བལ་ཡུལ་དུ་འོས་བསྡུའི་ལམ་ནས་གཞུང་གསར་པ་འདེམས་བཞིན་འདུག
བོད་ཀྱི་ཁྱིམ་མཚེས་རྒྱལ་ཁབ་བལ་ཡུལ་ནང་། ན་ནིང་གཞོན་སྐྱེས་ཚོས་ལྐོག་ཟ་རུལ་སུངས་དང་། ལས་མེད། ཆབ་སྲིད་བརྟན་ལྷིང་མེད་པ་སོགས་ཀྱི་དཀའ་ངལ་ལ་བརྟེན་ནས་སྒེར་ལངས་རྒྱ་ཆེ་བྱས་ཏེ་བལ་ཡུལ་གཞུང་མགོ་རྟིང་བསློགས་ཡོད་པ་དང་། དེ་རིང་བལ་ཡུལ་ནང་གཞུང་གསར་པ་ཞིག་ཡོང་ཐབས་ཆེད་རྒྱལ་ཡོངས་འོས་བསྡུ་བྱེད་བཞིན་ཡོད་འདུག
ཕྱི་ལོ་༢༠༢༦ ཟླ་༣ ཚེས་༥ ཉིན་(The Kathmandu Post)ཡིས་གནས་ཚུལ་སྤེལ་དོན་ལ། དེ་རིང་བོད་ཀྱི་ཁྱིམ་མཚེས་རྒྱལ་ཁབ་བལ་ཡུལ་ནང་རྒྱལ་ཡོངས་འོས་བསྡུ་འགོ་བཙུགས་འདུག ན་ནིང་ཕྱི་ཟླ་༩ ནང་བལ་ཡུལ་གྱི་སྲིད་བློན་(KP Sharma Oli) ཡིས་འགོ་ཁྲིད་པའི་མཉམ་འབྲེལ་སྲིད་གཞུང་དེ་བལ་ཡུལ་གྱི་གཞོན་སྐྱེས་ཚོས་ངོ་རྒོལ་ཤུགས་ཆེ་བྱས་རྗེས་མཐར་སྲིད་དབང་མགོ་རྟིང་བསློགས་ནས། ད་བར་ (Sushila Karki) ཞེས་པའི་བུད་མེད་ཅིག་གིས་བར་བརྒལ་གཞུང་གི་སྲིད་དབང་བཟུང་ནས་བསྡད་ཡོད་པ་ལས་སྲིད་གཞུང་གསར་པ་འོས་བསྡུ་བྱས་མེད། ད་ཆར་ཟླ་བ་དྲུག་གི་རྗེས་སུ་བལ་ཡུལ་གཞུང་གིས་འོས་བསྡུའི་ལམ་ནས་སྲིད་གཞུང་གསར་པ་ཞིག་ཡོང་ཐབས་བྱེད་ཀྱི་ཡོད་འདུག
ཐེངས་འདིའི་བལ་ཡུལ་གྱི་འོས་བསྡུ་ལྷན་ཁང་གི་ཚོགས་གཙོ་ (Ram Prasad Bhandari) ནས་བལ་ཡུལ་གྱི་མི་མང་ཚོས་རང་ཉིད་ཀྱི་ཐོབ་ཐང་སྤྱད་ནས་རང་དབང་དང་འདྲ་མཉམ། ཕྱི་གསལ་ནང་གསལ། ཞི་བའི་ཐོག་ནས་འོས་བླུག་དགོས་པ་བརྗོད་འདུག
དེ་རིང་བལ་ཡུལ་ནང་གི་འོས་བསྡུ་དེ་ཞོགས་པའི་ཆུ་ཚོད་༧ ནས་ཉིན་རྒྱབ་ཆུ་ཚོད་༥ བར་ཆུ་ཚོད་༡༠ རིང་བྱེད་བཞིན་ཡོད་འདུག ཐེངས་འདིའི་འོས་བསྡུ་ནང་ཁྱོན་བལ་ཡུལ་གྱི་མི་མང་༡༨,༩༠༣,༦༨༩ ཙམ་གྱིས་འོས་བསྡུའི་ནང་མཉམ་ཞུགས་བྱ་རྒྱུར་ཚོད་དཔག་བྱེད་ཀྱི་ཡོད་འདུག་ལ། མི་མང་དེ་དག་གིས་བལ་ཡུལ་གྱི་གྲོས་ཚོགས་འོག་མའི་ནང་ཡོད་པའི་འཐུས་མི་༢༧༥ འདེམས་ཀྱི་ཡོད་འདུག བར་བརྒལ་སྲིད་བློན་ནས་བལ་ཡུལ་ནང་འོས་བསྡུའི་ས་ཚུགས་འགའ་ཤས་རྒྱ་མཚོའི་ངོས་ནས་བརྩིས་པའི་མི་ཊར་ ༤,༠༠༠ སར་ཡོད་པའི་ཧི་མ་ལ་ཡའི་རི་མཐོ་ས་སྨོན་ཐང་(Mustang) དང་དོལ་པོ་ (Dolphin) སོགས་ལ་ཡོད་པའི་རྐྱེན་གྱིས་ཐད་འཕུར་གནམ་གྲུ་བཏང་ནས་འོས་སྒམ་སྐྱེལ་འདྲེན་བྱེད་རྒྱུ་ཡིན་ཞེས་བརྗོད་འདུག
འདི་ལོའི་བལ་ཡུལ་གྱི་འོས་བསྡུའི་ཁྲོད་འོས་བླུག་མཁན་ཁྱོན་མི་མང་༩༡༥,༡༡༩ ཙམ་མང་དུ་ཕྱིན་ཡོད་པ་བརྗོད་འདུག་ལ། འོས་བླུག་མཁན་ཁྲོད་བརྒྱ་ཆ་༥༢ ནི་རང་ལོ་༡༨ ནས་༤༠ བར་གྱི་གཞོན་སྐྱེས་ཡིན་པ་བརྗོད་འདུག
འདི་ལོའི་བལ་ཡུལ་གྱི་འོས་བསྡུ་ཁྲོད་ཁྱོན་འོས་མི་༦,༥༤༡ ཡོད་འདུག་ཅིང་། དེ་དག་ཁྲོད་ནས་ཁྱོན་འོས་མི་༣,༤༠༦ ཡིས་ཐད་ཀར་གྲོས་ཚོགས་འོག་མའི་འཐུས་མིར་ལངས་ཀྱི་ཡོད་འདུག་པས། གལ་སྲིད་ཁོང་ཚོར་མི་མང་ཁྲོད་ནས་འོས་གྲངས་ཚད་མཐོ་པོ་ཐོབ་ཚེ་ཐད་ཀར་གྲོས་ཚོགས་ཀྱི་འཐུས་མི་ཆགས་ཀྱི་ཡོད་འདུག གཞན་འོས་མི་རྣམས་རང་རང་གི་ཆབ་སྲིད་ཚོགས་པའི་ངོ་ཚབ་བྱས་ནས་ལངས་ཀྱི་ཡོད་འདུག ཐད་ཀར་གྲོས་ཚོགས་འཐུས་མིར་ལངས་མཁན་༣,༤༠༦ ནས་བུད་མེད་༣༨༨ དང་སྐྱེས་པ་༣,༠༡༧ ཡོད་འདུག
འོས་བསྡུའི་ས་ཚུགས་ཁྱོན་༡༠,༩༦༠ བཙུགས་ཡོད་འདུག་ཅིང་། བདེ་སྲུང་མི་སྣ་ཁྱོན་༣༤༡,༡༡༣ ཙམ་གྲ་སྒྲིག་བྱས་ཡོད་འདུག བར་བརྒལ་གཞུང་གིས་ཁྱོན་ཉེན་རྟོག་པ་༡༤༩,༠༠༠ ཙམ་ཉིན་གྲངས་༤༠ རིང་འོས་བསྡུའི་ཆེད་དུ་གྲ་སྒྲིག་བྱས་ཡོད་འདུག
བལ་ཡུལ་གྱི་འོས་བསྡུའི་ལོ་རྒྱུས་ཁྲོད་མི་མང་གིས་ཆ་ཤས་མང་ཤོས་ལེན་པའི་དུས་ཚོད་ནི་ཕྱི་ལོ་༢༠༡༣ ལོ་ཡིན་པ་དང་ཁྱོན་བརྒྱ་ཆ་༧༨.༣ ཡིན་པ་དང་། དམའ་ཤོས་དེ་ཕྱི་ལོ་༢༠༢༢ ལོར་ཁྱོན་བརྒྱ་ཆ་༦༡.༤ ཡིན་འདུག
གསར་འགོད་པ། བསོད་ནམས་ཕུན་ཚོགས།
