དགེ་ལུགས་སྤྱི་འཐུས་གཉིས་དང་འབྲེལ་བའི་གནད་དོན་ཐོག་འོས་བསྡུ་ལས་ཁང་ལ་ལན་འདེབས་མེད་ཟུར་དུ་འཇོག་རོགས་བརྗོད།
སྔོན་དུ་འབྲས་སྤུངས་བླ་སྤྱི་ནས་གཞུང་རྟེན་དགྲ་ལྷ་གནས་ཆུང་ཆོས་རྒྱལ་ཆེན་པོ་སྤྱན་འདྲེན་ཞུས་སྐབས། ཕེབས་པའི་བཀའ་ལུང་སྐོར་གྱི་ཡིག་ཆ་ཞིག་སྤྱི་ཚོགས་ནང་བཀྲམས་པར་མི་མང་ཁྲོད་གླེང་སློང་ཆེན་པོ་བྱུང་ཡོད། བཀའ་ལུང་དེའི་ནང་རི་བོ་དགེ་ལུགས་པའི་སྤྱི་འཐུས་གཉིས་ཀྱིས་འབྱུང་པོས་རྒྱུད་བསྐུལ་ཏེ་ངག་བློ་ཐལ་བས་གང་བྱུང་བྱ་ངན་དང་། ༧གོང་ས་མཆོག་ལ་མཚན་སྨད་ཞུ་བ། ཁ་བ་ལྗོངས་ཀྱི་སྤྱི་དོན་བོར་ཏེ་ཆོལ་ཁ་ཆོས་ལུགས་ཀྱི་འཐེན་འཁྱེར་བྱས་པ་དེ་ནི་སྐྱེ་བོ་ཀུན་གྱི་མིག་གིས་མཐོང་ཆོས་སུ་གྱུར་པ་དང་། ཁོང་གཉིས་ཀྱི་བྱ་སྤྱོད་ལ་བརྟེན་ནས་དགེ་འདུན་པའི་སྡེ་ལ་མཚན་སྨད་ཞུ་བའི་དུས་ལ་བབ་པས། འགན་འཁུར་བ་རྣམས་ཀྱིས་མཚམས་འཇོག་བྱེད་དགོས་ཚུལ་བཀོད་འདུག འོན་ཀྱང་དོན་དམ་པར་སྤྱི་འཐུས་གཉིས་ཀྱིས་ནོར་འཁྲུལ་གང་ཞིག་བྱས་ཡོད་མེད་ཁ་གསལ་མེད་པའི་ཐོག་ནས་ནོར་འཁྲུལ་ངོས་ལེན་བྱེད་དགོས་པའི་ཡིག་ཆ་ཞིག་ཀྱང་བཀྲམ་འདུག
ཕྱི་ལོ་༢༠༢༦ ཟླ་༡ ཚེས་༡༣ ཉིན་འདི་གའི་གསར་ཁང་གི་ངོས་ནས་བོད་མིའི་སྒྲིག་འཛུགས་ཀྱི་འོས་བསྡུ་ལས་ཁང་ལ་འབྲེལ་བ་བྱས་པ་ཡིན། ཉེ་ཆར་འབྲས་སྤུངས་བླ་སྤྱི་ནས་སྤྱི་མོས་ཀྱི་ཐག་གཅོད་བྱུང་དོན་བཞིན་ཆེད་དུ་སྤྲིངས་པ་ཞེས་པའི་གསལ་བསྒྲགས་ཤིག་སྤེལ་ཡོད་པ་དང་། གསལ་བསྒྲགས་དེའི་ནང་དེ་སྔོན་གཞུང་རྟེན་དགྲ་ལྷ་གནས་ཆུང་ཆོས་རྒྱལ་ཆེན་པོ་སྤྱན་འདྲེན་ཞུས་སྐབས་ཕེབས་པའི་བཀའ་ལུང་ནང་། “དཔལ་ལྡན་འབྲས་དཀར་སྤུངས་པའི་མཁན་བླ་འདུས་སྡེ་སྤྱི་ནས་ངོས་ཀྱི་སློབ་དཔོན་མཐོང་བ་དོན་མཆོག་ལ་སྐུ་ཚེ་ཞབས་པད་བརྟན་བཞུགས་ཟབ་མོ་ལེགས་པར་བགྱིས་པ་དེ་ནི་ཤིན་ཏུ་ལེགས་ལ། འོན་ཀྱང་ཕྱི་ཡིས་རིམ་གྲོ་བསྒྲུབས་དང་སྒྲུབ་བཞིན་ནའང་། ནང་དུ་དམ་ཚིག་མི་གཙང་བའི་འགལ་རྐྱེན་ཡོད་ཙ་ན། རང་ཅག་རི་བོ་དགེ་ལུགས་པའི་མགྲིན་ཚབ་མིང་ཅན་རེ་བ་གཉིས་ནས་འབྱུང་པོས་རྒྱུད་བསྐུལ་ཏེ་ངག་བློ་ཐལ་བས་གང་བྱུང་བྱ་ངན་དང་། ༧གོང་ས་མཆོག་ལ་མཚན་སྨད་ཞུ་བ། ཁ་བ་ལྗོངས་ཀྱི་སྤྱི་དོན་བོར་ཏེ་ཆོལ་ཁ་ཆོས་ལུགས་འཐེན་འཁྱེར་བྱས་པ་དེ་ནི་སྐྱེ་བོ་ཀུན་གྱི་མིག་གིས་མཐོང་ཆོས་སུ་གྱུར་པ་དང་། ཁོང་གཉིས་ཀྱི་བྱ་སྤྱོད་ལ་བརྟེན་ནས་དགེ་འདུན་པའི་སྡེ་ལ་མཚན་སྨད་ཞུ་བའི་དུས་ལ་བབ་པས། འགན་འཁུར་བ་རྣམས་ཀྱིས་མཚམས་འཇོག་བྱེད་དགོས་” ཞེས་བཀོད་འདུག
འོན་ཀྱང་ད་ལྟ་བོད་མིའི་སྤྱི་ཚོགས་ཁྲོད་གླེང་སློང་ཆེ་ཤོས་བྱེད་བཞིན་པ་ནི། རི་བོ་དགེ་ལུགས་པའི་སྤྱི་འཐུས་གཉིས་ཀྱིས་ནོར་འཁྲུལ་གང་ཞིག་བྱས་ཡོད་མེད་བཀའ་ཡིག་དེའི་ནང་ཁ་གསལ་མེད་པ་དེ་རེད། ད་དུང་བཀའ་ཡིག་དེའི་ནང་ཕྱི་ལོ་༢༠༢༦ ཟླ་བ་༡ ཚེས་༡༩ ཉིན་འབྲས་སྤུངས་བླ་སྤྱིས་དགེ་ལུགས་པའི་སྤྱི་འཐུས་གཉིས་འབྲས་སྤུངས་ཚོགས་ཆེན་དུ་༧རྒྱལ་བའི་བཞུགས་ཁྲིར་མཇལ་དར་སྒྲོན་དགོས་པ་དང་། ལྷ་མོ་ཁང་དུ་འགྱོད་བཤགས་བྱེད་དུ་ཕེབས་དགོས་པའི་བཀའ་བཏང་འདུག་ལ། གལ་སྲིད་མ་ཕེབས་ན་དགེ་ལུགས་པའི་མགྲིན་ཚབ་ཏུ་ངོས་ལེན་ཞུ་ཐབས་མེད་ཅེས་གསུངས་འདུག
དྲི་བ། གནད་དོན་དེ་འོས་བསྡུའི་སྒྲིག་གཞི་དོན་ཚན་༢༤ པའི་ནང་གསལ་ ༢ པའི་ནང་། འོས་གཞིའམ། འོས་འཕེན་པ་ཞིག་ལ་དྲག་ཤུགས་ཀྱི་ཐོག་ནས་འཇིགས་སྐུལ་བྱས་ཚེ། དེ་ནི་འོས་བསྡུའི་སྒྲིག་གཞི་དང་འགལ་བ་ཡིན་ཞེས་པའི་དོན་ཚན་དང་འགལ་ཡོད་མེད།
དྲི་བ། ཐེངས་འདིའི་གནས་ཆུང་གི་བཀའ་ལུང་ཡིག་ཆའི་ནང་རི་བོ་དགེ་ལུགས་པའི་སྤྱི་འཐུས་གཉིས་ཀྱིས་ནོར་འཁྲུལ་ཁ་གསལ་གང་ཡང་བཀོད་མེད་པ་དེ་བོད་མིའི་སྒྲིག་འཛུགས་ཀྱི་འོས་བསྡུའི་སྒྲིག་གཞི་དོན་ཚན་༢༤ ནང་གསལ་༣ པའི་ནང་། འོས་གཞིའི་སྐྱེ་བོ་གཞན་ཞིག་གམ། དེའི་ཕྱོགས་གཏོགས། གཞན་ཡང་སྐྱེ་བོ་སུ་རུང་ནས་གཞན་ཞིག་ལ་འོས་བསྡུའི་རྒྱལ་ཁ་མ་ཐོབ་པའི་བསམ་སྦྱོར་ངན་པ་ཀུན་ནས་བསླངས་ཏེ་གཞི་མེད་སྒྲོ་བཏགས་ཀྱིས་སྐྱོན་བརྗོད་དམའ་འབེབས་བྱེད་པ་དང་། ལུང་ཚན། ཆོས་བརྒྱུད། སྤྱི་ཚོགས་བཅས་ཀྱི་དབར་དབྱེན་སྦྱོར་གྱིས་ཕན་ཚུན་འཁོན་འཁྲུག་འབྱུང་གཞིའི་རྐྱེན་སློང་བྱེད་པ་ཞེས་པའི་དོན་ཚན་དང་འགལ་ཡོད་མེད།
དྲི་བ། འབྲས་སྤུངས་བླ་སྤྱིས་སྤྱི་འཐུས་གཉིས་ལ་༧གོང་ས་མཆོག་ལ་མཚན་སྨད་ཞུས་པའི་མངོན་སུམ་གྱི་བདེན་དཔང་མ་བཏོན་པར། སྐྱོན་འཛུགས་བྱས་པ་འདི་འོས་བསྡུའི་སྒྲིག་གཞི་ལྟར་ན། “གཞི་མེད་སྒྲོ་བཏགས་” སུ་བརྩི་གི་ཡོད་མེད།
དྲི་བ། ཆོས་བརྒྱུད་སྒྲིག་འཛུགས་ཤིག་གིས་ “མགྲིན་ཚབ་ཏུ་ངོས་འཛིན་མི་བྱེད་པ་” དང་ “འགྱོད་བཤགས་” བྱེད་དགོས་པའི་བཙན་བཀའ་གཏོང་བ་འདིས། འོས་མིའི་ཐོབ་ཐང་ལ་བར་ཆད་བཟོ་ཡི་ཡོད་པས། འདི་ནི་འོས་བསྡུའི་ལས་རིམ་ལ་ཐད་ཀར་ཐེ་བྱུས་བྱས་པ་ཞིག་ཏུ་ངོས་འཛིན་གནང་གི་ཡོད་དམ་མེད་བཅས་ཀྱི་སྐོར་སྤྱི་ཚོགས་ནང་རྙོག་གླེང་སྣ་ཚོགས་ཤིག་ཡོང་གི་ཡོད་པར་བརྟེན། གནས་ཚུལ་དེ་གསལ་པོ་བཟོ་ཆེད་བོད་མིའི་སྒྲིག་འཛུགས་ཀྱི་འོས་བསྡུའི་ལས་ཁང་ལ་བཅར་འདྲི་བྱེད་དུ་སོང་ཡང་། རྗེས་སུ་ཁ་པར་བརྒྱུད་ནས་འོས་བསྡུ་ལས་ཁང་ལ་ལན་འདེབས་གང་ཡང་མེད། འོས་བསྡུ་ལས་ཁང་ཟུར་དུ་འཇོག་རོགས་ཞེས་གསུངས་སོང་།།
གསར་འགོད་པ། བསོད་ནམས་ཕུན་ཚོགས།
