བོད་མི་མང་སྤྱི་འཐུས་ཟུར་པ་གྲ་ཕྱི་ཕུན་རབ་བློ་བཟང་དར་རྒྱས་འདས་གྲོངས་སུ་ཕྱིན་འདུག
ཕྱི་ལོ་ ༢༠༢༣ ཟླ་ ༡༡ ཚེས་ ༢༣ ཉིན་གྱི་ཕྱི་དྲོར་སྐུ་གཟུགས་བདེ་མིན་གྱིས་ཀང་ར་རྫོང་ཀྲང་ཀྲ་སྨན་ཁང་དུ་འདས་གྲོངས་སུ་གྱུར་འདུག་ལ། ཁོང་ནི་བོད་མི་མང་སྤྱི་འཐུས་སྐབས་བཞི་པ་དང༌། ལྔ་པ། དྲུག་པ་བཅས་ཀྱི་སྤྱི་འཐུས་དང་། སྐབས་དྲུག་པའི་སྤྱི་འཐུས་ཚོགས་གཞོན། བོད་གཞུང་དཔལ་འབྱོར་ལས་ཁུངས་ཀྱི་དྲུང་ཆེ་དང་བཀའ་བློན། དབུས་སྤྱི་ཁྱབ་འདེམས་བསྐོ་ལྷན་ཚོགས་ཀྱི་ཚོགས་མི་དང་གཙོ་འཛིན་ཟུར་པ། འཆར་འགོད་ལྷན་ཚོགས་ཀྱི་ཚོགས་གཙོ། ཆེས་མཐོའི་སློབ་ཡོན་ཚོགས་ཆུང་གི་ཚོགས་མི་དང་། དཔལ་འབྱོར་བདེ་དོན་ལྷན་ཚོགས་ཀྱི་ཚོགས་གཙོ། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ། སློབ་དགེ་ཟུར་པ།
གཞན་ཡང་ཕྱི་ལོ་ ༡༩༧༩ ལོར་བོད་ནང་གཟིགས་སྐོར་སྐུ་ཚབ་ཚོགས་པ་ཕེབས་པའི་ཚོགས་མི་སོགས་མཛད་ཁུར་དུ་མ་བཞེས་མྱོང་ཡོད་འདུག
ཕྱི་ཟླ་༡༡ ༢༤ ཉིན་བོད་མི་མང་སྤྱི་འཐུས་ལྷན་ཚོགས་ནས་འདས་པོ་དམ་པ་ཁོང་གི་ཤུལ་ལུས་ནང་མི་འབྲེལ་ཡོད་ཀུན་ལ་ཐུགས་གསོའི་འཕྲིན་ཡིག་གཅིག་ཕུལ་འདུག་པ་དང་། དེའི་ནང་དུ། ཁོང་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་པར་ཤིན་ཏུ་ཡིད་སྐྱོ་དང་བློ་ཕམ་གྱི་གནས་སུ་གྱུར་པ་དང་། དམ་པ་གང་གི་ཤུལ་ལུས་ནང་མི་ཉེ་འབྲེལ་རྣམས་ཀྱང་ཐུགས་ཡིད་གདུང་ཆེན་པོའི་ངང་ཡོད་ངེས་ཀྱང་། འཇིག་རྟེན་གྱི་སྐྱེ་འགྲོ་ཀུན་ལ་སྐྱེ་འཆིའི་རང་དབང་མེད་པ་ཆོས་ཉིད་ལ་དགོངས་རྒྱ་ཆེ་བཞེས་དང་འབྲེལ་དམ་པ་དེ་ཉིད་ཀྱི་ཆེད་རྣམ་དཀར་དགེ་ཚོགས་ཀྱི་གནང་སྒོ་རིམ་པ་གནང་བཞིན་ཡོད་པར་གཞིར་བཅས། འདི་ནས་གྲོས་ཚོགས་སུ་སྤྱི་མཚུངས་ལྟར་གཞུང་འབྲེལ་མྱ་ངན་གུས་འདུད་ཀྱི་གྲོས་ཆོད་བཞག་ཟིན་རྗེས་འབུལ་ལམ་ཞུ་རྒྱུ་དང་། དམ་པ་དེ་ཉིད་ཀྱིས་བོད་བསྟན་སྲིད་མི་རིགས་དང་། བོད་མིའི་སྒྲིག་འཛུགས། བོད་རྒྱ་ཆེའི་མང་ཚོགས་བཅས་ཀྱི་དོན་དུ་ཞབས་ཞུ་མཐར་སོན་གནང་བའི་མཛད་རྗེས་ལ་ཡི་རངས་བསྔགས་བརྗོད་དང་། མཆོག་གསུམ་རྒྱལ་བའི་སྤྱན་སྔར་མཆོད་སྤྲིན་དང་བཅས་གང་གིས་ཚེ་རབས་ཀུན་ཏུ་བྱས་བསགས་སྡིག་ལྟུང་རྣམས་བྱང་ཞིང་དག་ཅིང་། འཕགས་མཆོག་ཕྱག་ན་པདྨོའི་རྗེས་སུ་བཟུང་སྟེ་རྣམ་མཁྱེན་རྒྱལ་བའི་གོ་འཕང་ལ་མྱུར་དུ་རེག་པའི་སྨོན་འདུན་དང་སྦྲགས། ཤུལ་ལུས་ནང་མི་ཉེ་འབྲེལ་ལྟོས་བཅས་ཡོངས་ལ་ཐུགས་གསོ་ཞུ་རྒྱུ་ཡིན་ཞེས་འཁོད་འདུག
གསར་འགོད་པ། བསྟན་འཛིན་ལམ་བཟང་།
