རྐུན་མ་ནས་ཕྱུག་བདག་ཏུ་གྱུར་པའི་ཨུ་རུ་སུའི་སྒེར་དམག་ཚོགས་པའི་འགོ་པ།

ཟླ་འདིའི་ཚེས་༢༤ ཉིན་ཨུ་རུ་སུའི་སྒེར་དམག་ཚོགས་པས་ཨུ་རུ་སུའི་སྲིད་གཞུང་ལ་གྱེན་ལོག་བྱས་པར་བརྟེན། ཨུ་རུ་སུའི་གཞུང་ལ་དཀའ་ངལ་འཕར་མ་ཞིག་འཕྲད་ཡོད་པ་དང་། རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་ཡང་ཨུ་རུ་སུའི་སྒེར་དམག་ཚོགས་པ་དང་དེའི་འགོ་ཁྲིད་ཀྱི་ཐོག་ལ་ཡང་གནས་ཚུལ་མང་དག་ཅིག་སྤེལ་འདུག

ཟླ་འདིའི་ཚེས་༢༧ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཨུ་རུ་སུའི་སྒེར་དམག་ཝེ་གྷ་ནར་(Wagner) ཞེས་པའི་ཚོགས་པ་དེ་ནི་ཕྱི་ལོ་༢༠༡༤ ལོར་འགོ་བཙུགས་ཡོད་པ་དང་། ལོ་དེར་ཨུ་རུ་སུ་དང་ཡུག་རེན་བར་གདོང་ཐུག་བྱུང་བའི་སྐབས་སུ་ཨུ་རུ་སུའི་ཕྱོགས་གཏོགས་པ་ཚོ་ལ་རྒྱབ་སྐྱོར་བྱེད་མཁན་གྱི་ཚོགས་པ་གཙོ་བོ་དེ་ཆགས་ཡོད་འདུག

 སྐབས་དེར་ཨུ་རུ་སུའི་སྒེར་དམག་ཚོགས་པ་དེ་ལ་ཚོགས་མི་༥༠༠༠ ཙམ་ཡོད་པ་ལས་ཚོགས་མི་མང་ཆེ་བ་ནི་ཨུ་རུ་སུའི་དམག་མི་རྒན་གྲས་དང་ཉམས་མྱོང་ལྡན་པ་དེ་འདྲ་ཡིན་འདུག  ཕྱི་ལོ་༢༠༡༤ ནས་བཟུང་རིམ་པས་ཚོགས་པ་དེའི་ཚོགས་མི་ལོ་རེ་ནས་ཇེ་མང་དུ་སོང་ཡོད་པ་མ་ཟད་ཚོགས་པས་ལས་དོན་མང་ཆེ་བ་གསང་བའི་ཐོག་བྱེད་ཀྱི་ཡོད་འདུག

ལོ་འདིའི་ཕྱི་ཟླ་༡ པའི་ནང་དབྱིན་ཡུལ་གྱི་བདེ་སྲུང་བློན་ཆེན་གྱིས་བརྗོད་གསལ་ལྟར་ན། ཡུག་རེན་གྱི་དམག་འཁྲུག་ཁྲོད་ཨུ་རུ་སུའི་སྒེར་དམག་ཚོགས་པའི་ཚོགས་མི་༥༠༠༠༠ ་ཙམ་མཉམ་ཞུགས་བྱས་ཡོད་འདུག  ཨ་རིའི་བདེ་སྲུང་ལྷན་ཁང་གིས་བརྗོད་གསལ་ལྟར་ན། ཡུག་རེན་གྱི་དམག་འཁྲུག་ཁྲོད་མཉམ་ཞུགས་བྱེད་མཁན་ཨུ་རུ་སུའི་སྒེར་དམག་ཚོགས་པའི་ཚོགས་མི་བརྒྱ་ཆ་༨༠% ནི་བཙོན་ཁང་ནས་ཁྲིད་པའི་བཙོན་པ་ཡིན་འདུག

ཨུ་རུ་སུའི་སྒེར་དམག་ཚོགས་པས་ཕྱི་ལོ་༢༠༡༥ ལོར་སི་རི་ཡའི་ནང་འཁྲུག་དང་རྗེས་སུ་ལི་བྷི་ཡ་(Libya) ་རྒྱལ་ཁབ་ཀྱི་ཟིང་འཁྲུག་ནང་མཉམ་ཞུགས་བྱས་མྱོང་ཡོད་འདུག དེ་བཞིན་དབུས་ཨ་ཧྥི་རི་ཀ་སྤྱི་མཐུན་རྒྱལ་ཁབ་ཀྱིས་སྐད་བཏང་ནས་ཡུལ་དེར་རྡོ་རྗེ་ཕ་ལམ་སྲུང་སྐྱོབ་དང་སུ་ཌན་རྒྱལ་ཁབ་ཀྱི་ནང་གཏེར་ཁ་སྲུང་སྐྱོབ་བཅས་བྱས་མྱོང་ཡོད་འདུག་པ་མ་ཟད། ཨ་ཧྥི་རི་ཀའི་ནུབ་ཕྱོགས་སུ་ཡོད་པའི་མ་ལི་(Mali) ་སྲིད་གཞུང་ལ་རོགས་པ་བྱས་ནས་ཁ་ཆེའི་དམག་ལ་ཁ་གཏད་བཅག ལྷག་པར་དུ་ཕྱི་ལོ་༢༠༡༦ ལོར་ཨ་རིའི་སྲིད་འཛིན་གྱི་འོས་བསྡུའི་ནང་དུ་ཡང་ཐེ་གཏོགས་བྱས་མྱོང་ཡོད་འདུག་པ་སོགས་ཨུ་རུ་སུའི་སྒེར་དམག་ཚོགས་པས་འདས་པའི་ལོ་མང་རིང་ས་ཕྱོགས་མང་པོའི་ནང་དམག་འཁྲུག་དང་ནང་འཁྲུག་ཁྲོད་མཉམ་ཞུགས་བྱས་མྱོང་ཡོད་འདུག

ཨུ་རུ་སུའི་སྒེར་དམག་ཚོགས་པའི་འགོ་པ།

ཨུ་རུ་སུའི་སྒེར་དམག་ཚོགས་པའི་འགོ་པའི་མིང་ལ་ཡེབ་གྷེ་ནི་པ་རི་གྷོ་ཞོན་( Yevgeny Prigozhin) ཟེར་ཞིང་། ཁོང་ནི་ཕྱི་ལོ་༡༩༦༡ ཕྱི་ཟླ་༡ པོའི་(St Petersburg) ་ཞེས་པའི་ཡུལ་དུ་སྐྱེས་འདུག ཁོང་ནི་ཨུ་རུ་སུའི་སྲིད་འཛིན་པུ་ཊིན་གྱི་ལུང་པ་གཅིག་པ་དང་གྲོགས་པོ་ཡིན་པ་མ་ཟད། ཨུ་རུ་སུའི་ནང་མི་སྣ་ཕྱུག་ཤོས་དང་ཤུགས་རྐྱེན་ཆེ་ཤོས་གྲས་ཤིག་ཀྱང་ཆགས་ཡོད་འདུག

རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ལོ་རབས་བརྒྱད་ཅུའི་ནང་ཁོང་གིས་རྐུ་མ་བརྐུས་པ་དང་འཕྲོག་བཅོོམ་བྱས་པར་བརྟེན། ཁོང་ལ་ལོ་ངོ་༡༣ རིང་བཙོན་འཇུག་གི་ཁྲིམས་ཐག་བཅད་ཡོད་འདུག ཁོང་ཉིད་བཙོན་ཁང་ནས་གློད་བཀྲོལ་བཏང་བའི་རྗེས་ཚོང་ལས་ལ་ལམ་ལྷོང་བྱུང་བར་བརྟེན། དུས་ཡུན་ཐུང་ངུ་ཞིག་གི་ནང་ཚོང་པ་ཆེན་པོ་ཞིག་ཆགས་ཡོད་འདུག ལྷག་པར་དུ་ཁོང་གིས་བཙུགས་པའི་(Concord catering) ་ཞེས་པའི་ཟ་ཁང་ཞིག་ཨུ་རུ་སུའི་ནང་སྐད་གྲགས་ཆེན་པོ་ཆགས་པའི་དབང་གིས་ཨུ་རུ་སུའི་དམག་དཔོན་དང་ཆེས་མཐོའི་འགོ་ཁྲིད་མང་དག་ཅིག་ཀྱང་ཁོང་གི་ཟ་ཁང་དུ་འགྲོ་སྲོལ་ཡོད་འདུག

ལྷག་པར་དུ་པུ་ཊིན་ཨུ་རུ་སུའི་སྲིད་འཛིན་ཆགས་རྗེས། སྲིད་འཛིན་པུ་ཊིན་གྱིས་ཨ་རིའི་སྲིད་འཛིན་ཟུར་པ་ཇོ་ཇི་བྷུ་ཤི་(George Bush) དང་དབྱིན་ཇིའི་རྒྱལ་སྲས་ཅལ་སི(Charles) ་སོགས་དང་མཇལ་འཕྲད་བྱེད་པའི་སྐབས། གཞུང་འབྲེལ་གསོལ་ཚིགས་མཁོ་སྤྲོད་བྱེད་མཁན་ནི་ཡེབ་གྷེ་ནི་པ་རི་གྷོ་ཞོན་ཆགས་ཡོད་འདུག པུ་ཊིན་དང་ཁོང་གཉིས་གྲོགས་པོར་གྱུར་ཞིང་འདས་པའི་ལོ་མང་རིང་ཁོང་གཉིས་ཕན་ཚུན་རོགས་རམ་བྱེད་རེས་ཀྱིས་ཕྱོགས་གཉིས་ཀ་ལ་ཕན་ཐོགས་ཆེན་པོ་བྱུང་ཡོད་འདུག

ད་ལྟ་ཡེབ་གྷེ་ནི་པ་རི་གྷོ་ཞོན་གྱིས་འགོ་འཁྲིད་བཞིན་པའི་ཨུ་རུ་སུའི་སྒེར་དམག་ཚོགས་པ་དེ་ནི་ཕྱི་ལོ་༢༠༡༤ ཙམ་ནས་བཙུགས་ཡོད་ཀྱང་། ཕྱི་ལོ་༢༠༢༢ བར་ཡེབ་གྷེ་ནི་པ་རི་གྷོ་ཞོན་གྱིས་ཁོང་ཉིད་སྒེར་དམག་ཚོགས་པ་དེ་དང་འབྲེལ་བ་ཡོད་པ་ཁས་ལེན་བྱས་མེད་པ་རེད་འདུག

ཕྱི་ལོ་༢༠༢༢ ནས་བཟུང་ད་བར་ལོ་ངོ་གཅིག་ལྷག་གི་དམག་འཁྲུག་ཁྲོད་ཨུ་རུ་སུའི་སྒེར་དམག་ཚོགས་པས་བྱས་རྗེས་གང་འཚམ་བཞག་ཡོད་ཀྱང་། དུས་ཡུན་དེ་དག་གི་རིང་ཨུ་རུ་སུའི་སྒེར་དམག་ཚོགས་པའི་འགོ་ཁྲིད་ཡེབ་གྷེ་ནི་པ་རི་གྷོ་ཞོན་དང་ཨུ་རུ་སུའི་བདེ་སྲུང་བློན་ཆེན་ཤོ་གྷོ་( Sergei Shoigu) དང་དམག་མིའི་བཀོད་འདོམས་པ་ཝེ་ལབ་རེ་(Valery Gerasimav) གཉིས་དང་རྩོད་རྙོག་ཐེངས་མང་བྱུང་ཡོད་འདུག ལྷག་པར་དུ་ཟླ་འདིའི་ཚེས་༢༤ ཉིན་ཨུ་རུ་སུའི་སྒེར་དམག་ཚོགས་པས་ཨུ་རུ་སུའི་གཞུང་ལ་གྱེན་ལོག་བྱས་པར་བརྟེན། ཨ་རུ་སུའི་སྲིད་འཛིན་དང་ཨུ་རུ་སུའི་སྲིད་གཞུང་ནི་འཛམ་གླིང་ཁྱོན་ཡོངས་ཀྱིས་དོ་སྣང་ཆེ་ཤོས་བྱེད་ས་ཞིག་ཏུ་གྱུར་ཡོད་འདུག།

གསར་འགོད་པ། བློ་བཟང་རྒྱ་མཚོ།