གྱི་འཕེལ་རིམ་དག་གིས། ཁོང་གི་སྐད་ཆ་དང་ལག་ལེན་དབར་གྱི་ཁྱད་པར་དེ་སྔ་ལས་གསལ་དུ་བཏང་ཡོད་པ་དང་། འཛམ་གླིང་མི་མང་གིས་ཊོམ་གྱིས་ཇི་ལྟར་དམག་འཁྲུག་འདི་དག་མཚམས་འཇོག་བྱེད་མིན་དང་། ཡང་ན་དམག་འཁྲུག་གསར་པ་ཞིག་གི་ནང་དུ་ཨ་རི་འཁྲིད་འགྲོ་མིན་ལ་དོ་སྣང་ཆེན་པོ་བྱེད་བཞིན་ཡོད་ཚུལ་བརྗོད་འདུག།
གསར་འགོད་པ། བློ་བཟང་རྒྱ་མཚོ།
