ད་བར་རྒྱ་བལ་ནང་བོད་མི་༣༡ རྒྱ་ནད་ཏོག་དབྱིབས་ན་ཚའི་འོག་གྲོངས་འདུག
ཟླ་འདིའི་ཚེས་༢༦ ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་རྒྱ་ནད་ཏོག་དབྱིབས་ན་ཚའི་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཤིག་སྤེལ་བ་དང་། འདས་པའི་བདུན་ཕྲག་ཅིག་གི་ནང་རྒྱ་གར་དང་བལ་ཡུལ་ནང་གི་བོད་མིའི་གཞིས་ཆགས་ཏུ་ནད་གཞི་ཕོག་པ་ར་འཕྲོད་བྱུང་བ་མི་གྲངས་༤༤ བྱུང་འདུག
དེ་ཡང་ནད་གཞི་ཕོག་པ་ར་འཕྲོད་བྱུང་བ་མི་གྲངས་༤༤ ལས་ལ་དྭགས་ཁུལ་ནས་མི་གྲངས་༤། ལྡི་ལི་ཁུལ་ནས་མི་གྲངས་༥། ལ་ཁན་ཝཱ་ལཱ་གཞིས་ཆགས་ནས་མི་གྲངས་༡། མོན་གྷོ་གཞིས་ཆགས་ནས་མི་གྲངས་༡། རཱ་ཇི་པུར་གཞིས་ཆགས་ནས་མི་གྲངས་༢། བན་དྷཱ་རཱ་གཞིས་ཆགས་ནས་མི་གྲངས་༡། སྦེལ་ཀོབ་གཞིས་ཆགས་ནས་མི་གྲངས་༡། ཀེལ་མན་ཊོན་གཞིས་ཆགས་ནས་མི་གྲངས་༡། དྷེ་ར་དྷུན་ཁུལ་ནས་མི་གྲངས་༡། ཀོ་ལེ་གཱལ་གཞིས་ཆགས་ནས་མི་གྲངས་༢། མེན་པཱཊ་གཞིས་ཆགས་ནས་མི་གྲངས་༡༤། ཨོ་ཌི་ཤ་གཞིས་ཆགས་ནས་མི་གྲངས་༣ བཅས་རྒྱ་གར་ནང་མི་གྲངས་༣༦ བྱུང་ཡོད་པ་དང་བལ་ཡུལ་ཀཐ་མན་ཌུ་ཁུལ་ནས་མི་གྲངས་༤། པོ་ཁ་ར་ཁུལ་ནས་མི་གྲངས་༤ བཅས་ཁྱོན་བསྡོམས་པས་མི་གྲངས་༤༤ བྱུང་བ་ལས་དགུང་ན་མཐོ་ཤོས་དེ་༨༧ དང་ཆུང་ཤོས་དེ་ལོ་༧ ཡིན་པ་རེད།
དེའི་ནང་ནས་ནད་རྟགས་ཅུང་མངོན་པ་མི་གྲངས་༢༡ དང་ནད་རྟགས་མེད་པ་མི་གྲངས་༢༣ ཡིན་འདུག འདས་པའི་བདུན་ཕྲག་ནང་ལ་དྭགས་ཁུལ་ནས་བུད་མེད་རང་ལོ་༦༧ སོན་པ་གཅིན་སྙིའི་ནད་གཞི་སྡོངས་པའི་ནད་པ་གཅིག་དང་སྦེལ་ཀོབ་གཞིས་ཆགས་ནས་སྐྱེས་པ་རང་ལོ་༣༡ སོན་པ་གཅིག་བཅས་མི་གྲངས་གཉིས་འདས་གྲོངས་སོང་། ད་བར་རྒྱ་གར་དང་བལ་ཡུལ་ནང་ཁྱོན་བོད་མི་ནད་གཞི་ཕོག་པ་གྲངས་༡༢༧༤ ལས་དྲག་སྐྱེད་བྱུང་བ་མི་གྲངས་༡༠༨༥། འདས་གྲོངས་སོང་བ་མི་གྲངས་༣༡། ད་ལྟ་ནད་མནར་བཞིན་པ་མི་གྲངས་༡༥༨ བཅས་བྱུང་འདུག ནད་གཞི་ཕོག་པ་རྣམས་ས་གནས་ཛ་དྲག་ཚོགས་ཆུང་དང་དེ་བཞིན་ཚོགས་པ་གྲྭ་ཚང་དང་སློབ་དགེ་རྣམས་ཀྱི་ལམ་སྟོན་འོག་ཟུར་བཀག་ཐོག་བཞུགས་ཡོད་པ་དང་། ནད་གཞི་ཕོག་པ་དང་འབྲེལ་ཐུགས་བྱུང་བའི་མི་རྣམས་ཀྱང་ཉིན་གྲངས་༡༤ རིང་ཟུར་བཀག་ཐོག་བཞུགས་ཡོད་འདུག
རྒྱ་བལ་འབྲུག་གསུམ་ལས་གཞན་པའི་བོད་མི་གནས་སྡོད་བྱེད་སའི་རྒྱལ་ཁབ་ཁག་གི་ནང་དུ་གནས་སྡོད་མི་ཚོར་ཏོག་དབྱིབས་ན་ཚ་ཕོག་པའི་གྲངས་ཐོ་ཁ་གསལ་ལེན་ཐུབ་ཀྱི་མེད་པ་རེད།
ད་ཆ་འཛམ་གླིང་ཁྱོན་ཡོངས་ནང་ནད་གཞི་ཕོག་པ་གྲངས་ས་ཡ་༥༩ ལྷག་བརྒལ་ཡོད་པ་དང་། ཨ་རིར་ནད་གཞི་ཕོག་པའི་གྲངས་ཇེ་མང་དུ་སོང་ནས་ད་ཉིན་བར་ས་ཡ་༡༢ ལྷག་བརྒལ་བའི་གནས་སྟངས་དང་། རྒྱ་གར་ནང་དུའང་ད་ཆ་ཉིན་རེར་ནད་གཞི་ཕོག་པའི་གྲངས་ཇེ་མང་དུ་འགྲོ་བཞིན་འདས་པའི་ཆུ་ཚོད་༢༤ ནང་ཁྱོན་ནད་གཞི་ཕོག་པའི་གྲངས་དེ་༤༤༤༨༩ དང་འདས་གྲོངས་སོང་བའི་གྲངས་༥༢༤ ཆགས་ཡོད་འདུག རྒྱ་གར་ནང་ད་ཆ་ནད་གཞི་ཕོག་པ་ལས་བརྒྱ་ཆ་༩༣ ལྷག་དྲག་བསྐྱེད་འགྲོ་བཞིན་ཡོད་ཀྱང་ཉེན་ཚབས་ཆེ་བའི་མི་ལོ་ན་བགྲེས་པ་དང་བླ་གཉན་གྱི་ནད་གཞི་ཡོད་པ་རྣམས་ནས་དམིགས་བསལ་གཟབ་གཟབ་གནང་རྒྱུ་དེ་གལ་ཆེན་པོ་ཡིན་པ་དང། ད་ལྟའི་ཆར་འཛམ་གླིང་ཁྱོན་ཡོངས་ནང་སོ་སོའི་རྒྱལ་ཁབ་དང་སྲིད་གཞུང་ནས་ནད་ཡམས་ཁྱབ་གདལ་བཀག་འགོག་ཆེད་ལམ་སྟོན་དང་ཁྲིམས་སྒྲིག་གཏན་འབེབས་ཀྱིས་དོ་དམ་གནང་བཞིན་ཡོད་པས་རྒྱ་གར་ནང་ཆ་བཞག་ནས་ཁ་ཉིན་ཕྱི་ཚེས་༢༥ ཉིན་དབུས་ནང་སྲིད་ལས་ཁུངས་ནས་ཡོངས་ཁྱབ་གསལ་བསྒྲགས་བཏང་བའི་ནང་གཙོ་བོ་ད་ཆ་རྒྱ་གར་བྱང་ཕྱོགས་སུ་དགུན་དུས་གྲང་ངར་ཆེ་རུ་འགྲོ་བཞིན་པ་དང་། དེ་བཞིན་ཆོས་ཕྱོགས་ཀྱི་དུས་ཆེན་རིམ་པ་སླེབས་བཞིན་ཡོད་ན་མང་ཚོགས་ནང་ནད་གཞི་ཁྱབ་གདལ་ཆེ་རུ་འགྲོ་དང་འགྲོ་བཞིན་གནས་སྟངས་འདིར་མངའ་སྡེ་དང་རྫོང་སོ་སོའི་ཁྱབ་ཁོངས་ནས་ས་གནས་ཀྱི་གནས་སྟངས་ཛ་དྲག་ཆེ་ཆུང་ལ་གཞིགས་ནས་ནད་ཡམས་ཁྱབ་གདལ་བཀག་འགོག་ཆེད་མཚན་གྱི་འགྲུལ་བཞུད་བཀག་སྡོམ། དེ་བཞིན་མི་མང་འདུ་འཛོམས་ཀྱི་གྲངས་ཆ་ཉུང་ཕྲི་དང་ཁྲོམ་དང་ལས་ཁུངས་སོགས་ལས་དུས་ལས་བསྐོས་སོགས་ལ་བཀོད་ཁྱབ་གཏོང་དགོས་པའི་གསལ་བསྒྲགས་གནང་བ་ལས་ད་ལྟའི་ཆར་རྒྱ་གར་མངའ་སྡེ་མང་པོའི་ནང་ལྷག་པར་ལྡི་ལི་དང་ཧི་མཱ་ཅལ་སོགས་བྱང་ཕྱོགས་ཁུལ་དུ་ནད་ཡམས་ཁྱབ་གདལ་བཀག་འགོག་གི་དམ་བསྒྲགས་ཆེན་པོ་གནང་ཞིང་ཁ་རས་མ་གྱོན་ཚེ་ཉེས་ཆད་དང་ཕྲལ་སེལ་བཙོན་འཇུག དེ་བཞིན་མཚན་གྱི་ཆུ་ཚོད་༨ ནས་སྔ་དྲོ་ཆུ་ཚོད་༦ པར་སྨན་བཅོས་སོགས་ཛ་དྲག་ལས་དོན་ལས་གཞན་ཕྱིར་འགྲུལ་བཞུད་བཀག་སྡོམ་གྱི་བཀོད་ཁྱབ་བཏང་ཡོད་པ་རེད།།
གསར་འགོད་པ་ཆོས་ཉིད་འོད་ཟེར།
